出埃及記 31

起聖帳篷

(出埃及記 35:30–36:1)

1上主對摩西講： 2「𠊎已經對猶大支族選出戶珥个孫仔、烏利个孻仔比撒列。 3𠊎个靈已經充滿佢；𠊎有賜給佢聰明、才能、技術，會做各樣手藝， 4像設計圖案，用金、銀、銅製造各種用品； 5會刻愛鑲个寶石；能刻樹仔；還會其他各樣奇巧个手藝。 6𠊎又對但支族指派亞希撒抹个孻仔亞何利亞伯做佢个助手。該兜有奇巧技術个人，𠊎也有賜給佢等才能，使佢等會做𠊎所吩咐个各種用品： 7就係聖帳篷、約櫃、約櫃頂高贖罪个蓋仔、聖帳篷个所有用品、 8供桌㧯所有个用品、純金个燈臺㧯所有个用品、香壇、 9獻燒化祭个壇㧯所有个用品、洗盪盆㧯盆座、 10手工當幼个祭司聖服 — 亞倫㧯佢該兜孻仔執行祭司職務个時所著个聖服、 11聖油、㧯聖所所用个當香个香。這一切佢等一定愛全部照𠊎所吩咐个去做。」

守安息日

12上主吩咐摩西轉告以色列人，講： 13「你等一定愛守𠊎个安息日；因為這係你等㧯𠊎中間永遠个證據，表示𠊎 — 上主揀選你等做𠊎聖潔个子民。 14你等愛守安息日，因為這日係聖日。所有毋遵守、在這日照常去工作个人一定愛處死刑。 15你等六日做得工作，總係第七日係安息聖日，係獻給𠊎个；所有在安息日工作个人一定愛處死刑。 16以色列人愛世世代代遵守安息日，做永遠个約。 17這係以色列人㧯𠊎中間永遠个證據；因為𠊎 — 上主在六日內創造天地，在第七日停工歇睏。」

18上帝在西奈山頂對摩西講這兜話以後，就將兩垤石版交給佢；上帝用手指在石版頂寫下佢个誡命。

Currently Selected:

出埃及記 31: THV12Hdb

Highlight

Copy