2 Tesəloniki 3
3
Pwəə nə́ ń lwə̀l Tesəloniki Kristə-lyì bí bə̀ bə̀ lwə̂l Yi ń yilə
1Da-byâ, tɛ̀bɛ́ rə̀ súlí èlâsɛ̃´ mɔ́, nə́ rʼé lwə̀l ába, sʼá lwə̀l Yi nə́ yilə, mùnì ga rə sɛ̃ nə́ba Cinu zɔ̀mɛ̀ rɛ́ cə̀ə̀lè rə yí lyì bí dwã bɛ́ làlà, bə shɛ̀nɛ́ bə zwẽ de náàcɛ̀nɛ́, ǹdə ámyɛ gə́ zwẽ de né. 2Lwə̂lnə Yi nə́ yil gwẽ̌, mùnì ga rə yìlì nə́ba lyì-bəlwâlsɛ́ yé né, bʼè də̀ lyì bí gakó bə̀ nʼê shɛ̀nɛ́ bə̀ zwì Cinu yé.
3Cinu wɔ́ zhə̀n-cí. Ń mà n pə ába jàn n sɛ̃ ába mùnì ga lwɛlɛ cə́bal mɔ́ bə̀ká n ŋwɛ̀nɛ́ n wɛ̀rhɛ́ ába kaka yé. 4Cinu ce nə́ zhe á zhə̀nà. Ń ce nə́ lwar pamparɛ̃ɛ̃ bʼâ nʼá wɛ̀rhɛ́ kɔn dɛ́ dɛ̀bɛ́ nə́ byili ába mó, á jʼâ gwẽ̌ bʼâ cə̀ə̀lè á wɛ̀rhɛ́ rɛ. 5À nʼâ lwə̀l Cinu bə̀ ń byili ába Yi sónó sɔ́má yá, sə n ce á zə cìn-pyɔ́nɔ́ ǹdə Kristə ta.
Lò gakó mə̂ sə́ twĩ̀ ń pyà ǹ nyí kùjú
6Da-byâ, nə́ rʼé pɛ ába nyí rí tɛ̀bɛ́ nə́ Cinu Yezu Kristə yil lé yilə: á bə̀kʼá shɛ̀nɛ́ á tó Kristə-lyì bí byɛ̀bɛ́ bə̀ wɔ́ nə̀wàcã̀nyɛla mɔ́ kùr yé. Bə̀ tʼâ zwẽ zɔ̀mà nɛ́ nyɛ̀bɛ́ nə́ byili mú yé. 7Á cìcì mú yě á gə́ mʼâ wɛ̀rhɛ́ nɛ́ á kwè nə́ nà. Nə́ gə́ yʼâ tú á sono mó, nə́ yə̀ nə̀wàcɔ̀rɔ̀ wɛ̀rhɛ́ yé. 8Nə́ yə̀ lò lò yó w nyǐ ǹdə́ nə́ nyí kùjú yé. Nə́ twĩ̀ cəcɛ̃ ǹdə́ nə̀nyɔ́nɔ́ ga nə́ yə̀ shǐrh yé, mùnì ga nə́ bə̀kʼá lyɛ̀ɛ̀ á mə̀dù ga yé. 9È də̀ á kɔn nə́ yʼâ bə mə̂ sə nə́ jí yé, sə nə́ twĩ̀ èta mùnì ga á kwè nə́ nà. 10Á yě bə̀ nə́ gə́ yàl á sõ yi ní, nə́ yʼâ pɔ ába nyí nə́ wɔ̀: “Lò mɔ̀bɔ́ ń tá ń yâl n twĩ̀, sə ń bə̀ká n jí myɛ yé.”
11Nə́ nyɛ̀ɛ̀ bə̀ lyì jàlà ŋwɛ́nɛ́ á wẽ́ bə̀ wɔ́ nə̀wàcã̀nyɛla, bə̀ tʼâ yâl tum yé. Bə jʼà nʼê zwì bə̀ dwã nyə̀ná wẽ́. 12Nə́ rʼé pɛ nyí lyì bí bə̀myɛ́ mɔ́ nɛ, nə́ mʼé cící bi Cinu Yezu Kristə yil lé yilə, bə̀ bə̀ zhìlì bə̀ yala nɛ bə twĩ̀, bə nə bə̀ nyí kùjú bə̀ sə̀pwà nɛ̀.
13Sə ámyɛ̌ da-byâ, á bə̀kʼá gə á wun yé. Cə̀ə̀lènə̀ á nʼá twĩ̀ tumə nyɛ̀bɛ́ nə̀ càn. 14Sə lò mɔ̀bɔ́ ń tá ń zwẽ tɛ̀bɛ́ nə́ kɛ̃ sɛ́bɛ́ rɛ́ tɛ̀bɛ́ wẽ́ mó, sʼá byili lyì bí gakó ne. Á bə̀kʼá kʼá jí ǹdə́ mɔ yé, mùnì ga cìzhìl zə mɔ, 15sʼá bə̀kʼá nyǐ mu ǹdə á zù-bal ta yé. Cícínə mo bə̀ ń wɔ́ á da-byǐ.
Pwəə nə́ ń gwi ń sɛ́bɛ́ rɛ́ yó ǹdə́ nə̀bán-co
16Cinu mú ń wɔ́ yə̀-zùlə́ cə́bal mɔ́ cìcì mà n pə ába yə̀-zùlə́ kɔn gakó wẽ́! Ń mà n yə̀ nɛ́ ǹdʼá gakó!
17Wɔ́ àmyɛ́ Pwəə à nʼâ ce ába ǹdə́ zɔ̀mà nɛ́ nyɛ̀bɛ́. Wɔ́ àmyɛ́ cìcì jɛ̃̀ è kɛ̃ nɛ. À nʼâ kɛ̃ à yil lé né ǹdə à gə́ nʼâ kɛ̃ dɛ à sábá nɛ́ gakó wẽ́ né. Á bʼâ tó à kəkɛ̃ɛ̃ rɛ́ dɛnnɛ á lwar bə̀ wɔ́ àmyɛ́ à kɛ̃ sɛ́bɛ́ rɛ́ tɛ̀bɛ́.
18Nə́ Cinu Yezu Kristə mà n cĩ́ bwəl á gakó yó!
Currently Selected:
2 Tesəloniki 3: lee
Highlight
Share
Copy
Want to have your highlights saved across all your devices? Sign up or sign in
© 2001, Wycliffe Bible Translators, Inc. All rights reserved.
