路加 20
20
質問耶穌个權柄
(馬太 21:23-27；馬可 11:27-33)
1有一日，耶穌在聖殿肚教示人，宣傳福音。祭司長、經學教師，㧯長老來見佢， 2問佢講：「你靠麼介權柄做這兜事？麼人給你這權柄呢？你㧯𠊎等講！」
3耶穌應講：「𠊎先問你等一句話；㧯𠊎講， 4約翰行洗禮个權柄係對上帝來个，抑係對人來个？」
5佢等就彼此商量，講：「若係𠊎等講：『對上帝來个』，佢會講：『恁樣，你等做麼介毋信約翰呢？』 6若係𠊎等講：『對人來个』，眾人會拿石頭㧹𠊎等，因為佢等攏總相信約翰係先知。」 7對恁樣，佢等應講：「𠊎等毋知係對㖠位來个。」
8耶穌對佢等講：「恁樣，𠊎也毋㧯你等講𠊎靠麼介權柄做這兜事情。」
壞佃農个比喻
(馬太 21:33-46；馬可 12:1-12)
9接等，耶穌對眾人講這個比喻：「有一個人開一垤葡萄園，將它租給佃農，自家出外去旅行一站時間。 10到收葡萄个時節，佢派一個僕人去對該兜佃農收佢應得个果子。總係該兜佃農將該僕人捉來打，逐佢空手轉去。 11園主又派另外一個僕人去；佢等照樣捉佢來打，又侮辱佢，逐佢空手轉去。 12園主第三擺又派一個僕人去；佢等還係打傷佢，將佢㩳出園外。 13葡萄園个主人講：『𠊎愛樣般正好呢？𠊎愛派𠊎所惜个孻仔去，或者佢等會尊重佢。』 14總係該兜佃農一看到園主个孻仔，就彼此講：『這人係園主个繼承人；𠊎等來㓾死佢，佢个產業就變做𠊎等个了！』 15佢等就將佢㩳出園外，㓾死佢。
「恁樣，葡萄園个主人會樣般對付該兜佃農呢？ 16佢一定會來㓾死該兜佃農，將葡萄園租給別人。」
眾人聽了，就講：「絕對做毋得有恁樣个事！」
17耶穌注目看佢等，問講：「聖經講：
泥水師傅所㧒掉个這垤石頭，
已經成做地基中最重要个 #20:17 「地基中最重要个」抑係譯做「屋棟个拱心石」。。
這係麼介意思呢？ 18麼人跌在該石頭頂，佢就會粉身碎骨；該石頭跌落麼人个身上，也會將佢磧到糜糜。」
納稅个問題
(馬太 22:15-22；馬可 12:13-17)
19經學教師㧯祭司長知耶穌這比喻係責備佢等，當場就想愛捉耶穌；總係又驚眾人。 20佢等就一方面掌等佢；一方面收買一兜人，假正經來請教耶穌問題，想愛對佢个話來捉把柄，好將佢交給總督來辦。 21這兜奸細對耶穌講：「先生，𠊎等知你所講所教个話盡合情理，也知你毋會看人个情面，總係忠實將上帝个道理教示人。 22納稅給羅馬皇帝係違背𠊎等个法律麼？」
23耶穌看出佢等个詭計，就對佢等講： 24「拿一隻銀幣給𠊎看！這個像㧯名號係麼人个？」
佢等應講：「係皇帝个。」
25耶穌對佢等講：「既然係恁樣，將皇帝个東西歸給皇帝，將上帝个東西歸給上帝。」
26佢等在眾人个面前無法度對耶穌所講个話捉到麼介把柄；同時，佢等對耶穌个回答感覺盡希奇，就肅恬。
復活个問題
(馬太 22:23-33；馬可 12:18-27)
27有兜否認有復活這件事个撒都該人來見耶穌，問佢講： 28「先生，摩西為𠊎等立法講：『若係有一個人過身，留下佢个𡜵娘，總係無子女，厥老弟一定愛討守寡个阿嫂做𡜵娘，代阿哥傳宗接代。』 29頭擺，識有七個兄弟：大哥討𡜵娘後，無留下子女就過身； 30二哥就討守寡个阿嫂； 31後來，第三個也討姖；像恁樣，一直到第七個，全部討過姖，攏總無留下子女就過身。 32最尾，該婦人家也過身。 33請問，在復活个時節，這個婦人家愛算係麼人个𡜵娘呢？因為七個兄弟全部識㧯姖結婚。」
34耶穌應佢等講：「今生个人有討也有嫁； 35總係該兜有資格對死復活，並生在來生个人，無討也無嫁； 36因為佢等毋會再死，㧯天使共樣。佢等係上帝个子女，因為佢等已經對死復活。 37連摩西乜證明有死人復活這件事；在竻樹𤏸火个故事底背，佢識講：主係『亞伯拉罕个上帝，以撒个上帝，雅各个上帝。』 38這意思係講，上帝毋係死人个上帝，係生人个上帝；因為對上帝來看，佢等攏總係生人。」
39有兜經學教師講：「先生，你講个盡著！」 40因為恁樣，佢等無一個敢再問耶穌麼介難題。
有關基督个問題
(馬太 22:41-46；馬可 12:35-37)
41總係，耶穌對佢等講：「樣般有人講基督係大衛个子孫呢？ 42大衛自家識在《詩篇》講：
主對𠊎个主講：
『你坐在𠊎个右片，
43等𠊎使你个仇敵伏在你个腳下。』
44 大衛既然稱佢做『主』，基督樣會又係大衛个子孫呢？」
愛提防經學教師
(馬太 23:1-36；馬可 12:38-40)
45眾人全部聽到盡入神个時節，耶穌對厥學生講： 46「愛提防經學教師；佢等好著長袍，招搖過街，盡愛別人在公共場所對佢等致敬請安，又盡愛坐會堂肚个特別座位㧯筵席中个大位。 47佢等吞食寡婦个產業，然後在人个面前表演長篇个祈禱。佢等一定會受到較重个責罰！」
Currently Selected:
路加 20: THV12Hdb
Highlight
Share
Copy
Want to have your highlights saved across all your devices? Sign up or sign in
© The Bible Society in Taiwan, 2012
All rights reserved
© 台灣聖經公會版權所有 2012
