哥林多後書 7
7
1親愛个朋友，既然𠊎等得到這兜應許，𠊎等就應該潔淨自家，除掉一切打垃圾身體㧯心靈个事物，用敬畏上帝个生活來達成完全个聖潔。
保羅个歡喜
2請你等愛大量兜仔接納𠊎等。𠊎等無做過對毋起人个事；毋識破壞麼人，也毋識批麼人。 3𠊎恁樣講，毋係責備你等。𠊎已經講過，𠊎等係樣般惜你等；𠊎等甘願同你等共生死。 4𠊎對你等盡有信心，盡誇獎你等，滿有安慰；在𠊎等一切患難中，𠊎大大快樂。
5來到馬其頓後，𠊎等還係無好休息。逐所在都有困難，外有相爭，內有著驚。 6總係，俾灰心失志个人得到鼓勵个上帝，使𠊎等因為提多來到就得到鼓勵。 7佢毋單淨人來，還㧯𠊎等講，佢樣般對你等得到鼓勵，還有，你等係樣般想念𠊎，樣般傷心，樣般迫切為𠊎辯駁；這一切攏總使𠊎得到還較大个歡喜。
8關係𠊎以前寫給你等个信仔，雖然害你等憂愁，𠊎也無後悔。𠊎知該封信仔害你等憂愁个時，盡毋過意；總係後來就無再後悔，因為𠊎看出你等係暫時憂愁定定。 9𠊎這下盡歡喜，毋係因為害你等憂愁，係因為憂愁致到你等悔改。上帝善用你等个憂愁，所以𠊎等所做个無傷害到你等。 10上帝所善用个憂愁會改變人心，使人得救；這係永遠毋會後悔个！總係，屬世界个憂愁會害人喪失生命。 11你等看，上帝樣般善用你等个憂愁，使你等樣般煞猛，又為自家辯駁，也顯出義个憤怒、驚心、切望、熱心，又刑罰不義！在各方面你等證明自家係清白个。
12所以，𠊎雖然寫該封信仔給你等，總係𠊎毋係為做毋著个人寫个，也毋係為受冤枉个人寫个。𠊎个目的係愛在上帝个面前，將你等對𠊎等个熱情表明出來。 13因為恁樣，𠊎等已經得到鼓勵。
毋單淨恁樣，提多个歡喜也使𠊎等加倍歡喜；因為你等大家幫助佢，使佢快樂。 14𠊎頭擺識在佢面前稱讚你等，你等並無使𠊎見笑。𠊎等一旦對你等講實話；共樣，𠊎等對提多誇獎你等个話也係實在个。 15所以，提多一想起你等大家係樣般順服，樣般用恭恭敬敬个態度接待佢，佢對你等个愛心就較深了。 16𠊎這下非常歡喜，因為𠊎做得對你等完全放心了！
Currently Selected:
哥林多後書 7: THV12Hdb
Highlight
Share
Copy
Want to have your highlights saved across all your devices? Sign up or sign in
© The Bible Society in Taiwan, 2012
All rights reserved
© 台灣聖經公會版權所有 2012
