GYƆNI 20

1Din daari asuba pinipini - Alahadaari n‑daa la - halli beoo ŋɔn daa na bu neaai la, Mariama, Magdala tiŋŋa pɔ'a la, daa kyaŋŋi dabɔri maa ni. Ka u daa ti nya ka kugri maa laa n‑ka dabɔri maa noori ni. 2Ka u daa zɔ n‑labi Saimoon Piita saani na, ŋɔn ni Yisa nyaandɔla sɔa, dɔsɔ Yisa ŋɔn daa wuri pam la. M‑paai ba na nti yɛli ba, ni, “Ba zaŋŋi ti Dugma n‑yiisi u dabɔri maa ni na, ka ti bu mi ba n zaŋŋi u n‑niŋi seela!” 3Ka Piita ni nyaandɔla wa daa doaai n‑kyaŋŋi dabɔri maa ni. 4Ba bayi maa daa zɔra, ka ŋɔnla daa zɔ n‑gaari Piita n‑daŋŋi u tooni m‑paai dabɔri maa na. 5U daa kunni n‑nya tampeela maa ŋɔn dɔya, amaa u daa bu kpɛ dabɔri duu maa ni. 6Di saha ka Piita daa kari u nɔba ka naayi paai na nti kpɛ dabɔri duu maa ni. Ŋɔn gba daa gɔsi n‑nya tampeela ka a dɔya, 7ka daa laa n‑nya kyinkyinseaa ba n daa zaŋŋi m‑pili Yisa zugu la - kana mun daa kpabi ni n‑dɔ kpaŋŋa sa, ka daa ka tampeela maa ziiya. 8Di saha maa ka nyaandɔla la gba daa kpɛa - sɔ ŋɔn daa daŋŋi tooni m‑paai bɛni la. Ŋɔn mun daa gɔsi n‑nya, ka daa niŋi yɛdda. 9(Ya bu nya? Ba daa na kur bu baŋŋi Litaafi maa ŋɔn daa yɛli seem la, ni, see ka u doaai kum ni.) 10Ka ba bayi maa daa labi n‑kuli.

11Mariama mun daa kpalim n‑zɛ la dabɔri maa zii n‑kumna. U daa kur kpalim n‑kumni maa, ka kunni n‑gɔsi dabɔri duu maa puuni 12nti nya malaakadima ayi ka ba yɛ neenpeela n‑zi n‑tabi Yisa ningbiŋŋu maa ŋɔn daa dɔ seela. Ba yinni n daa zi Yisa zugu ya'ari ni, ka ŋɔnla mun daa zi u gbaya ya'ari. 13Ka ba daa boosi Mariama n‑yɛli, “Pɔ'a, bɔ n niŋi ka i kumna?”; ka u daa labsi n‑yɛli ba, ni, “Ba zaŋŋi la n Dugma, ka m bu mi ba n zaŋŋi u n‑niŋi seela.” 14Di saha ka u daa ŋmaligi u nyaaŋŋa nti nya Yisa ka u zɛya, amaa u daa bu baŋŋi, ni, Yisa nla. 15Ka Yisa daa boosi u, ni, “M ma, bɔ n niŋi ka i kumna? I boori la sɔ ziiya, bee?”: ŋɔn mun daa teesi, ni, gaadi maa daana n nyɛ u, ka dizugu u daa yɛli u, ni, “M Bapira, nyin yi zaŋŋi u m‑bakki, nyin wulisi ma ka n kyaŋŋi nti zaŋŋi u.” 16Ka Yisa daa yɛli u, “Mariama!”, ka ŋɔn mun daa ŋmaligi u saani nti yɛli u, ni, “Rabooni!” (Hibruuli nla, ka di gbinni n nyɛ, ni, ‘N Karimba!’). 17Ka Yisa daa yɛli u, ni, “Di siisiri ma, dama n na bu labi m Ba maa saani. See ka i kyaŋŋi nti yɛli m mabiisi maa, ni, n doaaya ka n ya n‑labi m Ba Naawunni saani, ka u nyɛ la ba gba Ba Naawunni.” 18Di saha ka ŋɔn Mariama Magdala la daa kyaŋŋi nti yɛli Yisa nyaandɔliba maa, ni, “Mani n nya ti Dugma!”, ni, u daa yɛli anŋɔ zaa n‑ti u.

19Di dabsiri maa, Alahadaari maa, zaanoori saha, ka Yisa nyaandɔliba maa daa la'am taaba n‑kpɛ duu ni nti kpari dunoori maa, dama ba daa zɔri la Yɛhudiya dima maa dabeem. Di saha ka Yisa daa kpɛ na nti zaani ba sunsukkuni m‑puusi ba. 20Ka ŋɔn daa puusi ba n‑naai maa, u daa zaŋŋi u nuusi ni u pulugri n‑wulisi ba. Di saha ka u nyaandɔliba maa sufu daa maai pam, ni, ba nyaya, ni, ba Dugma nla. 21Ka Yisa daa laa m‑puusi ba yaasa, ka daa yɛli ba, ni, “M Ba ŋɔn daa tum ma na seem la, lala ka n ya n‑tum yarima gba.” 22Di nyaaŋŋa ka u daa vuusi vuusim n‑ti ba ka yɛli, “Ya deaam Sii Kasi la. 23Ya yi ti kyɛ sɔ tumbeeri taalli m‑pɛŋŋi u, di daama siri nin nya kyɛ-m‑pɛŋŋi: ka yan mun yi kyɛ ka sɔ taalli ti kpalim n‑dɔli u, di daama nin kpalim m‑mari taalli.”

24Tɔ, ka Tɔmaasi daa ka bɛni, ban daa pa sɔ yupaa, ni, ‘Gyeaa la’: Yisa ŋɔn daa kpɛ ba saani na sahanseaa la u daa ka ba saani. 25Sahanseaa ka u nyaandɔlitaaba daa ti nya u nti yɛli u, ni, “Ti nya ti Dugma!”, ŋɔn Tɔmaasi daa gyɛrigi n‑yɛli, “M mammaŋŋa yi bu nya u nuusi ka kpaasi daalima m bɛ a ni, halli n‑laa n‑zaŋŋi n nubila wa n‑tum u nuusi dansi wa ni, ka zaŋŋi n nuu n‑kpeesi u pulugri la daŋŋa ni gba - ay! di yi pa lala n ku niŋi yɛttɔ'a maa yɛdda.” 26Ka di daa niŋi dabsa anii ka ba daa maali n‑la'am n‑kpɛ duu ni, ka Tɔmaasi mun gba daa bɛ ba saani. Ba daa laa n‑kpari dunoori, ka Yisa daa laa n‑kpɛ na nti zaani ba sunsukkuni m‑puusi ba. 27Di saha ka u daa yɛli Tɔmaasi, ni, “Tɔ! zaŋŋi i nubila n‑tum na n‑nya n nuusi, ka zaŋŋi i nuu n‑kpeesi n pulugri wa daŋŋa wa ni! Ka di laa n‑za'asiri yɛdda niŋbu, amaa ka niŋi yɛdda.” 28Ka Tɔmaasi daa labsi n‑yɛli u, ni, “Nyin n nyɛ Naawunni n‑ti ma: n Dugma n nyɛ i!” 29Yisa mun daa yɛli u, “I nini n nya maa, ka di zugu ka i niŋni yɛdda, bee? Zugsuŋŋu siri nin bɛ ni n‑tiri seeba ban bu nya amaa ka niŋni yɛdda!”

30Tɔ: di nyɛ la yɛlimaŋni - Yisa siri daa tum tunkara ni makkri yɛla pampam m‑paasi anŋɔ zugu, ka daa wulisi u nyaandɔliba maa. Pa anŋɔ yɛla zaa n sɔbi n‑niŋi bukku wa puuni. 31Aseesi mun sɔbi n‑dooli kpa, ni ya ti niŋi yɛdda ka baŋŋi, ni, Yisa nyɛ la Masiiya maa, Naawunni ŋɔn tum sɔ na ka diisi u naam la - halli Naawunni Bii n nyɛ u gba. Ka anŋɔ sɔbiya, ni ya ti niŋi lala yɛdda ka lala zugu ya nin ti nya nyɔvuri ŋɔn Yisa yuuri zugu.

Currently Selected:

GYƆNI 20: maw

Highlight

Copy