創世記 13
13
亞伯蘭㧯羅得分家
1 亞伯蘭帶等厥𡜵娘㧯羅得、並一切所有个，對埃及向北行倒轉迦南个南部。 2亞伯蘭當好額，有盡多个金銀㧯頭牲。 3後來佢離開該位，漸漸向北去伯特利。佢轉到伯特利㧯艾个中間，就係佢頭擺搭帳篷、 4起祭壇个所在；佢就在該位求喊上主个名。
5㧯亞伯蘭共下行个羅得，也有牛群、羊群㧯帳篷。 6佢兩家个牛群、羊群忒多，該地方無罅大，容納毋下，使佢等無辦法共下住。 7(當時，迦南人㧯比利洗人還住在該位。) 亞伯蘭个牧人㧯羅得个牧人常常爭地盤。
8 亞伯蘭就對羅得講：「𫣆係骨肉之親；你㧯𠊎毋好相爭，你个牧人㧯𠊎个牧人也毋好相爭。 9𫣆來分開！你看，頭前還有一大片个土地；你選右片，𠊎就選左片；你行左片，𠊎就行右片。」
10 羅得向四面看，看到約旦河一直到瑣珥該地方係平原，水源充足，像上主个園 #13:10 「上主个園」係指到伊甸園。，又像埃及个土地。 (該時，上主還吂消滅所多瑪㧯蛾摩拉。) 11羅得就擇約旦河該片平原，徙向東片去。佢兩儕就恁樣分開。 12亞伯蘭住在迦南；羅得住在河該片平原个城鎮，最後將帳篷徙到所多瑪附近。 13所多瑪人在上主面前罪大惡極。
亞伯蘭徙到希伯崙
14 羅得離開亞伯蘭以後，上主對亞伯蘭講：「你愛在所企个地方，向東西南北看。 15𠊎愛將你看到這所有个土地攏總賜給你㧯若子孫；這土地愛永遠歸屬你等。 16𠊎愛使你个子孫像地上个泥沙恁多；人若算得出地上个泥沙，正算得出你个子孫有幾多。 17䟘起來！去行透這垤地；𠊎愛將這位賜給你。」 18亞伯蘭就將帳篷徙到希伯崙，在幔利个橡樹附近住；佢在該位為上主起一座祭壇。
Currently Selected:
創世記 13: THV12Hdb
Highlight
Share
Copy
Want to have your highlights saved across all your devices? Sign up or sign in
© The Bible Society in Taiwan, 2012
All rights reserved
© 台灣聖經公會版權所有 2012
