Avaefeso 4

Uwulilumwi wa umuvili

1Sweno, nene ye ndimunyandinde pakuva ngumupigila Umutwa, nguvagongola mwikalage imikalile igivaje ulukemelo lwemwakemelilwe. 2Muvelage mbepali muvilevesi, muvalele, muvanya mola, mwikangalilage yinyenye kwa yinyenye mu wende. 3Musugunalage ukuwugosa uwulilumwi uwiletwa nu Muhe kwa ukwinatila uwikalakunoga uwuli mwa nyenye. 4Koguli muvili gumwi nu Muhe yumwi, ndawe uluhuvi lumwi lwemwakemelilwe. 5Koyuli Mutwa yumwi, lufuuwo lumwi nu wubatiso wumwi; 6poyuli Nguluvi yumwi na ye Dada va mbevali, ye ali pachanya ye mbefili, ayipiga ikipigo mwa mbefili na kangi ali mwa mbefili.

7Yeyeavesaga munu mwa hwehwe mupele uwuwuya, mwekigelye ikigelo chapelitwe na Kilisito. 8Ndawe lwandikwe:

“Lweahelelye kuchanya, kuchanya hilo,

ategwe avagalule;

Avagavye avanu ifipelwa.”

9Sweno, peyilongwa: “Ahele kuchanya,” kwekutigila kiki pesi kwekutigila ulwa ukutala asulunwike pasi hilo mung'i? 10Sweno, uyo yeasulunwike pa ing'i ye yuyo yeahele kuchanya hilo sambi afimemye mbefili. 11Kangi yemwene yeavapelye avanu ifipelwa: Avamwi avapelye vave vigendo, avamwi vavisi, avamwi vave vadalisi Ulukani Ulunofu, avamwi vave vanyakukwamila na avigisi. 12Apigite ulo sambi avagelanise avanu mbevali va Nguluvi uwimila ikipigo cha Kilisito sambi umuvili gwa Kilisito gusengwe, 13na palulo mbetuli tuwufikile uwulilumwi wa ulufuuwo na ukumukagula hilo Umwana va Nguluvi; tuve vanu yetukange nu kuwufikila uwukwilanifu wakwe Kilisito yumwene. 14Sweno, sisatuva nda twivana kangi, ye twitosewa na ukupugwa uko na uko ni kifulufumbi chechekivesaga cha inzigiso sevakwivangila avanu avabanga, sambi vavayase avangi muwubanga. 15Wone twinatile inachene munumbula ya uwende tugina ukuvina mwa mbesili ukutegana na Kilisito, umwene ye mutwe; 16pasi pa uwulongola wakwe, ifigawamuvili mbefili fya umuvili pefihangila, nu muvili mbeguli gwisikimala kwa uwutanzi wa ifigawamuvili fyakwe, sweno, ikigawamuvili chechekivesaga kikwisage ikipigo chakwe ulukivaje, umuvili mbeguli gwivina nu kwisenga mu wende.

Imigendele igivipya mwa Kilisito

17Sweno, mwitawa lya Umutwa, nguvakenyela mulikala kangi ndawe avanu vesivamuseli Nguluvi, ve amahosa gawo gapufile, 18nu luhala lwawo luli mulwisa. Vali pataali na uwumi wa Nguluvi, ukwimila uwupuva uwuli mugati umwawo na uwutalamu wa inumbula. 19Vayasile vagaya nyoni, vitanise muukupiga uwaafu; kangi vanya chaka ukupiga chechekivesaga cha uwuhongi nyoni.

20Neke nyenye simwiyigisi ndahihyo mung'ani sa Kilisito. 21Neke lulipawelu ukuta mwapulike wunofu ing'ani sakwe, na pakuva nyenye mukumuninila, mwivigisi inachene weyiwali mwa Kilisito. 22Sweno, Mugilekelage ng'ani imigendele jenyu ija pamwandi, ukutigila uwunu wenyu uwulovela wewanangigwe mu wudobokesi wakwe wa uwulyalya. 23Mwipitulage wupya munumbula na mumahosa genyu. 24Mufwalage uwunu uwupya we wagafilwe muluhwano lwa Nguluvi we wiwonekela mu migendele ija nachene ja uwugolofu na uwelu.

25Sweno, muwulekelage ng'ani uwudesi. Na yeyeavesaga lumuvaje amulongelage umuyagwe isa nachene, pakuva yeyeavesaga mwahwehwe iva kigawamuvili cha umuvili gwa Kilisito. 26Na wone muvipe, mulidikila ililakali lyenyu livambuse mupige inzanangifu, na kangi mulahwa na ililakali ikimunyi mbekili. 27Mulagela mumupele Setani ikilega. 28Yahiisige alagela ahiise kangi, lino avangage ukupiga ikipigo ikinofu kwa amawoko gakwe, peahwane ukuva na ikinu cha ukumutanga umunu yagulwime, 29na ing'ani sa uwaafu silapulisa kangi kwa nyenye; mbepali ing'ani senyu sivelage nofu na isihwanite sivasenge nu kuvatanga avangi, sambi sivapele uwuwuya avipulikisa. 30Mulagela mumuvifye Umuhe Umwelu va Nguluvi pakuva Umuhe uyo chekilagilo cha Nguluvi kwa nyenye, ulwa nyenye mwivanu vakwe, na ye wolelesi ukuta ikimunyi sachusa pe Nguluvi saavakombola nyenye. 31Lino swe mululekelage ng'ani ulwigawo, lwivipilo, lilakali, liyoyo, na amaligo! Muwulekage uwanangifu wewewuvesaga! 32Muvelage na inumbula nofu, na vanyalusungu; umunu yeyeavesaga amudegepelage umuyagwe ndawe nave Nguluvi lwe avadegepye nyenye ukwimila Kilisito.

Currently Selected:

Avaefeso 4: HeNT2004

Highlight

Copy