創世記 20
20
亞伯拉罕㧯亞比米勒
1 亞伯拉罕對幔利个橡樹徙到迦南个南片，住在加低斯㧯書珥中間。佢暫時住在基拉耳个時， 2對人講厥𡜵娘莎拉係自家个老妹；所以，基拉耳王亞比米勒派人將莎拉接去。
3有一暗晡，上帝在亞比米勒夢中向佢顯現，講：「你該死了！你搶來這婦人家係別人个𡜵娘啊！」
4該時，亞比米勒還吂親近莎拉；佢講：「主啊！𠊎係冤枉个！你愛消滅𠊎㧯𠊎个人民嗎？ 5亞伯拉罕自家對𠊎講，這婦人家係厥老妹；這婦人家自家也恁樣承認。𠊎做這件事良心清白，雙手潔淨。」
6在夢中，上帝應佢講：「無毋著！𠊎知你做這項事良心清白；𠊎自家也阻止你，免得你侵犯姖來得罪𠊎。 7這下你愛將這𡜵娘人還厥老公；佢係先知，會代你祈禱，使你毋使死。總係𠊎警告你，若係你無將這𡜵娘人送還厥老公，你㧯你所有个人民全部愛死。」
8第二日朝晨，亞比米勒召集所有个官員，將所發生个事㧯佢等講，佢等就非常著驚。 9亞比米勒喊亞伯拉罕來，責問佢講：「你做麼介恁樣對待𠊎等？𠊎麼介地方得罪你？你將這災難帶給𠊎㧯𠊎个國家，你無應該恁樣做！」 10亞比米勒又問亞伯拉罕講：「你樣般愛恁樣做呢？」
11 亞伯拉罕應佢講：「𠊎恅到這地方个人全無敬畏上帝，佢等會為到搶𠊎个𡜵娘來㓾𠊎。 12其實，姖也係𠊎个老妹；姖㧯𠊎共爺無共𡟓，後來姖㧯𠊎結婚。 13所以，在上帝喊𠊎離開故鄉，到別國流浪个時，𠊎㧯姖講：『無論𫣆等到㖠去，你愛講𠊎係若哥；這就係你對𠊎个恩情。』」
14 亞比米勒聽到這個解釋，就將羊群、牛群、奴僕㧯奴婢送給亞伯拉罕，又將佢个𡜵娘莎拉交還佢。 15亞比米勒對亞伯拉罕講：「你看，這係𠊎个土地，你歡喜在㖠位住，就住在該位。」 16佢對莎拉講：「𠊎將一千隻銀幣給若哥，用來證明你係清白个，俾大家知，你無做對毋起人个事。」
17-18因為亞伯拉罕个𡜵娘莎拉所堵到个事，上主已經使亞比米勒宮內个婦人家全部毋會𫱔。亞伯拉罕祈求上帝，上帝就醫好亞比米勒、厥𡜵娘㧯佢所有个使女，俾姖等又會𫱔。
Currently Selected:
創世記 20: THV12Hdb
Highlight
Share
Copy
Want to have your highlights saved across all your devices? Sign up or sign in
© The Bible Society in Taiwan, 2012
All rights reserved
© 台灣聖經公會版權所有 2012
