撒迦利亞書 3

大祭司个異象

1在另外一個異象中，上主俾𠊎看到大祭司約書亞企在上主个天使面前，撒但 #3:1 「撒但」：希伯來文个意思係「對敵者」，指反對抑係對敵人類个一種超自然个存在。企在約書亞个右片，準備愛告約書亞。 2上主个天使 #3:2 「上主个天使」係根據一古譯本，希伯來文係「上主」。㧯撒但講：「撒但，上主愛責備你！就係揀選耶路撒冷个上主愛責備你！這個人敢毋係像對火中抽出來个一支柴嗎？」

3 約書亞著等屙糟个衫褲企在天使面前。 4天使吩咐企在佢面前个部下講：「將這個人个屙糟衫褲脫掉。」又對約書亞講：「𠊎已經除掉你个罪，愛俾你著高貴个衫褲。」

5𠊎出聲講：「愛將淨浰个帽仔戴在佢个頭那頂。」部下就將淨浰个帽仔戴在約書亞个頭那頂，㧯佢著高貴个衫褲；該時，上主个天使企在堘頭。

6上主个天使警告約書亞講： 7「上主 — 萬軍个元帥恁樣講：若係你遵守𠊎个法律，實行𠊎派你个任務，你就可以繼續管理𠊎个聖殿㧯庭院。𠊎也會給你權利出入𠊎个面前，像這兜企在𠊎面前个天使共樣。 8大祭司約書亞啊，你愛聽！你个同伴，就係該兜成做好兆頭个祭司，也愛聽！𠊎愛啟示𠊎个僕人，就係被人喊做『樹枝』个 #3:8 「被人喊做『樹枝』个」指彌賽亞、大衛王个後代，參考 6:12-13；以賽亞書 11:1；耶利米書 23:5；33:15。。 9𠊎愛在約書亞面前放一垤寶石，這寶石有七面 #3:9 「七面」希伯來文直譯係「七隻目珠」，參考 4:2，10。。𠊎 — 上主、萬軍个元帥愛親自在這寶石面頂刻字 #3:9 「刻字」：有學者認為係刻等「歸上主為聖」，參考出埃及記 28:36-38。。𠊎也愛在一日內除掉這地方个罪惡。 10到該日，你等逐儕愛請鄰舍來，到葡萄樹㧯無花果樹下背坐聊。這係上主 — 萬軍个元帥講个。」

Currently Selected:

撒迦利亞書 3: THV12Hdb

Highlight

Copy