Tùntúmə́ bé 2
2
Eshirhə náàcɛ̀nɛ́ só Kristə-lyì bí yó wə
1Pantəkɔtɛ y címsí yùwə̀,#2.1 Gwɛ̃ bə̀ gə́ byili zɔ̀mà nɛ́ jàlà kùr mə̀gã̌ mɔ́. Bə̀ byili címsi gakó gə́ nʼê jí ní gàà mɔ́. lyì bí byɛ̀bɛ́ gakó bə̀ yʼà zù Yezu Kristə mó yʼà gùlí dwã jàà èdù wẽ́. 2Sə twər rə̀dù sá, sɔ̀ ǹdə zho nánfɔ̀lɔ̀ ò nʼô wùl ta shí dɛ̃̌, o bə̀ o sú jì y bə̀ yʼà jě è wẽ́ mó. 3Bə jʼa zɛ̃̀ bə nə wẽ̀ rə̀ nyɛ̌ ǹdə myǐn mə̀jə̀ə̀lè ta, rə̀ pɔr dwã nɛ rə̀ nʼê swé lò gakó yó wə. 4Bə̀ gakó sú ǹdə́ Eshirhə náàcɛ̀nɛ́, bə zɛ̃̀ bə̀ nʼê zɔ̀m dwə́ dwã zɔ̀mà ǹdə Eshirhə náàcɛ̀nɛ́ gə́ pɔ bɛ ŋwɔ̀nɔ́ bə̀ bə̀ zɔ̌m nɛ́.
5Zhwifubá dwã yʼà shí lũ w tənèsé gakó w bə bə̀ Zhərəzalɛm. Bə̀ yʼà wɔ́ lyì byɛ̀bɛ́ bə̀ só Yi. 6Bə̀ gə́ nyɛ̀ɛ̀ sɔ̀ wá, bə bə̀ dwã yó nánzhəzhɔ̌, sə kɔn jàr bɛ̀, bə̀ lò gakó yà ń nyɛ̌ bə̀ nʼê zɔ̀m ń dwí rí zɔ̀mà nɛ́. 7Rə̀myɛ́ jàr bɛ̀ dɛ̃´dɛ̃´, bə zɛ̃̀ bə wɔ̀: “Lyì bí byɛ̀bɛ́ èta bə̀ nʼê zɔ̀m mɔ́, bə̀ gakó də̀ Gəlile lyì nà? 8Etər nə́ mə̀dù mə̀dù gakó tó né ń nyɛ̌ bə̀ nʼê zɔ̀m ń dwí rí zɔ̀mà nɛ́? 9E jà nə́ wɔ́ dúdúmə́ dúdúmə́: Partɛ ǹdə́ Mɛɛdɛ ǹdə́ Elam lyì ŋwɛ́nɛ́; Məzopotəmyi ǹdə́ Zhide ǹdə́ Kapadɔɔsɛ lyì súlí bə̀ ŋwɛ́nɛ́; Pɔ̃ ǹdə́ Azhi lyì ŋwɛ́nɛ́; 10Fərizhi ǹdə́ Pə̃fyili lyì myɛ ŋwɛ́nɛ́; Ezhibti ǹdə́ Lyibyi tənà y cɔ òdù ò yíl Shərɛnɛ, òmyɛ lyì ŋwɛ́nɛ́; byɛ̀bɛ́ bə̀ shí Orɔm bə̀ jě nyə̀má mɔ́ myɛ ŋwɛ́nɛ́; 11Kərɛtɛ ǹdə́ Arəbyi lyì myɛ súlí bə̀ ŋwɛ́nɛ́. Byɛ̀bɛ́ bə̀ wɔ́ Zhwifubá páá mɔ́ ŋwɛ́nɛ́; byɛ̀bɛ́ bə̀ zù Zhwifubá Yi-sɔ́má y mɔ́ myɛ ŋwɛ́nɛ́; e jà nə́ gakó nyɛ̌ bə̀ nʼê zɔ̀m Yi tùm-fwààlɛ́ yò ǹdə́ nə́ dwə́ né zɔ̀mà nɛ́.”
12Bə̀ gakó wun yʼà zɛ̃̀ dɛ̃´dɛ̃´. Bə̀ kʼê yə̀l bə̀ gə́ mʼa bù ní yé. Bə zɛ̃̀ bə̀ nʼê zɔ̀m ǹdə́ dwã bə̀ zhe: “Bə̀kɔ́n ywẽ̀ ǹdə́ nyɛ̀bɛ́ èta mɔ́?” 13Sə jàlà yʼà nʼê fulsi tùntúmə́ bé bə̀ zhe: “Nyǐ wɔ́ sə̀-nyɔ̀ɔ́rɛ.”
14Pyɛɛrɛ ǹdə́ tùntúmə́ bé dwã bɛ́ shí ǹdə́ mə̀dù y zɛ̃̀ bə zhì dɛ̃̌, n zɔ̀m dɛ̃̌ dɛ̃̌ n wɔ̀: “Ámyɛ̌ Zhwifubá, ǹdʼámyɛ̌ byɛ̀bɛ́ gakó á jě Zhərəzalɛm nɛ́ mɔ́, cilinə kɔn dɛ̀bɛ́ à la ába byilu mú, sʼá lwar kɔn dɛ́ dɛ̀bɛ́ rə̀ nʼê wɛ̀rhɛ́ èta mɔ́ kùrə̀. 15Nyǐnə byɛ̀bɛ́ á nə èta mɔ́ yə̀ sɛ̃´ nywɛ̀ ǹdə á gə́ nʼá bùl né yé. Yi rí gwẽ̌ yə̀ dɛ̃̌ twí yé. 16Wɔ́ kɔn dɛ́ dɛ̀bɛ́ Yi nyì-zwennə Zhowəə yà ń byili mú rə̀ nʼê pyìrh èlâsɛ̃´. Ń byili bə̀ Yi wòwə̀:
17‘Dwã nɛ́ nánkwaá nɛ́ gə tú è yúwə́,
à bʼa ce à Eshirhə y só lyì bí gakó yó wə.
Á byâ bɛ́ ǹdʼá bə̀kwá bɛ́ mʼa zɔ̀m zɔ̀mà nyɛ̀bɛ́ à byili bi mú.
À mʼa ce á bɔ́bwá-dàlá bɛ́ yírhə́ nə kɔn dɛ̀bɛ́ numbyíní yírhə́ wàr nə̀ nɛ.
À mʼa byili wẽ̀ á náncɛsɛ́ nɛ dàrhà wẽ́.
18Zhə̀nà, rə̀myɛ́ yi ní, à mʼa ce à Eshirhə y só bala bɛ́ ǹdə́ kana bɛ́ byɛ̀bɛ́ bə̀ wɔ́ à tùntùnnə̀ mó yó wə,
sə bə̀ mʼa zɔ̀m zɔ̀mà nyɛ̀bɛ́ à byili bi mú.
19À bʼa ce wò-jààrɛ̀ du dɛ̃̌ yi wə,
a ce màmyaarhɛ wɛ̀rhɛ́ tɛ̃´ cɛ y yó:
jal ǹdə́ myǐn bʼa yə̀ nɛ́;
nyɛ̀rh bʼa du dɛ̃̌ ǹdə bə́ban ta;
20nə̀nyɔ́nɔ́ w bʼa jǐrh námbyṹ;
cànà y bʼa jǐrh nánshɔ̃̀ ǹdə jal ta,
fòró Cinu dɛ̃ rɛ́ nánfɔ̀lɔ̀ w zɛ̃̀ rə yí.
21Sə lò mɔ̀bɔ́ gakó ǹ lwə̀l Cinu sãɔ̃, ń mà n vwârh mɔ́.’
22“Esərayɛl lyì, cilinə kɔn dɛ̀bɛ́ à la ába byilu: wɔ́ Nazarɛtɛ lyì bal Yezu yò wə́. Ámyɛ̌ cìcì mú yě bə̀ Yi tó màmyaarhɛ́ ǹdə́ wò-jààrɛ́ tɛ̀bɛ́ ń wɛ̀rhɛ́ á sõ mó dɛnnɛ rə byili ába ń gə́ wɔ́ lò ná-dwí yilə. 23Wɔ́ ámyɛ̌ nɛ bə̀ myìnì mù bə pə á za, á ce lyì byɛ̀bɛ́ bə̀ yə̀l Yi rí tɛ̀bɛ́ rə̀ wɔ́ zhə̀n mɔ́ pár pəpa mɔ də̀-jɔrhɔ́ yó bə gu. Yi yʼà kɔ́ rə̀myɛ́ rə cĩ́, rə̀ yě rə̀ nyí ni, 24sə rə̀ bwìrhì mù, n du cu mú zúzúnú w wẽ́, bə̀ mə̀ yʼà bə ń yàlà zhe yé. 25Dəvyidi cìcì yà ń zɔ̀m ń yò n wɔ̀:
‘À nə Cinu ń ŋwɛ́nɛ́ à nyí ni dɛ̃ gakó;
ń zhǐ à sarh nɛ mùnì ga à jàn dɛ́ bə̀kʼa gə yé.
26Rə̀myɛ́ ce, à wu nyɛ̀ dɛ̃´dɛ̃´;
wu-nyɔ̃̀ zɔ̀mà nʼê shí à nyú wə;
à yala nɛ́ cìcì mú myɛ bʼa zə yə̀-zùlə́ à lú-bɔ̀l mɔ́ wẽ́.
Cinu, à nʼâ dɛ̃̀ kɔn ǹ sõ,
27bə̀ ǹ tá ǹ la nɛ yõ̌ a mɛ̃ cùùrì wẽ́ yé;
ǹ tá ǹ la shɔ̀nɔ́ ǹ lyì-twə̂ y dɛ̀rhɛ̀ lú-bɔ̀l w yé.
28Ǹ byili ni nyǔ mə̀ tʼâ la zhɔ̌ sɔ́msɛ́.
Ǹ bʼâ ce a nə wu-nyɔ̃̀ námpúm ǹ sõ.’ ”
29Pyɛɛrɛ súlí n wɔ̀: “Da-byâ, yẽ̌nə a zɔ̀m nə́ nàmbal Dəvyidi yò pamparɛ̃ɛ̃. Ń cùwə̀, sə bə̀ co mo; ń lú-bɔ̀l mɔ́ gwẽ̌ ŋwɛ́nɛ́ zà zà nə́ dǒ sõ. 30Ń yà ń wɔ́ Yi nyì-zwennə; ń yà ń yě bə̀ Yi yʼà bwəl mo nyí rə wɔ̀: ‘Ǹ cìcì nɔ̃̌ bʼa jí ǹ pyɛ̀lɛ̀ rɛ́.’ 31Dəvyidi dámâ n lwar Kristə bùrhù mú yò. N zɛ̃̀ n wɔ̀:
‘Yi yə̀ mə̀ yẽ̌ n mɛ̃ cùùrì wẽ́ yé.
Ń yə̀ dɛ̀rhɛ̀ lú-bɔ̀l w yé.’ ”
32Pyɛɛrɛ kə́ n súlí n wɔ̀: “Wɔ́ Yezu mú ńmyɛ̌ Yi bwìrhì mú, sə nə́ gakó wɔ́ yò w òmyɛ́ zhə̀n-cínnə. 33Sə Yi kwè mò n vò dɛ̃̌ ń jě rə̀ jə̀jĩ́ ni. Ń nɔ Eshirhə náàcɛ̀nɛ́ y ń Da yà ń bwəl mo è nyí mú, n ce e só nə́ yó èlâsɛ̃´. Wɔ́ èmyɛ́ tumə né á yírhə́ na, á zhã̌ jʼà nyɛ̌ mɔ́. 34È gə wɔ́ Dəvyidi cìcì mú, Yi yə̀ mò kwè n vò Arəzana w ǹdə́ ń yírhə́ yé. N jà n wɔ̀:
‘Cinu Yi wò à Cinu ni:
bʼə̂ jòm à jə̀jĩ́ ni;
35à bʼa ce ń nɔ̀ ǹ zwə̀ bé tɛ̃´ ǹ nə̀rh kùr wə̀.’
36“Esərayɛl dwí rí lyì bí gakó mə̂ sə rə lwar pamparɛ̃ɛ̃ bə̀ Yezu mú á pəpa də̀-jɔrhɔ́ yó mó, Yi ce n jǐrh Cinu ǹdə́ Kristə mó.”
37Bə̀ gə́ nyɛ̀ɛ̀ zɔ̀mà nɛ́ nə̀myɛ́, bə̀ wun kwẽ bə̀ wẽ́. Bə zɛ̃̀ bə bwə̀rh Pyɛɛrɛ ǹdə́ tùntúmə́ bé dwã bɛ́ bə wɔ̀: “Da-byâ, wɔ́ bə̀kɔ́n nə́ bʼâ wɛ̀rhɛ́?”
38Pyɛɛrɛ zɛ̃̀ n wɔ̀ bɛ: “Pyìrhínə á wun, sʼá mə̀dù mə̀dù gakó zwẽ nɛ̃̌-shɔ Yezu Kristə yil lé yilə, mùnì Yi pə ába á yə̀-bəlwàálɛ́ sǔbri, sə rə pə ába Eshirhə náàcɛ̀nɛ́. 39Cinu nə́ Yi nyí rí rə̀ bwəl mó wɔ́ lyì bí byɛ̀bɛ́ gakó ń la byõ̌ mó yilə. Wɔ́ ámyɛ̌ ǹdʼá byâ bɛ́, ǹdə́ byɛ̀bɛ́ gakó bə̀ ŋwɛ́nɛ́ pyépyé mó myɛ yilə.”
40Pyɛɛrɛ zɛ̃̀ n súlí ń nə́ ń zɔ̀m zɔ̀mà dwã nánzhəzhɔ̌ ń mə́ ń zal bə̀ wun ni, mùnì bə zwẽ nyí. Ń yà ń zhe: “Lũ w kɔ̀bɔ́ lyì bí wɔ́ lwɛlɛ cìnə́. Vǔrnə á cìn bə̀ wẽ́, mùnì á nə vwârh.”
41Byɛ̀bɛ́ gakó bə̀ shɛ̀nɛ́ bə zwẽ Pyɛɛrɛ zɔ̀mà nɛ́ mɔ́ jʼa zwẽ nɛ̃̌-shɔ. Lyì bí byɛ̀bɛ́ bə̀ súlí byɛ̀bɛ́ bə̀ jɛ̀rɛ̀ bə zù Kristə dɛ̃ rɛ́ rə̀myɛ́ yù w mú yʼà bwəlse lyì mɔ̀ɔ̀rhɛ̀ rə̀tɔ̀.
42Bə̀ yʼà zhe yə̀wâl bə̀ tʼâ kwàrh ǹdə́ tùntúmə́ bé kàrmɔ́ cilu yé; bə̀ zhe dwã twéé twéé ǹdə da-byâ ta sónó ǹdə́ nyì-dwìì wẽ́; bə̀ yʼà nʼê kɛ́ búrú w bə̀ tə̀l ǹdə́ dwã; bə̀ yʼà nʼê tó dwã bə̀ ce Yi. 43Yi yʼà nʼê tó tùntúmə́ bé dɛnnɛ rə wɛ̀rhɛ́ màmyaarhɛ ǹdə́ wò-jààrɛ̀ nánzhəzhɔ̌, sə rə̀myɛ́ yʼà nʼê jàr lò gakó. 44Byɛ̀bɛ́ gakó bə̀ yʼà zù Kristə yʼà zhe nyì-dwìì ǹdə́ dwã; bə̀ yʼà nʼê ce bə̀ kɔn gakó dwã yó. 45Bə̀ yʼà nʼê yè bə̀ cɛsɛ́ ǹdə́ bə̀ wẽ̀ dé, bə zɛ̃̀ bə tə̀ kɔn dɛ́ dɛ̀bɛ́ bə̀ nɔ mɔ́ bə̀ gakó ne, lò gakó ǹdə ń gə́ zhe rə̀ tum ní. 46Bə̀ yʼà nʼê wɛ̀rhɛ́ nyí rə̀dù; bə̀ yʼà nʼê gùlí dwã Yi jì y kɔ̀nɔ́ w wẽ́ dɛ̃ gakó bə̀ ce Yi. Bə̀ yʼà nʼê kɛ́ búrú w bə̀ tə̀l ǹdə́ dwã bə̀ sõ kâlsɛ́ wẽ́; bə̀ yʼà nʼê jí bə̀ kùjú w ǹdə́ wu-nyɔ̃̀; bə̀ bə zwini zhe ǹdə́ dwã yé. 47Bə̀ yʼà nʼê cèrhé Yi, sə lyì bí gakó yʼà só be. Dɛ̃ gakó, Cinu yà ń nə́ ń ce byɛ̀bɛ́ ń vwârh mɔ́ twí bə̀ súlí bə̀ gùlú w ni.
Currently Selected:
Tùntúmə́ bé 2: lee
Highlight
Share
Copy
Want to have your highlights saved across all your devices? Sign up or sign in
© 2001, Wycliffe Bible Translators, Inc. All rights reserved.
