撒迦利亞書 11
11
暴君个結局
1 黎巴嫩啊，打開你个門，
俾火燒淨你个香柏樹！
2松樹啊，大噭噢！
因為香柏樹已經橫下來；
該兜高大个樹仔毀掉了。
巴珊个橡樹啊，大噭噢！
因為又拶又靚个樹林已經斬掉了。
3你等聽該兜牧者噭个聲，
因為佢等茂盛个草場毀壞了！
也愛聽該兜少壯獅仔噭个聲，
因為約旦河邊个樹林荒廢了！
兩個牧者
4上主 — 𠊎个上帝恁樣講：「你去牧養該群將愛㓾个羊。 5買羊个㓾牠兜，認為自家無罪；賣羊个講：『讚美上主，𠊎等好額了！』連牠兜个牧者也無可憐牠兜。」
6上主講：「𠊎無愛再憐憫住這地方个人了；𠊎愛將這兜人交給佢等个鄰舍㧯佢等个王手中。佢等愛糟滅這地方；𠊎也無愛救這兜人脫離佢等个手。」
7恁樣，𠊎就為到該兜買賣羊群个人牧養這群將愛㓾个羊。𠊎拿等兩支牧杖，一支安到「恩惠」，一支安到「合一」，就開始照顧羊群。 8在一個月內，𠊎除掉三個牧者，因為𠊎个心無法度忍佢等，佢等也當惱𠊎。 9𠊎對羊群 #11:9 「對羊群」抑係譯做「對該兜買賣羊群个人」。希伯來文無這幾隻字。講：「𠊎無愛再做你等个牧者了。愛死个，由在牠死；愛滅亡个，做牠去滅亡；賸个，由在牠兜互相吞食。」 10然後𠊎將安到「恩惠」个杖拗斷，表明𠊎廢掉㧯萬國所立个約。 11當日，該約就廢掉了。該兜買賣羊群个人注意看𠊎，佢等就知係上主通過𠊎來傳話。 12𠊎對佢等講：「若係你等看做好，就給𠊎工錢，毋好就算了！」佢等就給𠊎三十個銀仔，做𠊎恁少个工錢。
13上主對𠊎講：「將這兜錢放入聖殿个銀庫 #11:13 「放入聖殿个銀庫」係根據一古譯本，希伯來文係「交給燒缶師傅」。。」𠊎就將這三十個銀仔，就係佢等認為𠊎應得恁好个工價，放入聖殿个銀庫。 14然後𠊎將第二支安到「合一」个杖拗斷，表明切斷猶大㧯以色列之間个兄弟情。
15上主對𠊎講：「你再拿壞牧者所用个用器。 16𠊎愛在這地興起一個牧者，喊佢掌𠊎个羊群；總係佢毋幫助該兜滅亡个，毋去尋毋見掉个，毋醫治受傷个，也毋餵該兜強壯个；佢反轉食掉最肥个羊，還擘掉牠兜个蹄。
17該豁掉羊群、無路用个牧者慘了！
戰爭愛徹底消滅佢个勢力。
佢个手定著會完全枯燥；
佢右片个目珠會全部看毋到。」
Currently Selected:
撒迦利亞書 11: THV12Hdb
Highlight
Share
Copy
Want to have your highlights saved across all your devices? Sign up or sign in
© The Bible Society in Taiwan, 2012
All rights reserved
© 台灣聖經公會版權所有 2012
