馬太 18

麼人最偉大

(馬可 9:33-37；路加 9:46-48)

1該時，學生來問耶穌講：「在天國底背麼人最偉大？」

2耶穌喊一個細人仔來，俾佢企在佢等个中間， 3講：「𠊎實在㧯你等講，除了你等變到像細人仔恁樣，你等絕對無可能成做天國个子民。 4像這個細人仔恁謙卑个，在天國底背就係最偉大个。 5為到𠊎个名接待一個像這細人仔个，就係接待𠊎。

愛棄絕罪个誘惑

(馬可 9:42-48；路加 17:1-2)

6「無論麼人害信徒中任何一個微細个人離開𠊎，佢最好被人用大磨石紽等頸筋，㧒落深海浸死。 7這世間慘了，因為有害人離開𠊎个事！發生恁樣个事係難免个，總係使這個事發生个人慘了！

8「若係你个一支手抑係一支腳害你犯罪，將它斬下來，㧒掉它。少一支手抑係一支腳來得到永遠个生命，較贏雙手雙腳好好卻㧒落永遠不滅个烈火中。 9若係你个一隻目珠害你犯罪，將它挖出來，㧒掉它。少一隻目珠來得到永遠个生命，較贏雙目好好卻㧒落地獄个火底背。

迷路个羊

(路加 15:3-7)

10「你等愛細膩，毋好看輕任何一個微細个人。𠊎㧯你等講，在天頂，佢等个天使常常企在𠊎天頂个阿爸面前。#18:10 有兜古卷加 11 節：「因為人子來个目的係愛拯救迷失个人。」

12「你等想看仔，若係一個人有一百隻羊，其中一隻行迷路，佢敢毋會將九十九隻放在山排頂，去尋該隻迷路个羊嗎？ 13𠊎實在㧯你等講，佢若係尋到該隻迷路个羊一定非常歡喜，比九十九隻無迷路个羊歡喜還較大！ 14共樣，你等 #18:14 「你等」另外有兜古卷係「𠊎」。在天頂个阿爸也無愛任何一個微細个人喪失掉。

對待做毋著个兄弟姊妹

15「若係你个兄弟抑係姊妹得罪你 #18:15 「得罪你」另外有兜古卷係「犯罪」。，你就去見佢，指出佢个毋著；總係愛在單淨佢一儕同你共下个時正好恁樣做。若係佢聽你个勸話，你就係重新得到你个兄弟抑係姊妹。 16若係佢毋聽，你就另外請一兩儕共下去；恁樣，每一句責備个話就有兩三儕好做證。 17若係佢還係毋聽，就將這件事个頭尾報告教會。教會佢也毋聽，你就看佢做外邦人抑係稅棍。

禁止㧯批准

18「𠊎實在㧯你等講，你等在地上所禁止个，在天頂也愛禁止；你等在地上所批准个，在天頂也愛批准。

19「𠊎再㧯你等講，你等在地上，若係有兩個人同心合意祈禱，無論求麼介，𠊎在天頂个阿爸的確會成全你等。 20因為，無論在㖠位，有兩三儕奉𠊎个名來聚集，𠊎就在佢等中間。」

毋饒人个壞僕人

21該時，彼得來問耶穌講：「主啊，𠊎个兄弟抑係姊妹得罪𠊎，𠊎愛饒佢幾多擺？七擺罅麼？」

22耶穌應講：「毋係七擺。𠊎㧯你講，係七十個七擺 #18:22 「七十個七擺」抑係譯做「七十七擺」。。 23因為天國可比這個故事：有一個王愛㧯佢个僕人算數。 24佢開始算數个時節，有人將一個欠佢幾下千萬銀仔个僕人帶到佢面前來。 25因為這個人無錢好還，主人就下令將佢㧯佢个𡜵娘子女全部賣給人做奴才，連佢所有个一切也攏總賣掉來還債。 26該僕人在王面前跪下來，求講：『寬容𠊎一擺哪！𠊎定著會將一切債務還清。』 27該僕人个主人就可憐佢，放佢走，又免掉佢个債。

28「該僕人出來後，堵到一個同佢共下做事个伴。這同伴欠佢幾個銀仔，佢就揪等佢，揢佢个喉嗹，講：『欠𠊎个錢還𠊎！』 29佢个同伴跪下來，求佢講：『寬容𠊎一擺哪！𠊎定著會還清！』 30總係佢毋肯，反轉將同伴關在監獄，等佢還清債務。 31其他个同伴看到這個事，心盡艱苦；佢等去見主人，將這事个頭尾對佢報告。 32主人就喊該僕人來，對佢講：『你這壞心个僕人！你求𠊎，𠊎就免你所有个債， 33你敢無應該憐憫你个同伴，像𠊎憐憫你共樣嗎？』 34主人非常譴，將佢關在監獄受刑罰，等佢還清全部个債。」

35耶穌講：「若係你等逐儕毋肯對內心饒赦兄弟抑係姊妹，𠊎在天頂个阿爸也愛恁樣對待你等。」

Currently Selected:

馬太 18: THV12Hdb

Highlight

Copy