出埃及記 40

搭聖帳篷

1上主吩咐摩西講： 2「正月初一，你愛將聖帳篷搭起來， 3將該放十誡个約櫃放在底背，並用帳幔遮等。 4你愛將供桌搬入去，在桌頂擺好用品；也將燈臺搬入去，又愛點燈火。 5你愛將燒香个金壇面對約櫃放好，並在聖帳篷門口掛上門簾。 6愛將燒化祭个祭壇擺在聖帳篷門口前， 7洗盪盆放在聖帳篷㧯祭壇中間，底背裝等水。 8愛將庭院周圍个帳幔掛起來，並在門口掛上門簾。

9「你愛拿聖油膏聖帳篷㧯所有用品，分別它兜為聖， 10然後用聖油膏燒化祭个祭壇㧯所有用品，使它兜全部分別為聖。 11你也愛用聖油膏洗盪盆㧯盆座，使它兜分別為聖。

12「你愛帶亞倫㧯佢該兜孻仔到聖帳篷門口，俾佢等在該位洗身。 13愛㧯亞倫著好聖服，用聖油膏佢，使佢分別為聖，做祭司事奉𠊎。 14愛帶亞倫該兜孻仔來，㧯佢等著好內衫， 15用聖油膏佢等，像膏佢等个阿爸共樣，使佢等做祭司事奉𠊎。通過這聖禮佢等愛永遠做祭司，世世代代事奉𠊎。」

16這一切个事摩西全部照上主所吩咐个話去做。 17所以佢等在離開埃及後个第二年正月初一將聖帳篷搭起來。 18摩西放好篷座，安骨架，穿橫杠，扶起柱仔。 19佢將聖帳篷个篷頂揜好，頂高還有頂蓋。這攏總係照上主吩咐摩西个話做个。 20佢又將兩垤寫誡命个石版放在約櫃底背，將槓仔穿過約櫃个圈仔，頂高安贖罪个蓋仔， 21然後將約櫃放在聖帳篷底背，掛帳幔來遮等約櫃。這攏總係照上主吩咐摩西个話做个。

22 摩西將供桌搬入聖帳篷，放在聖帳篷个北片，在帳幔外面， 23又在桌頂放獻給上主个供餅。這攏總係照上主吩咐摩西个話做个。 24佢將燈臺放在聖帳篷个南片，㧯供桌相對， 25又在上主面前點燈盞。這攏總係照上主吩咐摩西个話做个。 26佢將金香壇放在聖帳篷底背，面對等帳幔， 27在壇頂燒盡香个香。這攏總係照上主吩咐摩西个話做个。 28佢在聖帳篷个門口掛門簾， 29將燒化祭个祭壇放聖帳篷外門簾个正對面，然後在壇頂獻燒化祭㧯素祭。這攏總係照上主吩咐摩西个話做个。 30佢將洗盪盆放在聖帳篷㧯祭壇中間，盆肚裝等水。 31摩西、亞倫、㧯亞倫該兜孻仔在進入聖帳篷以前抑係就近祭壇个時，在盆肚洗手洗腳。 32這攏總係照上主吩咐摩西个話做个。 33最後摩西在聖帳篷㧯祭壇个外圍起圍欄，來做庭院，然後在門口將庭院个門簾掛起來。恁樣，摩西就完成所有个工作。

上主个榮光

(民數記 9:15-23)