路加 17

論罪

(馬太 18:6-7，21-22；馬可 9:42)

1耶穌㧯厥學生講：「害人犯罪个事係難免个，總係使這個事發生个人壞了！ 2佢被人用大磨石紽等頸筋㧒落海肚去，較贏佢害任何一個最微細个人犯罪。 3你等自家愛細膩！

「假使你个兄弟抑係姊妹犯罪，愛勸話佢；佢若係悔改，就愛赦免佢。 4若係佢在一日當中得罪你七擺，逐擺倒轉來對你講：『𠊎悔改了』，你也愛赦免佢。」

論信心

5該兜使徒對主講：「求你使𠊎等有較大个信心！」

6主講：「若係你等有像一粒芥菜子恁大个信心，就係對這頭桑樹講：『連根挷起來，去種在海中！』它也會聽從你等。

僕人个責任

7「假使你等當中某人有一個耕田抑係掌羊个僕人，佢對田園轉來个時，你敢會對佢講：『遽遽坐下來食飯！』 8當然毋會！你敢毋係對佢講：『為𠊎準備食个，然後繫等圍裙來服事𠊎，等𠊎食飽，你正去食！』 9僕人照主人个吩咐做事，敢講主人還愛感謝佢嗎？ 10你等也係共樣；當你等做好上帝所吩咐个一切事情，就愛講：『𠊎等係無路用个僕人；𠊎等所做个係盡本份定定。』」

醫好十個發癩个人

11耶穌在愛去耶路撒冷个路上，經過撒馬利亞㧯加利利當中个所在。 12佢入一個村莊个時，有十個發癩个人對面行等來。佢等遠遠企等， 13大聲喊講：「耶穌，先生啊，可憐𠊎等！」

14耶穌看到，就對佢等講：「你等去俾祭司檢查身體！」

佢等在去个路上，就得到淨浰。 15其中一儕看到自家已經好了，遽遽就倒轉來，大聲頌讚上帝， 16又伏在耶穌个腳前感謝佢。這個人係撒馬利亞人。 17耶穌講：「得到醫好个人敢毋係有十儕？另外九個在㖠位呢？ 18樣般只有這別族个人倒轉來感謝上帝呢？」 19耶穌就對佢講：「䟘起來，好去了！你个信心醫好你了！」

上帝國个降臨

(馬太 24:17-18，23-28，37-41)

20有兜法利賽人來問耶穌，愛知上帝个國幾時會降臨。耶穌應講：「上帝國个降臨並毋係目珠所看得到个。 21無人能講：『看啊，在這位！』抑係『在該位！』因為上帝个國就在你等个心中 #17:21 「在你等个心中」抑係譯做「在你等中間」，抑係「忽然出現在你等中間」。！」

22接等，佢又對學生講：「時間會到，你等會盡想愛看人子掌權个時節，總係連一日也看毋到。 23有人會對你等講：『看啊，在這位！』抑係『看啊，在該位！』你等毋好出去看，也毋好跈佢等去。 24像𥍉爧一下仔對天个這片照到天个該片去，人子再臨該日也會恁樣。 25總係佢一定會先受盡多苦難，被這世代个人棄絕。 26像挪亞時代个情形，人子再臨个時節也會恁樣。 27該時代个人照常食啉嫁娶，直到挪亞入大船該日，大水來到，將佢等全部滅掉。 28人子再臨个時節，又會像羅得時代个情形；該時代个人照常食啉、買賣，照常耕種、起屋。 29到羅得離開所多瑪該日，火㧯硫磺就對天頂降下來，將佢等全部滅掉。 30人子顯現該日也會恁樣。

31「該日，在屋頂个，毋好下來入去屋肚拿佢个東西；共樣，在田項个，也毋好轉去。 32愛記得羅得个𡜵娘來做警戒！ 33想愛保全自家生命个，反轉會喪失生命；喪失生命个，反轉會保全生命。 34𠊎㧯你等講，該日暗晡，兩個人睡共頂眠床，一個會受接走，一個會留下來； 35兩個婦人家共下挨磨石，一個會受接走，另外一個會留下來。#17:35 有兜古卷加 36 節：「兩個人在田項做事，一個會受接走，另外一個會留下來。」」

37學生問講：「主啊，這兜事情會發生在㖠位呢？」

耶穌應講：「身屍在㖠位，鷹鳥也會聚集在該位。」

Currently Selected:

路加 17: THV12Hdb

Highlight

Copy