加拉太書 4
4
1還有，愛繼承阿爸產業个孻仔，雖然所有个產業全部係佢个，總係還做細人仔个時節，佢㧯奴僕無麼介分別。 2在佢還細个時節，有人照顧佢，代佢管理家業，一直等到厥爸為佢所定个日仔來到。 3共樣，𠊎等个靈性還像細人仔个時節，也係被宇宙間所謂星宿个神靈 #4:3 「星宿个神靈」抑係譯做「基本个原理」。支配做奴才。 4總係，時機成熟个時，上帝就差派自家个孻仔，對女人來出世，又生活在法律之下， 5目的係愛救贖生活在法律之下个人，使𠊎等有好成做上帝个子女。
6為到愛證明 #4:6 「為到愛證明」抑係譯做「因為」抑係「既然」。你等係佢个子女，上帝就差派佢个孻仔个靈入𠊎等个心，呼喊：「阿爸！𠊎个爺！」 7所以，從今以後，你就毋係奴僕了，係孻仔；既然係孻仔，上帝就俾你做繼承人。
保羅關心加拉太人
8以前你等毋識上帝个時，係被該兜毋係神个神明做奴才。 9這下你等已經認識上帝 (事實上係被上帝認識)，樣又倒轉去尋該兜無能力㧯無路用个星宿个神靈 #4:9 「星宿个神靈」抑係譯做「基本个原理」。呢？樣愛重新去做佢等个奴才呢？ 10你等還將該兜日、月、節期，㧯年份个規定守到死死！ 11𠊎為你等實在憂愁，盡驚𠊎頭擺在你等中間所做个全部落空了。
12兄弟姊妹啊，𠊎求你等，愛將心比心，像𠊎認同你等一樣。以前，你等毋識做過對毋起𠊎个事。 13你等還記得嗎？𠊎頭一擺去傳福音給你等，係因為𠊎發病所造成个機會。 14雖然𠊎个病使你等受盡大个考驗，總係你等無看輕𠊎，也無拒絕𠊎。顛倒，你等接待𠊎，像接待上帝个天使，像接待基督耶穌一樣。 15該時你等恁歡喜！總係這下呢？𠊎敢講，該時，若係有法度，就係將自家个目珠挖給𠊎，你等乜願意。 16這下𠊎㧯你等講真理，反轉卻成做你等个對敵係麼？
17該兜人對你等恁熱心，毋係麼介好心術。佢等个目的係愛切斷你等㧯𠊎个關係，使你等正會熱心對待佢等。 18在善事上熱心本來係好个，總係毋單淨𠊎同你等共下个時正恁樣。 19𠊎親愛个子女啊，𠊎為你等再一擺像阿姆忍受生產个痛苦，直到基督在你等个生命中成形。 20這下，𠊎若係同你等共下，毋知會有幾好噢！𠊎㧯你等講話个口氣就毋使像恁樣。為到你等，𠊎个心實在無葛無煞！
用夏甲㧯莎拉來舉例
21該兜想愛生活在法律之下个人，𠊎問你等一個問題：你等無聽過摩西个法律嗎？ 22法律書記載講，亞伯拉罕有兩個孻仔，一個係使女𫱔个，一個係自由个婦人家𫱔个。 23使女𫱔个係照人个意思來𫱔个；自由个婦人家𫱔个係對上帝个應許來个。 24這做得看做一個比喻：該兩個婦人家係代表兩種个契約。其中一個約係對西奈山來个，所𫱔个就愛做奴隸；這就係夏甲。 25夏甲係代表在阿拉伯个西奈山 #4:25 「夏甲…西奈山」另外有兜古卷係「西奈山係在阿拉伯个一座山」。，可比今晡日个耶路撒冷；姖㧯姖个子女所過个係奴隸个生活。 26總係，在天頂个耶路撒冷係自由个；姖正係𠊎等个阿姆。 27因為聖經記載講：
無懷胎、無𫱔子个𡜵娘人啊，
你愛歡喜！
吂識經歷生產个痛苦个，
你愛大聲歡呼！
因為受冷落个𡜵娘人
比該同老公共下生活个，
會有較多个子女！
28兄弟姊妹啊，像以撒共樣，你等係對上帝个應許來成做上帝个子女。 29當時，該照人个意思𫱔个，迫害聖靈所𫱔个；這下也係恁樣。 30總係聖經樣般講呢？聖經講：「將使女㧯厥孻仔逐出去，因為使女个孻仔做毋得同自由个婦人家所𫱔个孻仔共下繼承產業。」 31總講，兄弟姊妹啊，𠊎等毋係使女个子女；𠊎等係自由个婦人家所𫱔个。
Currently Selected:
加拉太書 4: THV12Hdb
Highlight
Share
Copy
Want to have your highlights saved across all your devices? Sign up or sign in
© The Bible Society in Taiwan, 2012
All rights reserved
© 台灣聖經公會版權所有 2012