2 Avakolindo 13
13
Ulukenyelo ulwidugilisa na inyungila
1Lino ulu lwe lwa wudatu nene ukusa ukwenyu, “Inalamu mbesili sipulikiswage pa awolelesi vavili apangi vadatu.” Uwandike Uwelu ndawe witigila. 2Ngavakenye vala mbevali vevakapigite uwanangifu pavanu mbevali, kangi nguvakenye wendili pataali, ndawe ndapigite pende ndivagendye ulwa kavili ukuta wone nzuse ndivapunanga. 3Ipo pepene pemwilavila yinyenye ukuta Kilisito ilongela mwa nene. Yula ye kwa nyenye Kilisito si muhomefu, neke pesi ukuta uludali lwakwe lwipiga mwa nyenye. 4Nambi luve umwene atumbikwe mumusalaba muwuhomefu, neke lino lwe iva mumi muludali lwa Nguluvi. Nayi hwehwe twivahomefu ndahihyo mukuhanga nave, neke nahwehwe twihanga nave muwumi muludali lwa Nguluvi ukwimila nyenye.
5Ongo lino mwigelage we yinyenye sambi mulukagule ukuta wone nachene mukwinatila ulufuuwo. Mwigosage we yinyenye. Mbi, simukulukagula ulwa Kilisito Yesu ali mugati mwa nyenye? Nachene wone mulemilwe ukwigela. 6Neke ndihuvye ukuta nyenye mukulukagula ukutigila hwehwe silulava lutulema. 7Tukwifunya kwa Nguluvi mulemwe ukupiga uwanangifu wewewuvesaga, neke ulwene si kwekutigila, tukagulanike nda vanu avakulwe pesi ukuta muhwane ukupiga inofu nambi hwehwe tuwoneka ukuta tulemilwe. 8Pakuva situhwaniti ukupiga ikinu ikisutana na inachene, pakuva uwutalemwa wetwinawo we wula uwukwimila isa nachene siginage. 9Neke ulwene twihekelela ukuta twivahomefu, neke nyenye mwina ludali, nambi tukuvasukila nyenye muwufikile uwukwilanifu. 10Sweno, nambi ngwandika ibalula iyi wendilipataali, sambi pefikite ukwenyu ndemwe ukuva mukali ukukola ululagilo lwe amelyee Umutwa, ena, ululagilo lwa ukuvasikimika na silula lwa ukuvagwisa. 11Pendisindilisa, vanyalukolo vangu nguvatigila twiwonaga! mukwilanikilage, mwinatilage hilo uwigisi wangu, mwilaganila kumwi, mwikalilage mu wikalakunoga. Na Nguluvi umunya uwende na uwikalakunoga ava pamwi na nyenye.
12Kamwene mbemuli, mwinonelage kwa uwende. 13Avanu va Nguluvi kono vakuvatigila kamwene mbemuli.
14Uwuwuya wa Umutwa vetu Yesu Kilisito na uwende wa Nguluvi na uwulilumwi wa Umuhe Umwelu, wuvelage nanyenye mbemuli.
Currently Selected:
2 Avakolindo 13: HeNT2004
Highlight
Share
Copy
Want to have your highlights saved across all your devices? Sign up or sign in
Kihehe New Testament © Bible Society of Tanzania, 2004.
