出埃及記 6
6
1上主對摩西講：「你會黏時看到𠊎樣般對付埃及王。𠊎愛迫佢放𠊎个子民走。𠊎愛迫佢將佢等趕出佢个國家。」
上帝呼召摩西
2上帝指示摩西講：「𠊎係上主。 3𠊎頭擺對亞伯拉罕、以撒、雅各顯現做全能个上帝；總係，𠊎毋識將𠊎个名 — 上主啟示給佢等。 4𠊎識㧯佢等立約，應許將佢等做旅客暫時住過个迦南地賜給佢等。 5這下𠊎聽到以色列人因為被埃及人欺負所發出个噌聲，𠊎就想到𠊎个約。 6所以你去㧯以色列人講：『𠊎係上主；𠊎愛救你等，對埃及人給你等㧡个重擔中救你等出來。𠊎愛伸出大能个手重重責罰埃及人；𠊎愛拯救你等。 7𠊎愛將你等看做𠊎个子民，𠊎也愛做你等个上帝。當你等對埃及人給你等个重擔中得到自由个時，你等就會知𠊎係上主，係你等个上帝。 8𠊎識應許亞伯拉罕、以撒、雅各，所以𠊎一定愛將你等帶到該地方，將該地方賜給你等做產業。𠊎就係上主。』」 9摩西將這兜話㧯以色列人講，總係佢等毋肯聽，因為艱苦个奴才生活已經使佢等灰心失志。
10所以上主對摩西講： 11「你去㧯國王講，愛俾以色列人離開埃及。」
12總係摩西在上主面前講：「連以色列人全毋聽𠊎个話，埃及王樣會聽𠊎講呢？𠊎係一個嘴鈍舌拙个人。」
13上主還係命令摩西㧯亞倫到以色列人㧯埃及王該位去，將以色列人對埃及帶出來。
亞倫㧯摩西个族譜
14下背所記个係以色列个族長。雅各个長子呂便有四個孻仔：哈諾、法路、希斯崙㧯迦米；佢等成做呂便支族。
15 西緬有六個孻仔：耶母利、雅憫、阿轄、雅斤、瑣轄㧯少羅 — 少羅係迦南个細妹仔所𫱔个；佢等成做西緬支族。
16 利未有三個孻仔：革順、哥轄㧯米拉利；佢等成做利未支族。利未食到一百三十七歲。
17 革順有兩個孻仔：立尼㧯示每；佢等逐儕有盡多子孫。
18 哥轄有四個孻仔：暗蘭、以斯哈、希伯倫㧯烏薛。哥轄食到一百三十三歲。
19 米拉利有兩個孻仔：抹利㧯母示。這就係利未支族㧯佢等个後代。
20 暗蘭討自家个阿姑約基別；姖𫱔亞倫㧯摩西。暗蘭食到一百三十七歲。
21 以斯哈有三個孻仔：可拉、尼斐㧯細基利。
22 烏薛有三個孻仔：米沙利、以利撒反㧯西提利。
23 亞倫討以利沙巴；姖係亞米拿達个妹仔、拿順个老妹。以利沙巴為亞倫𫱔四個孻仔：拿答、亞比戶、以利亞撒㧯以他瑪。
24 可拉𫱔三個孻仔：亞惜、以利加拿㧯亞比亞撒；佢等係可拉宗族各房个祖先。
25 亞倫个孻仔以利亞撒討普鐵个妹仔；姖𫱔非尼哈。
這兜全部係利未支族下各宗族、家族个族長。
26 亞倫㧯摩西這兩儕，上主識命令佢等講：「你等去將以色列人个軍隊一隊一隊對埃及𢱋出來。」 27對埃及王講愛放以色列人走个，也係摩西㧯亞倫。
上主命令摩西㧯亞倫
28以前上主在埃及對摩西講話个時， 29佢講：「𠊎係上主；𠊎㧯你講个話，你全部愛㧯埃及王講。」
30總係摩西在上主面前講：「你知𠊎係嘴鈍舌拙个人，國王樣會聽𠊎个話呢？」
Currently Selected:
出埃及記 6: THV12Hdb
Highlight
Share
Copy
Want to have your highlights saved across all your devices? Sign up or sign in
© The Bible Society in Taiwan, 2012
All rights reserved
© 台灣聖經公會版權所有 2012
