Avagalatiya 3

Ulufuuwo apangi indagilo

1Nyenye nye Vagalatiya, mwivapuva nachene! Ye nani yeavahavye nyenye? Pakuva ulukani lwa ukutumbikwa kwa Yesu Kilisito, mwalongelilwe pawelu. 2Lino ndisaka mundongele nene lukani lumwi. Mwanuche Umuhe va Nguluvi ukukola ifipigo fya indagilo apangi ukukola ukupulika mulufuuwo? 3Mbi mwivapuva va Kinyandawuli? Nyenye mwavanzile mbesili ukwimila uwutanzi wa Umuhe va Nguluvi, ngali lino mukwenda musinde muludali lwenyu? 4Ngali lino mbesili sila sesavafikite nyenye sikave si kinu? Nda silwihwana! 5Ngali Nguluvi akuvapela Umuhe na ukupiga imiitu ati pakuva mwikwisa imbage na indagilo, ngali apangi pakuva mukapulike Ulukani Ulunofu na ukufuuwa?

6Muhosage seapigite Abulahamu: wewitigila, umwene amufuuvitwe Nguluvi, nave Nguluvi amwidiche ukuva mugolofu. 7Sweno, mulukagulage ukuta avanu avakumufuuwa iwo vevene avana va nachene va Abulahamu. 8Uwandike Uwelu walonzile idaha ukuta Nguluvi avawuyapa avanu avamyanza vave vagolofu ukukola ulufuuwo. Palulo Uwandike Uwelu watasile idaha ukumulaalikila Abulahamu Ulukani Ulunofu, “Ukukola kwa veve avanu mbevali savafunyililwa.” 9Sweno, vala vanyalufuuwo vifunyililwa pamwinga na Abulahamu yeafuuvitwe.

10Neke vala avakwihuvila hela ukukwisa isa indagilo, iwo vali mung'oto. Pakuva lwandikwe, “Yeyeavesaga munu yesakwinatila mbefili ifyandike mukitabu icha Indagilo akotwike.” 11Lino de lulipawelu hela ukuta umunu sahwaniti ukuwuyapwa ukwimila indagilo, pakuva Uwandike Uwelu wilonga, “Yula ye mugolofu ukwimila ulufuuwo anana.” 12Neke indagilo sisikwimilagi ulufuuwo. Pesi Uwandike Uwelu wewitigila, “Yeyeavesaga ikwisa mbesili imbage mu ndagilo anana.” 13Neke Kilisito atukombwe ukuhuma mung'ooto lwa indagilo kwa ukwitegulila ing'ooto ulo ukwimila hwehwe pakuva Uwandike Uwelu witigila, “Umunu yeyeavesaga atumbikwe mumusalaba mukotofu.” 14Ulu lwapigike sambi uwufunyilile wula wapelitwe Abulahamu wuvafikile avamyanza kwa ukukola kwa Kilisito Yesu, sambi kwa ukukola mulufuuwo, twanukile yula Umuhe va Nguluvi ye alatuhuvise.

Indagilo na uluhuviso

15Vanyalukolo, ndivalongela ikiganiso icha uwunu. Asukuli umunu yeakululeka ulukani ulwa ulufingano nambi kongelesa peyevafingine. 16Sweno, Abulahamu apelitwe uluhuviso, umwene pamwi na imbegalo yakwe. Uwandike Uwelu siwitigila, “Na imbegalo sakwe.” Ukutigila wolofu, pesi lino witigila, “Imbegalo yakwe.” Kwekutigila munu yumwi nave ye Kilisito. 17Lwengwenda ndonge lwe ulu Nguluvi aluvisile uluhuviso lwakwe, nu kulukangasa; Indagilo sesasile pambele pegilutye imyaka magana gatayi na machumi gadatu, sisihwana ukudenya uluhuviso ulo nambi ukulupitula. 18Pakuva, wone ililila lya Nguluvi lyakwimila indagilo, siluva kangi muluhuviso lwa Nguluvi. Pesi Nguluvi amupelye ililila Abulahamu ukwimila uluhuviso. 19Mbi lino indagilo seki? Longelesiwe baho sambi lulagile inzanangifu che kiki, mbaka peseasile umwisukulu va Abulahamu, yeapelitwe lula uluhuviso. Indagilo salesilwe na munyivaha va Nguluvi mwiwoko lya umulamusi. 20Neke nachene, umulamusi siayisakwa ave pwali, wone ulukani ulwene lwitigila munu yumwi; na Nguluvi ye yumwi.

Indagilo sisaka kiki

21Ngali tutigile indagilo sikwilema na uluhuviso lwa Nguluvi? Nangi na ludodo hela! Pakuva wone sesuse indagilo sisesihwana ukuvawuyapa avanu vave na uwumi, sweno, twetuwuyapwa vagolofu ukwimila lulo. 22Neke ulwene silwindahihyo Uwandike Uwelu watigee idaha, ukuta konivala mbekuli kwagwilye mu wutema wa inzanangifu, palulo, ukukola ukumufuuwa Yesu Kilisito avanyalufuuwo vipelwa lula uluhuviso.

23Pesitulapelwa ulufuuwo, indagilo yeyituvikite mundinde mbaka pe ulufuuwo lulo lwelwasige lugubulwe. 24Sweno, indagilo iyo ye nda mulolesi vetu mbaka peasile Kilisito, sambi kwa ukukola ulufuuwo tuwuyapwe vagolofu twidikilwe na Nguluvi. 25Lino uluhuma ukufika kwa ulo ulufuuwo, indagilo sipe mulolesi kangi va hwehwe.

26Kwa ukukola ulufuuwo nyenye mbemuli mukave mwivana va Nguluvi mukuhanga na Kilisito Yesu. 27Nyenye mbemuli yemwabatisiwe mukuhanga na Kilisito, na lino mwiva nda mumufwite Kilisito. 28Palulo, pagaya uwululiwungi kwa Umuyudaya na Umugiliki, Umunyawingi na umunu umutemapakwe, umunu umugosi na umunu umung'inetu. Nyenye mbemuli mukave kinu kimwi mukuhanga na Kilisito Yesu. 29Wone nyenye mwivanu va Kilisito, sweno nyenye mwi mbegalo ya Abulahamu, na samwanukila sila sealahuvise Nguluvi.

Currently Selected:

Avagalatiya 3: HeNT2004

Highlight

Copy