Mathayo 15

1Ku bɔ Parithai kene dugɛɛr enɔŋ Yecu ne Jeruthalem, ku thiecki, 2Yi yeŋo ye kɔckuk piɔceke wel ke roordit thɛɛr doony? Ne ke cik kek ye piny te ciɛm kek. 3Go dhuk thiec keek, Ye yeŋo ye we loŋ de Nhialic doony eya ne wel thɛɛrkuɔn? 4Nhialic ee jam, Ye yee wuur theek ku moor; ku, Ye ran ye wun jaam arac ka man, ke ne thou. 5Ku we ye jam, Wuɔ na yook raan wun ka man, Ye kee ya ba yiɛn yi aca miɔc Nhialic, 6ke kaci wun ka man ye dhiil ne thɛk. We ci wɛt de Nhialic cɔk ye ke piɛlic ne wel thɛɛrkuɔn. 7We ye dudhuum, ee cii Yithaya nyiɛc luel ne week, jiɛm,

8Ye keekɔcke aaye roth cuɔt ɣa ne keliep, ku yiki ɣa noom ne kethook;

Ku kaamec piɔth enɔŋ ɣa.

9Ku kaaye ɣa door ne ciɛlic,

Ku ka yee kek ke weet aaye looŋ ke raan.

10Ku cɔɔl duut ku yook, Ye piɛŋka, ku muɔkka; 11Acie ke ye lɔ ne thok e ye raan cɔk rac; ee ke ye bɛn bei thok, yenekee raan cɔk rac. 12Go kɔcpiocke bɛn, ku yookki, Yi nyic Parithai e ke ci piɔth rac enhia piŋ kek yewɛte? 13Go dhuk jiɛm, Ye wal ebɛn wal kene com ne Awa tɔ nhial, abi wɛc bei. 14Pɛleke: aaye ŋɔɔr e ke ye coor. Ku na ye cɔre cɔre ŋɔɔr, e kaaye lony adhum kedhia. 15Go Petero dhuk yook, Ye lɛkne wɔ yeparabole. 16Go thiec, Ye ŋuɔtka ke kɛnka guɔ dot eya? 17Cakka ye ŋem, ke ke ye lɔ thok ye lɔ yiɛɛc ku le nyaai? 18Ku ka ye bɛn bei ne thok, aaye bɛn bei ne piɔuic, ku keeka ye raan cɔk rac. 19Ka ye bɛn bei ne piɔuic eke, tɛŋ rac, ku tir, ku kɔɔr de roth de yi moc ke tiik, ku bɛɛl, ku kuel, ku rieth, ku lɛɛt. 20Keeka ye raan cɔk rac: ku kacie ciɛm ke raan ken piny e ye raan cɔk rac.

21Go Yecu jaal eeti, nyiɛi rɔt leer piny de Turo ku Thidon. 22Ku ŋemka, tiŋ toŋ de Kanaan ee bɛn bei yepinye, ku coot, jiɛm, Ye kace piɔu enɔŋ ɣan, yin Bɛnydit, wen de Dabid; nyandie ayee jɔŋ rac yɔŋ areet. 23Go ciɛn wɛt dhuk e. Ku bɔ kɔcpiocke ku lɛŋki, jamki, Yi ciec, ee wɔ kuany cok ke cot. 24Go dhuk, jiɛm, Ye ɣan ci tuɔc amɛl ci maar ke dhien de Yithrael kepɛc. 25Go tiik bɛn, ku door, jiɛm, Ye Bɛnydit, kony ɣa. 26Go dhuk, jiɛm, Ye kaci piath bi cuin de mith ya loom ku cuete jɔk. 27Go jam, Ye kee yic, Bɛnydit, jɔk aaye thethuei ye loony piny ne ageen ke banyken nhiim cam. 28Go Yecu dhuk, yook, Ye tiik, gamdu kadit: ke de piɔndu abi luɔi yi. Ku go nyande pial ne yethane.

29Go Yecu jaal eeti, ku ɣeet te thiak ke bar de Galili; ku leer ne kuur nom, le reer. 30Go dun dit bɛn enɔŋ en kene ŋot, ku coor, ku kɔc cin thook, ku kɔc nɔŋ ɣɔn ci tɛm ne kegup, ku kɔc juec kɔk; goki ke taau ne yenom; go ke cɔk dem. 31Go duut gai, te cik kek kɔc cin thook ŋem e ke jam, ku kɔc nɔŋ ɣɔn ci tɛm e ke piath, ku ŋot e ke cath, ku coor e ke yiɛn: goki Nhialiny de Yithrael noom.

32Go Yecu kɔcpiocke cɔɔl, ku jiɛm, Ye an kɔc piɔu ne duut, ne ke ci kek tɔ kene ɣan ne akol keediak, ku cin ke camki, Ku kaacaa ciec ne cɔk, kɛleke bi lɔ kuk dholic. 33Go kɔcpiocke yɔɔk, Yi buk monoi juec yok eno roor eene, bi dun dit kuɛth? 34Go Yecu ke thiec, Ye naŋka monoi keede? Goki, Yi kaaye dherou, ku rec thii keediak. 35Go duut yɔɔk bi nyuc piiny. 36Ku loom monoi keedherou ku rec, ku leec, ku wɛɛk ke, ku yin ke kɔcpiocke, bik ke yiɛn duut. 37Goki cam kedhia, kuethki. Ku jɔlki thethuei ci both kuany ne thiaŋ akuɔp keedherou. 38Ku kɔc eke ciɛm aaye bianabur ŋuan, ke cin diar ku mith. 39Go duut cɔk puɔk, ku leer riɛi, bii piny de Magdala.

Currently Selected:

Mathayo 15: LEKJOT

Highlight

Copy