Tio 21

Uvaʼs tokaʼp vet quBʼaal Jesuus tu tenam Jerusaleen

Kuxh 11.1-11; Luk 19.28-40; Xhun 12.12-19

1Bʼiitichetz kuxh taqʼbʼ Jesuus tuchʼ inqʼa nikich itxhus tibʼ s-kʼatza tu tenam Jerusaleen, tul motx aqʼbʼ vet tu vitz Inqʼa Oliivo tu tal tenam Vetfajee. Yaʼne itxhaq bʼen Jesuus kaʼvaʼl inqʼa nikich itxhus tibʼ s-kʼatza. 2Tul ech tal Jesuus s-te s-eche: —Bʼenoq ex. Tul yekl ex tu tal tenam uvaʼ s-quvatz bʼen. Tul bʼen eleq val u bʼur, uvaʼ qitzelka, imol tibʼ tuchʼ val u tal, uvaʼ yaʼnxh txakunna. Echetz echiteʼ, tul laʼ etiqʼo tzaan. 3Oqetz jaʼl invaʼq xaol laʼ alon invaʼq yol s-tiʼ, tul ech laʼ etal s-te s-eche: «Toq qiqʼo txoo. Tan toq txakunsaloq txoo taʼn quBʼaal. Tul yek toq ul qaqʼ ka txoo inpaqte,» chaq ex, —xeʼt Jesuus.

4Echetz telaʼpune val u yol uvaʼ tzʼibʼamal ka taʼn val u qʼexsanich tetz viyol quBʼaal Tiuxh uvaʼ ech nik tal s-eche:

5—Bʼenoq etal val u yol

te inqʼa aj tenam Sioon.

Tul ech etal s-eche:

«Il vet u mam iqʼesal

vetenam

tul sexoʼl,

u mam iqʼesal

uvaʼ tzʼuʼkinla aanima.

Tul aʼ atil jaʼ tiʼ val u bʼur,

uvaʼ yaʼnxh txakunna,

tal val u bʼur,»

chich quBʼaal Tiuxh,

—xeʼt itzʼibʼat u yol.#Sakariias 9.9{*}#21.5 Sakariias 9.9. Aʼ nik ex ikʼutxh quBʼaal Jesuus tuchʼ vitzʼuʼkinil, tiʼ uvaʼ, aʼ kuxh val u bʼur jaʼ bʼen quBʼaal Jesuus s-tiʼ sibʼenoʼk t-Jerusaleen. Tan taqʼ koq bʼen tibʼ quBʼaal Jesuus siqʼesal, tul aʼetz laʼich jaʼk bʼen quBʼaal Jesuuse tiʼ vaʼq chej uvaʼ, aʼ itʼikeʼve; atz maq tuulich kareʼt chej laʼich bʼenkoʼk quBʼaal Jesuus t-Jerusaleen.

6Bʼenetz vet inqʼa nikich itxhus tibʼ kʼatz Jesuus, tul ex ibʼan vet kam uvaʼ tal Jesuus. 7Tul tiqʼoaq vet tzaan u bʼur tuchʼ u tal uvaʼ yaʼnxh txakunna. Tul teesaaq vet inqʼa iqinkin oksaʼm uvaʼ txhasichaq ok s-tiʼ. Tul taqʼaq vet jaʼ tiʼ inqʼa bʼur. Yaʼne jaʼ vet Jesuus tiʼ u tal bʼur. 8Tul mam xaol uvaʼ yeʼl s-atxhel eesan vet el inqʼa iqinkin oksaʼm uvaʼ txhasichaq ok s-tiʼ. Tul ilitʼaq vet kuʼ tibʼey Jesuus. Atz ataq jolt xaol uvaʼ nikich ex tzokʼon tzaan qʼabʼaq tzeʼ uvaʼ, eche xaq chʼiʼm. Tul nikich motx taqʼ kuʼ tibʼey Jesuus s-viqbʼal. 9Tul jankʼalxh inqʼa xaol, inqʼa bʼaxich vatz Jesuus, atz tuchʼ inqʼa txhʼuyich tzaan tiʼ Jesuus, ech nikich motx tal tiʼ toksal iqʼij Jesuus s-eche:

—¡Nik qoksa iqʼij,

u Tij Imam Daviid!

Tan ¡chiibʼebʼalxh tul

s-quxoʼl

tan iqʼomal u tiqleʼm

quBʼaal Tiuxh taʼn!

¡Nik qoksa iqʼij,

u quBʼaal Tiuxh

uvaʼ niim at jaʼp t-amlikaʼ!

—chichich isichʼin inqʼa xaol.#Saalmo 118.25-26

10Okaʼpetz vet Jesuus tu tenam Jerusaleen, tul motx kuxh sotz vet ikʼuul u tenam. Tul ech nikich motx tal vet s-vatzaq s-eche: —¿Jaʼletze u vinaq uvaʼe? —chichichaqe.

11Tul ech nikich tal jolt inqʼa xaol s-eche: —Jesuuse, u qʼexsan tetz viyol quBʼaal Tiuxh, uvaʼ een tzajnaʼql tu tenam Nasareet tuulbʼal Galileea, —chichich inqʼa xaol.

Uvaʼs itilut eluʼl quBʼaal Jesuus inqʼa yakol kʼaʼy tu nimla atibʼal tuulbʼal u tostiuxh

Kuxh 11.15-19; Luk 19.45-48; Xhun 2.13-22

12Yaʼne pal vet ok Jesuus tu nimla atibʼal tuulbʼal u tostiuxh tal uvaʼ nik natxhkʼuulalik Tiuxh tu Jerusaleen. Tul xeʼt Jesuus tiʼ itilul eluʼl inqʼa nikich ikʼayineʼ, atz inqʼa nikich iloqʼoneʼ. Tul ivampu el Jesuus imeexha inqʼa nikich motx jalon puaq; atz ivampu el Jesuus ixhiila inqʼa nikich motx kʼayin paraamuxh. 13Tul ech tal Jesuus s-eche: —Ech viyolbʼal quBʼaal Tiuxh tzʼibʼamal ka s-eche: «U votzotz, tan aʼ itxaʼk natxhkʼuulabʼ vetz taʼn inqʼa tenam s-kaqaayil laʼ ibʼana,» chich u yol.#Isaiias 56.7; Jeremiias 7.11 Pet aʼetz ex qat aqʼon bʼen s-tatibʼal elqʼom, —xeʼt Jesuus.{*}#21.13 ¿Kam s-tiʼil itilu eluʼl quBʼaal Jesuus inqʼa nikich ikʼayineʼ? Tiʼ uvaʼ tan, jitichxh vet ikʼulel kam uvaʼ nikich tutxh tu tostiuxh til quBʼaal Jesuus. At vaʼt u yaabʼla txumbʼal til quBʼaal Jesuus uvaʼ nikich tutxh tuulbʼal u nimla atibʼal tu tostiuxh. Tan nikich ikuy vet inqʼa iqʼesal u tostiuxh tutxh subʼuʼm tiʼ inqʼa nikich motx ikʼayileʼ. Tan sibʼich kuxh vet ijaʼmil inqʼa kam nikich ibʼan inqʼa aj kʼaʼy, jankʼal eche tiʼ ikʼayil inqʼa txoo uvaʼ nikich itzʼeʼsal ok vatz Tiuxh, eche inqʼa paraamuxh, karneʼl, tzentun tuchʼ vaʼk. Tan ataqich vet iyol inqʼa oksan yol tuchʼ inqʼa yakonal, atz maq antxh titzʼin tatzik inqʼa oksan yol nikich motx ikʼayineʼ. Tul at vaʼt yaabʼla txumbʼal nikich ibʼan inqʼa nikich motx jalon puaq. Tan sibʼxh nikich motx itxʼak tiʼ ijalax inqʼa puaq. Tan aʼ nikich motx ibʼan inqʼa iqʼesal oksan yol vatz Tiuxh uvaʼ tira yeʼ nikich motx ikʼul inqʼa puaq tetz Rooma, uvaʼ ‹denaarioich› ibʼij, atz uvaʼ ‹draakma› chichich eʼli. Pet taʼnxh nikich motx ikʼul u puaq u ‹siiklo,› u tetzichxh inqʼa tij imam Israeel. Xaʼtetze tetxhal kuxh laʼich motx ijal inqʼa xaol inqʼa ipuaq tiʼ ipaloʼk, atz maq tiʼ iloqʼon tu nimla atibʼal tuulbʼal u tostiuxh. Echetz s-tiʼile tira lakp iviʼ quBʼaal Jesuus te vitxumbʼal inqʼa yakonal, atz inqʼa aj kʼaʼy, tan taʼn kuxh nikich motx titzʼa itxʼakax puaq. Pet jit bʼeeq aʼ nikich titzʼa inatxhkʼuulal Tiuxh. ¿Kam s-tiʼil tal quBʼaal Jesuus uvaʼ antxh inqʼa aj kʼaʼy aqʼon bʼen u tuulbʼal u tostiuxh sijulil elqʼom? Aʼ s-tiʼile tan, ibʼan quBʼaal Jesuus eela inqʼa aj kʼaʼy tuchʼ elqʼom. Tan inqʼa elqʼom, aʼ nikich ex imuqvat ka tuul jul, inqʼa nikich telqʼa. Echetz uvaʼe nikich ibʼan inqʼa yakol, tan aʼ kuxh muqichaq tibʼ tu tostiuxh tiʼ itxʼakax mam puaq.

14Yaʼne aqʼbʼ jolol inqʼa tzot vatz Jesuus tuchʼ jolt inqʼa koyelich ibʼenaʼ. Tul yekich motx ibʼan bʼaʼn taʼn Jesuus. 15Yaʼne lakp vet iviʼ inqʼa iqʼesal oksan yol vatz Tiuxh tuchʼ inqʼa nikich txhusun ibʼekʼbʼal inqʼa tij imam Israeel, tiʼ inqʼa bʼaʼnil uvaʼ nikich ibʼan Jesuus. Tul motxat lakp iviʼ, tiʼ uvaʼ sebʼtich isichʼin vet inqʼa nitxaʼ tiʼ toksal iqʼij Jesuus tu nimla atibʼal tuulbʼal u tostiuxh, tan ech nikich motx tal inqʼa nitxaʼ s-eche: —¡Nik qoksa aqʼij, axh u Tij Imam Daviid! —chichich inqʼa nitxaʼ.

16Yaʼne ech motx tal inqʼa iqʼesal te Jesuus s-eche: —¿Yeʼ kuxh akuy toksal aqʼij taʼn inqʼa nitxaʼ? —xeʼtaqe.

Tul ech tal Jesuus s-eche: —Echxh toq ibʼane. Pet yeʼletzebʼ nik ibʼen u yol sete uvaʼ nik esikʼle uvaʼ ech nik tal s-eche:

«Nik toksal iqʼij

quBʼaal Tiuxh

taʼn inqʼa nitxaʼ,

atz taʼn inqʼa neʼ,

inqʼa yaʼn nik itxhʼuʼneʼ.

Tan quBʼaal Tiuxh

alon ka,»

chich u yol,

—xeʼt Jesuus.#Saalmo 8.2

17Tul el tzaan Jesuus vatz inqʼa iqʼesal uqʼeʼybʼal. Eletz kuxh vet ul Jesuus t-inqʼa otzotz tu nimla atibʼal tuulbʼal u tostiuxh, atz tu tenam Jerusaleen, tul yekich vet Jesuus ilan tu tenam Vetaania.

Uvaʼs talt quBʼaal Jesuus itzaq u tzeʼ u iigo uvaʼ yeʼlich ivatz

Kuxh 11.12-14, 20-26

18Echetz vet eqal s-qʼalaʼm, tul qʼaʼv Jesuus tu tenam Jerusaleen. Tul kamyichxh Jesuus t-vaʼy. 19Tul til Jesuus viʼl u iigo uvaʼ atich tziʼ bʼey. Yaʼne ex tiloʼk Jesuus. Tul yeʼlich bʼak ivatz. Pet taʼnich kuxh ixaq atiche. Tul ech tal Jesuus te u iigo s-eche: —¡Yeʼl inpaqt laʼ vatzin axh! —xeʼt Jesuus. Tul yekich tzaq vet u iigo.{*}#21.19 ¿Kam nik elkaʼp u yol tal quBʼaal Jesuus, tiʼ uvaʼ?: —¡Yeʼl inpaqt laʼ vatzin axh! —xeʼt quBʼaal Jesuus. Aʼetz nik elkaʼpun u iigo tiʼ inqʼa tij imam Israeel. Atz aʼetz nik elkaʼp uvaʼ yeʼl ivatz u iigo, tiʼ uvaʼ yeʼl bʼaʼnil ileq quBʼaal Tiuxh kʼatz inqʼa tij imam Israeel. Aʼetz nik elkaʼpun u yol, tiʼ uvaʼ yeʼl vet ivatz u iigo laʼ taqʼ tele; aʼe, uvaʼ yeʼl vet laʼ ikʼutxh inqʼa tij imam Israeel vinatxhkʼuulal Tiuxh vatz inqʼa jit tij imam Israeel. Tan yeʼ nikich isaʼ inqʼa tij imam Israeel ikʼulux u Kriisto, atz yeʼ nikich isaʼ tiqʼol viyolbʼal quBʼaal Tiuxh s-jik.

20Tiletz vet inqʼa nikich itxhus tibʼ kʼatz Jesuus itzaq u iigo, tul yekich motx kaj taanima s-tiʼ. Tul ech tal te Jesuus s-eche: —¿Kametz s-tiʼil uvaʼ nal kuxh qat itzaq u tzeʼ? —xeʼtaq te Jesuus.

21Yaʼne ech tal Jesuus s-eche: —Toq val sete: Oq kʼuqlelxh ekʼuul, tul oq yeʼ laʼ ebʼan kaʼl ekʼuul, jitetz kuxh taʼn laʼ ebʼane, eche uvaʼ qat inbʼana. Pet: «Elen el tzitza, tul een bʼenk axh xeʼ u mam aʼ,» chaq ex te u vitz. Tul echxh laʼ ibʼane.#Tio 17.20; 1 Koriintios 13.2 22Tan jankʼalxh uvaʼ laʼ etabʼi te quBʼaal Tiuxh uvaʼs laʼ enatxht Tiuxh, oqetz laʼ ekʼuqbʼa ekʼuul uvaʼ laʼ aqʼax sete, tul laʼxh ekʼula, —xeʼt Jesuus te inqʼa nikich itxhus tibʼ s-kʼatza.

Uvaʼs itzaqʼbʼet quBʼaal Jesuus inqʼa fariseeo tiʼ u tiqleʼm

Kuxh 11.27-33; Luk 20.1-8

23Yaʼne aqʼbʼ vet Jesuus t-inqʼa otzotz tu nimla atibʼal tuulbʼal u tostiuxh. Tul xeʼt Jesuus txhusun. Sebʼtelichetz itxhusun Jesuus, tul aqʼbʼ inqʼa iqʼesal oksan yol vatz Tiuxh tuchʼ jolt inqʼa iqʼesal u tenam. Tul ech motx tal te Jesuus s-eche: —¿Jaʼl qat aqʼon aviqleʼm, tiʼ uvaʼ nik abʼaneʼ? Atz ¿jaʼl qat alon see uvaʼ, aʼ vet axh laʼ bʼekʼon axh? —xeʼtaq te Jesuus.

24Yaʼne tzaqʼbʼ Jesuus. Tul ech tal Jesuus s-eche: —Ape. Toqatetz vabʼi val u yol sete s-bʼaxa. Oq toq etzaqʼbʼe u yol uvaʼ toq vabʼi sete, tul echatetz toq intzaqʼbʼete veyol tiʼ jaʼl qat aqʼon viqleʼm, tiʼ uvaʼ nik inbʼaneʼ. 25¿Jaʼletz aqʼon tiqleʼm naq u Xhun tiʼ taqʼax kuʼ inqʼa xaol xeʼ aʼ nik enatxheʼ? ¿Maq quBʼaal Tiuxh, uvaʼ tu amlikaʼ? Pet ¿maq aʼ inqʼa vinaq? —xeʼt Jesuus.

Yaʼne motx iyol vet inqʼa iqʼesal u tenam inqʼa yol s-vatzaq. Tul ech motx tal s-eche: —Oq toq qaleʼ uvaʼ: «QuBʼaal Tiuxh, uvaʼ een t-amlikaʼ, aqʼon tiqleʼm naq u Xhun,» oq toq qaleʼ, tul: «¿Keʼchetz yeʼ eqejt naq bʼa?» toq tal naq s-qe. 26Pet oq ech toq qal s-eche: «Naqe inqʼa vinaq aqʼon tiqleʼm naq,» oq toq qaleʼ, tul toqetz lakpoq iviʼ u tenam s-qiʼ. Tan jankʼalxh u tenam ootzaqin tetz uvaʼ qʼexsanich tetz iyol quBʼaal Tiuxh naq u Xhun, —xeʼt inqʼa iqʼesal s-vatzaq.

27Yaʼne ech motx tal te Jesuus s-eche: —Yeʼ qootzaqle, —xeʼtaqe.

Tul ech tal Jesuus s-eche: —Aʼatetz koq in laʼ alon sete jaʼl nik aqʼon viqleʼm tiʼ inqʼa nik inbʼaneʼ.

Uvaʼs txumbʼalimal itxhusun quBʼaal Jesuus tiʼ u qejoʼm, tul tiqʼo tzaan kaʼvaʼl u kʼaola tuulbʼal viyol

28Pet ¿kam toq etal tiʼ val u yol uvaʼ toq val sete? Tan atich val u vinaq uvaʼ kaʼvaʼlich ikʼaol. Tul ech tal te u bʼaxa ikʼaol s-eche: «Txa inkʼaol, quxh aqʼonvoq tal uvaʼ avamal inqʼa quuuva,» xeʼt u bʼaala.

29Tul ech tal u kʼaola s-eche: «Yeʼl in laʼ bʼen in,» xeʼte. Poro xamteletz txhoʼn s-te, tul ex ibʼan u aqʼon.

30Yaʼne aqʼbʼ u bʼaala kʼatz invaʼt vikʼaol. Tul antxh tal te vikʼaol, eche uvaʼ maʼtich talt te u bʼaxa ikʼaol.

Tul ech tal u kʼaola s-eche: «Ape bʼa, inbʼaal. Maʼt in aqʼonvoq,» xeʼte. Poro yeʼxh bʼeni.

31¿Jabʼisteetz kaʼvaʼl u kʼaola niman iyol vibʼaal nik enatxheʼ? —xeʼt Jesuus.

Yaʼne ech motx tal inqʼa iqʼesal s-eche: —Aʼ u bʼaxa kʼaola, —xeʼtaqe.

Tul ech tal Jesuus s-eche: —Nuqxh toq val sete uvaʼ, aʼ inqʼa molol puaq tuchʼ inqʼa ixoq, uvaʼ lampaqʼil nik ibʼaneʼ, bʼaxal vet sevatz tiʼ ibʼant quBʼaal Tiuxh iqʼesalil t-taanima. 32Tan ul Xhun, u aqʼol kuʼ xaol xeʼ aʼ, tiʼ talax inuqul u jikla yol tetz etatin vatz quBʼaal Tiuxh. Tul yeʼ eqej kam uvaʼ ul tal Xhun. Petetz koq inqʼa xaol, inqʼa molol puaq tuchʼ inqʼa ixoq, inqʼa lampaqʼil nik motx ibʼaneʼ, tan aʼetz inqʼae, motx qeon inqʼa yol uvaʼ ul tal Xhun. Pet koq ex, tan kʼuxh etil iqejt inqʼa xaol inqʼa yol, poro tira yeʼ etitzʼa etibʼ t-inqʼa epaʼv vatz quBʼaal Tiuxh.#Luk 3.12; 7.29-30

Uvaʼs txumbʼalimal itxhusun quBʼaal Jesuus tiʼ talt yol te inqʼa iqʼesal uqʼeʼybʼal, tul tiqʼo tzaan jolol inqʼa yaabʼla kʼamol txʼavaʼ tuulbʼal viyol

Kuxh 12.1-12; Luk 20.9-19

33Pet abʼivaq invaʼt u yol uvaʼ txumbʼalimal toq valtaʼ. Atich val u vinaq uvaʼ itxhik uuva t-vitxʼavaʼ. Tul ipeʼ tiʼ vitxʼavaʼ. Atz ibʼit val u atibʼal tal uvaʼ laʼ patxhʼaxik el taʼlil inqʼa uuva. Tul ibʼit vaʼt otzotz, uvaʼ sibʼ jaʼi, xeebʼ tetz vitxhiko. Tul taqʼ ka vitxʼavaʼ s-kʼam, uvaʼ at txhiko s-tuul, te jolol vinaq. Tul bʼen vet u vinaq t-invaʼt tenam s-naatxh.#Isaiias 5.1-2 34Oponetz vet viqʼiil iqʼanbʼ ivatz inqʼa uuva, tul itxhaq vet tzaan u vinaq inqʼa taqʼonvil tiʼ ijaqax ivatz inqʼa itxhiko te inqʼa kʼamol txʼavaʼ.

35Poro tiletz vet inqʼa kʼamol txʼavaʼ tul inqʼa aqʼonvil, tul aʼl motx itxeytaʼ. Tul vaʼl u aqʼonvil, qʼosoxi. Atz vaʼt, yatzʼaxi. Atz vaʼt, kʼonil s-sivan taʼn inqʼa kʼamol txʼavaʼ.

36Yaʼne itxhaq vet tzaan u vinaq jolt inqʼa taqʼonvil. Tul palnaʼq vet tatxhul viʼ inqʼa ul s-bʼaxa. Tul echat kuxh motx ulbʼel inqʼa aqʼonvil, eche motx ulbʼel inqʼa ul s-bʼaxa.

37Yaʼne aʼetz vet vikʼaol u vinaq itxhaq tzaan tiyaʼebʼal. Tan ech titzʼa s-eche: «Toqetz qeexoq vet naqe vinkʼaol taʼn inqʼa kʼamol txʼavaʼ,» xeʼt titzʼat u vinaq.

38Tiletz vet inqʼa kʼamol txʼavaʼ tul vikʼaol u vinaq, tul ech motx tal vet s-vatzaq s-eche: «Aʼetz naqe uvaʼe, toq etzan ka inqʼa kam s-kaqaayil. Pet ¡etulvaq! Tul ¡quyatzʼvaq el naq! Tul ¡qetz vet inqʼa kamaq tetz naq s-kaqaayil toq ibʼaneʼ!» xeʼtaq vet inqʼa kʼamol txʼavaʼ.

39Yaʼne iqʼol el vikʼaol u vinaq taʼn inqʼa kʼamol txʼavaʼ. Tul een ex yatzʼaxik el tiʼeʼl uvaʼ avamich inqʼa uuva.

40Poro ¿kametz laʼ ul ibʼan vet u vinaq te inqʼa kʼamol txʼavaʼ uvaʼs laʼ tul inpaqte nik enatxheʼ? —xeʼt Jesuus.

41Yaʼne ech tal inqʼa iqʼesal te Jesuus s-eche: —¡Aʼ laʼ ul ibʼan u vinaq uvaʼ yeʼ laʼ ikuy ipaʼv inqʼa yaabʼla txhaq kʼamol txʼavaʼ! Pet ¡tira laʼ iyatzʼeʼl! Tul aʼ laʼ taqʼvat vet tilix viuuva te jolt kʼamol txʼavaʼ. Laʼetz qʼanbʼ vet inqʼa uuva, tul laʼ taqʼ vet inqʼa kʼamol txʼavaʼ jankʼal vivatz u uuva te u vinaq, —xeʼtaqe.

42Yaʼne ech tal Jesuus s-eche: —Yeʼetzebʼ nik ibʼen sete u yol uvaʼ tzʼibʼamal ka uvaʼ ech nik tal s-eche:

«U Sivan, uvaʼ ixval

taʼn inqʼa bʼitol otzotz,

tan aʼetz vet uvaʼe,

qat aqʼax tiqleʼm s-bʼaʼn

tiʼ itxeyt jaʼp vixojbʼal

u otzotz.

Tan quBʼaal Tiuxh

qat bʼanon.

Tul mam yol qilt vet

kam qat tulbʼe

quBʼaal Tiuxh

itxakunsal u Sivan,»

chich u yol.#Saalmo 118.22-23

43Echetz toq valte sete uvaʼ: Jit vet aʼ, ex laʼ bʼanon iqʼesalil tzitza vatz txʼavaʼ tiʼ vinatxhkʼuulal Tiuxh. Tan quBʼaal Tiuxh toq eesan el teqʼabʼ. Tul aʼ laʼ taqʼvat vet te jolt inqʼa xaol, inqʼa aʼ nik ikʼutxh vet u bʼaʼnla txumbʼal uvaʼ, aʼ vet quBʼaal Tiuxh nik bʼanon iqʼesalil tu taanima, eche viʼoq tzeʼ uvaʼ bʼaʼn vivatz nik taqʼeʼ. [44Tan jaʼl invaʼq uvaʼ laʼ tetxha ok tibʼ kʼatz u Sivan uvaʼa, tul laʼ kuxh ul tajsa ok tibʼ s-tiʼ. Atz jaʼl invaʼq uvaʼ laʼ kaj jaqʼ u Sivan uvaʼa, tul tira laʼ patxhʼqʼ taʼn u Sivan,] —xeʼt Jesuus.

45Tabʼietz vet inqʼa iqʼesal oksan yol vatz Tiuxh tuchʼ inqʼa fariseeo inqʼa yol uvaʼ tal Jesuus, tul bʼenaq vet s-te uvaʼ, aʼ nikich talax tuchʼ u yol uvaʼ nikich tal Jesuus. 46Tul motx itxhok vet txumbʼal tiʼ itxeyp Jesuus. Poro xoʼvaq te inqʼa xaol, tan qʼexsanich tetz viyol quBʼaal Tiuxh Jesuus vatz inqʼa xaol.

Currently Selected:

Tio 21: ixlC

Highlight

Copy