Maak 6

Chenani Nazarɛt Tim Ta Fun Vɛ Yesu

(Mat. 13.53-58; Luk 4.16-30)

1Yesu fun a li dooni a bu kaali o sɛmbiri tɔha, o wa o gantɛl tiŋsi ta ni. 2Ba funɛ nyɛn dooni, ba hiisi wuzu fun wa tel. O fun kaali a la zu ba bar lagmi dɛ a biksi nara Koosa wɛ. Nara kinkan funɛ nyɛn doon a nu o biksi ti. O ya ba alaazibu kinkan. Ba funɛ pɛɛsi dɔŋa, “Leene baal nɔ pu sɛm nama maga? Ka leene o vɛɛn pu zima nɔ? Ka yɛrɛ o zi yaa ya a tum o tum zene nama? 3O laata funɛ ya bugilsal a nyɛn bar nɔ ni chenn? O niina laata ya Mɛri chenn? Jems, Josɛf, Judas awa Simɔn laata ya o niinbisa chenn? Ya wa o toosa laata lagmi nyɛnn?” Ba wa un wa fun lɛm dɔŋ ni, domi ba funɛ zim unu.

4Yesu fun ŋɔ ba, “Nara maga nyɛ Koosa witiina jirimau, amaa o sɛmbiri tɔhɔn nara wa o dam walɛ awa o lul, ba wara nyɛ un jirima.”

5O funɛ nyɛn dooni chene, o fun kpa o nin a sak wichɔɔrsi nara tam ni a tiibi ba. Chen duŋduŋnɛ o fun koti a tum. O wa fun koti a tum tum zene, domi ba se wa fun su un. 6O fun jɛri Yesu kinkan. O fun si a kaali tɔ wisa naa nyɛn dooni chen, a biksi nara Koosa wɛ.

Yesu Fun Tum O Nitumɛ Nara Fidalɛ Baa Biksi Nara

(Mat. 10.5-15; Luk 9.1-6)

7Doone o fun a lagmi o gantɛl tiŋsa nara fidalɛ ta a wa tum ba nara balɛlɛ, a nyɛ ba kpok di baa kiduŋni alizin tagna a li nara ni. 8O fun ŋɔ ba, “Ma wa kaa la, ma fiɛŋ ma zer buna a chi diwe, malɛ awa kapursa. 9Ma du natausa, amaa ma ta laari takta wisa lɛ a zer ma daŋkpalsa a la. 10Ma wa la tel tɔha, ma nyɛn dam bɛgim naa ba nyɛ ma di ma chɔ chen, hali a wuzu naa ma wa li tɔhɔn ti ni. 11Amaa ma wa zu tɔ digi ka tɔhɔn ti nara vɛ la ma duuli koo a vɛ nu nyɛ ma, ma li dooni, a piisi ma naasa hɛɛra a ta, chen ni ba zi zim di a li ba nɛɛ. O wa li ma ni.”

12Yesu funɛ biksi ba chene, ba fun si a kaali a la sɛm Koosa wɛ a nyɛ nara ni, a ŋɔ di ba gil ba tum tagna a burgi a tiŋ Koosa nyinbaan. 13Ba fun vɛɛn a duŋni alizin tagna a li nara kinkan ni, a zer nu tama a tiksi a du wichɔɔrsi ta ni a tiibi ba.

Chenani Koor Hɛrɔd Fun Kpu Jɔn

(Mat. 14.1-12; Luk 9.7-9)

14Nara tim maga fun a sɛm Yesu wɛ. Bɔnɛ fun ŋɔ di Jɔn, naa funɛ chaksi nara chen si o sou niu. Chendaha o koti a tum tum zene.

15Bɔnɛ fun kpa un a yir un Koosa witiina naa ba yir Ɛlaija. Bɔnɛ ka fun ŋɔ di o chi witiinsi naa Koosa tum chen digirɛ.

16Koor zen digi funɛ nyɛn doon. Ba funɛ yir un Hɛrɔd. O funɛ nu Yesu wɛ, o fun ŋɔ o titi ni, “Baal nɔ wa Jɔn naa la chaksi nara chen ya nibɛgimnɛ. Mu nyɛ ba fun teŋ o nyuha, amaa o bur si o sou niu.” 17Hɛrɔd fun a kpa o niinbe Filip haan. O haan ti sɔn funɛ ya Hɛrɔdias. 18Jɔn fun te ŋɔ un, “Chenani i ya chen, o wa wer.” O funɛ sɛm chen, Hɛrɔdias fun nyɛ Hɛrɔd tum nara ba la kpak Jɔn a tɔ un dɛ.

19Doone Hɛrɔdias fun a ha Jɔn a daŋ o kpu un. 20Hɛrɔd funɛ ɔm Jɔnu a la nyɛ un jirima, domi o funɛ zim di Jɔn ya nibin werere. Adaha o fun vɛ la nɔɔni di ba kpu un. Hali Jɔn sɛm ta fun muksi un kinkan, amaa o ha funɛ vɛɛn a daŋni o nu o sɛm tau.

21Hɛrɔd bun luli wuzu funɛ wa tel, o fun a yir o nihɛɛ zene awa o lanjimasa nihɛɛta awa nibin zene, ba naa maga nyɛn Galili ni di ba wa di o luli wuzu diwe. Ba fun wa di. 22Doone Hɛrɔdias nihabichɛla fun wa zu dɛ naa ba di diwe ta chen a gɔ a du ba. O gɔɔli ti fun ya Hɛrɔd awa o chɛnsi ta lɛmlɛm kinkan. Hɛrɔd fun pɛɛsi un, “Baŋnɛ ii daŋni? Kin naa maga ii daŋni n zi nyɛ hinu.” 23O fun hɛɛsi a ŋɔ, “Kin naa maga ii daŋni, ŋɔ min, n zi nyɛ hinu. Hali ii daŋni n pulum nɔ, n zi purigiu a nyɛ hin.”

24Nihabichɛl ti fun kaali o niin wati a la pɛɛsi un, “Baŋnɛ n kaa la sumi un?” O niin ti fun vaan na nyinbaan a ŋɔ di o la a la sumi Jɔn nyuha.

25O fun bur kaali koor ti wati lalaga a la ŋɔ un, “Mu sumi Jɔn nyuhurɛ di ba kpa du pɛŋ ni a wa nyɛ min.”

26O sɛm ta fun chɔk Hɛrɔd tuha kinkan. O wa fun bu koti a vɛ, domi o fun hɛɛsi o walɛ ta suwachak ni di o zi nyɛ un kundɔŋu. 27O fun a tum o lanjimasi ta digi di o la a la teŋ Jɔn nyuha a kpa wa. O fun kaali doonani ba fun tɔ un dɛ chen a la teŋ Jɔn nyuha, 28a kpa sak pɛŋ ni a wa nyɛ nihabichɛl ti ni. O fun kpa la nyɛ o niin ti ni. 29Jɔn gantɛl tiŋsi ta funɛ nu chen wɛ, ba fun la zer un a sogli.

Yesu Fun Kpa Diwe A Dɛɛsi Nara Tusugsa Nyuu

(Mat. 14.13-21; Luk 9.10-17; Jɔn 6.1-14)

30Yesu nitumɛ fidalɛ, ba naa o fun tum chen, bur wa a ŋɔ un kin naa maga ba tum awa kin naa maga ba biksi nara ta. 31Yesu fun ŋɔ ba, “Ma si. Ma nyɛ ya la nyabaan ti ya duŋduŋ a la hiisi tama.” Nara kinkan yaa fun a wa o wati a la bur, ba wa fun kpak bar digi a di diwe. 32Ba fun si a li a la zu arŋa a kaali nyabaan ti ba duŋduŋ.

33Ba funɛ la chene, nidamata fun a na ba a fun vaan zim ba a li ba tɔsi ni a kpa ba naŋgere a chɔ a te ba suwachak a la tel doon ka ba zi wa. 34Yesu funɛ wa li arŋ ti ni, o fun a na zɛmɛ kinkan ka ba chiŋi dooni. Ba funɛ chi piisisa a naa vɛ kpak nigbaŋirɛ. Ba wɛ fun ya un siki, ka o vɛɛn a biksi ba wu damata dooni. 35Ba funɛ nyɛn doon a vusi, Yesu gantɛl tiŋsi ta fun wa o wati a wa ŋɔ un, “Nha daŋni o chelu. Bar nɔ ya nyabaannɛ. 36Nyɛ zɛmɛ ta kila ŋmaana awa tɔ wisa a naa go bar nɔ a la yau diwe a di.”

37Yesu fun ŋɔ ba, “Ma titi nyɛ ba diwe ba di.” Ba fun pɛɛsi un, “Ei, yɛrɛ ya kaa ya na diwe a nyɛ nara nama ni ba di? Ya yau boroboro sidi tusugsa nyuu, o wa zi tel.”

38Yesu fun pɛɛsi ba, “Boroborosa ŋmɛnwa ma kpak ma wati bar nɔ? Ma la nyini.”

Ba fun la na a wa ŋɔ un, “Boroborosa nyuunwa awa nyinsa lɛ nyɛn doon.”

39O fun ŋɔ, “Chen weru.” O fun a nyɛ nara tima maga kani kɔ tota daha ni, 40pukpuk ni, puk digi kɔkwa, puk digi fumnyuu, puk digi kɔkwa, puk digi fumnyuu, hali a kaali. 41Doone Yesu fun zer boroborosa nyuun ta awa nyinsa lɛ a nyini buudaha ni a sumi Koosa a du a ni. O fun zer boroborosi ta a chɔksi a nyɛ o gantɛl tiŋsi ta ni di kpa bɔni nara tima. Ba fun kpa bɔni ba. O fun bukoo zer nyinsa lɛ ta a chɔksi a bɔni ba. 42Ba maga fun se puŋ. 43Ba funɛ se peti chen, Yesu gantɛl tiŋsi ta fun pa ba kidikaalɛ tima a su chenchisa fidalɛ. 44Ba naa funɛ se boroborosi ta chen, ba nibaala duŋduŋ funɛ ya tusugsa nyuunwa.

Yesu Fun Val Ni Daha

(Mat. 14.22-33; Jɔn 6.15-21)

45O fun ŋɔ o gantɛl tiŋsi ta ni di ba la a la zu arŋa a la ji bɛɛŋ ti jibaŋ kinkin ti a la Bɛtsaida ka o ta nara tima nyinbaan ni a wa. 46Ba fun kaali ka o ta nara tima nyinbaan ni a kaali kuŋkule nyuuna bar nyɛni di o la sumi Koosa. 47Dusum funɛ wa biri, Yesu duŋduŋ fun a nyɛn jibaŋ ti ni ka o gantɛl tiŋsi ta fun a nyɛn arŋ ti ni a li bɛɛŋ ti bambaan ni. 48O fun na ba ka peha mo ba a li ni ti ni ba luk ku jibaŋ ti jili. O funɛ wa ya zimal hɛɛta yeligi saha, Yesu fun si a val ni daha ni a la ba wati a daŋ o gali ba ni. 49Doone ba maga fun a na un ka o val ni daha ni. Ba fun kpa un a yir lɛlɛ. 50Hansura fun kpak ba. Ba fun a huusi kinkan.

Yesu fun ŋɔ ba, “Ma ta ɔmi. Minnɛ. Ma nyɛ ma bara sɔɔni.” 51O fun wa zu arŋ ti a gbaari ba ni. Saha naa o fun wa zu arŋ ti, pe ti fun gil. O fun ya ba alaazibu a kaali a maga. 52O funɛ ya ba alaazibu chen, domi ba fa wa zim chenani Yesu fa kpa boroborosi ta a nyɛ zɛmɛ ta ni chen.

Yesu Fun Tiibi Wichɔɔrsa

(Mat. 14.34-36)

53Ba fun la ji jibaŋ kinkin ti a fun la tel tɔhɔn naa ba yir Gɛnɛsarɛt a kpa arŋ ti a vɔu dooni. 54Yesu funɛ wa li arŋ ti tuhu ni, nara ta fun vaan a zim un. 55-56Yesu yaa fun gba a la tɔ zene awa tɔ wisa awa ŋmaana. Ba yaa funɛ nu di o wau, ba chɔ kaali ba damsa a la kpa ba wichɔɔrsa a du amaŋkasi ni a kaali yawa a la sumi un di o nyɛ wichɔɔrsi ta gbaŋsi o takta nɔ, chen ni ba zi na alaafɛu. Ba naa maga funɛ gbaŋsi o takta ti nɔ, ba fun na alaafɛ.

Currently Selected:

Maak 6: tpmNT

Highlight

Copy