MATIYU 20

1Ka Yisa daa laa n‑yɛli, ni, “Arizana naam yɛla ŋmanni la nŋɔa#:- Yiridaansɔ n daa bɛ ni, ka u daa daŋŋi asuba n‑doaai n‑yi na, ni u ti bɔ tuntumniba ni ba tum u puu tuma n‑ti u. 2U daa nya seeba, ka daa sakki ni u nin yɔ ba sɔkam dabsimunni tuma ligri, ka daa kyɛ ka ba kyaŋŋi u puu ma ni. 3Ka u daa laa n‑yi na kurigu awai saha nti kpɛ daa ni n‑nya ninvugseeba ka ba kpalim n‑zɛya n‑ka tuma. 4Tɔ, ka u daa yɛli ba, ni, ba gba kyɛma nti tum u tuma maa, ka u ti yɔ ba din tuusi. 5Ka ba daa sakki ka kyaŋŋi. Ka u daa laa n‑yi na agbaa saha, ni kurigu ata saha yaasa, n‑niŋi lala. 6Di daa ti paai kurigu anu saha, ka u daa laa n‑yi na n‑kpɛ daa ni ka seeba kpalim n‑zɛya ka ka tuma. Ka u daa yɛli ba, ni, ‘Bɔ n niŋi ka ya kpalim n‑zɛ kpa yɔriyɔri, halli ni zaanoori saha wa?’ 7Ka ba daa labsi n‑yɛli u, ni, ‘Sɔ na bu zaŋŋi ti ni ti tum.’ Ka u yɛli ba, ‘Tɔ! Ya gba kyɛma m puu ni nti tum ka n nin yɔ ya.’ 8Ka zaanɔyuŋŋu saha ŋɔn daa ti paai, puu maa daana daa yɛli u tuma zuguraana, ni, u kyɛma nti booli u tuntumniba na ka u ti yɔ ba ba ligri. Ni, u daŋŋma m‑piili ban kpalim nyaaŋŋa la halli nti paai asuba dima maa. 9Ka dizugu baseeba ban daa kyaŋŋi kurigu anu saha la daa kyɛ na nti deaai dabsimunni tuma ligri. 10Tɔ; ka di daa ti paai asuba dima maa, ka ba daa teesi, ni, ba nin deaai ligri n‑gaari banla dina, amaa ba gba daa deaai dabsimunni tuma yoori. 11Ka ban daa deaai lala maa, ba daa nyurimni ba kparima n‑niŋi puu maa daana, 12n‑yɛtti, ni, ‘Ban kpalim nyaaŋŋa wa bu tum hoo tirima ŋɔn tum seem la. Saha beela kɔkɔ ka ba tum, ka tirima mun tum asuba halli ni yuŋŋu saha wa ka di wum ti pam; ka ti zaa deaai yoori yummu!’ 13Ka u daa labsi n‑yɛli ba ninvugsɔ, ni, ‘N zɔa, wumma! M bu yɔmsiri i ni. I da bu sakki, ni, i ya deaai dabsimunni tuma ligri? 14Zaŋŋma i ligri n‑kyaŋŋi! M boori n zaŋŋi n‑tisi ŋɔn kpalim nyaaŋŋa wa hoo man zaŋŋi n‑ti i. 15Mani n su ligri maa. I bu sakki ni n zaŋŋi m mammantoori bunni n‑niŋi man boori seem? Bee, i zabri ma nyuuri n nirilim tuma zugu?’ ” 16Ka Yisa daa yɛli, “Dizugu ban daŋŋi tooni nin ti kpalim nyaaŋŋa, ka ban kpalimni nyaaŋŋa mun nin ti daŋŋi tooni.”

17Yisa ŋɔn daa ti wa Gyɛrusalɛm, u daa zaŋŋi u nyaandɔliba pii ni ayi maa n‑yi kpaŋŋa n‑yɛli ba, 18ni, “Ya wumma: ti wa la Gyɛrusalɛm tiŋŋa, bɛni ka ba nin ti zaŋŋi man Ninsaala Bii n‑niŋi gyeeŋŋu toondaandima ni karimbadima nuusi ni. Ban nin ti kari n sariya n‑zaŋŋi ma taalli, ni, n sumni kum, 19ka naayi zaŋŋi ma n‑niŋi ban pa ti butiri niriba la nuu ni, ni ba maali ansarisi, ka feebi ma ka ku ma. Amaa daba ata daari n nin yisigi kum ni.”

20Ka Zɛbidii pɔ'a daa mari u biisi, Gyeemsi ni Gyɔni, n‑kyɛ Yisa saani na nti gbaani n‑ti u ka susiri bunseelli u saani. 21Ka u daa boosi u, ni, “Bumbɔ n nyɛ di?” Ka pɔ'a maa yɛli u, “Ni, i kyɛ ka m biisi ayi wa ti zinni n‑tabli i tooni, i nudirigu ni i nuzaa ziiya, i naam zɔŋŋu puuni.” 22Ka Yisa daa labsi n‑yɛli, ni, “Ya bu mi yan susiri seelli maa. Ya nin toaai n‑nyu wahala kɔbɛseaa ka man ya n‑nyu wa?” Ka ba labsi n‑yɛli u, ni, ii, ba nin nyaŋŋi. 23Ka u yɛli ba, “Ya siri nin ti nyu n wahala kɔbeaa la, amaa mani bu su noori ni n wulisi ban nin zinni n nudirigu bee n nuzaa zii maa. Di nyɛ la : m Ba Naawunni n ya n‑yiisi niriba maa, ka u pun maali ba ziziisi siri n‑zaali ba.” 24Tɔ, ka u nyaandɔliba ban kpalim piiya la ŋɔn daa ti wum lala, ba suuri daa yisigi n‑niŋi mabiisi ayi wa, Gyeemsi ni Gyɔni. 25Dizugu Yisa daa booli ba ni ba la'amma taaba na, ka yɛli ba, “Ya mi ninvugseeba ban bu gyeemni Naawunni la yɛla, ni, ba saani ka ban su ba fukumsi mari la yiiko ka niŋni putoo n‑tiri ba, ka ba kpamma su ba yɛla ni kpeeŋŋu. 26Amaa di pa lala ya saani. Ya sɔ yi boori tibsim, see ka u tumni n‑tiri ya daadam wa zaa. 27Ya sɔ yi boori ni u leebi toondaana, see ka u leebi ya zaa daabri. 28Kaman man Ninsaala Bii bu kyɛ na ni ba tumni n‑suŋŋni ma, amaa n kyɛ na ni n ti tumni n‑suŋŋni niriba, ka zaŋŋi n nyɔvuri m‑pa talima ka niriba pam nya tiliginsim.”

29Yisa ni u nyaandɔliba maa ŋɔn daa ti ya yi Gyɛrikoo tiŋŋa maa, daadam pam daa dɔli ba. 30Di saha ka zoomma ayi daa zi soori maa gbiriŋŋu, ka daa ti wum, ni, Yisa n gatta, ka ba daa tasi n‑yɛli, ni, “Nyin NaaDauda bii wa, zɔm ti namboo!” 31Ka daadam maa daa nyikki ba n‑yɛli, ni, ba sina ba vuuri. Amaa ba daa laa n‑tasi pampam m‑paasi, ni, “Nyin NaaDauda bii wa, zɔm ti namboo!” 32Ka Yisa daa zaani, ka booli ba na, nti boosi ba, ni, “Bɔ ka ya boori ni n niŋi n‑ti ya?” 33Ka ba daa yɛli u, ni, “Ti Bapira, ti boori la i neaai ti nini wa ka ti nyara.” 34Ka Yisa daa siisi ba nini maa, ka di saha ka a daa neaai ka ba nyara, ka ba daa dɔli Yisa di daari maa.

Currently Selected:

MATIYU 20: maw

Highlight

Copy