Maliko 7

Nkumbizi kwa mbuli ya kuhaka.

1-23.

1Mafaliseyo na watabaluwangwa kuṅwe walawilewo Yelusalemu wazaunganana kwakwe. 2Wakiona wahina wakwe kuṅwe, wakija nkande na mikono ishihoziγweyo, ni kuγamba ishihakiγweyo, wazawashunda. 3Hambu Mafaliseyo na Wayuda woshe nkawaja, waishihakile mikono na kuichukula, ni kwa kuti watoza vitigo vya wakale. 4Hata vyelawa γwilo nkawavija, shuti wavimyaγe mazi; kangi kuna vitigo vingi vituhu wainkiγwevyo, wavitoze, ati ni kuhaka vinywelo mazi na maiγa na nyungu na sazi. 5Lushe waja Mafaliseyo na watabaluwangwa wazamwuza: Nini wahina wako wakisheanga na vitigo vya wakale? 6Nini wakija nkande na mikono ishihoziγweyo? Azawati: Yesaya azateγanya vitana mbuli za inywi mwehemba, akigonda: Mbali inu yanigimbika na milomo yawe, miya myoyo yawe i hale na imi. 7Wanivika bule, hambu mbuli, wazofuza wantu, ni milaγilizo ya kimuntu. 8Milomo ya Mulungu mzaiasha, mtoze vitigo vya wantu. 9Vituhu azawati: Kweli mzazifya mkiusha milaγilizo ya Mulungu, kangwe mdahetongela vitigo vyenyu! 10Hambu Mose azalonga: Gimbika isho na nyokwe! Hatuhu aγamba: Ndiye amlonge ishe ao nine vibada akatakoṅwa! 11Miya inywi mwaγamba: Ati muntu amγamba ishe ao nine: Uchokunda china ṅwiko, ni kuγamba: Chiya, ukundilecho kufilwa mbazi ni miyo, chizahita na Mulungu, azifya. 12Kangi ivyoho mwamfingiza kumupikila ishe ao nine. 13Ne kubusha mbulingwa ya Mulungu kwa mbuli ya vitigo vyenyu, mutuzilevyo wenye. Kangi mwaγoshola vingi muno vyefanana na ivi.

Vye kisitama ni vihi?

14Azaitanga wantu vituhu na kwakwe, azawati: Niteγelezai nyosheni, mwive! 15Nkakuna mbuli ya muntu ye se yedaha kumgela kisitama ikimwingila; vyemgela muntu kisitama ni viya vyelawa mwe moyo wa mimtu. 16Ati kuna mwena mashikilo yeiva neaive! 17Akiuka kwa waja wantu, akiingila mwe nyumba, wahina wakwe wazamwuza mbuli ya luja lushimo. 18Azawati: Kumbe hata inywi nkamwiva vivyoho? Nkamtaila kuti: Vyoshe vye se vikimwingila muntu nkavidaha kumgela kisitama? 19Hambu nkaviingila mwe moyo wakwe, viingila mwe ifu, vituhu vilawa na sila yawe; ne mbuli ya nkande zoshe ivyoγenda. 20Vikibinda azawati: Vyelawa mwe moyo wa muntu ne vyemgela muntu kisitama. 21Hambu uko ndai mwe myoyo ya wantu kulawa ntongonyezi mbada, 22utesi, kilanga, kukoma, ubavi, mumelo, ubada, leba, kujilisha na kunywelesha, luzisho lubada, lukanko, utili, uhambanyi. 23Ivi vibada vyoshe vilawa uko ndai, vyamgela muntu kisitaiṅa.

Mvyele ywa Kikanaani

24-30.

24Akiinuka kuja azahita mwe shi ya Tilo na ya Sidoni. Azaingila na nyumbai, nkakundile, muntu akimtaila, miya nkadahile kukifisha. Haho hazaiva mvyele mbuli yakwe. 25Yuja mvyele yohena ṅwanae ywa kindele ana mpepo ye usaba. 26Azaiza, azamkinila he milundi. Yuja mvyele ni Mgiliki, mbali yakwe ni Msilofonike; azamhembeleza, aingate ija mpepo, ilawe mwe ṅwanae. 27Miya Yesu azamuti: Leka, wana waneiγuta! Hambu nkavitama, muntu akiγuwa nkande za wana, akizitambikiia vikuli. 28Yuja azaitikila angwe: Ni vivyo, Zumbe. Kangi vikuli viyaja mpuγutishi za wana mzunguwi he meza. 29Angwe ndiye: Kwa inu mbuli hita! Mpepo izabinda kulawa mwe ṅwanawo. 30Azahita na nyumbai mwakwe azamubulila ṅwanae, aiikale mwe lusazi, miya ija mpepo iiukile.

Yesu amhonya bubu.

31Vituhu azakulawa kuja kwe shi ya Tilo, azadwisha Sidoni, azahita kwe bahali ya Galileya gatigati mwe ija shi yena mizi kumi. 32Wazamletela muntu ashiivaye, kangi ni bubu, wazamhembeleza, amubadikile mikono. 33Azamwusha haja he wantu na hantu he ike, azagela vyala vyakwe mwe mashikilo yakwe, azashwa mate, azadowa lulimi lwakwe. 34Azaolela na kwe lwingu azahesa moyo, azamuti: Efata!, ni kuγamba: Zuγuka! 35Ne mashikilo yakwe yahozuγuka, hata luge lwa lulimi lwakwe luzashunguka. 36Azawalaγiliza, washevimγambile muntu. Miya akikawalaγiliza ivyoho, waakaisiiza kuvibilikila. 37Kangi wazaisiiza kushentukisha, wazaγamba: Vyoshe azavizifya, washiivawo aleka, waive, washilongawo aleka, walonge.

Currently Selected:

Maliko 7: KISHNT05

Highlight

Copy