Ifipigo 1

1Ve mutambule Teofilo, mu kitabu cha pamwandi ndakwandiche ing'ani mbesili sa Yesu seapigite na ukwigisa ukuhuma pamuvango gwa ifipigo fyakwe 2mbaka pa ikimunyi kikila cheabitye kuchanya. Na wesialabita kuchanya avalagilye kwa uludali lwa Umuhe Umwelu vala avanu veala avahagwe vave vigendo vakwe. 3Pakuva kwa ulusika lwa ifilo machumi gatayi ukuhuma ukufwa kwakwe ave peavasila kolofu avigendo na ipo ave peavalagila ulwa umwene pe mumi. Vamuwene, nave avalongelige ulwa Uwutwa wa Nguluvi. 4Na peyevakong'ine mbevali, swe ndawe avalagilige de: “Mulahega ipa pa Yelusalemu, muvela pemusindila ulufingano lula lwa Dada lula lwemwamulike nene nguvalongela ulwa ikipelwa. 5Pakuva Yohane abatisige nu ululenga, neke lino pefilutye filo fikefu, nyenye mubatisiwa nu Umuhe Umwelu.”

Yesu ibita kuchanya

6Napeyevakong'ine pamwi avigendo na Yesu vamuwusise, “Mutwa ulusika ulu peuvapilulila kangi Uwutwa wula Vaisilaeli?” 7Neke Yesu avapitule, “Imisika na ifivagwa ifyo mbefili filimululagilo na muludali lwa Dada, ulo silwanyenye ukulukagula pesalulava. 8Neke samupelwa uludali pe Umuhe Umwelu aviche nyenye, nanye samuva wolelesi vangu mu Yelusalemu na mu Yudaya mbeyili na mu Samaliya na mung'i mbesili.” 9Avelige ilonga iso, mbevali wevakumulava ndawe, anyanyuligwe kuchanya; lifufu limusikage pamiho gawo sivamuweni kangi.

10Na lwevevakali vilava kuchanya umwene peakwibitila, lavage avanu vavili vafwite imyenda myelu, vimite pipi nawo. 11Swe vitigila, “Nyela mwevanu va mu Galilaya! mbi ndawuli mwimite mwilava kuchanya? Yesu uyu yeibita kuchanya ukuhuma kwa nyenye saasa kangi ndahihyo ndawe lwemumuwene ibita kuchanya.”

Yula yeahelye pa Yuda

12Ndawe avigendo vapilukige ku Yelusalemu ukuhuma kukidunda chekitambulwaga miseitumi, ulugendo ulugelaniche wita kilomita yimwi ukuhuma paboma. 13Ndawe wafikige mu boma swe vakwingila kukibupa cha pachanya, apono pevikalige nawo veva: Petulo, Yohane, Yakobo na Andeleya, Filipo na Tomasi, Batolomayo na Matayo, Yakobo umwana va Alufayo, Simioni umuselote na Yuda umwana va Yakobo. 14Iva mbevali vakong'anige kwa mutima gumwinga vakwifunya, pamwi na avang'inetu avangi pamwi na Maliya uyuve va Yesu na avanakwave avakwamisi.

15Na peyefilutye filo fikefu pepogoli umukong'ano gwa vevevafuuvitwe avendige vafike ku ligana na machumi gavili kwa mbevali ndawe Petulo inukige pa avene, 16atige, “Vanyalukolo vangu lwinogela Uwandike Uwelu wukwile, walonzile Umuhe Umwelu ukukola kwa Daudi, ulwa Yuda, yula yeali mulongola vavala vevamwibete Yesu. 17Pakuva Yuda alimuyetu na hwehwe, pakuva alimuhagule ukuhanga na hwehwe mukipigo iki.”

( 18“Mukulukagula ulwa umwene agusile lilungulu, na amagobole geanuche ukuhuma mukipigo chakwe ichanangifu. Agwe pasi neke atudike, na ulutumbu lwakwe luhume mwivala. 19Avanu mbevali vevikalige mu Yelusalemu, vapulike iso, sweno valitambule lilungulu lila mundongele yawo vitigila, ‘Akeli Dama’, kwekutigila, ‘Lilungulu lya Idanda.’) 20Pakuva nzandike mu kitabu icha inzimbo (Sabuli):

‘Lekage ikaye yakwe live lihame;

Lekage nambi munu alikala mumo.’

Kangi nzandike:

‘Lekage umunu uyungi ategule apono pakwe

mukupiga ikipigo.’

21-22“Ino lunoje umunu yungi, ave molelesi pamwi na hwehwe ulwa ulusilibuko lwakwe Umutwa Yesu. Luvaje ave yumwi mwa vala vevagendasige na hwehwe mufilo mbefili, fye Umutwa Yesu pe avelige na hwehwe, ukuhuma ulusika lwe Yohane abatisige, mbaka ikumunyi kila che Yesu anyanyulilwe ukuhuma kwa hwehwe nu kubita kuchanya.”

23Ndawe vatambulige matawa ga vanu vavili, yeatasile Yosefu yevamutambulige Balasaba (apamwi atambuligwe Yusito), na vakavili Matiya. 24Neke ndawe vifunyige vitigila, “Ve Mutwa, veve yeusikagwe inumbula sa avanu mbevali, lino veve Mutwa, utulagilage yenani mwa iva avavili yeumuhagwe, 25sambi ahalile mukipigo nu wigendo uwu, weawulesile Yuda, neke ibitilage apakwe yumwene.” 26Ndawe vatosige isimbi ukuhagula muvanu avavili, isimbi yamudonyite Matiya ndawe ahangige mwa vala avigendo avanyichumi na yumwi.

Currently Selected:

Ifipigo 1: HeNT2004

Highlight

Copy