創世記 17
17
立約个記號 — 割禮
1 亞伯蘭九十九歲个時，上主向佢顯現，對佢講：「𠊎係全能个上帝。你愛在𠊎面前行事，做一個無好嫌个人。 2𠊎愛㧯你立約，俾你有盡多子孫。」 3亞伯蘭面伏到地上；上帝又對佢講： 4「𠊎㧯你立个約係恁樣：你愛做盡多國家个阿爸。 5對這下開始，你个名毋好再安到亞伯蘭，愛喊做亞伯拉罕#17:5 「亞伯拉罕」有「多國个阿爸」个意思。，因為𠊎立你做盡多國家个阿爸。 6𠊎愛賜給你盡多子孫；你个子孫會建立盡多國家，你个後代會出盡多君王。
7「𠊎愛堅定𠊎㧯你並你世世代代子孫立个約，做永遠个約。𠊎愛做你㧯子子孫孫个上帝。 8𠊎愛將你這下做旅客所住个地方，就係迦南全地，賜給你㧯你个後代，做永遠个產業；𠊎也愛做佢等个上帝。」
9上帝對亞伯拉罕講：「你㧯你个後代也一定愛世世代代遵守𠊎个約。 10你等當中个細孻仔全部愛受割禮；這係𠊎㧯你並你世世代代个子孫所立个約，你等一定愛遵守。 11對這下開始，你等所有个細孻仔全部愛受割禮 #17:11 「愛受割禮」原文直譯係「愛割包皮」。；這係𠊎㧯你等立約个證據。 12你等世世代代个細孻仔，無論係自家𫱔个、抑係㧯外國人買來个奴僕，出世第八日，全部愛受割禮。 13你等屋下每一個細孻仔愛受割禮；留在肉體上這個記號，表示𠊎㧯你等立永遠个約。 14男人無受割禮个愛對𠊎个子民中除掉，因為佢無遵守𠊎个約。」
15上帝對亞伯拉罕講：「你毋好再喊若𡜵娘莎萊；姖个名愛改做莎拉。 16𠊎愛賜福給姖，使姖為你𫱔一個孻仔。𠊎愛賜福給姖，俾姖成做盡多國家个阿姆；姖个後代會出君王。」
17 亞伯拉罕就仆在地上偷笑，心肚講：「一百歲个老人家，敢還會𫱔？莎拉已經九十歲，敢還會𫱔？」 18亞伯拉罕對上帝講：「樣毋俾以實瑪利做𠊎个繼承人？」
19上帝講：「做毋得！若𡜵娘莎拉一定會為你𫱔一個孻仔，你愛㧯佢安名以撒#17:19 「以撒」意思係「佢笑了」。。𠊎愛㧯佢並佢个子子孫孫堅定𠊎个約；這係永遠个約。 20有關以實瑪利，𠊎也愛聽你个要求。𠊎愛賜福給佢，使佢子孫盡多，代代相傳。佢愛𫱔十二個族長；𠊎愛俾佢个後代成做大國。 21總係𠊎愛㧯以撒堅定𠊎个約。到明年這時節，莎拉會𫱔以撒。」 22上帝㧯亞伯拉罕講完這兜話，就離開佢升天去了。
23在該日，亞伯拉罕遵守上帝个命令，為佢个孻仔以實瑪利㧯屋下出世所有个男人，包含該兜買來个奴僕，全部行割禮。 24亞伯拉罕受割禮个時九十九歲。 25厥孻仔以實瑪利受割禮个時係十三歲。 26在該日，亞伯拉罕㧯厥孻仔以實瑪利共下受割禮。 27所有个男人，無論係屋下出世个，抑係對外國人買來个，攏總㧯佢共下受割禮。
Currently Selected:
創世記 17: THV12Hdb
Highlight
Share
Copy
Want to have your highlights saved across all your devices? Sign up or sign in
© The Bible Society in Taiwan, 2012
All rights reserved
© 台灣聖經公會版權所有 2012
