San Mateo 14

Suꞌva kuu te ndixiꞌi ra Juan ra sakuchi yuvi

1Ra suvi mii tiempo ña ndixaꞌan Jesús ñuu ra ke kundaa ini ra rey Herodes, ra xaꞌndia chiñu chi Galilea xaꞌa Jesús, ña ^xa ra kuaꞌa ni ña xituꞌun. 2Ra saa ndikaꞌan ra xiꞌin ndia xachiñu nuu ra kachi ra saa:

―Ra kaꞌan na kuu Jesús kan ra süvi vi ra, chi ra Juan ra sakuchi yuvi va kuvi ra ndatiaku. Ña kan ke vaꞌa iyoo ni ndiee ra, ña xa ra ña xituꞌun ―kachi ra xiꞌin ndia.

3Saa chi mii ra rey Herodes kan kuvi ra xaꞌndia chiñu ña ndixaꞌan ndia tiin ndia ra Juan, ra kuꞌni ndia ra xiꞌin yoꞌo kàà, ra chikaa ndia ra veꞌe kàà, saa chi ndikaꞌan ra xaꞌa kuachi ña ^xa ra Herodes xiꞌin ña Herodías xanu ra, ña yasiꞌi ra Felipe, ñani ra. 4Saa chi xa ta yachi vi ke ndikaꞌan ra Juan kan, xiꞌin ra Herodes xaꞌa ña väꞌa ndixa ra, saa chi ndakiꞌin ra ña Herodías, yasiꞌi ra Felipe, ñani ra, ra nduu ña yasiꞌi va ra. 5Ra xaꞌa ña kan ke kuni ra Herodes kan ña kaꞌni ra ra Juan, ndi su ndiyuꞌvi va ra nuu na ñuu; saa chi ^kandixa takundiꞌi va na ra Juan kan, ña kuu ra ra kaꞌan ndoso tuꞌun yuꞌu Ndioxi. 6Ndi su ndixaa iin kii ña ndatava na viko ra rey Herodes ña ndaxinu ra kuiya, saa ra ndixaa va ña loꞌo kuáa̱n seꞌe ña Herodías kan nditaxaꞌa ña nuu takundiꞌi ndia ndee ndatava viko kan, saa ra kusii ka vi ini ra Herodes xiꞌin ña, 7ra saa kindoo ra, ña taxi ra ndia ndia ka ñaꞌa ña nduku ña nuu ra ndaꞌa ña. 8Ra te kundaa ini siꞌi ña loꞌo kuaan kan, ra saa chikaa yuꞌu ña ñá, ra saa ndikaꞌan ña loꞌo kuaan kan xiꞌin ra Herodes kachi ña saa:

―Kuni yu ña na kundikaa xini ra Juan ra sakuchi yuvi ini iin koꞌo ra taxi kun ña ndaꞌa yu ―kachi ña xiꞌin ra.

9Ra te xini soꞌo ra rey Herodes tuꞌun kan, saa ra kusuchi ni ini ra, saa chi xini takundiꞌi va ndia ndee kan ña kindoo ra taxi ra ndia ndia ka mii ñaꞌa ña nduku ña loꞌo kan nuu ra ndaꞌa ña, ra xaꞌa ña kan ke ndinïꞌi ka ra ni ke sa ra, ndia saa ra xaꞌndia ra chiñu nuu ndia xachiñu nuu ra, ña na ndataxi ndia xini ra Juan ndaꞌa va ña. 10Ra saa ndixaꞌan ndia xachiñu nuu ra Herodes ini veꞌe kàà nuu ndikaa ra Juan kan, ra xaꞌndia ndia sukun ra, ta kuꞌva kachi mii ra Herodes xiꞌin va ndia. 11Ra saa chikaa ndia xini ra Juan ini iin koꞌo, ra niꞌi ndia ña xaa ndia ndataxi ndia ndaꞌa ña loꞌo kuaan kan, ra saa ndixaꞌan ña ndataxi ña xini ra Juan ndaꞌa siꞌi va ña.

12Ra saa ndixaꞌan ndia xitaꞌan xiꞌin ra Juan, ra ndakiꞌin ndia iki kuñu ra ninduxin va ndia. Ra te ndiꞌi saa ndixaꞌan ndia ndatuꞌun ndia xiꞌin Jesús xaꞌa ña kuu kan.

^Sakuxi Jesús uꞌun mil yuvi

13Ra ta kundaa ini Jesús ña ndixiꞌi ra Juan, ra saa nandaa ra ini iin barca loꞌo ra ndakiꞌin ra kuaꞌan ra iin iku nuu köo yuvi. Ndi su ta kundaa ini yuvi kan chi nuu kuaꞌan ra, ra saa kee na ñuu na ra taxi ndikun na kuaꞌan xaꞌa na sata va ra. 14Ra te nuu Jesús barca loꞌo kan, ra xa iin ndandaa va kaa xiꞌin yuvi xini ra, ra saa kundaꞌvi ka vi ini ra xini ra na, ra sandaꞌa ra kuaꞌa ni na xiꞌi na ndixaa xiꞌin yuvi kan. 15Ra te xa kuaꞌan kuaa, ra saa kuyachin ndia itaꞌan xiꞌin Jesús, ra ndikaꞌan ndia xiꞌin ra kachi ndia saa:

―Tata, ndiayu taꞌan xiꞌin yuvi yoꞌo ra na kuꞌun na ndia ndia ka mii ñuu vali ña ndoꞌni yachin yoꞌo, ra na sata na ñaꞌa kuxi na, chi yoꞌo, ra iku nuu köo yuvi va kuvi ña, ra xa kuaꞌan kuaa ni va ―kachi ndia xiꞌin ra.

16Ra saa ndakuiin Jesús kachi ra saa xiꞌin ndia:

―Xiniñüꞌu kuꞌun na kan vi, chi na taxi ndoꞌo ña kuxi va na ―kachi ra xiꞌin ndia.

17Saa ndakuiin ndia kachi ndia saa:

―Tata, köo kuaꞌa ñaꞌa niꞌi ndi, chi takua uꞌun va kuvi ixta, ra uvi kuvi tiaka va niꞌi ndi ―kachi ndia xiꞌin ra.

18Ra saa ndikaꞌan Jesús xiꞌin ndia kachi ra saa:

―Taxi ndo ña ndaꞌa yu ―kachi ra xiꞌin ndia.

19Ra saa xaꞌndia ra chiñu nuu yuvi kan ña na ndakundee vii na nuu itia kuii kan, ra saa kiꞌin ra uꞌun saa ixta kan, xiꞌin uvi saa tiaka kan, ra ndoniꞌi ra nuu ra ndivi, ra ndataxi ra tixaꞌvi ndaꞌa Ndioxi xaꞌa ña, ra te ndiꞌi, saa taꞌvi ra ixta kan taxi ra ndaꞌa ndia itaꞌan xiꞌin ra, ra saa ndataꞌvi ndia kan ña xiꞌin yuvi kan. 20Ra xixi takundiꞌi va yuvi kan ndiakua nditiandiaa ini na. Ra te ndiꞌi xixi na, saa ndakaya ndia itaꞌan xiꞌin Jesús ñaꞌñu ña nindoo ndoso, ra uxi uvi ka tuká sakutu ndia xiꞌin ña. 21Ra yuvi na xixi kan, ra kuꞌva uꞌun mil kuvi niña tiaa va, ra ndiäꞌvi vi na siꞌi, xiꞌin na kuachi vali.

Vaꞌa xika xaꞌa Jesús nuu mini

22Te ndiꞌi kuu ña yoꞌo, saa xaꞌndia Jesús chiñu nuu ndia itaꞌan xiꞌin ra, ña na nandaa ndia ini itun loꞌo tu xika nuu mini, ra xa na kunuu va ndia kuꞌun ndia chi inka xiyo yuꞌu mini kan, ra nani saa na ndiayu taꞌan ra xiꞌin yuvi kan ra saa vi ke kundikun ra kuꞌun ra sata ndia, kachi ra xiꞌin ndia. 23Ra te ndiꞌi nindiayu taꞌan ra xiꞌin yuvi kan, ra saa ndaa mituꞌun saa ra iin iku ña kaꞌan ra xiꞌin Ndioxi, ra nani saa kuu ra saa ra kuu ñuu va. 24Ra barca tu ñuꞌu ndia itaꞌan xiꞌin Jesús kuaꞌan ndia, ra xa nditaꞌvi sava va nuu kuaꞌan nu nuu tiañuꞌu kan, ra iin xiꞌin ña nduxa va kuaꞌan itu loꞌo kan xiꞌin ndia, saa chi tachi ra ndiee ni kani ña ra chi nuu ndia suꞌva va ke kani ña vaxi ña. 25Ra te xa kuaꞌan kuni tuvi, saa xika xaꞌa Jesús nuu tiañuꞌu kan vaxi ra nuu ndia. 26Ra te xini ndia itaꞌan xiꞌin Jesús ña xika xaꞌa ra vaxi ra nuu tiañuꞌu kan, saa ra tiaa ni ndiyuꞌvi ndia, ra iin kokoꞌo nindaꞌyu ndia, kachi ndia saa:

―¡Nima va ke vaxi kaa! ―kachi ndia.

27Saa ra, ndikun ndikaꞌan va Jesús xiꞌin ndia kachi ra saa:

―¡Yayaa koo ndo! ra ¡Kuayüꞌvi ndo!, chi yuꞌu va kuvi ra ―kachi ra xiꞌin ndia.

28Saa ndakuiin ra Pedro kachi ra saa xiꞌin Jesús:

―Tata, tu ndixa suvi yoꞌo kuvi ra, saa ra, taxi ndiayu ña na kaka xaꞌa yu nuu tiakuii yoꞌo, ra xaa yu niꞌi taꞌan yu xiꞌin kun ―kachi ra xiꞌin Jesús.

29Ra saa ndikaꞌan Jesús xiꞌin ra Pedro kachi ra saa:

―Naꞌa ―kachi ra xiꞌin ra.

Saa ra ndikun nuu ndixa va ra Pedro barca loꞌo kan, ra ndakiꞌin ra xika xaꞌa ra kuaꞌan nuu mini kan, ña ndakutaꞌan ra xiꞌin Jesús. 30Ndi su ta xini ra Pedro ña ndiee ni kani tachi, saa ra ndiyuꞌvi va ra; saa ra xaꞌa kuandee va ra kaꞌa mini kan, saa ra iin kokoꞌo nindaꞌyu ra kachi ra saa:

―¡Tata, sakaku yuꞌu! ―kachi ra xiꞌin Jesús.

31Ra saa ndatiin Jesús ndaꞌa ra, ra ndikaꞌan ra xiꞌin ra kachi ra saa:

―Loꞌo ni va kandixa kun yuꞌu, Pedro. ¿Nichuun ^xa uvi ini kun? ―kachi ra xiꞌin ra.

32Ra saa ta nandaa ndia ini barca loꞌo kan, saa ra ndikun ndixkuiin va tachi kan, ña kini ni kuu ña. 33Saa ra ndia ñuꞌu ini barca loꞌo kan, ra ndikun ndakusiti va ndia nuu Jesús, ra xaꞌa ndia ^ndasakaꞌnu ndia ra kachi ndia saa:

―Seꞌe Ndioxi ku ndixa va yoꞌo ―kachi ndia xiꞌin Jesús.

Sandaꞌa Jesús kuaꞌa ni na ñuu Genesaret

34Ra te ndakoyo ndia yuꞌu mini kan, ra saa ndixaa ndia ñuu Genesaret. 35Ra te ndakuni na ñuu kan Jesús, ra saa tiꞌvi na chiñu ndixaꞌan iinii kuvi ñuu ña ndoꞌni kan, ña ndatuꞌun na xiꞌin na xaꞌa Jesús, ra saa xaꞌa na xaa na xiꞌin na xíꞌi̱ nuu ra, 36ra xakundaꞌvi ka vi yuvi kan nuu Jesús, ña na taxi ra tiandiaa loꞌo ndaꞌa na xíꞌi̱ kan yuꞌu tikoto ña ndixi ra; ra takundiꞌi na xíꞌi̱ na nditiandiaa ndaꞌa yuꞌu tikoto ra, ra nduvaꞌa ndixa va na.

Currently Selected:

San Mateo 14: mxvNT

Highlight

Copy