Kuxh 14

Uvaʼs itxhokox txumbʼal tiʼ itxeyp quBʼaal Jesuus

Tio 26.1-5; Luk 22.1-2; Xhun 11.45-53

1Echetz kuxh vet kabʼi laʼich xeʼt vet kaʼvaʼl u nimla qʼij nimaloq xoʼl inqʼa tij imam Israeel, tul aʼ, u nimla qʼij Ipal Aanxel, bʼaxa laʼich inimaleʼ. Yaʼne laʼich xeʼt vet nimaloq invaʼt u nimla qʼij, uvaʼs nikich itxʼaʼp inqʼa paan uvaʼ yeʼl aqʼbʼal jaʼ tuul atoʼk.#Eeksodo 12.1-27 Tul imol vet tibʼ inqʼa iqʼesal oksan yol vatz Tiuxh tuchʼ inqʼa nikich txhusun ibʼekʼbʼal inqʼa qumol s-tijaq imam Israeel. Tul motx ibʼan vet eela iyol tiʼ itxhokox txumbʼal, tuchʼ tzʼeqo tzij, tiʼ itxeyp Jesuus, atz tiʼ iyatzʼax el Jesuus. 2Tul ech motx tal vet inqʼa iqʼesal s-eche: —Poro yeʼ laʼ utxh qutxeyt naq tuulbʼal u nimla qʼij, tan avoqe toq kuxh motx ivavu tibʼ inqʼa xaol tu tenam, —xeʼtaq iyoltaʼ.

Uvaʼs ipeqʼt jaʼ val u ixoq txʼumbʼisabʼal tiviʼ quBʼaal Jesuus

Tio 26.6-13; Xhun 12.1-8

3Atich vet Jesuus tu tenam Vetaania tu totzotz Simoon, uvaʼ maʼtich ibʼant vet bʼaʼn tu qʼajchil txhiʼoʼl. Kʼuqlich ok Jesuus viʼ meexha. Tul aqʼbʼ val u ixoq kʼatz Jesuus, uvaʼ iqʼomich bʼaʼnla txʼumbʼisabʼal taʼn, taʼlilich val u tzeʼ, uvaʼ naardo ibʼij, uvaʼ sibʼichxh ijaʼmil. Tul aʼ atich kuʼ u txʼumbʼisabʼal tuul val u bʼaʼnla atibʼal uvaʼ sivanichxhtuʼ. Yaʼne iqʼupeʼl u ixoq iviʼ u atibʼal, tul ipeqʼ kuʼ u txʼumbʼisabʼal tiviʼ Jesuus.

4Tul lakp vet iviʼ kaʼl inqʼa atich ok viʼ meexha kʼatz Jesuus tiʼ kam uvaʼ ibʼan u ixoq. Tul ech motx tal s-eche: —Yeʼ koq nik ibʼutxh ixoq u txʼumbʼisabʼal. 5Pet aʼl koq qat kʼayili. Tan oxvaʼl sieen (300) denaario puaq ijaʼmil. Tul oxvaʼlen sieen (300) iqʼij invaʼl vinaq tiʼ u puaq uvaʼe. Pet aʼl koq qat kʼayili, tul laʼ lotxhox inqʼa meebʼaʼ tuchʼ u puaq, —xeʼtaqe. Tul mam kuxh vet yol nikich motx tal tiʼ u ixoq.

6Yaʼne ech tal Jesuus s-eche: —Yeʼ kuxh kam etal tiʼ u ixoq. Tan bʼaʼnile uvaʼ nik ibʼan s-ve. 7Bʼaʼn inqʼa meebʼaʼ, tan oq laʼ esaʼa laʼ elotxha, tul laʼ utxhi. Tan ech kuxh toq tatine sexoʼl. Pet in, tan ech koq kuxh saʼ vatine sexoʼl.#Deuteronoomio 15.11 8Pet u ixoq, tan qat taqʼl jankʼal uvaʼ qat tzaj s-kʼuul tiʼ ibʼaxabʼsal ibʼanax tutxh vintxhiʼoʼl uvaʼs toq inmuqtxʼeʼ. 9Nuqxh nik val sete uvaʼ: Talxh laʼ bʼen paxsalik inqʼa bʼaʼnla txhaq yol s-viʼ, tuulbʼal jankʼal inqʼa tenam vatz txʼavaʼ, tul laʼ alax kam uvaʼ qat ibʼan u ixoq s-ve. Echetz yeʼ laʼ isotz talaxe u bʼaʼnil uvaʼ qat ibʼan u ixoq, —xeʼt Jesuus.

Uvaʼs toksal quBʼaal Jesuus tiqʼabʼ inqʼa iqʼesal uqʼeʼybʼal taʼn Juudas

Tio 26.14-16; Luk 22.3-6

10Yaʼne bʼen vet Juudas, u aj tenam Karioote, tiʼ ibʼant eela iyol tiʼ toksal Jesuus tiqʼabʼ inqʼa iqʼesal oksan yol vatz Tiuxh, kʼuxh atich ok Juudas s-tatxhul kabʼlaval inqʼa nikich itxhus tibʼ kʼatz Jesuus. 11Tabʼietz vet inqʼa iqʼesal uqʼeʼybʼal u yol uvaʼ tal Juudas, tul yekichxh motx chiibʼ veteʼ. Tul taltziaq vet puaq te Juudas. Tul yekich taqʼ vet te Juudas. Echetz ixeʼt vet Juudase tiʼ itxhokt txumbʼal tiʼ toksal Jesuus tiqʼabʼ inqʼa iqʼesal.

Uvaʼs ibʼant quBʼaal Jesuus u yaʼtebʼal txʼix tuchʼ inqʼa nikich itxhus tibʼ s-kʼatza

Tio 26.17-29; Luk 22.7-23; Xhun 13.21-30; 1 Koriintios 11.23-26

12Aʼ topoon u bʼaxa qʼij tetz u nimla qʼij u Txʼaʼbʼal Tetz Inqʼa Paan uvaʼ yeʼl aqʼbʼal jaʼ tuul atoʼk, atz uvaʼs nikich iyatzʼt inqʼa tij imam Israeel inqʼa ichelem karneʼl tiʼ itzʼeʼsal ok vatz Tiuxh tiʼ inimal u nimla qʼij Ipal Aanxel.

Tul ech tal inqʼa nikich itxhus tibʼ kʼatz Jesuus s-te s-eche: —¿Tal bʼen qubʼanvat tutxh u qetxhbʼubʼal tiʼ inimal u nimla qʼij Ipal Aanxel, tul laʼ txʼaʼon oʼ? —xeʼtaq te Jesuus.

13Yaʼne itxhaq bʼen Jesuus kaʼvaʼl inqʼa nikich itxhus tibʼ s-kʼatza. Tul ech tal bʼen Jesuus s-tiʼ s-eche: —Bʼenoq ex tu tenam Jerusaleen. Tul bʼen ekʼul etibʼ tuchʼ val u vinaq uvaʼ iqʼomal vaʼl nimla txeʼn aʼ taʼn. Echetz txhʼuyeʼv vet bʼen ex s-tiʼ. 14Jabʼisteetz u otzotz uvaʼ laʼ palkoʼk u vinaq, tul ech laʼ etal te u aj otzotz s-eche: «Ech nik tal naq u Txhusul qetz s-eche: –¿Jabʼiste invaʼq itziʼ vavotzotz s-te toq inkʼameʼ, tal uvaʼ toq txʼaʼonk in tuchʼ inqʼa nik itxhus tibʼ sinkʼatza tiʼ inimal u txʼix tetz u nimla qʼij Ipal Aanxel? –chich u Txhusul qetz,» chaq ex.

15Yaʼne bʼen ikʼutxh vet u aj otzotz vaʼl u nimla otzotz tikaʼviq, uvaʼ bʼanel vet tutxheʼ. Tul aʼetz laʼ ebʼanvat tutxh qetxhbʼubʼal tzitzi, —xeʼt Jesuus.

16Bʼenetz vet kaʼvaʼl inqʼa nikich itxhus tibʼ kʼatz Jesuus, tul yekich vet tu tenam Jerusaleen. Tul echxh elkaʼpune kam uvaʼ tal bʼen Jesuus s-tiʼ. Tul motx ibʼan vet tutxh inqʼa etxhbʼubʼal uvaʼ bʼanbʼel tiʼ u nimla qʼij Ipal Aanxel.

17Aʼetzxh iqʼeqx veteʼ, tul aqʼbʼ vet Jesuus tuchʼ kabʼlaval inqʼa nikich itxhus tibʼ s-kʼatza tu otzotz.

18Tul ok vet Jesuus viʼ meexha s-tuchʼ. Tuulbʼaletz uvaʼs nikichaq itxʼaʼoneʼ, tul ech tal Jesuus s-xoʼl s-eche: —Nuqxh nik val sete: At invaʼl ex, uvaʼ nik etxʼaʼon sinkʼatza s-txheel, toq oksan in tiqʼabʼ inqʼa iqʼesal uqʼeʼybʼal, —xeʼt Jesuus.

19Yaʼne xeʼtaq vet txumun. Tul ech tal vet junun s-eche: —InBʼaal, ¿maq in? —chichichaqe.

20Yaʼne ech tal Jesuus s-eche: —Antxh invaʼl ex s-te sekabʼlaval, vaʼl ex, uvaʼ il in tzum nik intotxhʼt kuʼ vinpaan tu puraato setuchʼ. 21Poro tetxhalxh toq yatzʼaxoq el in, eche uvaʼ tzʼibʼamal ka s-viʼ t-viyolbʼal quBʼaal Tiuxh, in, u Kʼaola uvaʼ bʼen s-alam aanima. Pet txumlebʼalxh ivatz naq u vinaq uvaʼ toq oksan in tiqʼabʼ inqʼa iqʼesal uqʼeʼybʼal. Bʼaʼn uvaʼ tira koq yeʼl naqe alali, —xeʼt Jesuus.#Saalmo 41.9

22Tuulbʼaletz uvaʼs nikich itxʼaʼon Jesuus tuchʼ inqʼa nikich itxhus tibʼ s-kʼatza, tul tiqʼo tzaan Jesuus val u paan. Yaʼne taqʼ taʼntiuxh te quBʼaal Tiuxh s-tiʼ. Tul ipixh u paan s-tuul. Tul taqʼ te inqʼa nikich itxhus tibʼ s-kʼatza. Tul ech tal Jesuus s-eche: —Kʼulvaq u paan, tan aʼ vintxhiʼoʼle uvaʼa, —xeʼt Jesuus.

23Yaʼne tiqʼo tzaan Jesuus val u koopa, uvaʼ atich vet kuʼ taʼl uuva s-tuul. Tul taqʼ taʼntiuxh te quBʼaal Tiuxh s-tiʼ. Atz taqʼ vet te inqʼa nikich itxhus tibʼ s-kʼatza. Tul junun motx tukʼataq vet inbʼiitxhaqul u aʼ, uvaʼ atich tu koopa.

24Yaʼne ech tal Jesuus s-eche: —Aʼetz vinkaqale uvaʼa, uvaʼ toq eloq tiʼ isotzsal ipaʼv inqʼa xaol, atz uvaʼ toq jeqbʼan ka [u akʼla inyol] sexoʼl tiʼ ikuyux ipaʼv mamala xaol.{*}#14.24 ¿Kam nik elkaʼp u yol uvaʼ?: —…toq eloq tiʼ isotzsal ipaʼv inqʼa xaol, atz uvaʼ toq jeqbʼan ka invaʼt u akʼla inyol sexoʼl tiʼ ikuyux ipaʼv mamala xaol, —xeʼt quBʼaal Jesuus. Aʼetz nik elkaʼpun uvaʼ laʼ ikuy quBʼaal Jesuus vipaʼv inqʼa xaol, jaʼl inqʼa laʼ jaqon ikuya te quBʼaal Jesuus. Tul laʼ ikʼul qʼij isaq uvaʼ yeʼl iyaʼebʼal imotxebʼal. Aʼ vikaʼv iyol qubʼaal tiuxh uvaʼ ul ijeqbʼa quBʼaal Jesuus uvaʼ nik tal Jeremiias 31.31-34. Pet u bʼaxa yol uvaʼ ijeqbʼa quBʼaal Tiuxh, tan aʼ ijeqbʼavat tuchʼ inqʼa tij imam Israeel, atz tuchʼ Moisees s-naʼya. Ech uvaʼe nik tal tu Eeksodo 24.3-8. Pet u bʼaxa yol uvaʼ ijeqbʼa quBʼaal Tiuxh, tan aʼ ijeqbʼavat tuchʼ inqʼa tij imam Israeel, atz tuchʼ Moisees s-naʼya. Ech uvaʼe nik tal tu Eeksodo 24.3-8. 25Poro nuqxh nik val sete uvaʼ: Yeʼl inpaqt laʼ vukʼa taʼl uuva setuchʼ. Pet laʼ nal opoon u qʼij uvaʼs laʼ qukʼult qibʼ uvaʼs laʼ ibʼant quBʼaal Tiuxh viqʼesalil, yaʼne laʼ vukʼa setuchʼ inpaqte, —xeʼt Jesuus.#Apokaliipsis 19.9-10

26Ibʼitzleetz kuxh vet Jesuus val u bʼitz tuchʼ inqʼa nikich itxhus tibʼ s-kʼatza, tul bʼenaq vet tu vitz Inqʼa Oliivo.

Uvaʼs ibʼaxabʼsat quBʼaal Jesuus talaxeʼ uvaʼ toq naʼqich itzʼeq vet Luʼ tzij

Tio 26.30-35; Luk 22.31-34; Xhun 13.36-38

27Yaʼne ech tal Jesuus te inqʼa nikich itxhus tibʼ s-kʼatza s-eche: —Tuulbʼal u aqʼbʼal s-txheelaʼ, jankʼalxh ex toq aqʼon ka in sinjunal t-xoʼval. Tan ech nik tal val u yol uvaʼ tzʼibʼamal ka s-eche:

«Laʼ yatzʼax el u xeen karneʼl,

tul talaq kuxh

laʼ ikʼaq vet inqʼa karneʼl,»

chich u yol.#Sakariias 13.7

28Pet laʼetz itzʼeʼv vet in inpaqte, tul laʼ bʼaxabʼ bʼen in sevatz tuulbʼal Galileea, —xeʼt Jesuus.#Tio 28.16

29Yaʼne ech tal Luʼ s-eche: —Kʼuxh laʼ motx taqʼ ka axh txhaqnaq sajunal t-xoʼval, pet in, tan ¡yeʼl paqul laʼ vaqʼ ka axh! —xeʼt Luʼ.

30Tul ech tal Jesuus te Luʼ s-eche: —Nuqxh toq val see uvaʼ tuulbʼal u aqʼbʼal s-txheelaʼ, tul ech toq aal s-viʼ s-eche: «Yeʼ vootzaql Jesuus,» toq aaleʼ. Oxpaquletz maʼt aalt s-eche, tul laʼ oqʼ val u mam kaxhan [tikaʼpaq], —xeʼt Jesuus.

31Yaʼne tira itxakbʼa Luʼ vaʼl iyol. Tul ech tal Luʼ s-eche: —¡Kʼuxh tzum laʼ inkam savuchʼ, tul ech kam in! Poro ¡yeʼl paqul laʼ intzʼeq tzij seʼe! —xeʼt Luʼ.

Tul echat kuxh tal jolt inqʼae nikich itxhus tibʼ kʼatz Jesuus.

Uvaʼs inatxht quBʼaal Jesuus Tiuxh tu xhoraal Jetzemanii

Tio 26.36-46; Luk 22.39-46

32Opoonetz vet Jesuus tuchʼ inqʼa nikich itxhus tibʼ s-kʼatza t-val u xhoraal Jetzemanii, tul ech tal Jesuus s-te s-eche: —Kʼuqeʼvoq ka ex tzitza, ayaʼl s-tuul maʼt innatxh Tiuxh tzitzi, —xeʼt Jesuus.

33Taʼnetzxh Luʼ tuchʼ Jakoovo tuchʼ Xhun tiqʼo Jesuus s-tiʼ. Tul xeʼt Jesuus txumun; atz mam kʼayunchil nikich bʼanon vet Jesuus.

34Yaʼne ech tal Jesuus s-eche: —Valxh u mam txumuʼm at t-vaanima; tul tetxhal vet vopoon vatz u kamchil taʼn. Pet atoq ka ex tzitza, tul itzʼloqvaq ex, —xeʼt Jesuus.

35Bʼiiletz kuxh ijetxh bʼen tibʼ Jesuus, tul ijoqbʼa tibʼ Jesuus tiʼ inatxhax Tiuxh. Tul tabʼi Jesuus te quBʼaal Tiuxh uvaʼ yeʼich koq laʼ pal tu mam kʼaxkʼo tuulbʼal u oora uvaʼeʼ. 36Tul ech tal Jesuus tiʼ inatxht Tiuxh s-eche: —Bʼaali, axh vinBʼaal uvaʼ yeʼxhkam invaʼq tzaʼl savatz. Yeʼl koq in laʼ pal in tu mam kʼaxkʼo nik valeʼ, u kʼaxkʼo uvaʼ toq uloq s-viibʼa. Poro jit aʼ, laʼ abʼan kam uvaʼ nik valeʼ, pet aʼ, abʼan kam uvaʼ nik eetzʼa s-viʼ, —xeʼt Jesuus.

37Yaʼne qʼaʼv Jesuus. Tul ul Jesuus inpaqte xoʼl oxvaʼl inqʼa nikich itxhus tibʼ s-kʼatza. Tul vatyaqiche. Tul ech tal Jesuus te Luʼ s-eche: —¡Yeʼ kuxh vat axh, Simoon! ¡Yeʼetz kolxh qat atxʼol invaʼq oora uvaʼ itzʼlel koq axh! 38Pet natxhnotxh etatineʼ. Tul natxhvaq Tiuxh, echetz laʼ etxʼolt emaqt etibʼe tiʼ epaʼvineʼ, kʼuxh laʼ etxhbʼul ekuʼ t-paʼv. Tan kamal nik isaʼ vetaanxelal inatxhax Tiuxh, poro aʼ, vetxhiʼoʼl, yeʼ nik txʼolon, —xeʼt Jesuus.

39Yaʼne bʼen Jesuus tiʼ inatxhax Tiuxh inpaqte. Tul ant kuxh tal Jesuus te quBʼaal Tiuxh kam uvaʼ tal s-bʼaxa.

40Yaʼne qʼaʼv Jesuus inpaqte. Tul vatyaqiche s-tul Jesuus s-kʼatza. Tan kamyaqichxh t-vataʼm. Iyajetz vet Jesuus inqʼa nikich itxhuseʼ. Tul yeʼaq itxhabʼa vet itzaqʼbʼel Jesuus.

41Bʼenetz vet Jesuus titoxpaq tiʼ inatxhax Tiuxh, yaʼne qʼaʼv Jesuus inpaqte kʼatz inqʼa nikich itxhus tibʼ s-kʼatza. Tul ech tal Jesuus s-eche: —¡Kam s-tiʼil ant kuxh vaty ex; atz ilaʼm kuxh nik ebʼan veteʼ! ¡Yaʼ vet tzij! ¡Yeʼ vat vet ex!, tan opoony veteʼ, uvaʼ txheel toq oksaloq vet in tiqʼabʼ inqʼa aj paʼvom, in, u Kʼaola uvaʼ bʼen s-alam aanima. 42Pet ¡lakpoq vet ex, tul koʼvaq! Tan il naq tul veteʼ, uvaʼ toq oksan in tiqʼabʼ inqʼa iqʼesal uqʼeʼybʼal, —xeʼt Jesuus.

Uvaʼs itxeyp vet Jesuus

Tio 26.47-56; Luk 22.47-53; Xhun 18.2-11

43Sebʼ telichetz iyolon Jesuus, tul aqʼbʼ Juudas, uvaʼ atich ok s-tatxhul kabʼlaval inqʼa nikich itxhus tibʼ kʼatz Jesuus. Tul txhʼuyich vet mamala xaol tiʼ Juudas, inqʼa iqʼomalich iespaada taʼn, atz iqʼomalich itzeʼ taʼn. Tan txhaqelich inqʼa xaol inqʼae, taʼn inqʼa iqʼesal oksan yol vatz Tiuxh, atz taʼn inqʼa nikich txhusun ibʼekʼbʼal inqʼa qumol s-tijaq imam Israeel, atz taʼn inqʼa iqʼesal u tenam.

44Tul ech maʼtich talt Juudas, uvaʼ oksan Jesuus tiqʼabʼ inqʼa iqʼesal uqʼeʼybʼal, s-eche: —Jaʼl naq, uvaʼ laʼ bʼen intzʼubʼ txala itziʼ, tul aʼetz naqe, uvaʼ laʼ bʼen etxeyeʼ. Laʼetz etxhabʼa itxeyex naq, tul laʼ etiqʼo naq, —xeʼt Juudas.

45Ijetxhetz vet ok tibʼ Juudas kʼatz Jesuus, tul ech tal te Jesuus s-eche: —Xeni, Txhusul qetz, —xeʼt Juudas. Tul itzʼubʼ vet Juudas txala itziʼ Jesuus, tiʼ taqʼax bʼaʼnil ikʼuul Jesuus.

46Yaʼne txeyp vet Jesuus taʼn inqʼa itxhaq inqʼa iqʼesal uqʼeʼybʼal; atz qitzix vet Jesuus taʼn. 47Taʼnetzxh til vaʼl inqʼa nikich itxhus tibʼ kʼatz Jesuus itxeyp Jesuus, tul ijuj jaʼul viespaada. Tul itzokʼeʼl paqʼil ixichin vaʼl u taqʼonvil u mam iqʼesal oksan yol vatz Tiuxh.#Luk 22.49-51

48Yaʼne ech tal Jesuus te inqʼa xaol s-eche: —Echxh vete in vaʼq elqʼom sevatz. Tan il ex, iqʼomal e-espaada etaʼn. Atz il ex, iqʼomal etzeʼ etaʼn tiʼ intxeypeʼ. 49Tul jun qʼij nikich motx etilt intxhusun sexoʼl tu nimla atibʼal tuulbʼal u tostiuxh. Tul yeʼl in nikich etxey in. Poro echxh laʼ ibʼane tiʼ telaʼp inqʼa yol s-viʼ. Tan ech uvaʼe tzʼibʼamal ka taʼn inqʼa qʼexsanich tetz viyol quBʼaal Tiuxh, —xeʼt Jesuus.

50Motxetz itzʼeq vet tibʼ inqʼa nikich itxhus tibʼ kʼatz Jesuus, tul kaj vet Jesuus s-junal.

Uvaʼs itzʼeqt tibʼ val u chelem vinaq

51Txhʼuyichetz tzaan in tiʼ Jesuus, in u chelem vinaq uvaʼ atich ok val u chemkin bʼuʼq s-viʼ. Tul txeyex in taʼn inqʼa xaol. 52Intzʼeqetz vet vibʼ, in u chelem vinaq, tul aʼ kuxh vet u chemkin oksaʼm kaj tiqʼabʼ inqʼa xaol. Tul yeʼlich vet voksaʼm sintzʼeqt vibʼ.{*}#14.52 Eche u yol uvaʼ nik tal tzitza tiʼ u chelem vinaq, tan nik talaxeʼ uvaʼ, aʼich Kuxhe u chelem vinaq. Tul nik ibʼen s-qe uvaʼ tira aʼ chʼijk Kuxh kʼatz inqʼa apoostol. Tul nikichat tabʼi Kuxh txhaq tanul inqʼa yol uvaʼ nikich tal quBʼaal Jesuus. Tul antetzxh Kuxhe uvaʼ bʼen tuchʼ Vernavee, vitxhʼoj, atz bʼenaq tuchʼ Paʼp tiʼ ipaxsal viyolbʼal quBʼaal Tiuxh, eche uvaʼ nik tal t-Vibʼanoʼm inqʼa Apoostol 13.5, 13. Xamteletz vet tiʼ inqʼa yol inqʼae, tul lotxhonalich vet Kuxh kʼatz Luʼ, tetxhal motx taqʼbʼ tu mam tenam Rooma. Tul tzitzi itzʼibʼavat vet Kuxh kam uvaʼ maʼtich tilt Luʼ kʼatz quBʼaal Jesuus. Tan echich vet tatin Kuxh kʼatz Luʼ eche invaʼq aj tzʼibʼ.

Uvaʼs taqʼax kuʼ yol tinuqul tiʼ quBʼaal Jesuus taʼn inqʼa iqʼesal inqʼa tij imam Israeel

Tio 26.57-68; Luk 22.54-55, 63-71; Xhun 18.12-14, 19-24

53Yaʼne iqʼol vet Jesuus vatz u mam iqʼesal oksan yol vatz Tiuxh. Tul motx ikʼul vet tibʼ jankʼal inqʼa iqʼesal oksan yol vatz Tiuxh, tuchʼ inqʼa nikich txhusun ibʼekʼbʼal inqʼa qumol s-tijaq imam Israeel, atz tuchʼaq jolt inqʼa iqʼesal u tenam. 54Tul niim kuxh txhʼuyich tzaan Luʼ tiʼ Jesuus, tetxhal taqʼbʼ Luʼ tuul okaʼp viqʼanalil u totzotz u mam iqʼesal oksan yol vatz Tiuxh. Tul yekich ok Luʼ kʼuqloq kʼatz jolol inqʼa xeenal tiʼ ilejt tibʼ vatz xamal.

55Yaʼne motx xeʼt vet inqʼa iqʼesal oksan yol vatz Tiuxh tuchʼ inqʼa aqʼolaq kuʼ yol tinuqul, tiʼ itxhokox txumbʼal tiʼ itxhej ipaʼv Jesuus, kʼuxh tzʼeqo tzij kuxhtuʼ. Tan aʼichaq isaʼ ikameʼl Jesuus. Pet yeʼxh txhej ixeʼ u yol tiʼ taqʼtaq yaʼl tiʼ itxhej ipaʼv Jesuus. 56Kʼuxh nimalen xaol aqʼbʼ tiʼ itzʼeqex tzij tiʼ Jesuus, poro yeʼ nikich ibʼan eela inqʼa yol, inqʼa nikich tal tiʼ Jesuus.

57Yaʼne txakp jolol inqʼa xaol tiʼ itzʼeqex tzij tiʼ Jesuus. Tul echaq tal s-eche: 58—Ech val u yol qabʼi talt naq u vinaq uvaʼe s-eche: «Toq intilu el u tostiuxh uvaʼe, uvaʼ bʼanel taʼn naq inqʼa vinaq. Tul oxvaʼl kuxh qʼij laʼ oleʼvk in tiʼ taqʼax jaʼ invaʼte, poro jit invaʼq vinaq laʼ bʼanon,» xeʼt naq, —xeʼtaqe.#Xhun 2.20

59Poro jitoq nikich ibʼan eela inqʼa yol, uvaʼ nikich tal inqʼa tzʼeqol tzij inqʼae, tuchʼ uvaʼ nikich tal jolt inqʼa alon yol tiʼ Jesuus s-bʼaxa.

60Yaʼne txakeʼv u mam iqʼesal oksan yol vatz Tiuxh xoʼl jolt inqʼa iqʼesal. Tul ech tal te Jesuus s-eche: —¿Yeʼetz laʼ tzaqʼbʼ axh tiʼ inqʼa yol? Atz ¿yeʼxhkametz kol toq aal tiʼ inqʼa yol uvaʼ nik tal txhaqnaq seʼe? —xeʼte.

61Tul yeʼl Jesuus tzaqʼbʼi. Atz yeʼxhkam vaʼq yol tal Jesuus.

Yaʼne jotxhʼil itziʼ Jesuus inpaqte taʼn u mam iqʼesal oksan yol vatz Tiuxh. Tul ech tal te Jesuus s-eche: —¿Aʼetz kol axhe u Kriisto, viKʼaol u quBʼaal Tiuxh, uvaʼ nik inatxhkʼuulaleʼ? —xeʼt te Jesuus.

62Tul ech tal Jesuus s-eche: —Ee, ine. Tul toq val sete: Toq etil inkʼuqeʼv tiʼ inbʼant iqʼesalil tisebʼal u tiqleʼm u Nimla vatz inBʼaal Tiuxh, in, u Kʼaola uvaʼ bʼen s-alam aanima. Atz toqat etil vul xoʼl suʼtzʼ vatz u amlikaʼ, —xeʼt Jesuus.#Danieel 7.13

63Taʼnetz kuxh tabʼi u mam iqʼesal oksan yol vatz Tiuxh u yol uvaʼ tal Jesuus, tul iqʼixeʼl u toksaʼm s-tiʼ.#Leviitiko 24.16{*}#14.63 ¿Kam s-tiʼil lakp iviʼ Kaifaas, u mam iqʼesal oksan yol vatz Tiuxh, tiʼ u yol uvaʼ tal quBʼaal Jesuus? Tiʼ uvaʼ tan, tal quBʼaal Jesuus uvaʼ tira imol tibʼ quBʼaal Jesuus tuchʼ quBʼaal Tiuxh, atz vaʼl laʼ ikʼuqeʼv quBʼaal Jesuus tuchʼ quBʼaal Tiuxh. Pet vatz inqʼa iqʼesal, tan yiqxh sulaʼ xaolich kuxh quBʼaal Jesuus. Echetz s-tiʼile lakp iviʼ inqʼa iqʼesal, tan motx tabʼi uvaʼ tira nikich tal tibʼ quBʼaal Jesuus s-Tiuxh. Tul aʼ nikich tal inqʼa bʼekʼbʼal uvaʼ sivan laʼ tatxhi u xaol uvaʼ laʼ tal tibʼ s-Tiuxh. Xaʼtetze iqʼixeʼl Kaifaas u toksaʼm s-tiʼ t-kʼaʼnal. Leviitiko 24.16

Tul ech tal s-eche: —¡Yeʼletz vet vaʼtoʼq xaol nik qusaʼ, tiʼ talax inuqul u yol tiʼ naq! 64Tan ¡ile qat qabʼil vet setuchʼ s-txheel kam uvaʼ qat tal naq tiʼ teesal iqʼij quBʼaal Tiuxh! ¿Kametz vet eyol tiʼ naq? —xeʼt u mam iqʼesal.#Leviitiko 24.16 Tul aalatxh vet talt inqʼa iqʼesal s-kaqaayil iyatzʼax el Jesuus.

65Yaʼne ataq vet inqʼa xeʼt tiʼ itzubʼal Jesuus. Atz ataq inqʼa qitzon ok bʼuʼq tivatz Jesuus. Atz ataq inqʼa uʼtxhimich iqʼabʼ tiʼ iqʼosox Jesuus. Tul ech nikich motx tal te Jesuus s-eche: —Oqetz axh qʼexsan tetz viyol quBʼaal Tiuxh, tul aletz s-qe ¿jaʼletz oʼe uvaʼ qat qʼoson axh? —chichichaq kuxh tiʼ imaxubʼel Jesuus. Tul xeʼtaq vet jolt inqʼa xeenal tiʼ iqʼosox Jesuus.

Uvaʼs itzʼeqt vet Luʼ tzij tiʼ quBʼaal Jesuus

Tio 26.69-75; Luk 22.55-62; Xhun 18.15-18, 25-27

66Kʼuqlichetz Luʼ t-viqʼanalil u totzotz u mam iqʼesal oksan yol vatz Tiuxh; tul aʼ, kʼuqlich Luʼ t-vibʼaxa viq. Tul aqʼbʼ val u ixoq kʼatz Luʼ, vaʼl inqʼa aqʼonvil tetz u mam iqʼesal oksan yol vatz Tiuxh. 67Ilixetz vet Luʼ taʼn u ixoq, uvaʼs nikich ilejt tibʼ Luʼ vatz xamal, tul itiila saqi ivatz Luʼ. Tul ech tal ixoq te Luʼ s-eche: —Ant axh imol Jesuus, u aj Nasareet, ¿abʼa? —xeʼt te Luʼ.

68Tul itzʼeq Luʼ tzij. Tul ech tal Luʼ s-eche: —Yeʼ vootzaql naq. Tul tira yeʼ vootzaqle kam uvaʼ nik aaleʼ, —xeʼt Luʼ. Tul el vet ul Luʼ tziʼ vijubʼalil u vatz qʼanal. [Tul oqʼ vet u mam kaxhan.]

69Ilixetz Luʼ inpaqte taʼn u ixoq, u aqʼonvil, tul ech tal u ixoq te inqʼa xaol, inqʼa txaklelich tzitzi, s-eche: —Ante u vinaq uvaʼe, imol tibʼ tuchʼ inqʼa nik itxhus tibʼ kʼatz u vinaq uvaʼ qat txeypi, —xeʼt u ixoq.

70Yaʼne itzʼeq Luʼ tzij inpaqte.

Poro bʼiiletzxh vet s-tuul, tul ech tal inqʼa xaol, inqʼa atich tzitzi, te Luʼ s-eche: —Nuqxhtuʼ uvaʼ ant axh imol u vinaq uvaʼ qat txeypi. Tan axh aj Galileea, —xeʼt eʼl Luʼ.

71Tul ech tal Luʼ s-eche: —¡Uloqn u yeʼbʼaʼn s-viibʼa oq nik kuxh intzʼeq tzij! Tan vatz Tiuxh nik valvat uvaʼ ¡yeʼ vootzaql naq u vinaq uvaʼ nik etaleʼ! —xeʼt Luʼ.

72Yaʼne yekich oqʼ vet u mam kaxhan [tikaʼpaq]. Tul ul vet inqʼa iyol Jesuus s-kʼuul Luʼ, uvaʼ ech tal Jesuus s-eche: —Maʼtetz aalt oxpaqul uvaʼ: «Yeʼ vootzaql Jesuus,» toq aal s-viʼ, yaʼne laʼ oqʼ val u mam kaxhan tikaʼpaq, —xeʼt tul s-kʼuul Luʼ. Tul xeʼt vet Luʼ oqʼoq.

Currently Selected:

Kuxh 14: ixlC

Highlight

Copy