出埃及記 35

安息日个例規

1 摩西召集以色列全體會眾，對佢等講：「這係上主命令你等遵行个事： 2你等六日愛工作，總係第七日係聖日，應該歸給𠊎 — 上主做安息日。所有在這日工作个人一定愛處死刑。 3在安息日，連在自家屋下起火也做毋得。」

為聖帳篷奉獻

(出埃及記 25:1-9)

4 摩西對全體以色列會眾講：「上主恁樣命令： 5你等愛向上主獻禮物。所有樂意个人做得奉獻金、銀、銅； 6麻紗；藍色、紫色㧯深紅色个肨線；山羊毛刺个布料； 7染紅个羊牯皮；盡靚个皮料；金合歡木； 8燈油；製造聖油㧯香个原料； 9紅瑪瑙㧯其他寶石，愛拿來鑲在大祭司个以弗得聖服㧯胸牌頂。」

聖帳篷个用品

(出埃及記 39:32-43)

10「你等當中出名个師傅全部愛來做上主所吩咐个一切用品： 11就係聖帳篷、聖帳篷頂㧯外層个頂蓋、聖帳篷个鉤仔、骨架、橫杠、柱仔㧯柱座； 12約櫃、約櫃个槓仔、贖罪个蓋仔，㧯隔等約櫃个帳幔； 13供桌、桌个槓仔，㧯所有个用品；獻給上帝个供餅； 14燈臺㧯它个零件；燈盞㧯燈油； 15香壇㧯槓仔；聖油㧯當香个香；聖帳篷門口个門簾； 16獻燒化祭个祭壇㧯銅網、槓仔，㧯所有个用品；洗盪盆㧯盆座； 17圍外院个帳幔、柱仔㧯柱座；外院門口个門簾； 18聖帳篷㧯圍庭院个閂仔㧯索仔； 19祭司在聖所服事个時所著盡靚个聖服，就係祭司亞倫㧯佢該兜孻仔个聖服。」

人民个奉獻

20 以色列全體會眾對摩西面前離開； 21所有甘心樂意奉獻个人，全部帶上主个禮物來，獻做起聖帳篷个用途。佢等帶來崇拜需要个用品㧯製造祭司聖服个材料。 22逐個樂意奉獻个男女帶來秉針、耳環、禁指、脖鍊、㧯各種金器，獻給上主。 23凡有麻紗，藍色、紫色、㧯深紅色个肨線，山羊毛刺个布料，染紅个羊牯皮，抑係盡靚个皮料个，也全部帶來。 24有能力奉獻銀抑係銅个禮物，全部帶來獻給上主；屋下有金合歡木好做工程用个也帶過來。 25手藝好个婦女全部帶來親手刺个麻紗，㧯藍色、紫色、深紅色个肨線。 26甘心樂意个婦女也用山羊毛做肨線。 27該兜領袖將做得鑲在以弗得聖服㧯胸牌頂个紅瑪瑙㧯其他个寶石， 28並點燈火、做聖油㧯做香所需要个香料㧯油帶來。 29所有以色列人，無論男女，為到上主吩咐摩西進行个工程，全部甘心樂意將禮物帶來，獻給上主。

起聖帳篷个工人

(出埃及記 31:1-11)

30 摩西對以色列人民講：「上主已經對猶大支族選出戶珥个孫仔、烏利个孻仔比撒列， 31用自家个靈充滿佢，賜給佢聰明、才能、技術，會做各樣手藝， 32像設計圖案，用金、銀、銅製造各種用品； 33會刻愛鑲个寶石；能刻樹仔；還會其他各樣奇巧个手藝。 34上主賜給佢㧯但支族亞希撒抹个孻仔亞何利亞伯有教手藝个能力。 35佢賜給佢等各種技術，會做各樣手工，像雕刻、圖案設計、紡織麻紗，用藍色、紫色、深紅色个肨線刺花、還會刺各種布料。各種工作佢等全部會做，也盡會設計各樣圖案。」

Currently Selected:

出埃及記 35: THV12Hdb

Highlight

Copy