創世記 49
49
雅各臨終个話
1 雅各召集佢該兜孻仔來，對佢等講：「你等行偎來，𠊎愛將你等將來會堵到个事㧯你等講。
2 雅各个孻仔啊，愛聚集來聽！
留心聽若爸以色列个話。
3 呂便啊，你係𠊎个長子，你係𠊎个精力；
你係𠊎成人以後𫱔个第一個孻仔，
係𠊎最強壯、最堪得驕傲个孻仔。
4無想到，你个情慾像大水氾濫，
你㧯阿爸个細姐睡，
打垃圾阿爸个眠床，
所以你做毋得企頭。
5 西緬㧯利未係鱸鰻兄弟；
佢等用刀劍去行暴力。
6𠊎無愛參加佢等个陰謀，
無愛㧯佢等共下集會；
因為佢等譴到就㓾人，
斬斷牛个腳筋準搞。
7佢等个脾氣盡烈，應該受咒詛；
佢等當惡當殘忍，應該受刑罰。
𠊎愛使佢等分散在雅各个家族，
使佢等在以色列人當中分散掉去。
8 猶大啊，你个兄弟攏總會稱讚你。
你會揢等敵人个頸筋；
你該兜兄弟會在你面前跪拜。
9 猶大像少壯个獅仔，
捉到獵物帶轉洞肚；
佢像獅仔伏等睡，
無人敢惹佢！
10 猶大會一直掌管王權，
佢个後代會長久統治。
萬國會向佢進貢，
萬民會向佢跪拜。
11佢个葡萄樹多到毋驚驢仔來喪，
上等个葡萄樹紽細驢仔也無關係；
葡萄酒多到有好洗衫，
葡萄汁也多到做得洗大襖。
12佢个目珠比酒還較明亮；
佢个牙齒比乳還較白。#49:12 本節抑係譯做「佢个目珠因為啉酒啉到紅紅；佢个牙齒因為食乳食到白白。」
13 西布倫會住在海滣，
佢會成做停船个港口；
佢个領土會透到西頓。
14 以薩迦像紮磳个驢仔，
伏在兩隻羊欄中間。
15佢歡喜安定个地方，
愛盡肥个土地；
所以佢愛揹重擔，
做苦工就像奴僕。
16 但會代自家个子民伸冤，
像以色列其他支族一樣。
17 但會像路堘个蛇哥，
細路个毒蛇；
佢咬傷馬蹄，
害騎馬个橫下來。
18上主啊，𠊎等候你个拯救！
19 迦得會被強盜攻擊，
總係佢會反輸轉贏。
20 亞設个土地係豐富个榖倉；
佢預備好食个東西供奉君王。
21 拿弗他利係自由走闖个鹿乸，
佢𫱔个細鹿仔非常得人惜。
22 約瑟像泉水滣个野驢，
像山岡頂个細野馬。#49:22 「約瑟…細野馬」抑係譯做「約瑟像泉水滣个樹仔，像多結果子个樹枝伸出牆外。」
23敵人強強愛攻擊佢，
開弓射箭來迫害佢。
24總係倚靠雅各大能个上帝，
佢个弓還係盡硬撐；
因為以色列个牧人係你个保護者，
佢个手還遽板有力。
25若爸个上帝會幫助你，
全能个上帝賜福給你。
佢賜給你天頂个甘霖、地上个泉水，
六畜興旺，子孫眾多。
26佢使你五榖豐登，花草常開；
有萬世个山岡，永存个山脈。
願這一切福氣降在約瑟个頭那頂，
降在弟兄中最優秀个一位身上。
27 便雅憫像得人畏个豺狼；
佢朝晨吞食所捉到个，
暗晡時分所搶來个。」
28以上係以色列个十二支族；這也係佢等个阿爸臨終前對每一個孻仔所留下个遺言；佢照各人个性情、品行，講合適个話祝福逐個孻仔。
雅各个死㧯埋葬
29 雅各吩咐佢該兜孻仔講：「𠊎會死了；你等愛將𠊎㧯𠊎个祖先葬共下，就係在赫人以弗崙田間个窿肚。 30這個窿在迦南地、幔利東片个麥比拉，係亞伯拉罕向赫人以弗崙買來做墳墓个。 31亞伯拉罕㧯厥𡜵娘莎拉葬在該位；以撒㧯厥𡜵娘麗百加也葬在該位；𠊎也將麗亞葬在該位。 32這田㧯田間个窿係對赫人買來个。」 33雅各交帶佢該兜孻仔這兜話以後，就將腳跔上眠床，斷氣過身，轉到厥祖宗該位去。
Currently Selected:
創世記 49: THV12Hdb
Highlight
Share
Copy
Want to have your highlights saved across all your devices? Sign up or sign in
© The Bible Society in Taiwan, 2012
All rights reserved
© 台灣聖經公會版權所有 2012
