1 Timote 6

Yóm mə̂ sə n nyɛ̀ ń yó-cə́bal

1Lò mɔ̀bɔ́ gakó ǹ wɔ́ yóm, ǹ mə̂ sə́ nyɛ̀ ǹ yó-cə́bal mɔ́, mùnì ga lyì bí bə̀kʼa zɔ̀m Yi yil lé ǹdə́ nə́ kàrmɔ́ yò námməlwɛ̀lɛ́ yé. 2Yómə́ bé byɛ̀bɛ́ bə̀ yó-cìnə́ bé wɔ́ Kristə-lyì mú, bə̀kʼa tə̀ bə̀ bə̀ wɔ́ da-byâ yil bə cẽ be nyám yé. Bə̀ mə̂ sə bə kwɛrhɛ bə nyɛ̀ bɛ́, bə̀ wɔ́ Kristə-lyì byɛ̀bɛ́ bə̀ só ne bə̀ nʼê twĩ̀ bə̀ pɛ.

Wɔ́ shilə námməlwâlsɛ́ sə̀ nʼê dwĩ̀ numbyíní

Kɔn dɛ̀bɛ́ gakó à byili mú mú, wɔ́ rə̀myɛ́ ǹ mə̂ sə́ byili lyì bí ni, ń ce bə wɛ̀rhɛ́ rɛ.

3Lyì jàlà ŋwɛ́nɛ́ bə̀ kàrmɔ́ bə̀ nʼê cèrhè mó tə̀ sɔ́má yó yé. Bə̀ tʼâ tó zhə̀n dɛ́ tɛ̀bɛ́ nə́ Cinu Yezu Kristə kàrmɔ́ byili mú ni yé. Bə̀ kàrmɔ́ còrhò mó tʼâ tó nə́ Yi-ni-zhú nyân mɔ́ nɛ yé. 4Bə̀ cìn-dɛ̃̌-zhõ̌ mó ce bə̀ wɔ́ ǹdə lyìlyə̂r ta. Bə̀ yə̀l kaka Yi nyə̀ná nɛ́ wẽ́ yé. Wɔ́ nyə̀-pâr zɔ̀mà címí è zhe be. Wɔ́ rə̀myɛ́ è ce bwɛ̃̌-dǔr, búlə́, dwã tùùrhì, dwã cə̀rh ceré, 5ǹdə́ nyə̀-pâr mâ kɔn lyɛ̃ cɛ nɛ ŋwɛ́nɛ́ bə̀ cəcəl wə. Bə jǐrh ǹdə lyì byɛ̀bɛ́ bə̀ surhə jé, bə̀ kʼê yə̀l zhə̀n dɛ́ gə́ wɔ́ nɛ́ ta. Bə zɛ̃̀ bə̀ nʼê bùl bə̀ Yi-ni-zhú mú wɔ́ kɔn dɛ̀bɛ́ rə̀ mʼa ce numbyíní jǐrh nə̀cɛ̀m-bal.

6Sə zhə̀nà, Yi-ni-zhú mú wɔ́ nə̀cɛ̀ndɛ̀ nánfɔ̀lɔ̀ numbyíní yilə, ǹdə́ è gə nʼê bùl bə̀ tɛ̀bɛ́ è zhe mó yú yə. 7Nə́ yə̀ kaka zal nə́ mʼé bə̀ cɛ yó yé. Nə́ kʼé tʼá la kaka zal nə́ mʼé kwɛ̃̀ myɛ yé. 8Nə́ gə zhe kùjú nə́ rʼé jí, nə́ zhe gɔ̀nɔ̀ nə́ mʼé círhí nə́ yala nɛ, rə̀myɛ́ já ǹdə́ nə́ba. 9Sə byɛ̀bɛ́ bə̀ nʼê pyà sə bə jǐrh nə̀cɛ̀nà nánfwààlɛ́ mɔ́ nʼê twi sòlò wẽ́. Sə shilə né námməlwâlsɛ́ shɛ̀bɛ́ sə̀ bə kùr zhe sə̀ nʼê swèlè numbyíní è jé, è yò zhìlì mú, nʼê jə́jɛ̀rɛ́ bɛ. 10Zhə̀nà, zwini tɛ̀bɛ́ gakó rə̀ nʼê zal numbyíní mú kùr nʼê shí wɛ́rɛ́ sónó dɛ̃´dɛ̃´ wẽ́. Lyì nánzhəzhɔ̌ pyà y kɔn lyɛ̃ cɛ nɛ. Wɔ́ rə̀myɛ́ è ce bə jé bə̀ Yi-ni-zhú mú wẽ́, bə pə nɔ̀nɔ̀ nánfɔ̀lɔ̀ bə̀ cìn nì, e jʼa wɔ́ bə̀ cìcì yò.

Zə Yi-ni-zhú zãã y náàcɛ̀nɛ́

11Ǹmyɛ́ mɔ̀bɔ́ ǹ wɔ́ Yi lò mó, yẽ̌ rə̀myɛ́ gakó né. Pyâ sə́ yə̀ wu-cángá cí, ń pə ǹ cìn námpúm Yi ni, ń zhí ri. Zə sónó ǹdə́ cìn-pyɔ́nɔ́ ǹdə́ wu-bɔ̀nɔ̀. 12Zə Yi-ni-zhú zãã y náàcɛ̀nɛ́. Zə nyǔ mú mə̀ tʼâ la zhɔ̌ mɔ́ kẽkẽ, bə̀ wɔ́ mə̀myɛ́ yil Yi byẽ̀ mó, ǹ gə́ wɛ̀rhɛ́ ǹ nyí-bwəl náàcɛ̀nɛ́ y zhə̀n-cìnə́ nánzhəzhɔ̌ yé né dɛ̃ rɛ́ yùwə̀. 13Sə èlâsɛ̃´, à nʼâ pɛ mɔ́ nyí Yi rí tɛ̀bɛ́ rə̀ nʼê pɛ myə̂l kɔn dwí gakó ne mó yé né, ǹdə́ Yezu Kristə mó ń yàl Yi-ni-zhú mú zhə̀n-cínnə Pɔ̃s-Pyəlatɛ yé né mó yírh wə: 14zwẽ nyə́ né nə̀myɛ́, sə́ yə̀ wárhgáá, dóó bə̀kʼa yə̀ ǹ yó w yé, kɔn mʼe yí dɛ̃ rɛ́ tɛ̀bɛ́ nə́ Cinu Yezu Kristə mà n ká n bə̀ mɔ́. 15Mɔ̀bɔ́ ń la ce Kristə bə̀ ǹdə́ yi rí gə tú è yú mú, wɔ́ Yi. Wɔ́ rə̀myɛ́ sõ wu-nyɔ̃̀ w ò bə dõ zhe mó nʼô shí ní. Rə̀myɛ́ dúdú rə̀ wɔ́ pyɔ̌, rə̀ cǐ kɔn gakó. Rə̀ wɔ́ pyâ bɛ́ gakó pyɔ̌, yó-cìnə́ bé gakó yó-cə́bal. 16Rə̀myɛ́ dúdú rə̀ tʼâ cì yé. Rə̀ jě pwẽ̀ wẽ́. Lò lò wàr ń nə́ ń bwəlse re yé. Lò lò yírh gwẽ̌ yə̀ rɛ nɛ yé, e jà lò lò yírh tʼâ la rɛ nɔ myɛ yé. Wɔ́ rə̀myɛ́ rə̀ zhe zùwə́ ǹdə́ jàn, byinə nə̀ bə zhɔ̌ zhe yilə! Amɛ̀n!

Cící nə̀cɛ̀nà bɛ́ bə zə bə̀ cìn cɛ̀nɛ̀

17Byili lũ w kɔ̀bɔ́ nə̀cɛ̀nà bɛ́ nɛ bə̀ bə̀ bə̀kʼa zhẽ̌ bə̀ cìn dɛ̃̌, bə zə nə̀cɛ̀ndɛ́ zhə̀n yé, sə bə zə Yi zhə̀n dɛ́, bə̀ wɔ́ Yi rə̀ nʼê pɛ nə́ba kɔn dwí gakó nánzhəzhɔ̌ nə́ jí. 18Byili bi bə̀ bə̀ twĩ̌ cɛ̀nɛ̀, sə bə yə̀ nə̀cɛ̀nà bə̀ tùntwə̃̀ə̃̀ né wẽ́, sə bə tə̀ bə̀ jɛ̃̀-kɔn ǹdə́ lyì bí dwã bɛ́ ǹdə́ wu-nyɔ̃̀. 19Èta, bə̀ mʼa ŋwɛ̀nɛ́ bə tɛnɛ nə̀cɛ̀ndɛ́ tɛ̀bɛ́ rə̀ càn rə̀ tʼâ la zhɔ̌ mɔ́, mùnì ga bə nə nyǔ mú páá mɔ́.

Zə tɛ̀bɛ́ Yi pɔ mɔ́ mɔ́ cɛ̀nɛ̀

20À byì-sónó Timote, zə tɛ̀bɛ́ Yi pɔ mɔ́ mɔ́ cɛ̀nɛ̀. Dɛ̃̌ ǹ cìn ǹdə́ zɔ̀m-fwə́ə́ré tɛ̀bɛ́ rə̀myɛ́ ǹdə́ Yi-ni-zhú mú də̀ rə̀dù mú. Sə́ dɛ̃̀ ǹ cìn myɛ ǹdə́ kɔn dɛ̀bɛ́ lyì bí yʼa wɔ̀ bə̀ bə̀ yě, rə jʼà bə kùr zhe mó. 21Jàlà jə́jɛ̀rɛ́ bə̀ cìn bə̀ bə̀ yě, rə̀myɛ́ ce bə jé bə̀ Yi-ni-zhú mú wẽ́ dɛ̃´dɛ̃´.

Yi bʼa cĩ́ bwəl á gakó yó!

Currently Selected:

1 Timote 6: lee

Highlight

Copy