Kuxh 8

Uvaʼs inaʼsat quBʼaal Jesuus kaʼl u paan tuchʼ kaʼt u txay tiʼ itzuqbʼel kajvaʼl mil (4,000) xaol

Tio 15.32-39

1Tuulbʼaletz inqʼa qʼij inqʼae, tul mam tenam imol tibʼ kʼatz Jesuus. Tul yeʼlich itxʼix inqʼa xaol iqʼomich taʼn. Yaʼne isaʼ tzaan Jesuus inqʼa nikich itxhus tibʼ s-kʼatza. Tul ech tal Jesuus s-eche: 2—Poro nik intxum ivatz inqʼa xaol inqʼae. Tan itoxv vet qʼije tatin sinkʼatza. Tul yeʼl tetxhbʼubʼal ati. 3Tul yeʼ insaʼ laʼ intxhaq bʼen inqʼa xaol t-totzotz, tan avoqe toq motx uqloq tiʼ bʼey. Tan yeʼx motx itzuqbʼet tibʼ. Tan at inqʼa xaol uvaʼ niim tzajnaʼqle, —xeʼt Jesuus te inqʼa nikich itxhus tibʼ s-kʼatza.

4Yaʼne ech tal inqʼa nikich itxhus tibʼ kʼatz Jesuus s-eche: —Yeʼxh tal laʼ tzajk mam paan qaʼn, tul laʼ qaqʼ te inqʼa xaol. Tan yeʼxhal jeqlel tzitza, —xeʼtaqe.

5Tul ech tal Jesuus s-eche: —¿Jatvaʼletz paan at sexeʼ? —xeʼt Jesuus.

Tul echaq tal s-eche: —Juqvaʼl, —xeʼtaqe.

6Yaʼne ibʼekʼ Jesuus ikʼuqeʼv inqʼa xaol t-txʼavaʼ. Tul ikʼul Jesuus juqvaʼl inqʼa paan. Tul taqʼ Jesuus taʼntiuxh te quBʼaal Tiuxh s-tiʼ. Tul ipixh Jesuus inqʼa paan s-tuul. Tul taqʼ Jesuus te inqʼa nikich itxhus tibʼ s-kʼatza, tul laʼ taqʼ te inqʼa xaol. Tul echxh uvaʼe ibʼan inqʼa nikich itxhus tibʼ kʼatz Jesuus. Tan motx taqʼ vet te inqʼa xaol.

7Tul atich kaʼt vatz txay xeʼ inqʼa nikich itxhus tibʼ kʼatz Jesuus. Tul taqʼ Jesuus bʼaʼnil s-tiibʼa. Atz ibʼekʼat Jesuus ijatxpeʼl xoʼl inqʼa xaol s-kaqaayil. 8Tul txʼaʼon vet inqʼa xaol; atz tetxhal motx inojeʼ. Tul aʼl tel iyalan u etxhbʼubʼal. Tul juqvaʼt nimla xuʼk yal etxhbʼubʼal, uvaʼ nojnaʼqichxhtuʼ, imol inqʼa nikich itxhus tibʼ kʼatz Jesuus. 9Kamal kajvaʼlenich mil (4,000) inqʼa xaol txʼaʼoni. Yaʼne itxhaq vet bʼen Jesuus inqʼa xaol. 10Tul yekich pal vet ok Jesuus tuul u vaarko tuchʼ inqʼa nikich itxhus tibʼ s-kʼatza. Tul yekich vet Jesuus tuulbʼal u txʼavaʼ Dalmanuuta.

Uvaʼs tabʼil te quBʼaal Jesuus uvaʼ laʼich ikʼutxh invaʼq etxhlal, eche uvaʼ ikʼutxh Moisees, oq quBʼaal Tiuxh txhaqon tzaan quBʼaal Jesuus

Tio 16.1-4; Luk 12.54-56

11Yaʼne aqʼbʼ jolol inqʼa fariseeo vatz Jesuus. Tul xeʼtaq tiʼ iyojtaq tibʼ tuchʼ Jesuus, tiʼ tilixeʼ tal laʼich sotzk Jesuus tiʼ vaʼq yol; tul paʼv vet laʼich ibʼan Jesuus s-vatz. Tul motx tabʼi te Jesuus uvaʼ laʼich ikʼutxh Jesuus vaʼq etxhlal, kʼutxhbʼal tetz s-vatz uvaʼ quBʼaal Tiuxh txhaqon tzaan Jesuus. Tan aʼaq kuxh nikich titzʼa ichʼixvisal Jesuus vatz inqʼa xaol.

12Yaʼne jiqʼjotxh taanima Jesuus tiʼ u tial ikʼuul inqʼa fariseeo. Tul ech tal Jesuus s-eche: —¡Kam s-tiʼil nik etabʼi uvaʼ laʼ inkʼutxh invaʼq etxhlal sevatz!, ex inqʼa xaol, inqʼa itzʼlel ex s-txheel, ex inqʼa yeʼ nik qeon in.#Deuteronoomio 1.35 Nuqxh nik val sete: Yeʼxhkam invaʼtoʼq etxhlal laʼ inkʼutxh sevatz, —xeʼt Jesuus.{*}#8.12 ¿Kam etxhlalil nikich ijaq inqʼa iqʼesal uqʼeʼybʼal? Aʼ nikich motx ijaqeʼ uvaʼ laʼich ibʼan quBʼaal Jesuus vaʼq mam kaebʼal aanima s-vatz, eche uvaʼ ibʼan Moisees taʼn quBʼaal Tiuxh uvaʼs ijatxt tibʼ u maar uvaʼ Kaq Maar chichich eʼli. Tul echatetz uvaʼe nikich itxʼebʼ inqʼa iqʼesal uqʼeʼybʼal tiqʼabʼ quBʼaal Jesuus, uvaʼ echat laʼich ibʼan quBʼaal Jesuuse s-vatz. Tul echetz laʼich motx tilte uvaʼ atich tiqleʼm quBʼaal Jesuus taʼn quBʼaal Tiuxh. Pet oqetz yeʼl vaʼq kaebʼal aanima laʼich ibʼan quBʼaal Jesuus s-vatz, tul chʼixvebʼalichetz kuxh quBʼaal Jesuus vatz u tenam nikich motx taleʼ.

Uvaʼs ibʼant quBʼaal Jesuus eela vitxumbʼal inqʼa fariseeo tuchʼ u aqʼbʼal jaʼ tuul paan

Tio 16.5-12

13Eletz vet el Jesuus vatz inqʼa fariseeo, tul pal vet ok Jesuus tuul u vaarko inpaqte tuchʼ inqʼa nikich itxhus tibʼ s-kʼatza. Tul yekich vet Jesuus jala el u mam aʼ. 14Yeʼetz bʼak inatxh inqʼa nikich itxhus tibʼ kʼatz Jesuus tiqʼolaq ipaan. Pet yiq bʼakxh vaʼl ivatz paan iqʼomichaq taʼn tu vaarko.

15Tul sebʼtichaqetz ixaon viʼ aʼ tuul vaarko, tul ech tal Jesuus s-xoʼl s-eche: —Noq etil etibʼ vatz vikantxhaqla txumbʼal inqʼa fariseeo. Tan ech nik iyansan eche nik iyansal u paan taʼn u aqʼbʼal jaʼ tuul, u paan uvaʼ nik toksal vatz quBʼaal Tiuxh. Atz noqat etil etibʼ vatz vikantxhaqla txumbʼal Eroodes. Tan echatxh vitxumbʼal Eroodes, eche u aqʼbʼal jaʼ tuul pan, —xeʼt Jesuus.{*}#8.15 Ech nik tal u versiikulo tu literaal s-eche: —Xeevaqxh etibʼ. Atz kol vaq etibʼ te u aqʼbʼal jaʼ tuul paan uvaʼ nik tal inqʼa fariseeo tuchʼ u tetz Eroodes, —xeʼt quBʼaal Jesuus. ¿Kam nik elkaʼpun u aqʼbʼal jaʼ tuul paan u tetz inqʼa fariseeo tuchʼ u tetz Eroodes uvaʼ tal quBʼaal Jesuus? Aʼ nik elkaʼpun tiʼ u kantxhaqla txhusbʼal uvaʼ nikich itxhus inqʼa fariseeo tuchʼ uvaʼ nikich tal Eroodes. Tan tira nikich ipaxin xoʼl u tenam, tul nikich iyansa iviʼ u tenam s-tuchʼ. Aʼetz nik ex ibʼan eela tuchʼ u aqʼbʼal jaʼ tuul u paan, tan tira nik ipax xoʼl u qʼota, tetxhal iqʼuʼt tibʼ taʼn.

16Yaʼne ech motx tal inqʼa nikich itxhus tibʼ kʼatz Jesuus s-vatzaq s-eche: —¡Tiʼebʼ uvaʼ jit nimal paan qat qiqʼo tzaan, xaʼte ech u yole nik tal Jesuus s-qe! —xeʼtaq veteʼ.{*}#8.16 Tan tira yeʼ nikich motx ibʼen s-te kam uvaʼ tal quBʼaal Jesuus tuchʼ viyol. Tan kʼuxh tiqʼo tzaan quBʼaal Jesuus u paan tuul viyol, aloq vaʼlen nikich titzʼa quBʼaal Jesuus s-tuchʼ, pet inqʼa nikich itxhus tibʼ kʼatz quBʼaal Jesuus, tan nalxh ex titzʼa txha veteʼ uvaʼ, aʼ nikich yolonk quBʼaal Jesuus tiʼ u paan uvaʼ laʼich motx tetxhbʼu.

17Poro bʼen te Jesuus kam uvaʼ nikich iyol inqʼa nikich itxhus tibʼ s-kʼatza. Tul ech tal Jesuus s-eche: —Jit aʼ nik yolonk in, tiʼ uvaʼ oq yeʼl epaan iqʼomal etaʼn. Tul yeʼxyetz kolxh bʼenoq sete uvaʼ laʼ utxh itzʼeq kaʼvoʼq paan sexoʼl. Pet nik intxumun tiʼ vetxumbʼal, tiʼ uvaʼ yeʼ nik ekʼuqbʼa ekʼuul s-viʼ tiʼ itxhej vepaan. 18Tan kʼuxh nik etil kam uvaʼ nik inbʼaneʼ, poro yeʼ nik ibʼen sete. Atz kʼuxh nik etabʼi kam u yol nik valeʼ, poro yeʼ nik tel etxumbʼal s-te. ¡Yeʼ kol nik enatxh veteʼ, 19uvaʼs inpixht oʼvaʼl vatz paan tiʼ inaʼsal inqʼa paan xoʼl oʼvaʼl mil (5,000) vinaq! ¿Jatvaʼtetz xuʼke viyal u etxhbʼubʼal emola? —xeʼt Jesuus.

Yaʼne echaq tal s-eche: —Kabʼlavat xuʼke yalani, —xeʼtaqe.

20Tul ech tal Jesuus s-eche: —¿Keʼchetz uvaʼs innaʼsat inqʼa paan xoʼl kajvaʼl mil (4,000) xaol, tul juqvaʼlich kuxh u paan? ¿Jatvaʼtetz xuʼk viyal emola? —xeʼt Jesuus.

Yaʼne echaq tal s-eche: —Juqvaʼt xuʼke yalani, —xeʼtaqe.

21Echetz tal Jesuus s-eche: —¡Keʼchetz yeʼ nik ibʼen bʼa sete uvaʼ at viqleʼm tiʼ itzʼeq u paan sexoʼl! —xeʼt Jesuus.

Uvaʼs ibʼant quBʼaal Jesuus bʼaʼn val u tzot tu tenam Vetsaaida

22Tul yekich vet Jesuus tu tenam Vetsaaida. Tul ex aqʼaxoq val u tzot vatz Jesuus. Tul jaqax bʼaʼnil te Jesuus, tiʼ uvaʼ laʼich ikan Jesuus u tzot tiʼ ibʼant bʼaʼn.

23Yaʼne itxhʼiqi el Jesuus u tzot tiʼeʼl u tal tenam Vetsaaida. Tul takʼsa Jesuus inqʼa bʼaqʼ ivatz u tzot tuchʼ taʼl itziʼ. Tul ilaj Jesuus inqʼa bʼaqʼ ivatz. Tul ech tal Jesuus s-te s-eche: —¿Maq nik avilon vet inbʼeeq? —xeʼt Jesuus.

24Tul tetxhbʼu vet u tzot isaqineʼ. Tul ech tal s-eche: —Il vet, inqʼa xaol nik vileʼ eche tilix viʼoq tzeʼ. Tul ile, nik vil ixaoneʼ, —xeʼte.

25Yaʼne ilaj Jesuus inqʼa bʼaqʼ ivatz u tzot inpaqte. Tul saqin vet u tzot taʼn Jesuus. Yekichetz ilon veteʼ. Atz bʼaʼnxh vet nikich tilt inqʼa kam s-kaqaayil, kʼuxh s-naatxh. 26Tul ech tal Jesuus s-te s-eche: —Quxh vet tavotzotz. Poro yeʼl axh laʼ bʼenoʼk axh tu tal tenam Vetsaaida tiʼ talaxeʼ kam uvaʼ qat inbʼan tiʼ abʼanax bʼaʼn. Atz yeʼxhabʼil invaʼq laʼ aal s-te, —xeʼt Jesuus.

Uvaʼs talt Luʼ uvaʼ, aʼ quBʼaal Jesuuse u Kriisto

Tio 16.13-20; Luk 9.18-21

27Eletz vet bʼen Jesuus tu tal tenam Vetsaaida tuchʼ inqʼa nikich itxhus tibʼ s-kʼatza, tul yekich vet Jesuus t-inqʼa talaq tenam, uvaʼ jeqlich inqʼa xaol, uvaʼ naqlich kʼatz u tenam Sesareea Filiipo. Tul ech tabʼi Jesuus tiʼ bʼey te inqʼa nikich itxhus tibʼ s-kʼatza s-eche: —¿Jaʼletz in nik tal inqʼa xaol? —xeʼt Jesuus.

28Tul echaq tal s-eche: —At xaol nik alon seʼe uvaʼ axh Xhun, uvaʼ nikich aqʼon kuʼ inqʼa xaol xeʼ aʼ. Atz at xaol nik alon uvaʼ axh Eliias, u qʼexsanich tetz viyol quBʼaal Tiuxh. Tul at xaol nik alon uvaʼ axh vaʼtoʼq inqʼa qʼexsanich tetz viyol quBʼaal Tiuxh, —xeʼtaq te Jesuus.

29Yaʼne ech tal Jesuus s-eche: —Pet ¿keʼchetz ex? ¿Jaʼletz in, nik etaleʼ? —xeʼt Jesuus.

Tul ech tal Luʼ s-eche: —Aʼ axhe u Kriisto, —xeʼt Luʼ.

30Tul itiila bʼekʼu Jesuus te inqʼa nikich itxhus tibʼ s-kʼatza, uvaʼ yeʼxhabʼil s-te laʼich motx talvat, uvaʼ aʼich Jesuuse u Kriisto.

Uvaʼs talt vet quBʼaal Jesuus uvaʼ tetxhal laʼich yatzʼax el, atz laʼich itzʼeʼv inpaqte

Tio 16.21-28; Luk 9.22-27

31Yaʼne xeʼt Jesuus tiʼ talt te inqʼa nikich itxhus tibʼ s-kʼatza, tiʼ uvaʼ yeʼich kuxh laʼ kaj utxhchil tiʼ ikʼaxbʼisal Jesuus, kʼuxh aʼ Jesuuse u Kʼaola uvaʼ bʼen s-alam aanima. Atz laʼich ixval Jesuus taʼn inqʼa iqʼesal u tenam, atz taʼn inqʼa iqʼesal oksan yol vatz Tiuxh, atz taʼn inqʼa nikich txhusun ibʼekʼbʼal inqʼa qumol s-tijaq imam Israeel. Tul tetxhal laʼich yatzʼax el Jesuus. Poro titoxv qʼij laʼich itzʼeʼvk Jesuus inpaqte. 32Tul tira tal Jesuus inuqul u yol te inqʼa nikich itxhus tibʼ s-kʼatza.{*}#8.32 ¿Kam s-tiʼil maqax quBʼaal Jesuus taʼn Luʼ? Tiʼ uvaʼ tan Luʼ txumun ivatz quBʼaal Jesuus s-vatz. Atz yeʼ nikich isaʼ Luʼ uvaʼ laʼich yatzʼax quBʼaal Jesuus. Tan Luʼ, yeʼ nikich ibʼen s-te kame u titzʼabʼalich quBʼaal Tiuxh kʼaqelich taʼn tiʼ quBʼaal Jesuus. Atz yeʼ nikich ibʼen te Luʼ uvaʼ, aʼ quBʼaal Jesuus laʼich jaqon u bʼey tuchʼ vikamebʼal tiʼ ibʼen inqʼa xaol kʼatz quBʼaal Tiuxh. Atz aʼ nikich titzʼa Luʼ uvaʼ, aʼ quBʼaal Jesuus laʼich ok siqʼesalil tiʼ teesal iqʼij inqʼa sol aj Rooma. Tan taʼn kuxh nikich titzʼa Luʼ u vatz txʼavaʼ. Pet xamtichetz veteʼ, tul qʼoon bʼen vet te Luʼ kamiche u titzʼabʼal quBʼaal Tiuxh tiʼ quBʼaal Jesuus.

Yaʼne iqʼol el Jesuus s-junal taʼn Luʼ. Tul xeʼt Luʼ tiʼ imaqax Jesuus.

33Tul sutxhqʼ Jesuus tiʼ isaqil inqʼa nikich itxhus tibʼ s-kʼatza. Tul ech tal Jesuus tiʼ imaqax Luʼ s-eche: —¡Eloq el viyol Satanaas tatziʼ, Luʼ! Tan bʼane aʼ koq nik eetzʼa kam uvaʼ nik isaʼ quBʼaal Tiuxh s-viʼ. Pet yiqxh aʼ nik atxakunsa u titzʼabʼal xaol, inqʼa yeʼ ootzaqin tetz quBʼaal Tiuxh, —xeʼt Jesuus.

34Yaʼne isikʼle tzaan Jesuus inqʼa xaol tuchʼ inqʼa nikich itxhus tibʼ s-kʼatza. Tul ech tal Jesuus s-eche: —Jaʼl ex, uvaʼ nik esaʼ etxhʼuyeʼv s-viʼ, tiʼ etxhust etibʼ sinkʼatza, tul aʼ isaʼ uvaʼ jit aʼ laʼ etatxhva ikʼulux vaʼq bʼaʼnil tzitza vatz txʼavaʼ. Pet txhʼuyeʼvoq ex s-viʼ, kʼuxh mam kʼaxkʼo laʼ palk ex, tul kʼuxh ech laʼ ekʼaxbʼ tiʼ etxhʼuyeʼv tzaan s-viʼ eche nik ikʼaxbʼ vaʼq pereexho tiʼ tiqal vikurus. 35Tan jatvaʼlxh ex, uvaʼ laʼ esaʼ ekolt u qʼij esaq tetz vatz txʼavaʼ, tiʼ yeʼ etalt etibʼ s-niman vetz, tul aʼetz exe, uvaʼ laʼ tzʼeqon u qʼij esaq yeʼl iyaʼebʼal imotxebʼal.

Pet jatvaʼlxh ex, uvaʼ laʼ yatzʼax el ex, tiʼ uvaʼ, ex niman vetz, tul laʼ etzʼeq u qʼij esaq tetz vatz txʼavaʼ tiʼ inqʼa bʼaʼnla txhaq yol s-viʼ, tul aʼetz exe, uvaʼ at qʼij esaq yeʼl iyaʼebʼal imotxebʼal kʼatz quBʼaal Tiuxh. 36Tan yeʼxhkam laʼ taqʼa, kʼuxh jankʼal inqʼa kam vatz u txʼavaʼ laʼ oleʼv u xaol tiʼ itxʼakaxeʼ, oq aʼ laʼ itzʼeq u qʼij isaq u taanxelal uvaʼ yeʼl iyaʼebʼal imotxebʼal. 37Atz laʼat koq isaʼa uvaʼ laʼ iloqʼ u xaol qʼij isaq u taanxelal kʼatz quBʼaal Tiuxh tuchʼ u mam txʼijbʼal qʼij uvaʼ laʼ itxʼak vatz u txʼavaʼ. 38Pet at ex, uvaʼ laʼ chʼixv ex s-ve. Atz laʼ chʼixv ex te vinyolbʼal vatz inqʼa xaol, inqʼa itzʼlel s-txheel, inqʼa tzʼeqxinaʼq vitxumbʼal, inqʼa aʼ kuxh mam paʼv nik ibʼaneʼ, inqʼa yeʼ nik qeon in.#Deuteronoomio 1.35 Echatetz laʼ inchʼixve sete, in, u Kʼaola uvaʼ bʼen s-alam aanima, uvaʼs laʼ vul inpaqte tuchʼ u nimla vatineʼ uvaʼ laʼ taqʼ vinBʼaal s-ve, atz tuchʼ inqʼa aanxel, —xeʼt Jesuus.

Currently Selected:

Kuxh 8: ixlC

Highlight

Copy