創世記 25
25
亞伯拉罕另外一支後代
(歷代志上 1:32-33)
1 亞伯拉罕又討一個𡜵娘，名喊基土拉。 2佢㧯亞伯拉罕𫱔心蘭、約珊、米但、米甸、伊施巴㧯書亞。 3約珊𫱔示巴㧯底但。底但个後代係亞書利人、利都是人㧯利烏米人。 4米甸个孻仔係以法、以弗、哈諾、亞比大㧯以勒大。以上這兜全部係基土拉个後代。
5 亞伯拉罕將所有个財產給以撒。 6總係佢趕還生个時，也將一部份分給其他𡜵娘所𫱔个孻仔；過後，佢打發這兜孻仔到東方去，喊佢等遠遠離開佢个孻仔以撒。
亞伯拉罕个死㧯埋葬
7-8 亞伯拉罕享長壽，一百七十五歲，盡好命來過身，轉到厥祖宗該位去。 9佢兩個孻仔以撒㧯以實瑪利將佢埋葬在麥比拉窿。這壁窿在幔利東片，本來係赫人瑣轄个孻仔以弗崙个田。 10這垤田係亞伯拉罕向赫人買來个。亞伯拉罕㧯厥𡜵娘莎拉共樣埋在該位。 11亞伯拉罕死後，上帝賜福給厥孻仔以撒。以撒住在庇珥‧拉海‧萊附近。
以實瑪利个後代
(歷代志上 1:28-31)
12 莎拉个使女埃及人夏甲同亞伯拉罕𫱔个孻仔以實瑪利，有以下个孻仔。 13佢等个名照出世个順序係：尼拜約、基達、亞德別、米比衫、 14米施瑪、度瑪、瑪撒、 15哈達、提瑪、伊突、拿非施、基底瑪。 16佢等係十二宗族族長。佢等所住个村莊、營地全部係照佢等个名來安名。 17以實瑪利享壽一百三十七歲，過身轉到厥祖宗該位去。 18佢个後代住个地方，對哈腓拉到埃及東片，通到亞述个書珥。佢等無㧯亞伯拉罕其他个後代住共下。
以掃㧯雅各出世
19以下係亞伯拉罕个孻仔以撒後代个記事。亞伯拉罕𫱔以撒。 20以撒四十歲个時㧯麗百加結婚；麗百加係美索不達米亞个亞蘭人彼土利个妹仔、拉班个老妹。 21因為麗百加毋會𫱔，以撒代𡜵娘向上主祈禱；上主聽佢个祈禱，麗百加就有身項。 22姖所懷个係雙生仔，出世以前在姖肚笥肚相爭。姖講：「𠊎樣會恁歪命啊！」姖就去求問上主。 23上主對姖講：
「兩個國家在你肚笥肚，
你會𫱔出兩個彼此對敵个民族。
一個民族會比另外一個強，
大个會服事細个。」
24姖生產个日期到了，斷真𫱔雙生仔。 25先𫱔出來个，全身紅紅、渾身生毛，像著皮衫一樣，所以佢等㧯佢安名以掃#25:25 「以掃」指後來以掃後代住个西珥地區 (本譯本譯做以東)。西珥有「多毛」个意思。以東有「紅」个意思。。 26第二個揪等以掃个腳㬹出來，所以阿爸㧯佢安名雅各#25:26 「雅各」有「揪等腳㬹」个意思，另外也有「欺騙」个意思。。佢等出世个時，以撒六十歲。
以掃出賣長子个權利
27兩個細人仔緊來緊大，以掃盡會打獵，長透在野外；雅各堵好相反，當恬，常常留在帳篷肚。 28以撒較惜以掃，因為佢當愛食以掃打个野味；總係麗百加較惜雅各。
29有一日，雅各煮紅豆湯，堵好以掃打獵轉來，肚笥盡飢。 30以掃對雅各講：「𠊎餓到會死，紅豆湯給兜𠊎食！」 (所以佢也安到以東#25:30 「以東」有「紅」个意思。。)
31 雅各應講：「你將長子个名份讓給𠊎，𠊎就給你食。」
32 以掃講：「好啊！𠊎會死囉！長子个名份對𠊎有麼介用呢？」
33 雅各應講：「你愛先發誓給𠊎聽，將長子个名份讓給𠊎。」以掃就發誓，將長子个名份讓給雅各。 34恁樣，雅各就拿兜餅仔㧯紅豆湯給以掃，以掃食掉啉掉以後就走了。這就係以掃看輕佢長子名份个經過。
Currently Selected:
創世記 25: THV12Hdb
Highlight
Share
Copy
Want to have your highlights saved across all your devices? Sign up or sign in
© The Bible Society in Taiwan, 2012
All rights reserved
© 台灣聖經公會版權所有 2012
