馬太 16

要求神蹟

(馬可 8:11-13；路加 12:54-56)

1有幾個法利賽人㧯撒都該人來見耶穌，想愛害佢，就要求佢行一個神蹟，來證明佢所做个係對上帝來个。 2耶穌講：「臨暗仔，你等講：『天光日定著好天，因為天邊牽紅霞。』 3朝晨頭，你等講：『今晡日會有風雨，因為天烏烏。』你等盡會看天色，總係看毋出這時代个兆頭 #16:2-3 有兜古卷無「臨暗仔…時代个兆頭」這句話。！ 4一個邪惡毋信个世代正要求神蹟；總係，除了約拿个神蹟以外，無別个神蹟好給你等看。」

耶穌講了，就離開佢等。

法利賽人㧯撒都該人个發酵

(馬可 8:14-21)

5學生渡到湖對面去，毋記得帶餅仔。 6耶穌㧯佢等講：「你等愛細膩，愛提防法利賽人㧯撒都該人个發酵！」

7佢等彼此暗中議論講：「佢講這個話，怕係因為𠊎等無帶餅仔。」

8耶穌知佢等所講个，就問佢等講：「你等樣般議論無餅仔這件事呢？你等个信心忒細了！ 9樣般到這下還無明白！敢講你等毋記得用五隻餅給五千人食飽个事嗎？該時你等拈幾多籃个碎仔？ 10還有，用七隻餅給四千儕食飽該擺，你等又拈幾多籃个碎仔？ 11樣般還毋明白𠊎毋係同你等講餅仔个事？你等愛提防法利賽人㧯撒都該人个發酵！」

12學生這時正知耶穌並毋係喊佢等提防餅仔底背个發酵，係愛佢等提防法利賽人㧯撒都該人个教訓。

彼得認耶穌係基督

(馬可 8:27-30；路加 9:18-21)

13耶穌到凱撒利亞‧腓立比个地方；在該位，佢問學生講：「一般人講人子係麼儕？」

14佢等應講：「有兜講係施洗約翰；有兜講係以利亞；也有兜講係耶利米抑係其他先知个一個。」

15耶穌問佢等講：「你等呢？你等講𠊎係麼人？」

16 西門‧彼得應講：「你係基督，係永生上帝个孻仔。」

17耶穌對佢講：「約拿个孻仔西門，你真有福氣；因為這毋係人指示你个，係𠊎天頂个阿爸啟示你个。 18𠊎㧯你講，你係彼得，係磐石；在這磐石頂，𠊎愛建立𠊎个教會，連死个權勢也無可能贏過它。 19𠊎愛將天國个鎖匙交給你，你在地上所禁止个，在天頂也愛禁止；你在地上所批准个，在天頂也愛批准。」

20然後，耶穌吩咐學生，絕對毋好㧯麼儕講佢就係基督。

耶穌預言自家个死㧯復活

(馬可 8:31–9:1；路加 9:22-27)

21對該時開始，耶穌明明指示學生，佢一定愛上耶路撒冷去，對該兜長老、祭司長㧯經學教師受盡多个苦難，也會被人殺害，總係第三日佢會復活。

22 彼得拉等耶穌，開始勸佢講：「主啊，做毋得！這件事千萬做毋得臨到你身上！」

23耶穌轉身對彼得講：「撒但，閃開！你係𠊎个絆腳石；因為你个想法毋係對上帝來个，係人个想法。」

24然後，耶穌對學生講：「想愛跈𠊎个人，就愛放掉自家，擎起佢个十字架來跈𠊎。 25因為想愛救自家生命个人，反轉會喪失生命；為到𠊎喪失生命个人，反轉會得到生命。 26人若係賺到全世界，總係喪失自家个生命，有麼介路用呢？當然無！佢愛拿麼介來換自家个生命呢？ 27人子愛在厥爸个榮光中，同佢个天使共下來。該時，佢愛照各人个行為施行報應。 28𠊎實在㧯你等講，企在這位个人，有兜在死以前會看到人子臨到佢等當中來掌權。」

Currently Selected:

馬太 16: THV12Hdb

Highlight

Copy