Kuxh 1

KUXH

Uvaʼs ipaxsat Xhun inqʼa yol tiʼ quBʼaal Jesuus, Xhun uvaʼ nikich aqʼon kuʼ inqʼa xaol xeʼ aʼ

Tio 3.1-12; Luk 3.1-9, 15-17; Xhun 1.19-28

1Aʼ vixeʼtebʼal inqʼa bʼaʼnla txhaq yole tiʼ JesuKriisto, [viKʼaol quBʼaal Tiuxh].{*}#1.1 ¿Kam nik elkaʼp u yol ‹viKʼaol quBʼaal Tiuxh?› Aʼ nik elkaʼpun uvaʼ tira aʼ ibʼan quBʼaal Jesuus kamxhte uvaʼ nik isaʼ viTiuxhil viBʼaal, tan Tiuxh viBʼaal u quBʼaal Jesuus. Tul tira aʼ pal tiqʼo vitxumbʼal viBʼaal. Tan jankʼalxh kʼaola, tan antxh vitxumbʼal u bʼaala nik pal tiqʼo. Atz nik pal tiqʼo kam tatin u bʼaala. Echatetz uvaʼe ibʼan quBʼaal Jesuus, tan antxh Tiuxh quBʼaal Jesuus. 2Tan aʼ nik ixeʼtebʼe viyoltziil Jesuus val u yol itzʼibʼa ka Isaiias, u qʼexsanich tetz viyol quBʼaal Tiuxh, uvaʼ ech nik tal s-eche:

—Toq val see:

Laʼ inbʼaxabʼsa bʼen

val vintxhaq savatz

tiʼ ijikbʼixsal tatin taanima

inqʼa xaol savatz

tiʼ vavaqʼbʼebʼal,

—chich u yol.#Malakiias 3.1

3Tul ech tal Isaiias s-eche:

—Tul een laʼ bʼen sichʼink

viʼ inqʼa xaol,

inqʼa nik ipal tu txʼavaʼ

uvaʼ yeʼl xaol jeqlel s-tuul.

Tul ech laʼ tal s-eche:

«Jikbʼavaq etibʼ

tiʼ ikʼulux u quBʼaal

uvaʼ tuleʼ,

eche ibʼanax tutxh ibʼey

vaʼq mam iqʼesal,»

chaq vitxhaq quBʼaal Tiuxh

tiʼ u taqʼbʼebʼal u Kriisto,

—chich u yol.#Isaiias 40.3

4Echetz aʼ itzʼibʼavat Isaiias inqʼa yol tiʼ Xhun, uvaʼ nikich aqʼon kuʼ inqʼa xaol xeʼ aʼ. Tul aʼ nikich ipaxsavat Xhun inqʼa yol tu txʼavaʼ uvaʼ yeʼl xaol jeqlel s-tuul. Tul aʼ nikich tal Xhun titzʼat tibʼ inqʼa xaol vatz quBʼaal Tiuxh, atz tiʼ ijaqtaq ikuya tiʼ ikuy sotzsat quBʼaal Tiuxh inqʼa ipaʼv. Yaʼne nikich taqʼ kuʼ Xhun inqʼa xaol xeʼ aʼ, inqʼa motx qeon inqʼa yol.

5Tul mam xaol nikich itzaj tuulbʼal Judeea, atz tuulbʼal u tenam Jerusaleen tiʼ taqʼbʼ tiʼ tabʼil inqʼa yol uvaʼ nikich tal Xhun. Tul nikich motx tal inqʼa xaol inqʼa ipaʼv te quBʼaal Tiuxh. Yaʼne nikich taqʼ kuʼ Xhun inqʼa xaol xeʼ u xaomla aʼ u Jordaan. 6Aʼichetz toksaʼm Xhun u chemich xiʼl tiʼ kameeyo. Tul tzʼuʼmich qitzbʼal ok u toksaʼm Xhun xeʼ tuul. Tul sakʼ nikich tetxhbʼu Xhun tuchʼ taʼl kabʼ, inqʼa nikich ileq t-vitz s-vatzil itxʼix.#2 Reeyes 1.8

7Tul ech u yol nikich ipaxsa Xhun s-eche: —Tul vet naq vaʼt u Vinaq, uvaʼ sibʼxh palnaʼql tiqleʼm sinviʼ. Tul jitoq inkʼulel uvaʼ laʼ inchiteʼl kʼaʼil ichichʼ xaʼp naq t-toq. 8Tan il ex, qat vaqʼ kuʼ ex xeʼ aʼ s-txheel, ex, inqʼa qat etitzʼal etibʼ t-inqʼa epaʼv. Pet ech koq naq uvaʼ yaʼn tul s-viʼ, tan aʼ vet viTiuxhil Tiuxh laʼ ul taqʼ naq sete, —chichich Xhun xoʼl inqʼa xaol.#Vibʼanoʼm inqʼa Apoostol 2.1-11

Uvaʼs taqʼax kuʼ quBʼaal Jesuus xeʼ aʼ taʼn Xhun

Tio 3.13-17; Luk 3.21-22

9Tuulbʼaletz inqʼa qʼij, uvaʼs nikich ipaxsat Xhun viyolbʼal quBʼaal Tiuxh, tul el vet bʼen Jesuus tu tenam Nasareet tuulbʼal Galileea. Tul yekich vet Jesuus tal uvaʼ nikich taqʼvat kuʼ Xhun inqʼa xaol xeʼ aʼ. Tul aqʼax vet kuʼ Jesuus xeʼ aʼ taʼn Xhun tu xaomla aʼ Jordaan. 10Jaʼetz vet ul Jesuus xeʼ u aʼ, tul til Jesuus ijaqp u amlikaʼ. Tul til Jesuus ikuʼl viTiuxhil Tiuxh s-tiibʼa. Echiche paraamuxh viTiuxhil Tiuxh kuʼl tiibʼa Jesuus.{*}#1.10 ¿Kam nik elkaʼp u yol tiʼ: ‹vijaqp u amlikaʼ,› nik tal tzitza? Aʼ nik elkaʼpun uvaʼ nik iyolon kuʼl quBʼaal Tiuxh t-amlikaʼ te inqʼa xaol, eche uvaʼs iyolon tzaan quBʼaal Tiuxh t-amlikaʼ tiʼ quBʼaal Jesuus uvaʼs taqʼax kuʼ quBʼaal Jesuus xeʼ aʼ taʼn Xhun. Tan echat kuxh nik tale t-Jeenesis 28.12-13, tuchʼ Tio 3.16 tuchʼ Luk 3.21 tuchʼ Apokaliipsis 4.1.

11Yaʼne ech tal kuʼl quBʼaal Tiuxh t-amlikaʼ s-eche: —Axh inKʼaol. Kamxh in seʼe. Tul tira nik achiibʼisa in, —xeʼt kuʼl quBʼaal Tiuxh.#Isaiias 42.1

Uvaʼs tetxhbʼul ikuʼ quBʼaal Jesuus t-paʼv taʼn Satanaas

Tio 4.1-11; Luk 4.1-13

12Yaʼne bʼen vet Jesuus tu txʼavaʼ uvaʼ yeʼl xaol s-tuul. Tan aʼ viTiuxhil Tiuxh alon ibʼen Jesuus tzitzi. 13Kaʼviinqilich vet qʼij tatin Jesuus tzitzi tu txʼavaʼ uvaʼ yeʼl xaol s-tuul. Tul etxhbʼul ikuʼ Jesuus t-paʼv taʼn Satanaas. Aʼetz atilich Jesuus xoʼl inqʼa txhiʼomla txoo, poro aʼ, inqʼa aanxel, nikich kʼuulan Jesuus.{*}#1.13 Eche u yol ‹Satanaas,› tan eela kuxh tuchʼ talax u yol ‹diaavlo.›

Uvaʼs ixeʼt quBʼaal Jesuus tiʼ ipaxsal viyolbʼal quBʼaal Tiuxh tuulbʼal Galileea

Tio 4.12-17; Luk 4.14-15

14Maʼtichetz taqʼax vet jaʼ Xhun t-tzeʼ, tul qʼaʼv Jesuus tuulbʼal Galileea tiʼ ipaxsal inqʼa bʼaʼnla txhaq yol uvaʼ aʼ tzajnaʼq kʼatz quBʼaal Tiuxh, [tiʼ vibʼant quBʼaal Tiuxh iqʼesalil xoʼl inqʼa xaol]. 15Tul ech nikich tal Jesuus s-eche: —Itzʼavaq etibʼ t-inqʼa epaʼv vatz quBʼaal Tiuxh. Tul qejvaq inqʼa bʼaʼnla txhaq yol tetz quBʼaal Tiuxh. Tan opoony vet inqʼa qʼij uvaʼ xeʼtiy vet quBʼaal Tiuxh tiʼ ibʼant iqʼesalil t-taanima inqʼa xaol, —chichich Jesuus.#Danieel 2.34-35, 44-45

Uvaʼs talt quBʼaal Jesuus itxhʼuyeʼv kajvaʼl inqʼa txeyol txay s-tiʼ, tiʼ itxhust tibʼ s-kʼatza

Tio 4.18-22; Luk 5.1-11

16Nikichetz ixaon Jesuus titziʼ u mam aʼ Galileea, tul til Jesuus kaʼvaʼl inqʼa vinaq uvaʼ titzʼinich tibʼ. Vaʼl, uvaʼ Simoonich ibʼij; tul vaʼt, uvaʼ Lixhich ibʼij. Sebʼtichaqetz taqʼt bʼen ikʼatxh xeʼ u mam aʼ tiʼ itxeyex txay. Tan aʼich taqʼon txeyo txay.

17Yaʼne ech tal Jesuus s-te s-eche: —Etulvaq. Tul koʼvaq s-viʼ, tan in toq txhusun ex. Tul ech laʼ emolt inqʼa xaol sinkʼatza, eche nik emolt inqʼa txay, —xeʼt Jesuus.

18Taʼnetz kuxh tabʼi inqʼa vinaq u yol, tul yekich taqʼ vet ka inqʼa ikʼatxh. Tul bʼenaq vet tiʼ Jesuus.

19Bʼiiletz kuxh xaon bʼen Jesuus tuchʼ kaʼvaʼl inqʼa vinaq uvaʼ tiqʼo s-tiʼ, tul til Jesuus kaʼvaʼt inqʼa vinaq uvaʼ antxh titzʼinich tibʼ. Vaʼl, uvaʼ Jakoovoich ibʼij; vaʼt, uvaʼ Xhunich ibʼij. Ikʼaolich val u vinaq, uvaʼ Sevedeeoich ibʼij. Tul sebʼtich ikʼoat inqʼa ikʼatxh tuul u vaarko. 20Yaʼne isikʼle eluʼl Jesuus s-kaʼbʼil. Tul taqʼaq vet ka vibʼaal tuchʼ inqʼa taqʼonvil tu vaarko. Tul bʼenaq vet tiʼ Jesuus.

Uvaʼs ikaj taanima inqʼa xaol tiʼ vitukit el quBʼaal Jesuus demoonio t-taanima val u vinaq

Luk 4.31-37

21Paletz vet paʼl kaʼoxvaʼl qʼij, tul aqʼbʼ vet Jesuus tu tenam Kapernauum tuchʼ inqʼa nikich itxhus tibʼ s-kʼatza. Atichetz vet Jesuus tzitzi, tul opoon vet vaʼt u xeem qʼij, uvaʼ saavadoiche. Tul txhusun vet Jesuus t-val u kʼulbʼal tibʼ inqʼa tij imam Israeel. 22Tul tira kaj taanima inqʼa xaol tiʼ vitxhusun Jesuus. Tan atich tiqleʼm Jesuus tuchʼ vitxhusuneʼ. Tan jit ech nikich itxhusun Jesuus eche inqʼa nikich txhusun ibʼekʼbʼal inqʼa qumol s-tijaq imam Israeel.{*}#1.22 ¿Kamichetze u tiqleʼm quBʼaal Jesuus uvaʼ yeʼ nikich ibʼan eela tuchʼ u tetz inqʼa nikich txhusun inqʼa bʼekʼbʼal uvaʼ til inqʼa xaol? Vaʼletze, uvaʼ tira tootzaqich quBʼaal Jesuus jabʼisteichxhte u taqʼil viyolbʼal quBʼaal Tiuxh. Tan nimalen kuxh inqʼa kam nikich itxhus quBʼaal Jesuus uvaʼ tira yeʼich tootzaq inqʼa nikich txhusun inqʼa bʼekʼbʼal. Atz vaʼte, uvaʼ tira nikich ibʼan quBʼaal Jesuus inqʼa kaebʼal aanima vatz inqʼa xaol tuulbʼal vitxhusuneʼ. Aʼetz inqʼa kaebʼal aanima nikich kʼutxhun uvaʼ een tzajnaʼq quBʼaal Jesuus kʼatz quBʼaal Tiuxh, tul een tzajnaʼqich vitxhusuʼm quBʼaal Jesuus kʼatz quBʼaal Tiuxh. Pet koq inqʼa nikich txhusun inqʼa bʼekʼbʼal, tan yeʼl kaebʼal aanima nikich motx ibʼaneʼ. Atz vaʼte, aʼe, uvaʼ tira atich taanima quBʼaal Jesuus tiʼ ilotxhox inqʼa xaol tiʼ ijetxhtich ok tibʼ kʼatz quBʼaal Tiuxh. Pet koq inqʼa nikich txhusun inqʼa bʼekʼbʼal, tan aʼl kuxh nikich motx itxhokt itxʼakon tiʼ inqʼa xaol. Tul nikich motx ikʼaxbʼisal inqʼa xaol taʼn.

23Atichetz okaʼp val u vinaq xoʼl inqʼa xaol tu kʼulbʼal ibʼ uvaʼ atich ok demoonio t-taanima. Tul yeʼ kuxh taqla sichʼin u vinaq taʼn u demoonio. 24Tul ech tal te Jesuus s-eche: —¡Aa! ¡Jesuus, aj Nasareet, keʼch taltxh axh! Atz ¡kam yeʼbʼaʼn ul abʼan s-qe! Tan aʼ nik aal uvaʼ ul eesa quqʼij. Aloq ¡vootzaqle uvaʼ axh u loqʼola iTxhaq Tiuxh! ¡Axh, uvaʼ een tzajnaʼql axh kʼatz Tiuxh! —xeʼte.

25Yaʼne imaq Jesuus iyolon u demoonio. Tul ech tal Jesuus s-te s-eche: —¡Val axhaakalil! ¡Elen el kʼatz naq u vinaqe! —xeʼt Jesuus.

26Taletz kuxh Jesuus u yol, tul aʼl taqʼt u demoonio yakʼil kʼatz u vinaq tiʼ itzetpuleʼ. Tul mam sichʼiʼm ibʼan vet u vinaq taʼn u demoonio, yaʼne el vet el u demoonio t-taanima u vinaq.

27Tul tira kaj taanima inqʼa xaol, inqʼa kʼulich tibʼ. Tul ech nikich motx iyol vet s-vatzaq s-eche: —¿Kam talax uvaʼ nik qileʼ? Yaʼnxh val u txhusuʼme nik qabʼi. Tul ¿tal qat tzajk tiqleʼm Jesuus taʼn tiʼ toleʼv tiʼ itukil el inqʼa demoonio? Tan ¡il inqʼa demoonio nik motx iqeon te Jesuus! —chichich vet inqʼa xaol. 28Tul nal kuxh ipaxin vet el itziulal vibʼaʼnil Jesuus tuulbʼal Galileea s-kaqaayil.

Uvaʼs ibʼant quBʼaal Jesuus bʼaʼn vijiʼ Luʼ t-val u xamal yaabʼil

Tio 8.14-15; Luk 4.38-39

29Eletz vet ul Jesuus tu kʼulbʼal tibʼ inqʼa tij imam Israeel tuulbʼal u xeem qʼij saavado, tul imolich tibʼ Jesuus tuchʼ Simoon tuchʼ Lixh tuchʼ Jakoovo tuchʼ Xhun. Tul bʼen vet Jesuus t-totzotz Simoon, atz t-totzotz Lixh. 30Tul xoklich qʼes u ixoq, vijiʼ Simoon, taʼn xamal yaabʼil. Tul yekich alax vet te Jesuus uvaʼ oybʼalich qʼes.

31Yaʼne ijetxh vet ok tibʼ Jesuus kʼatz qʼes u ixoq. Tul itxey Jesuus iqʼabʼ qʼes. Atz ilak vet jaʼ Jesuus. Tul yekich yaʼ vet u xamal yaabʼil s-tiʼ. Atz xeʼt vet qʼes tiʼ ikʼuulal Jesuus, atz tiʼ ikʼuulal inqʼa nikich itxhus tibʼ kʼatz Jesuus.

Uvaʼs ibʼant quBʼaal Jesuus bʼaʼn mamala yaabʼ

Tio 8.16-17; Luk 4.40-41

32Kuʼetz vet qʼij, atz qʼeqx veteʼ, uvaʼs ipal vet u xeem qʼij saavado, tul mamala yaabʼ ex aqʼaxoq vet ka vatz Jesuus. Atz mamala inqʼa atich ok demoonio t-taanima, ex aqʼaxoq paqte vatz Jesuus. 33Tul mamala vet xaol tu tenam uvaʼe, imol vet tibʼ tziʼ vijubʼalil u otzotz tal uvaʼ atich Jesuus. 34Tul motx ibʼan Jesuus bʼaʼn inqʼa yaabʼ, inqʼa kamaq kuxh yaabʼilil nikich bʼanon. Tul mamala demoonio ituki el Jesuus t-taanima inqʼa xaol. Tul tira yeʼ nikich ikuy Jesuus iyolon inqʼa demoonio, tiʼ taltaʼ jabʼilich Jesuus. Tan tootzaqlich inqʼa demoonio uvaʼ een tzajnaʼqich Jesuus kʼatz quBʼaal Tiuxh.

Uvaʼs tex quBʼaal Jesuus tiʼ inatxhax Tiuxh t-val u txʼavaʼ uvaʼ yeʼl xaol jeqlich s-tuul

Luk 4.42-44

35Sebʼetzxh lakp Jesuus, atz tokto teliche, tul bʼen Jesuus t-val u txʼavaʼ uvaʼ yeʼl xaol jeqlich s-tuul. Tul aʼ ex inatxhvat Jesuus Tiuxh tzitzi. 36Yaʼne ex txhokoxoq Jesuus taʼn Simoon tuchʼ inqʼa imol. Leqexetz vet Jesuus taʼn Simoon, tul ech motx tal te Jesuus s-eche: 37—Mam xaol nik txhokon axh, —xeʼtaq te Jesuus.

38Tul ech tal Jesuus s-te s-eche: —Koʼvaq t-jolt inqʼa tenam uvaʼ naql s-qukʼatza. Tul bʼenat inpaxsa viyolbʼal quBʼaal Tiuxh tzitzi. Tan aʼ uvaʼe, ul inbʼane, —xeʼt Jesuus.

39Tul nikich ex ipaxsa Jesuus inqʼa bʼaʼnla txhaq yol t-inqʼa kʼulbʼal tibʼ inqʼa tij imam Israeel tuulbʼal inqʼa tenam t-jankʼal tuulbʼal Galileea. Atz nikich ituki el Jesuus demoonio t-taanima inqʼa xaol.

Uvaʼs ibʼant quBʼaal Jesuus bʼaʼn val u vinaq uvaʼ qʼajchil nikich ibʼan vitxhiʼoʼl

Tio 8.1-4; Luk 5.12-16

40Ibʼanetz paqul, aqʼbʼ val u vinaq vatz Jesuus uvaʼ qʼajchil nikich ibʼan vitxhiʼoʼl. Tul qajeʼv u vinaq vatz Jesuus tiʼ ijaqax bʼaʼnil s-te. Tul ech tal te Jesuus s-eche: —Oq axh laʼ saʼon, tul tetxhal laʼ oleʼv axh tiʼ inbʼant bʼaʼn tu yaabʼil, —xeʼt te Jesuus.

41Tul itxum Jesuus ivatz u vinaq. Yaʼne taqʼeʼl Jesuus iqʼabʼ. Tul ikan vet Jesuus vitxhiʼoʼl u vinaq.

Tul ech tal Jesuus s-te s-eche: —Nik insaʼeʼ. Bʼaʼn vet axh, —xeʼt Jesuus. 42Taʼnetz kuxh tal Jesuus u yol, tul yekich ibʼan vet vitxhiʼoʼl u vinaq bʼaʼn, uvaʼ qʼajchil nikich bʼanon veteʼ.

43Yaʼne itiila bʼekʼu Jesuus jolol u yol te u vinaq, tiʼ uvaʼ yeʼxh tal laʼich talvat jaʼl bʼanon bʼaʼn. Tul nal kuxh itxhaq vet bʼen Jesuus.

44Tul ech tal Jesuus te u vinaq s-eche: —Abʼi eeleʼ. Yeʼxhabʼil invaʼq laʼ aal s-te s-bʼaxa. Pet quuxh, tul bʼaxa bʼen akʼutxh eebʼ vatz u oksan yol vatz Tiuxh. Yaʼne laʼ aaqʼ u oya uvaʼ bʼekʼel ka taʼn Moisees, tiʼ vatxʼajt eebʼ vatz quBʼaal Tiuxh. Echetz laʼ motx tilte inqʼa xaol uvaʼ bʼaʼn vet axh, —xeʼt Jesuus.#Leviitiko 14.1-32

45Bʼenetz vet u vinaq, tul aʼl tal kuxh nikich talvat veteʼ; tul motx tal vet el uvaʼ Jesuus bʼanon bʼaʼn. Echetz yeʼ nikich tutxh vet ipaloʼk Jesuuse t-junun tenam taʼn inqʼa mamala xaol. Pet aʼ nikich kajk vet Jesuus t-inqʼa txʼavaʼ uvaʼ yeʼl xaol jeqlel s-tuul. Poro talaq kuxh tenam nikich tzajk vet xaol tiʼ itxhokox Jesuus.

Currently Selected:

Kuxh 1: ixlC

Highlight

Copy