出埃及記 33

上主命令以色列人離開西奈山

1上主對摩西講：「你㧯你對埃及𢱋出來个人民愛離開這地方，到𠊎應許賜給亞伯拉罕、以撒、雅各、㧯佢等後代个土地去。 2𠊎愛派天使𢱋你；𠊎愛逐走迦南人、亞摩利人、赫人、比利洗人、希未人㧯耶布斯人。 3你愛去个地方係流乳㧯蜜个好地方。總係，𠊎毋㧯你等共下去；因為你等當硬頸，驚怕𠊎會在路項將你等消滅掉。」

4人民聽到這壞消息，就當悲傷，無人再戴妝飾品， 5因為上帝有吩咐摩西轉告以色列人，講：「你等係硬頸个人；若係𠊎㧯你等共下去，一下仔，𠊎就會將你等消滅掉。這下你等愛將身上个妝飾品全部剝下來，𠊎正決定樣般處理你等。」 6所以，以色列人離開何烈山以後，就無人再戴妝飾品。

聖帳篷

7逐擺以色列人安營，摩西就將一張帳篷搭在離營較遠个地方；這帳篷安到聖帳篷 #33:7 「聖帳篷」原文直譯係「相見个帳篷」。這聖帳篷係暫時个，然後換過另外一張有約櫃、祭壇、等等个聖帳篷。。所有愛求問上主个人全部到該位去。 8逐擺摩西出營到聖帳篷去，人民全部企在自家个帳篷口，看等摩西，直到佢進入聖帳篷。 9摩西入去以後，雲柱就降下來，停在聖帳篷門口；上主就對雲肚向摩西講話。 10人民一看到雲柱停在聖帳篷門口，逐儕就在自家个帳篷口跪拜。 11逐擺上主㧯摩西面對面講話，像人㧯朋友講話一樣。摩西轉營个時，佢个後生助手 — 嫩个孻仔約書亞留在聖帳篷肚。

上主應許㧯子民同在

12 摩西對上主講：「你吩咐𠊎𢱋人民到該地方去，總係你並無指示𠊎愛派麼人㧯𠊎共下去。你講過你盡了解𠊎，也歡喜𠊎。 13恁樣，求你將你个計劃指示𠊎，使𠊎多認識你，繼續在你面前蒙恩。求你記得這民族係屬你个。」

14上主講：「𠊎自家愛㧯你共下去；𠊎愛減少你个重擔。」 15摩西應講：「若係你自家毋㧯𠊎等共下去，求你毋好喊𠊎等離開這位。 16若係你毋㧯𠊎等共下去，樣會有人知𠊎㧯你个子民係在你面前蒙恩个？你个同在使𠊎等㧯世上其他民族有分別。」

17上主對摩西講：「𠊎愛照你所求个做；因為𠊎盡了解你，也歡喜你。」

18所以摩西講：「求你俾𠊎看到你个榮光。」

19上主應講：「𠊎愛顯出𠊎所有个恩惠，在你面前經過，並宣告𠊎个聖名。𠊎係上主；𠊎愛施恩給麼人，就施恩給佢；𠊎愛憐憫麼人，就憐憫佢。 20𠊎毋俾你看到𠊎个面貌，因為看到𠊎个人就會無命。 21總係在𠊎个堘頭有一個地方，你做得企在該隻磐石頂。 22當𠊎个榮光經過个時，𠊎會將你放在石孔肚，用𠊎个手遮等你，等𠊎過去， 23然後𠊎愛收轉𠊎个手；你就會看到𠊎个背囊，總係做毋得看𠊎个面貌。」

Currently Selected:

出埃及記 33: THV12Hdb

Highlight

Copy