Zakaria 10
10
Ku Tamatama palraingi ku apalribulane
1Luka kalarigarigane, lri kitubi numi ki Tamatama ku udale. Ku Tamatama lai lri paememe padaremedeme ki sanaka umawmawmase, lai ka salese sanaka umawma ki umawmase. 2Lu kitubi ku laumawmase si kivaga ki samiamiange si taratulrisi, ku nikitubalreane nicacapangane si draedrangelre ka vaga. Yakai kai laumawmase kai lu swacenge ki sipi, wadraedraedrangelre sikakathane numiane, kudra sasasane lini kadrwa ku paluludane. Ngwalai kikai, kai laumawmase lri ilatadre acaicaicali ka kadrwa ku taikaiyane, mia ki amuli ka kiu. Kwi lalasu lri ngwalai ku takakadrwane ku tamatama lini, lri kipadradresenge ku akwalriane.
3Ku Tamatama amia kai: Lri kalisiaku kudra ki lamaelane ka zuku si rathudu ki kawkawluli; lri pathavungaku liniane. Nakwane ki swa Yuda ka laumawmase; kwaku ka Tamatama ka abebeelengenga ki sanaka kwapingi lri sirapalaku liniane. Kwi lalasu lri ka amaninga kudra sapukwane ka tarakikaruburu ka rigili. 4Lri twalai liniane ikai ku maerece, la atamatama, latarasangililuku si lataradrekadrekase ki kwapingi kulri rathudu ki kawkawluli#10.4 “twalai ... kawkawluli” ku wahunyake madu iya kai “makanaelre kwidra amani ka wadrepete, latararathudu, latarasangililuku, si lataramarasikai ki kwapingi, lri karededele makanaelre katwase Yuda”.. 5Ku laumawmase ki swa Yuda lri mia ki garagarange ka lakwapingi pamalreme ki badha, lri miakau wadredre ki dae ka thuvugu ikadalranane. Kwi lalasu lri kagarange kikaruburu, asi lwiyane kwaku ka Tamatama lri ikai tapalra liniane, kwi lalasu lri pakeela ku pamalebe ki tarangurigi ki kwapingi ki badha.
6Lri pangiradhekanaku ki umawmase ki swa Yuda;
lri paakaciaku ki umawmase ki swa Iseraylri.
Lri kakalithaku liniane,
si iluku liniane makanaelre mubalriu.
Kwi lalasu lri mia ki kaiyana kiacilri nakwane.
Amaniaku ku Tamatama, ka Twaumase lini;
lri kilalraku ku inulri lini.
7Kai laumawmase ki swa Iseraylri lri maticaeme ku tacebeane mia ki garagarange ka kwapingi,
si mia ki waungungulu ku bava ku sakiaragai.
Ku lamwabaibalrithi liniane lri tarapulringau pikidremedreme ki kikai taakaciane;
kwi lalasu lri ngwalai ku takaungane ki Tamatama si kirararagai dralradralrai.
8Lri dawlaku ki kawkawluli,
si sarubu liniane.
Lri palribulaku liniane,
lai lri ngimia kunadruma ku takalrane ku umawmase.
9Adravane pasaravaku liniane ikai ki lakuni,
kwi lalasu lri ikai adaaili si ngulringalringau nakwane.
Kwi lalasu si lalalake lini lri sasipiane si panianiake,
lai lri karededele siwlri mubalriu.
10Lri patwaladhaku Izipiti liniane iluku mubalriu,
la patwalai Asiria iluku liniane mubalriu.
Lri pasutelradhaku liniane pikai Gileade si Lebanungu;
sanaka kadaengane lri suete ikai ku umawmase.
11Kwi lalasu lu ngukaikai ki akwalriane ka laveke,
lri lrumadhaku ki bikabiki,
ku kadravane Nile lri kameale.
Ku ngiakalrilrigu ka swa Asiria lri ngisasangate;
ku magarange ka swa Izipiti lri kawlrau ku puku.
12Lri pangiradhekanaku ki kawkawluli;
kwi lalasu lri sukubu nakwane, lai lri pasalaladha nakwane.
Ku Tamatama amia kikai pelaela.
Currently Selected:
Zakaria 10: NDV
Highlight
Share
Copy
Want to have your highlights saved across all your devices? Sign up or sign in
© The Bible Society in Taiwan, 2017
All rights reserved
© 臺灣聖經公會版權所有，2017
