Maliko 12

Lushimo lwa waluγojo wabada wa mizabibu.

1-12.

1Azaandiila kulonga nawo kilushimo angwe: Muntu azahanda mizabihu, azaidenganyiza na hibili, azafuka shimo ja minyiza mazabibu, azazenga dungu, azaiinkila kwa walimi, vikibinda azahita mwe shi ntuhu. 2Mishi ikitimiza, azatuma muhwanga kwa waja walimi, kangwe ainkwe mazabibu ni waja walimi. 3Miya waja wazamgwila, wazamuluta, wazamγotosha mikono du. 4Azatuma vituhu muhwanga mtuhu na kuja kwawe, wazamtowa mutwi na mawe, na kumweza. 5Azatuma mtuhu, yohena wazamkoma; vivyoho wangi watuhu kuṅwe wazawaluta, kuṅwe wazawakoma. 6Ne aina ṅwanae muṅwe, ayemkundisha; kushilikiza azamtuma na kwawe angwe: Uyu ṅwanangu newaingilwe ni shoni naye. 7Miya waja walimi wazafanyanya mwe myoyo yawe kuγamba: Uyu ni mupazi; ndokoi, timkome! 8Lushe ufa utaγaluka wetu. Ne wahomgwila, wakimkoma wazamwasha nkandai ya mizabibu uko se. 9Lushe yuja ṅwenye mizahibu atatenda zeze? Atahita, akome waja walimi, ainkile ija mizabibu kwa watuhu. 10Nkamfyomile uja ugondengwa wa kuγamba: Iwe, wazengo wabentilejo, jizaγaluka shikizi ja heta. 11Ivi vizaanduka kwa Zumbe; tikiviolela, ni kimaka. 12Wazalonda, ndivyo wamgwile, miya wazaogoha wantu, hambu wazataila, kuti luja lushimo alulongile kwa mbuli yawe, miya wazamleka, wazahita.

Kodi ya Kaiza.

13-17.

13Wazatuma kwakwe Mafaliseyo na wantu kuṅwe wa Helode, wamgwize na mbuli, ndiyo alonge. 14Wazahita, wazamuti: Mfuzi, tataila kuti: Iwe u mkweli, kangi nkushindauza muntu, hambu nkuolela vyeni vya wantu, miya ufuza sila ya Mulungu, ilivyo kweli. Vina ṅwiko kumunka Kaiza kodi, hambu nkavina? Tiinkile? Hambu tisheinkile? 15Miya azataila kuhemba kwawe, azawati: Nini mkiniγeza? Ninkai sumni, niolele! 16Wazaleta. Azawati: Ichi chapa ni cha ndai? Kangi ugonde ni wa ndai? Angwe ndiwo: Ni wa Kaiza. 17Ne Yesu ahowati: Munkei Kaiza viya vya Kaiza! Kangi Mulungu mumunke viya vya Mulungu! Wazamumakisha.

Wefufuka walivyo.

18-27.

18Vikibinda Masadukeyo wazamwizila, ni waja weγamba: 19Ufufuki nkahana, wazamwuza angwe: Mfuzi, Mose azatigondela kuγamba: Mkuluwe ja muntu akifa, akiasha mvyele, akisheasha ṅwana, shuti nduγuye amupale yuja muke, amwinulile mkuluwe mbeleko. 20Ne kwina wanduγu mfungate; yuja ywa bosi azaγuwa mvyele, azafa, nkaashize ṅwana. 21Yuja ywa mbili azamupala, yohe azafa nkaashize ṅwana. Yuja ywa ntatu ni vivyoho. 22Waja woshe mfungate wazamγuwa, miya nkawaashize mbeleko. Kushilikiza yuja mvyele yohena azafa. 23Mwe ufufuki wakizafufuka, yuja mvyele neaγaluke ywa ndai? Hambu woshe mfungate ne waina naye. 24Yesu azawati: Mkiaγilwa so kwa mbuli ya kuti nkamtaila baluwangwa? Hata nguvu ya Mulungu nkamwitaila? 25Hambu aho ndiho nezewafufukile kwa wafilewo, nkawaγuwa, nkawaγwiγwa, miya wataikala mwe lwingu, viya ni walau. 26Miya kwa kuti: Wafilewo wafufuka, nkamfyomile mwe kitabu cha Mose, Mulungu alongilevyo naye mwe jiya shafi akimuti: Imi ni Mulungu ywa Abulahamu na Mulungu ywa Isaka na Mulungu ywa Yakobo? 27Kangi Mulungu so ywa wafilewo, ni ywa we moyo. Kuaγilwa kwenyu ni kukulu.

Mulomo wekula kuzinka ni uhi?

28-34.

28Azaizilwa ni mtabaluwangwa aivileye, wavyouzanya naye, azataila, kuti azawalandula vitana, azamwuza: Mulomo mkulu kuzinka yoshe ni uhi? 29Yesu azamwitikila angwe: Mulomo mkulu shunu: Iva, Isilayeli! Zumbe, Mulungu ywetu, ni Zumbe ike du. Umkundishe Zumbe, 30Mulungu ywako, kwa moyo wako woshe na kwa mpeho zako zoshe na kwa ntongonyezi zako zoshe na kwa nguvu zako zoshe! 31Wa mbili shunu: Umkundishe ṅwiyawo, sa uvyokikundisha ṅwenye! 32Nkakuna mulomo mtuhu wekula kuzinka inu. Yuja mtabaluwangwa azamuti: Ni vitana, mfuzi, uzalonga vye kweli, kuti: Mulungu ni muṅwe, nkakuna mtuhu kushima yuja. 33Kangi kuja kumkundisha kwa moyo woshe na kwa ntongonyezi zoshe na kwa nguvu zoshe na kuja kumkundisha ṅweshu, sa tivyokikundisha wenye, ni kukulu kuzinka ṅombe za mviko na ntogolo zoshe. 34Yesu akiona, kuti azaitikila na viyuγo, azamuti: Nku hale na uzumbe wa Mulungu. Nkakuna lushe atozizeye moyo wa kumwuza mbuli.

Yesu ni ṅwana Dawidi zeze?

35-37.

35Vikibinda Yesu azaγuwa mbuli, azalonga akifuza vikiloi angwe: Watabaluwangwa walonga zeze kuti: Kilisito ni ṅwana Dawidi? 36Dawidi ṅwenye azalonga kwa viva, avyona Mpeho mṅazi, angwe: Zumbe azamlonga Zumbe ywangu: Ikala kulume kwangu, mpaka ndiho nezeniike wankulu wako shi he milundi yako! 37Dawidi ṅwenye amwitanga Zumbe, lushe ni ṅwanae vivihi?

Watabaluwangwa.

38-40.

38Wantu wangi muno wazatamilwa ni kumteγeleza. Akiwafuza azawati: Kiγojei kwa mbuli ya watabaluwangwa! Watamilwa ni kuanga waizwikile shuke za kizumbe, watamilwa ni kuluγushiγwa lwazoi. 39Mwe mavikilo waikala mwe viti vya wazumbe, hata wakilalikwa kwe nkande waikala ha wafuṅwa. 40Waaja nyumba za wavyelengwa wafilwewo ni waγoshi, kangi wakionyaonya, viya wataisiiza kuwahembelezeza. Awa watazalahwa masa yezinka ya weyae wawe.

Ntogolo ya mvyele mkiwa.

41-44.

41Azahita kwa ikala he chiya kisanduku cha ntogolo, azaolela wantu, wavyogela mali na mumo. Wazuli wangi wazagela nyingi. 42Kuzaiza mvyele mkiwa afilweye ni mγoshi ywakwe, azagela visenti vili vyeγelemuka hela ṅwenga. 43Azaitanga wahina wakwe, azawati: Kweli namiti: Uyu mvyelengwa mkiwa azagela hakulu kuzinka waja woshe wagezilewo mwe ichi kisanduku cha ntogolo. 44Hambu woshe wazausha senti kuṅwe mwe mali yawe nyingi, wazazigela, miya uyu ṅwenye ni mkiwa vikulu, kangi vyoshe, avyona navyo, azavigela, ni nkande zakwe zoshe.

Currently Selected:

Maliko 12: KISHNT05

Highlight

Copy