約翰 8
8
行姦淫个婦人家
[ 53大家轉屋下去； 1總係耶穌去橄欖山。 2第二日打早，佢倒轉去聖殿；眾人全部來就近佢，佢就坐下來，開始教佢等。 3經學教師㧯法利賽人帶一個婦人家來；姖係在行姦淫个時節被人捉到个。佢等迫姖企在當中， 4就對耶穌講：「先生，這個婦人家行姦淫个時被人捉到。 5摩西在法律中命令𠊎等，這種个婦人家應該用石頭㧹死。你講愛樣般？」 6佢等想愛用這個話害耶穌，尋把柄告佢。耶穌彎腰用手指在地上寫字。
7佢等繼續問無停，耶穌就企直起來，對佢等講：「你等當中麼人毋識犯罪个，就做得先用石頭㧹姖。」 8講了這個話，佢又彎腰在地上寫字。 9佢等聽到這個話，就對老个開始，一個一個退走，只有賸耶穌㧯企在佢面前个婦人家。 10耶穌企直起來，問姖講：「婦人家，佢等走去㖠位？無人留下來定你个罪係麼？」
11姖講：「先生，無。」
耶穌講：「好，𠊎也毋定你个罪。轉去，毋好再犯罪！」 ] #8:11 有兜古卷無括弧內 7:53–8:11 這站；有兜古卷將這站放在約翰福音 21:25 後背；也有兜古卷放在路加福音 21:38 後背；又有兜古卷放在約翰福音 7:36 後背。
耶穌係世間个光
12耶穌又對大家講：「𠊎係世間个光；跈𠊎个會得到生命个光，絕對毋會在烏暗中行。」
13法利賽人對佢講：「你為你自家做證；你个見證就無效。」
14耶穌講：「就算𠊎為自家做證，𠊎个見證也係真實个；因為𠊎知𠊎對㖠位來，愛去㖠位。你等毋知𠊎對㖠位來，愛去㖠位。 15你等係用人个標準來判斷人；總係𠊎毋判斷人。 16假使𠊎判斷人，𠊎个判斷也係正確个；因為𠊎毋係自家判斷，係該差𠊎來个阿爸同𠊎共下判斷。 17你等个法律書記載講，有兩個人做證，佢等个見證符合，就算有效。 18𠊎為自家做見證；該差𠊎來个阿爸也為𠊎做證。」
19佢等就問佢講：「若爸在㖠位？」
耶穌應講：「你等毋識𠊎，也毋識吾爸；假使你等識𠊎，就會認識吾爸。」
20這兜話係耶穌在聖殿个銀庫該位教訓人个時講个。當時無人捉佢，因為佢个時機還吂到。
𠊎去个地方你等做毋得去
21耶穌又㧯佢等講：「𠊎愛離開，你等也會尋𠊎，總係你等會死在自家个罪中。𠊎去个地方，你等做毋得去。」
22 猶太人个領袖就講：「佢講『𠊎去个地方，你等做毋得去』，敢講佢愛自殺係麼？」
23耶穌講：「你等係對地上來个，𠊎係對天頂來个；你等屬這世界，𠊎毋係屬這世界。 24所以𠊎講，你等會死在自家个罪中。假使你等毋信𠊎就係該『自有永有』个，你等就會死在自家个罪中。」
25佢等就問：「你到底係麼人？」
耶穌應講：「𠊎一開始就㧯你等講。#8:25 「𠊎一開始就㧯你等講」抑係譯做「𠊎樣愛使㧯你等講？」 26關係你等，有盡多事𠊎應當愛講，應當愛斷。總係，該『差𠊎來个』係真實可靠个；𠊎只有將對佢該位聽到个㧯世間人講。」
27佢等無明白耶穌所講个係關係阿爸个事。 28所以耶穌㧯佢等講：「你等將人子擎起來以後，你等正會知𠊎就係該『自有永有』个，並知𠊎無靠自家做麼介，𠊎只有講阿爸所教𠊎个。 29該差派𠊎來个㧯𠊎同在；佢無放𠊎孤單，因為𠊎一直行佢所歡喜个事。」
30盡多人聽到耶穌這兜話就信佢。
自由人㧯奴僕
31耶穌對信佢个猶太人講：「你等若常常遵守𠊎个教訓，就正經係𠊎个學生； 32你等會認識真理，真理會使你等得到自由。」
33佢等回答講：「𠊎等係亞伯拉罕个子孫；𠊎等從來毋識做過麼人个奴僕。你講『你等會得到自由』，這句話係麼介意思呢？」
34耶穌對佢等講：「𠊎實在㧯你等講，每一個犯罪个人就係罪个奴僕。 35奴僕在家庭中無一定像孻仔一直屬於家庭。 36假使上帝个孻仔使你等得到自由，你等就正經係自由人。 37𠊎知你等係亞伯拉罕个子孫；總係你等還想愛㓾𠊎，因為你等毋接受𠊎个教訓。 38𠊎所講个係吾爸指示𠊎个，你等所做个係你等个祖先㧯你等講个。」
39佢等回答講：「𠊎等个祖先就係亞伯拉罕。」
耶穌講：「假使你等正經係亞伯拉罕个子孫，你等个行事一定會㧯亞伯拉罕共樣。 40𠊎只有將𠊎對上帝該位聽到个真理㧯你等講，你等卻想愛㓾𠊎。亞伯拉罕毋識做過這種个事啊！ 41你等係做你等个阿爸所做个事。」
佢等應講：「上帝係𠊎等惟一个阿爸；𠊎等並毋係私生子啊！」
42耶穌對佢等講：「上帝若真實係你等个阿爸，你等一定會惜𠊎；因為𠊎係對上帝該位來到這位个。𠊎毋係自家來个，係佢差𠊎來个。 43你等樣毋會明白𠊎个話呢？因為𠊎个話，你等聽毋入耳。 44你等係魔鬼个子女，偏偏愛照你等阿爸个私慾行事。對古早以來，佢一直係謀害人个，毋識企在真理這片，因為佢根本無真理。佢講花撩係佢个本性；因為佢本來就係花撩牯，也係一切虛假个源頭。 45就係因為𠊎講真理，所以你等正毋信𠊎。 46你等當中麼人能指證𠊎有罪呢？既然𠊎係講真理，你等樣般毋信𠊎呢？ 47所有屬上帝个子女，定著會聽上帝个話。你等毋聽，因為你等毋係屬上帝个。」
耶穌㧯亞伯拉罕
48 猶太人个領袖問耶穌：「𠊎等講你係撒馬利亞人，又被鬼附身，敢講毋著嗎？」
49耶穌講：「𠊎並無被鬼附身；𠊎尊敬吾爸，你等卻侮辱𠊎。 50𠊎無追求自家个榮光，總係有一位代𠊎尋求、為𠊎主持公道个。 51𠊎實在㧯你等講，遵守吾教訓个人一定永遠毋會死。」
52 猶太人个領袖對佢講：「這下𠊎等確實知你係被鬼附身个！亞伯拉罕已經死掉，該兜先知也死掉，總係你講：『遵守吾教訓个人一定永遠毋會死。』 53敢講你比𠊎等个祖先亞伯拉罕還較偉大嗎？亞伯拉罕已經死掉，該兜先知也已經死掉，你看自家算麼介？」
54耶穌應講：「假使𠊎榮光自家，𠊎个光榮就無麼介價值。榮光𠊎个係吾爸，就係你等所講係你等个上帝。 55你等從來毋識佢，總係𠊎認識佢。假使𠊎講𠊎毋識佢，𠊎就㧯你等共樣係講花撩个。事實上，𠊎認識佢，也遵守佢个教訓。 56你等个祖先亞伯拉罕識歡歡喜喜仰望𠊎來个日仔；佢有看到，也非常快樂。」
57 猶太人个領袖對佢講：「你還吂五十歲，你見過亞伯拉罕#8:57 「你見過亞伯拉罕」有兜古卷係「亞伯拉罕見過你」。嗎？」
58耶穌應講：「𠊎實在㧯你等講，亞伯拉罕出世以前，𠊎就係該『自有永有』个。」
59因為恁樣，佢等拿石頭愛㧹佢；總係耶穌閃走，離開聖殿。
Currently Selected:
約翰 8: THV12Hdb
Highlight
Share
Copy
Want to have your highlights saved across all your devices? Sign up or sign in
© The Bible Society in Taiwan, 2012
All rights reserved
© 台灣聖經公會版權所有 2012
