路加 11

關係祈禱个教訓

(馬太 6:9-13；7:7-11)

1有一擺，耶穌在一個所在祈禱。祈禱後，有一個學生對佢講：「主啊，請教𠊎等祈禱，像約翰教佢个學生一樣。」

2耶穌㧯佢等講：「你等愛恁樣祈禱：

阿爸啊：

願你个聖名受尊重；

願你在世間掌權。

3賜𠊎等逐日 #11:3 「逐日」抑係譯做「天光日」。所需要个飲食。

4赦免𠊎等个罪過，

因為𠊎等也赦免所有得罪 #11:4 「得罪」抑係譯做「虧欠」。𠊎等个人。

毋好俾𠊎等堵到忒重个考驗。」

5接等，耶穌㧯佢等講：「假使你等中間有人半夜去到朋友屋下，對佢講：『朋友，請借𠊎三隻餅仔； 6因為有一個朋友旅行來吾屋下，𠊎無麼介食个好招待佢。』 7若係你个朋友對屋肚應講：『莫吵𠊎！門已經關好，𠊎㧯𠊎个子女也已經上床了，𠊎無法度䟘起來拿給你。』 8愛樣般正好呢？𠊎㧯你等講，就算佢無因為該人係厥朋友，䟘起來拿餅仔給佢，也會因為該人迫切緊求，䟘起來拿佢所需要个東西給佢。

9「所以，𠊎㧯你等講：你等求，就會得到；尋，就會尋到；掽門，門就會為你等開。 10因為每一個求个，就得到；尋个，就尋到；掽門个，門就為佢開。 11你等當中做阿爸个，孻仔討魚仔个時，有麼人反轉拿蛇哥給佢？ 12討雞卵个時，反轉拿蠍仔給佢呢？ 13你等雖然壞，還知拿好東西給自家个子女；恁樣，在天頂个阿爸敢毋係還較愛將聖靈賜給求佢个人嗎？」

耶穌㧯別西卜

(馬太 12:22-30；馬可 3:20-27)

14耶穌逐走一個啞仔鬼，鬼出去後，該人就講話。眾人攏總盡著驚， 15總係佢等中間有人講：「佢係靠鬼王別西卜逐鬼。」

16也有兜人想愛害耶穌，要求佢行一個神蹟，來證明佢所做个係對上帝來个。 17耶穌知佢等个意思，就對佢等講：「一個國家自相紛爭，該國家一定會敗掉。一個家庭自相紛爭，該家庭定著會破碎掉去。 18假使撒但自相紛爭，佢个國樣般會企得住哪？你等講𠊎逐鬼係靠別西卜。 19若係恁樣，你等个子弟逐鬼又係靠麼儕哪？你等个子弟會證明係你等毋著！ 20其實，𠊎逐鬼若係靠上帝个能力 #11:20 「能力」原文直譯係「手指」，指聖靈。，就係證明上帝已經在你等當中掌權了。

21「手拿武器个勇士掌等佢自家个屋，該時佢个東西就盡安全。 22總係，比佢還較有力个勇士來到，制伏佢，就將佢所靠个武器搶走，又將佢所搶來个東西分掉。

23「毋同𠊎共下个，就係反對𠊎个；毋同𠊎共下收集个，就係打散个。

邪靈倒轉來

(馬太 12:43-45)

24「邪靈離開所附身个人，在燥爽个地方行來行去，尋休息个所在，總係尋無，就講：『𠊎愛轉原來个屋肚去。』 25佢就倒轉去，看到該屋拚到淨浰淨浰，又整理到盡好勢。 26佢就出去，帶七個比佢還較惡个邪靈倒轉來，同佢共下入去住。恁樣，該人後來个情形就比先前還較慘。」

正經个福氣

27耶穌講等這個話，人群中有一個婦人家大聲對佢講：「𫱔你、俾你食乳个人，實在有福氣噢！」

28耶穌講：「聽上帝个話就遵行个人，還較有福氣噢！」

要求神蹟

(馬太 12:38-42)

29眾人聚集越來越多，耶穌就講：「這世代个人恁邪惡噢！你等想愛看神蹟，總係，除了約拿个神蹟以外，無別个神蹟好給你等看。 30約拿樣般成做尼尼微人眼中个神蹟，人子也愛成做這世代人眼中个神蹟。 31在審判該日，南方个女王會企起來告你等這代个人，因為姖對恁遠來聽所羅門王智慧个話。𠊎㧯你等講，在這位有比所羅門王還較偉大个。 32在審判該日，尼尼微人會企起來告你等這代个人，因為佢等聽到約拿所傳个就棄邪歸正。𠊎㧯你等講，在這位有比約拿還較偉大个。

身體个光

(馬太 5:15；6:22-23)

33「無人點燈囥在無人看到个所在，抑係放在斗底下；佢一定係放在燈臺頂，俾入來个人看得到光。 34目珠可比身體个燈。目珠若係好，你全身就會有光明；目珠若壞掉，你个身體就會烏暗。 35所以，愛細膩，驚怕你底背个光變做烏暗。 36若係你全身充滿光明，無半點烏暗，就會光明燦爛，像被燈个光照等一樣。」

責備法利賽人㧯法律教師

(馬太 23:1-36；馬可 12:38-40)

37耶穌講這兜話後，有一個法利賽人請佢食飯；佢就入去坐桌。 38這法利賽人看到耶穌食飯前無先照規矩洗手，就非常奇怪。 39主對佢講：「你等法利賽人將杯仔㧯盤仔个外背洗到淨淨，總係你等个底背反轉裝滿貪心㧯邪惡。 40你這兜戇仔啊，造外背个上帝敢毋係也造底背嗎？ 41只愛將杯盤底背个東西送給窮苦人，恁樣，一切對你等來講就算淨浰了。#11:41 本節抑係譯做「只愛用全心救濟窮苦人，恁樣，你等就算淨浰了。」

42「你等法利賽人慘了！你等連薄荷、芸香，㧯其他个香料也獻十分之一給上帝，總係忽略公義㧯敬愛上帝个事。其實，這兜正係你等應當盡力去行个；其他个，也做毋得忽略。

43「你等法利賽人慘了！你等愛坐會堂肚个特別座位，愛別人在公共場所對你等致敬請安。 44你等慘了！因為你等像無做記號个墳墓，對該頂高行過去，無人知係墳墓。」

45有一個法律教師對耶穌講：「先生，你恁樣講，連𠊎等也被你侮辱到了！」

46耶穌應講：「你等這班法律教師乜慘了！你等將難㧡个重擔放在別人个肩頭頂，總係自家連伸一支手指𢯭手也毋肯。 47你等慘了！你等整理先知个墳墓，該兜先知正係你等个祖先所殺害个。 48恁樣，你等證明又贊成你等祖先所做个事；佢等殺害先知，你等就整理先知个墳墓。 49所以，上帝个智慧識講：『𠊎愛派先知㧯使徒到佢等該位去；有兜會被佢等㓾死，有兜會被佢等迫害。』 50因為恁樣，對創造世界以來，所有殺害先知个罪， 51對殺害亞伯，直到在祭壇㧯聖所中間殺害撒迦利亞為止所有个血債，這世代个人一定愛還。𠊎實在㧯你等講，這世代个人一定愛為到這一切受責罰！

52「你等這班法律教師慘了！你等將打開智識寶庫个鎖匙搶走，自家毋入去，也阻擋想愛入个人入去！」

53耶穌離開該位以後，經學教師㧯法利賽人開始激烈批評佢，拿盡多難題來問佢， 54想愛對佢个話尋把柄來害佢。

Currently Selected:

路加 11: THV12Hdb

Highlight

Copy