2 Avatesaloniki 1
1
1Yenene Pawulo, pamwinga na Sila na Timoti tukuvandikila nyenye avanu va mu likanisa lya ku Tesalonike, ve avanu vakwe Nguluvi udadetu na va Umutwa Yesu Kilisito.
2Nguvasukila uwuwuya na uwikalakunoga ukuhuma kwa Nguluvi udadetu na kwa Umutwa Yesu Kilisito.
Ukuhigwa ulusika lwa ukusila Kilisito
3Vanyalukolo, lutuvaje ukumulumba Nguluvi mbepali ukwimila nyenye. Lwinoga hwehwe tupige ndahihyo pakuva ulufuuwo lwenyu lwigina ukongelekela na uwiyendi wenyu nawo wukongelekela hilo. 4Nambi hwehwe tukwitunumikila nyenye mumakanisa ga Nguluvi. Tukwitunumika pakuva mwiva pemufuuwa na ukukangalila Ineseko mbesili semwipigilwa.
5Iso mbesili silagila ukuta uluhigilo lwa Nguluvi lwa wugolofu, na mwasiso pambele muhwana ukuva mu wutwa wakwe we ukwimila wuwo mwiteseka. 6Nguluvi apiga lukani lugolofu; avahombela umukole kwa vala avakuvatesa nyenye, 7na ukuvapela iikiba nyenye ye mwiteseka na hwehwe nahwe. Apiga ulo ulusika lwa ukusila Umutwa ukuhuma kuchanya pamwi na vanyivaha vakwe avavina 8na ifyenge fya umoto, ukuvapumya vala avakumubihila Nguluvi na vala vesivakwinatila Ulukani Ulunofu lwa Umutwa vetu Yesu. 9Ukuhigwa kwawo sakuva ukuyaga kwa mbepali na mbepali na ukuvikwa pataali na indolo yakwe ingomi, 10pesaakusa Ikimunyi kila ukwanukila indolo uluhuma kuvanu vakwe, ni choga uluhuma kwa mbevali vevakumufuuwa. Nyenye nanye samuva pamwi na vawo, pakuva mulufuuvitwe ulukani lula lwe twavaletye.
11Nambi kwa lulo tukuvasukila mbepali. Tukumusuka Nguluvi vetu avatange munogele imikalile je mwakemelilwe mugendele. Tukumusuka, ukukola uludali lwakwe, akwise uwudobofu wenyu uwa ukupiga inofu na ukukwisa ikipigo chenyu icha ulufuuwo. 12Na mwalulo, litawa lya Umutwa vetu Yesu ipelwa indolo ukuhuma ukwenyu, nanye mupelwa indolo ukuhuma kulumwene uwuwuya wa Nguluvi vetu na wa Umutwa Yesu Kilisito.
Currently Selected:
2 Avatesaloniki 1: HeNT2004
Highlight
Share
Copy
Want to have your highlights saved across all your devices? Sign up or sign in
Kihehe New Testament © Bible Society of Tanzania, 2004.