Maliko 15

Yesu aiγalwa kwa Pilato.

1-19.

1Kukicha makelokelo wavikizi wakulu wazalonga masa yakwe na waγolokezi na watabaluwangwa na wafuṅwa woshe; wazamshunga Yesu, wazamwiγala, wazamwinkila kwa Pilato. 2Pilato azamwuza: Iwe u zumbe ywa Wayuda? Azamwitikila angwe: Uzalonga. 3Wavikizi wakulu wazamfyalima mbuli nyingi. 4Pilato azamwuza vituhu: Nkulandula mbuli? Olela viya vyoshe, wavyokushinga! 5Miya Yesu nkalandule hata mbuli ṅwenga du, ne Pilato ahomaka. 6Miya uja mviko mkulu uhokakinta, akawashungwila mimtu muṅwe ashungiγweye, ndiye wantu wakunde. 7Kuna muntu mweitangwa Balaba, ashungiγweye haṅwe na weyae wagwishizewo kiva, kangi ne wakomilewo wangi mwe chiya kiva. 8Wantu wazakwela, wazamhembeleza, aγoshole, sa avyokazwela. 9Pilato azawaitikila angwe: Mukunda, nimishungwile zumbe ywa Wayuda? 10Hambu aitaile, kuti wavikizi wakulu wamwinkile kwa wizu. 11Miya wavikizi wakulu wazatunya wantu, kangwe wakunde, wamshungwile Balaba. 12Miya Pilato azawalandula akiwati: Uyu, muyelonga kuti: Ni zumbe ywa Wayuda, nimγoshwele mbwai? 13Waja wazalandula na kukema: Mkontele mwe muti! 14Pilato azawati: Abanilei? Miya waja wazaisiiza kukema: Mkontele mwe muti! 15Pilato azakunda kuγoshola vyetamila wantu, ne ahowashungwila Balaba, miya Yesu azamwinkila, atowiγwe vibonko, vikibinda akontelwe mwe muti. 16Washilikali wazamwiγala, wazamwingiza na muja mwe kitala cha masa, wazaitanga weyae wawe woshe.

Yesu abadikilwa bundu ja miwa.

17Wazamzwika guni ja kizumbe, wazaluka bundu ja miwa, wazajimubadika. 18Wazaandiila kumluγusha angwe: Mpongezi, zumbe ywa Wayuda! 19Wazamtowa na ngoda mwe mutwi, wazamshwela mate, wazamgintila mazwi, wazamvika.

Yesu akontelwa mwe muti.

20-41.

20Wakibinda kumfyulila, wazamwusha jiya guni ja kizumbe, wazamzwika shuke zakwe; wazamwiγala, wamkontele mwe muti. 21Kuna mγoshi mwezinka haja mwelawa nkoi, ndiye Simoni ywa Kilene, ni ishe ja Alekisando na Lufo; uyu wazamkundila, amwinulile muti wakwe. 22Wazamwiγala hantu heitangwa Gologota, ni kuγamba: Hemazutwi. 23Wazamnywesha mvinyo unyeγeziγwewo ni mafutilo ya muti wenyeγelesha, miya azaulemela. 24Wakibinda kumkontela mwe muti wazapangilana shuke zakwe na kuzitowela lusolo, kila muntu ndizo aγuwe. 25Aho wakimkontela mwe muti, ni saa ntatu. 26Kangi mbuli ya masa yakwe izagondwa kuγamba: Zumbengwaywa Wayuda. 27Wazaamba wampoko waili mwe miti haṅwe naye, muṅwe kulume, muṅwe kumosho kwakwe. 28Ne uja ugondengwa ubontokevyo wa kuγamba: Azatalwa mwe wahambanyi. 29Wezinka haja wazamkanka na kumzunguziza mitwi angwe: Kumbe wachakula vikilongwa na kujizenga mishi mitatu! 30Kihonye ṅwenye, usheele mwe unu muti! 31Vivyoho hata wavikizi wakulu wazamvuluγila wakilonga wenye na wenye haṅwe na watabaluwangwa angwe: Watuhu azawahonya, ṅwenye nkadaha kukihonya! 32Kilisito, zumbe ywa Isilayeli, neasheele ivi lushe mwe unu muti, tione, tidahemtozesha! Hata weyae wakontelwewo naye mwe miti wazamubela vivyoho. 33Saa mtandatu ikibula, kuzagwa lwiza mwe shi ngima mpaka saa kenda. 34Saa kenda Yesu azakema na kanwa kikulu angwe: Eli! Eli! Lama azabutani? Ni kuγamba: Mulungu ywangu! Mulungu ywangu! Nini ukiniasha? 35Kuṅwe waγolokewo haja wakiviiva wazaγamba: Shivyo, amwitanga Eliya. 36Kuzaγuluka muntu azaγuwa fuli, azajigela mazi yenyeγela, azajitunga mwe lasi, azamnywesha najo angwe: Lekai, tiolele, ati Eliya aiza kwa msheleza.

Yesu afa.

37Yesu azakema na kanwa kikulu, azadwika moyo. 38Jiya shuke kulu muno ja zuγaila haṅazi ṅwenye muja vikiloi jizatatuka gati, kuandiila ulanga mpaka shi. 39Mkulu ywa washilikali aγolokeye sheja akiona, adwikilevyo moyo, azalonga: 40Kweli uyu muntu ne ai ṅwana Mulungu. Kuna wavyele waγolokewo hale wakiolela, wakina Maliya Magadalene, na Maliya, nine ja Yakobo mdodo na ja Yose, na Salome. 41Ni waja ndiwo wakimtongela na kumγoshwela ndima, akianga mwe shi ya Galileya. Wana weyae wawe wangi wakwezilewo naye Yelusalemu.

Yesu azikwa.

42-47.

42Aho kukishwa, kwa kuti ni mushi wa kukiteγa kwe mviko wa Pasa, ni kuγamba: Ni mushi welongwela uja mushi wa sabato ṅwenye, 43kuzaiza Yosefu ywa Alimatiya, ni mfuṅwa mwena kilango kitana, kangi yohe ni muntu mweafiza uzumbe wa Mulungu; azatoza moyo, azaingila kwa Pilato, 44azamlomheza kimba cha Yesu Pilato azamaka, kuti Yesu azafikafa, azamwitanga mkulu ywa washilikali, azamwuza, ati azabinda kufa. 45Akiviγambilwa ni yuja mγolokezi ywa washilikali, azamunka Yosefu kimba chakwe. 46Azaγula shuke yenala, azamsheleza mwe muti, azamkanta na ija shuke yeṅala, azamwika mwe mbila ibongiγwevo mwe kungu, azashindika iwe na kuja kwe kifiγwe cha mbila. 47Maliya Magadalene, na Maliya, nine ja Yose, wazaona, aikiγweho.

Currently Selected:

Maliko 15: KISHNT05

Highlight

Copy