Tio 20

Uvaʼs txumbʼalimal itxhusun quBʼaal Jesuus tiʼ u txʼaqaʼm uvaʼ laʼ ikʼul inqʼa niman tetz, tul tiqʼo tzaan jolol bʼaʼnla molol uuva tuulbʼal viyol

1Tan eela vibʼant quBʼaal Tiuxh, uvaʼ tu amlikaʼ, viqʼesalil xoʼl inqʼa xaol, tuchʼ uvaʼ ibʼan val u bʼaal aqʼon. Tan kuʼsaqxh lakp bʼen tiʼ itxhokox imol tiʼ ibʼanax u taqʼon xoʼl inqʼa iuuva. 2Tul yekich ibʼan yoli u bʼaal aqʼon inqʼa vinaq, tiʼ uvaʼ vaʼl denaario laʼich txhojpik tiʼ vaʼl iqʼij. Tul itxhaq vet bʼen u bʼaal aqʼon inqʼa vinaq aqʼonvoq tal uvaʼ avamich viuuva.

3Aʼetzxh ibʼant vet bʼelval oora s-qʼalaʼm, tul bʼen u bʼaal aqʼon tiʼ itxhokox kaʼt imol tiʼ ibʼanax u taqʼon. Tul ex ileq jolt inqʼa vinaq, inqʼa atich kuxh tu kʼayibʼal, inqʼa amlich kuxhtuʼ. 4Tul ech tal u bʼaal aqʼon te inqʼa vinaq s-eche: «Bʼantaq bʼaʼnil s-ve. Tul koʼvaq aqʼonvoq s-viʼ tal uvaʼ avamal vinuuva. Tul jankʼalxh uvaʼ nik txhoonk in tiʼ vaʼl qʼij, tul ant kuxh toq intxhojvat exe,» xeʼt u bʼaal aqʼon. Tul yekich bʼen vet inqʼa vinaq aqʼonvoq.

5Aʼetzxh itxhaqʼaan vet qʼij, tul bʼen u bʼaal aqʼon inpaqte tiʼ itxhokox jolt imol tiʼ ibʼanax u taqʼon. Tul antxh tal u bʼaal aqʼon te inqʼa vinaq kam uvaʼ maʼtich talt te jolt inqʼa vinaq. Aʼetzxh ibʼant vet oxvaʼl oora s-kuʼebʼal qʼij, tul bʼen u bʼaal aqʼon inpaqte tiʼ itxhokox jolt imol tiʼ ibʼanax u taqʼon. Tul antxh tal u bʼaal aqʼon te inqʼa vinaq kam uvaʼ maʼtich talt te jolt inqʼa vinaq.

6Aʼetzxh ibʼant vet oʼvaʼl oora s-kuʼebʼal qʼij, tul bʼen u bʼaal aqʼon inpaqte tiʼ itxhokox jolt imol tiʼ ibʼanax u taqʼon. Tul ex ileq jolt inqʼa vinaq, inqʼa amlich kuxhtuʼ. Tul ech tal u bʼaal aqʼon te inqʼa vinaq s-eche: «¿Vaʼxetz kolxh qʼij atin ex tzitza? ¿Yeʼletz kol etaqʼon qat txheji?» xeʼte.

7Tul ech tal vet inqʼa vinaq s-eche: «Yeʼle. Yeʼl qaqʼon qat txheji, tan yeʼxhal invaʼq qat alon taqʼon s-qe,» xeʼtaqe.

Yaʼne ech tal u bʼaal aqʼon s-eche: «Koʼvaq bʼa aqʼonvoq s-viʼ tal uvaʼ avamal vinuuva. Tul jankʼalxh uvaʼ nik txhoonk in tiʼ vaʼl qʼij, tul ant kuxh toq intxhojvat exe,» xeʼt u bʼaal aqʼon.

8Qʼeqxetz veteʼ, tul ech tal vet u bʼaal aqʼon te u ilol tetz taqʼon s-eche: «Sikʼle vet tzaan txhaqnaq inqʼa aqʼonvil s-kaqaayil. Tul xeʼten vet tiʼ itxhoox iqʼij txhaqnaq. Poro aʼ txhaqnaq atxhoj s-bʼaxa, inqʼa xamel qat motx ixeʼt aqʼonvoq. Pet xamel laʼ atxhoj txhaqnaq, inqʼa bʼaxa qat ixeʼt aqʼonvoq,» xeʼt u bʼaal aqʼon. 9Echetz aʼ vet inqʼa vinaq, inqʼa xamich ixeʼt aqʼonvoq, bʼaxichaq itxhojp veteʼ. Tul antxh txhojbʼal tetz invaʼl qʼij txhojpik inqʼa vinaq. 10Aqʼbʼatetz vet inqʼa vinaq, inqʼa bʼaxichaqxh ixeʼt aqʼonvoq, tul aʼ motx titzʼa uvaʼ niim saʼich txhojpika. Poro ant kuxh txhojbʼal tetz invaʼl qʼij motx txhojpika. 11Ikʼulaqetz kuxh vet inqʼa vinaq vijaʼmil, tul xeʼtaq vet tiʼ talax yol te u bʼaal aqʼon.

12Tul ech motx tal vet inqʼa vinaq te u bʼaal aqʼon s-eche: «Qatxh motx tzʼeʼy oʼ t-qʼij. Atz qatxh motx koʼliy oʼ. Tul eela kuxh qujaʼmil qat abʼan tuchʼ txhaqnaq inqʼa vaʼl txhan oora qat aqʼonvi,» xeʼtaqe.

13Yaʼne tzaqʼbʼ u bʼaal aqʼon. Tul ech tal te invaʼl u aqʼonvil s-eche: «Txa, poro yeʼl axh nik veesa axh t-bʼey. Tan yekich qat val see uvaʼ: –Ech laʼ intxhojvat axh s-eche, –chich in see. Tul qat atzaqʼbʼe. 14Pet iqʼo vajaʼmil. Tul quuxh. Tan ine qat tzaj t-vaanima, tiʼ uvaʼ eela kuxh vatxhojbʼal qat inbʼan tuchʼ txhaqnaq inqʼa xamtel qat tok tiʼ u aqʼon. 15Pet in s-tiʼ kam laʼ inbʼan tuchʼ vinpuaq. Pet yeʼ kuxh txhoʼn see uvaʼ bʼaʼn in te inqʼa xaol,» xeʼt u bʼaal aqʼon.

16Tan mamala xaol nik taqʼ bʼen tibʼ s-nim vatz quBʼaal Tiuxh. Aʼetz inqʼae yeʼxh jankʼal itxʼaqaʼm laʼ taqʼ quBʼaal Tiuxh. Pet at xaol uvaʼ nik tiqʼo kuʼl tibʼ vatz quBʼaal Tiuxh; aʼetz inqʼae, sibʼ itxʼaqaʼm laʼ taqʼ quBʼaal Tiuxh. Tan mamala xaol saʼele, poro yeʼxh jankʼal inqʼa laʼ txaaxi, —xeʼt Jesuus.#Tio 19.30; Kuxh 10.31; Luk 13.30

Uvaʼs talt quBʼaal Jesuus itoxpaq uvaʼ tetxhal laʼich kami, atz laʼich itzʼeʼv inpaqte

Kuxh 10.32-34; Luk 18.31-34

17Aalichetz ibʼen vet jaʼ Jesuus tu tenam Jerusaleen, tul tiqʼo el Jesuus kabʼlaval inqʼa nikich itxhus tibʼ s-kʼatza tziʼeʼl bʼey, ijetxheʼl tibʼ kʼatz inqʼa xaol. Tul ech tal Jesuus s-te s-eche: 18—Etootzaqle uvaʼ il oʼ qujaʼp vet t-Jerusaleen tal uvaʼ toq txeypik in, in, u Kʼaola uvaʼ qat bʼen s-alam aanima. Tan aʼ txhaqnaq inqʼa iqʼesal oksan yol vatz Tiuxh tuchʼ inqʼa nik txhusun ibʼekʼbʼal inqʼa qumol s-tijaq imam Israeel toq alon inyatzʼax el. 19Tul toq toksa in txhaqnaq tiqʼabʼ inqʼa xaol, inqʼa jit tij imam Israeel. Tul toq kuxh motx itzeʼle in. Atz toqat tzʼuʼmaloq in. Atz toq aqʼaxoq jaʼ in vatz kurus tetxhal inkameʼ. Poro titoxv qʼij, tul laʼ itzʼeʼvk in inpaqte, —xeʼt Jesuus.

Uvaʼs ex tabʼil bʼaʼnil te quBʼaal Jesuus tiʼ Jakoovo, atz tiʼ Xhun taʼn itxutx

Kuxh 10.35-45

20Yaʼne aqʼbʼ qʼes u tixqel qʼes Sevedeeo vatz Jesuus tuchʼ inqʼa tal; aʼe Jakoovo tuchʼ Xhun. Tul qael ikuʼ qʼes tiʼ ijaqax val u bʼaʼnil te Jesuus. 21Tul ech tal Jesuus te qʼes s-eche: —¿Kam nik esaʼe laʼ vaqʼ sete? —xeʼt Jesuus.

Tul ech tal qʼes s-eche: —Bʼan bʼaʼnil s-ve. Tul laʼ koq abʼekʼ ikʼuqeʼv inqʼa val sakʼatza. Vaʼl koq tasebʼal, atz vaʼt koq tamax laʼ ibʼana, uvaʼs laʼ abʼant vet iqʼesalil xoʼl inqʼa tenam s-kaqaayil, —xeʼt qʼes.

22Yaʼne ech tal Jesuus s-eche: —Tira yeʼ etootzaq kam talax uvaʼ nik etabʼi. ¿Laʼetz kol etxʼol epal tu mam kʼaxkʼo uvaʼ toq palk in? [Atz ¿laʼatetz kol etxʼol etok tu mam txumlebʼal uvaʼ toq okk in?] —xeʼt Jesuus.{*}#20.22 ¿Kam nik elkaʼpun u yol ‹podéis beber del vaso?› chich tu kastiiya. Aʼetz nik elkaʼpun vitxʼolt inqʼa niman tetz Jesuus ipal tu mam kʼaxkʼo, eche uvaʼ palk quBʼaal Jesuus. Tan ‹kʼaxkʼo,› chich teluʼl u yol ‹beber del vaso trago amargo.› Tul kamxh uvaʼ nik tal tu versiikulo uvaʼa, tul echatxh nik tale tu Tio 26.39. Aʼetz tzajnaʼql u yol uvaʼe xoʼl inqʼa aqʼol kuʼ yol tinuqul s-naʼya. Tan ech nikich ibʼanaxe te inqʼa xaol uvaʼ atichaq kuʼ t-tzeʼ, inqʼa niimichaqxh ipaʼv. Tan nikich taqʼax kʼayla aʼ tetz yatzʼbʼal aanima s-te tuul invaʼq koopa tiʼ ikamsalaq el. Aʼetz nik elkaʼpun uvaʼ bʼeeno kuxh laʼ ipal vaʼq xaol tuul mam itzaʼlal. ¿Kametz nik elkaʼpun u yol ‹bautizado con el bautismo?› chich tu kastiiya. Aʼetz nik elkaʼpun vipal invaʼq xaol titzaʼlal. Pet jit aʼ nik tal tiʼ taqʼax kuʼ xaol xeʼ aʼ.

Tul ech motx tal s-eche: —Laʼ qutxʼola, —xeʼtaqe.

23Yaʼne ech tal Jesuus s-eche: —Toqxh etxʼoleʼe u kʼaxkʼo, eche uvaʼ toq palk in, [atz vetok tu mam txumlebʼal, eche uvaʼ toq okk in.] Pet vekʼuqeʼv tinsebʼal, atz vekʼuqeʼv tinmax nik etaleʼ, tan yeʼl vokebʼal s-tiʼ. Pet taʼn kuxh vinBʼaal at tokebʼal tiʼ taqʼax te u xaol uvaʼ chʼexel vet taʼn. Tan il u bʼaʼnil bʼanel vet tutxh taʼn vinBʼaal, —xeʼt Jesuus.

24Taʼnetzxh tabʼi vet lavat inqʼa nikich itxhus tibʼ kʼatz Jesuus kam u yol uvaʼ tal Jakoovo tuchʼ Xhun, tul motx lakpaq vet iviʼ.

25Yaʼne isaʼ tzaan Jesuus inqʼa nikich itxhus tibʼ s-kʼatza. Tul ech tal Jesuus s-xoʼl s-eche: —Etootzaqle kam uvaʼ nik ibʼan inqʼa iqʼesal inqʼa tenam. Tan aʼ nik motx toksa u tetz tiʼ ibʼekʼon tiibʼa inqʼa tenam. Atz tetxhal kuxh nik inima u tenam kam uvaʼ nik motx tal inqʼa iqʼesal. 26Poro yeʼ laʼ utxhi uvaʼ ech laʼ motx ibʼane sexoʼl, ex inqʼa niman vetz. Pet jaʼl invaʼq ex, uvaʼ nik saʼon ebʼen s-nim xoʼl inqʼa emol, tul aʼetz ex laʼ etaqʼ bʼen etibʼ s-kʼuulan tetz emol.#Luk 22.23-26 27Atz jabʼiste ex, uvaʼ laʼ saʼon tiqʼol iviʼ xoʼl inqʼa emol, tul aʼetz exe uvaʼ laʼ bʼen ex s-lotxhol tetz emol. 28Tan aʼ ulk in, in, u Kʼaola uvaʼ qat bʼen s-alam aanima, tiʼ ikʼuulal, atz tiʼ ilotxhox inqʼa xaol. Tul aʼat ulk in tiʼ vaqʼt vibʼ kamoq setiʼ, tiʼ itxhoox vepaʼv tuchʼ inqʼa tenam s-kaqaayil. Pet jit aʼ ulk in, tiʼ uvaʼ laʼ kʼuulal in, —xeʼt Jesuus.

Uvaʼs ibʼant quBʼaal Jesuus bʼaʼn kaʼvaʼl inqʼa tzot

Kuxh 10.46-52; Luk 18.35-43

29Eletz vet tzaan Jesuus tu tenam Jerikoo tuchʼ inqʼa nikich itxhus tibʼ s-kʼatza, tul mam tenam txhʼuyich vet tzaan tiʼ Jesuus. 30Tul kʼuqlich kaʼvaʼl inqʼa tzot tziʼ val u bʼey. Taʼnaqetzxh tabʼi inqʼa tzot ipal paʼl Jesuus, tul xeʼtaq sichʼin. Tul ech motx tal s-eche: —¡QuBʼaal, axh u Tij Imam Daviid, txum quvatz! Tul ¡bʼan bʼaʼnil s-qe! —chichichaq isichʼineʼ.

31Yaʼne maqax isichʼin inqʼa tzot taʼn inqʼa xaol. Poro aʼl nikich motx taqʼt yakʼil tiʼ isichʼineʼ. Tul ech nikich motx tal s-eche: —¡QuBʼaal, axh u Tij Imam Daviid, txum quvatz! Tul bʼan bʼaʼnil s-qe! —chichichaqe.

32Yaʼne txakeʼv Jesuus. Tul isikʼle vet tzaan Jesuus inqʼa tzot. Tul ech tal Jesuus te inqʼa tzot s-eche: —¿Kam bʼaʼnil nik esaʼeʼ laʼ inbʼan sete? —xeʼt Jesuus.

33Tul ech tal inqʼa tzot s-eche: —QuBʼaal, aʼ qusaʼ uvaʼ laʼ ilon oʼ, —xeʼtaqe.

34Tul itxum vet Jesuus ivatz inqʼa tzot. Atz ikan vet Jesuus inqʼa ivatz. Tul yekich ilonaq veteʼ. Atz okaq vet bʼen tiʼ Jesuus.

Currently Selected:

Tio 20: ixlC

Highlight

Copy