Luk 10

Uvaʼs itxhaqt quBʼaal Jesuus laval imutxʼ (70) inqʼa niman tetz tiʼ ipaxsal inqʼa bʼaʼnla txhaq yol s-tiʼ

1Yaʼetz kuxh vet Jesuus tiʼ talax inqʼa yol inqʼae, tul itxaj Jesuus lavat imutxʼ (70) jolt inqʼa niman tetz. Tul kaʼkabʼil motx ibʼaxabʼsat bʼen Jesuus tuulbʼal inqʼa tenam, atz tuulbʼal inqʼa txʼavaʼ tal uvaʼ laʼich palk Jesuus. 2Tul ech tal Jesuus s-te s-eche: —Nik val sete uvaʼ mam xaol txʼebʼoʼmy kuxh al tiʼ tabʼil inqʼa yol uvaʼ bʼen etal s-te. Pet yeʼxh jankʼal inqʼa bʼen paxsan vinyolbʼal s-xoʼl. Tan ech tatin inqʼa xaol, eche tatin triigo uvaʼ sibʼxh avamal. Tul maʼt itzaq vet vivatz. Poro aʼe tan, yeʼxh jankʼal txhokol tetz triigo ati. Pet jaqvaq te quBʼaal Tiuxh, tul laʼ itxhaq tel paxsan tetz viyol, echetz laʼ imolt tzaane inqʼa xaol tiʼ innimaleʼ.

3Kʼuxhetz toqxh intxhaq bʼen ex xoʼl jolol inqʼa xaol uvaʼ nik saʼon tabʼil inqʼa yol uvaʼ bʼen etaleʼ, poro at jolt inqʼa yeʼ toq saʼon tabʼil u yol. Tul eche ibʼen karneʼl xoʼl xoʼ toq ebʼaneʼ.{*}#10.3 ¿Kam s-tiʼil tal quBʼaal Jesuus uvaʼ eche karneʼl inqʼa niman tetz, inqʼa kaʼkabʼil itxhaqt bʼen? Tan, tiʼ uvaʼ laʼich bʼen taqʼ tibʼ inqʼa niman tetz vatz inqʼa qʼesal uqʼeʼybʼal tiʼ ikʼaxbʼixsaleʼ, atz tiʼ ixotxhoxeʼ, eche karneʼl uvaʼ nik kuxh taqʼ tibʼ txeypoq taʼn inqʼa xoʼ. Tan tiʼ uvaʼ jalelich tibʼ inqʼa bʼaʼnla txhaq yol tuchʼ u txhusbʼal nimamalich taʼn inqʼa iqʼesal uqʼeʼybʼal xoʼl inqʼa tij imam Israeel. Echetz s-tiʼile laʼich lakp vet iviʼ inqʼa iqʼesal te inqʼa niman tetz Jesuus tiʼ ipaxsal vaʼtoʼq yol. Tul echichetz vete xoʼ inqʼa iqʼesal uqʼeʼybʼal laʼich motx ibʼan tiʼ ikʼaxbʼisal inqʼa niman tetz Jesuus uvaʼ tal quBʼaal Jesuus. Atz vaʼt nik tal quBʼaal Jesuus tiʼ inqʼa apoostol, uvaʼ eche karneʼl, tan bʼaʼnil laʼich bʼen taqʼ xoʼl inqʼa xaol. Tan aʼ u bʼaʼnla yol laʼich bʼen taleʼ. Atz laʼich bʼen ituki el demoonio t-taanima inqʼa xaol. Atz laʼich bʼen itzʼaka inqʼa yaabʼ. Pet jit kam koq vaʼq s-tiʼil, tul laʼich bʼenk inqʼa apoostol xoʼl inqʼa xaol. Tan aʼich isaʼ quBʼaal Jesuus uvaʼ jitich eela inqʼa laʼich bʼen ibʼan inqʼa apoostol tuchʼ kam uvaʼ nikich ibʼan inqʼa iqʼesal uqʼeʼybʼal. Tan taʼn kuxh nikich itxhok inqʼa iqʼesal uqʼeʼybʼal kam txumbʼal laʼich motx ibʼan tiʼ teesal puaq tiqʼabʼ inqʼa xaol; atz laʼich oksal iqʼij taʼn inqʼa xaol. Tul echatxh nik tal tu Tio 10.16 s-eche: —Tan toq intxhaq bʼen ex xoʼl inqʼa xaol, ex, inqʼa bʼaʼnil nik etxhokeʼ, atz bʼaʼnil iqʼomal etaʼn, eche karneʼl uvaʼ yeʼxhkam txhiʼtxhoil iqʼomal taʼn. Pet laʼetz opoon vet ex xoʼl inqʼa xaol, tul at xaol uvaʼ toq kʼaxbʼisan ex. Tan echaq tatin, eche xoʼ uvaʼ tzaoq kuxh txhibʼ s-vatz. Pet aʼ laʼ ebʼana uvaʼ atoq etxumbʼal tiʼ exeet etibʼ, eche nik ibʼan u kan, —xeʼt quBʼaal Jesuus. 4Tul yeʼl invaʼq etxʼuʼy laʼ etiqʼo, atz jitoq invaʼq esam. Atz jitoq laʼ etiqʼo invaʼtoʼq echichʼ xaʼp. Tul yeʼl ex laʼ kuxh ebʼal etibʼ t-bʼey tiʼ iqʼiilal invaʼq emol.

5Taletz invaʼq otzotz uvaʼ laʼ aqʼbʼik ex, tul ech laʼ etal s-bʼaxa s-eche: «QuBʼaal Tiuxh toq aqʼon bʼaʼnil tetaanima, ex, inqʼa at ex tu otzotz,» chaq ex. 6Tan oq ayaʼlxh ikʼuul invaʼq u xaol, uvaʼ laʼ kʼulun ex tu otzotz, tul laʼ ikʼul u bʼaʼnil uvaʼ laʼ ejaq te quBʼaal Tiuxh s-tiibʼa. Pet oq yeʼ laʼ ikʼul ex tibʼaʼnil, tul yeʼlat vibʼaʼnil quBʼaal Tiuxh laʼ ikʼula. Pet atoq vibʼaʼnil quBʼaal Tiuxh sekʼatza. 7Taʼnetzxh laʼ atink ex tu otzotz tal uvaʼ laʼ kʼultxhik ex. Pet jit jun otzotz kuxh laʼ epal tiʼ vetatineʼ. Tul laʼ txʼaʼon ex, atz laʼ etukʼa kam uvaʼ laʼ aqʼax sete. Tan ech uvaʼe tzʼibʼamal t-viyolbʼal quBʼaal Tiuxh uvaʼ: «Ikʼulel u aqʼonvil laʼ aqʼax vijaʼmil,» chiche.#Deuteronoomio 25.4; Tio 10.10 8Atz talxh invaʼq tenam laʼ aqʼbʼik ex, tul oq laʼ kʼulux ex tibʼaʼnil, tul laʼ kuxh ekʼula kam etxhbʼubʼal laʼ aqʼax sete. 9Tul bʼanvaʼq bʼaʼn inqʼa yaabʼ, inqʼa at tu tenam tal uvaʼ laʼ aqʼbʼik ex. Tul ech laʼ etal s-te s-eche: «Uyetz vet iqʼiil ibʼant quBʼaal Tiuxh iqʼesalil sekʼatza,» chaq ex te inqʼa xaol.

10Poro at tenam yeʼ toq kʼulun ex tal uvaʼ toq aqʼbʼik ex. Pet naletz kuxh laʼ etxakbʼa etibʼ t-inqʼa bʼey nikʼa tenam. Tul ech laʼ etal s-eche: 11«¡Jankʼal u poqoq uvaʼ qat ok tzaan jaqʼ qoq tuulbʼal vetenam, tul antxh toq qutichuvat ka tzitza, tetxhlal uvaʼ toq uloq u kʼaxbʼichil setiibʼa taʼn quBʼaal Tiuxh! Tan ¡yeʼ nik esaʼ tabʼil u yol uvaʼ iqʼomal qaʼn tiʼ talax inuqul uvaʼ il vet viqʼiil vibʼant quBʼaal Tiuxh iqʼesalil tetaanima uya!» chaq ka ex te inqʼa xaol. 12Pet nik val sete uvaʼ palnaʼql u kʼaxbʼichil laʼ til inqʼa xaol uvaʼ yeʼ laʼ kʼulun ex, viʼ u kʼaxbʼichil uvaʼ laʼ til inqʼa xaol tu tenam Sodooma tu qʼij uvaʼs laʼ taqʼt kuʼ quBʼaal Tiuxh inqʼa yol tinuqul.

Uvaʼs talt quBʼaal Jesuus kam laʼ elkaʼp u tenam uvaʼ yeʼ nik iqeoneʼ

Tio 11.20-24

13Poro ¡txumlebʼalxh evatz, ex, inqʼa aj Korasiin tuchʼ, ex, inqʼa aj Vetsaaida, tan mam kʼaxkʼo laʼ bʼen etileʼ! Tan sibʼ kaebʼal aanima qat inbʼan sexoʼl, kʼutxhbʼal tetz u tiqleʼm quBʼaal Tiuxh, poro yeʼ nik etitzʼa etibʼ t-inqʼa epaʼv. Pet ech koq nikich ibʼanax inqʼa kaebʼal aanimae xoʼl inqʼa aj Tiiro, atz xoʼl inqʼa aj Sidoon s-naʼya, eche uvaʼ nik ibʼanax sexoʼl s-txheel, tul yekichebʼ motx titzʼa tibʼ t-inqʼa ipaʼv vatz quBʼaal Tiuxh. Atz yekichatebʼ motx toksa inqʼa xaol qitxhkin oksaʼm s-tiʼ, s-tetxhlal u titzʼat tibʼ t-inqʼa ipaʼv. Tul yekichatebʼ motx taqʼ jaʼ tzaʼ tiviʼ. 14Echetz nik valte sete uvaʼ palnaʼql u kʼaxkʼo laʼ etil, viʼ u kʼaxkʼo uvaʼ laʼ til inqʼa aj Tiiro tuchʼ inqʼa aj Sidoon, tu qʼij uvaʼs laʼ taqʼt quBʼaal Tiuxh u kʼaxkʼo tiibʼa inqʼa yeʼ nik kʼulviin vinyol.

15Atz kʼuxh ex, inqʼa aj Kapernauum, yeʼ etitzʼa uvaʼ tira sibʼ laʼ oksal eqʼij t-amlikaʼ. Yeʼle. Pet aʼl toq teesal eqʼij. Tan aʼetz uvaʼs laʼ ekameʼ, tul yekl ex tu mam kʼaxkʼo uvaʼ yeʼl iyaʼebʼal imotxebʼal, —xeʼt Jesuus tiʼ ijaʼp u yol tiibʼa inqʼa tenam.

16Yaʼne ech tal Jesuus te inqʼa nikich itxhus tibʼ s-kʼatza s-eche: —Jabʼiletz uvaʼ laʼ qeon inqʼa yol uvaʼ laʼ etala, tul inetze, nik iqej in. Atz jabʼiletz uvaʼ laʼ ixvan ex tuchʼ u yol uvaʼ laʼ etala, tul inetze, nik tixva in. Atz jabʼiletz uvaʼ laʼ ixvan in, tul quBʼaal Tiuxhetze, nik tixva uvaʼ txhaqon tzaan in, —xeʼt Jesuus.

Uvaʼs iqʼaʼv vet laval imutxʼ (70) inqʼa niman tetz quBʼaal Jesuus tuchʼ chiibʼichil

17Qʼaʼvetz vet laval imutxʼ (70) inqʼa niman tetz Jesuus s-kʼatza, tul chiibʼiyaqichxh veteʼ. Tul ech motx tal te Jesuus s-eche: —¡QuBʼaal, tetxhal qat motx iqej oʼ inqʼa demoonio tuchʼ vaviqleʼm uvaʼ aqʼel taʼn quBʼaal Tiuxh! —xeʼtaqe.

18Tul ech tal Jesuus s-eche: —Ee. Tuulbʼal uvaʼ eenich ex al tetz inqʼa inyol, tul nikich vileʼe uvaʼ ech nikich ikuʼl Satanaas tiʼ tel iqʼij, eche ikuʼl kotzʼinebʼ vatz amlikaʼ. 19Tan qat vaqʼl etiqleʼm, tiʼ uvaʼ kʼuxh laʼ etatxhʼ invaʼq kan, atz invaʼq bʼaq jej txoo uvaʼs laʼ exaoneʼ, tan yeʼxhkam laʼ ebʼana. Atz qat vaqʼl etiqleʼm tiʼ etoleʼv tiʼ jankʼal inqʼa yeʼbʼaʼn uvaʼ laʼ ibʼan Satanaas sete. Tul yeʼ laʼ oleʼv setiʼ. 20Jitetz kuxh taʼn laʼ chiibʼik ex, tiʼ uvaʼ qat oleʼv ex tiʼ itukil el inqʼa demoonio t-taanima inqʼa xaol, pet chiibʼoqat ex, tiʼ uvaʼ tzʼibʼamal vet ebʼij tu amlikaʼ, —xeʼt Jesuus.#Apokaliipsis 20.11-14

Uvaʼs ichiibʼ quBʼaal Jesuus tiʼ taqʼax taʼntiuxh te quBʼaal Tiuxh, tiʼ uvaʼ ex ipaxsa inqʼa apoostol, inqʼa bʼaʼnla txhaq yol tiʼ quBʼaal Jesuus

Tio 11.25-27; 13.16-17

21Tuulbʼaletz kuxh uvaʼ iyaʼ Jesuus tiʼ talax inqʼa yol te inqʼa niman tetz, inqʼa itxhaqa, tul ul val u chiibʼichil t-taanima Jesuus taʼn viTiuxhil Tiuxh. Tul ech tal Jesuus s-eche: —Nik voksa aqʼij, inBʼaal, axh, uvaʼ nik bʼanon iqʼesalil tiibʼa u amlikaʼ, atz axh, uvaʼ nik bʼanon iqʼesalil tiibʼa u txʼavaʼ s-kaqaayil. Nik vaqʼ taʼntiuxh see, tan aʼ, axhe, qat aqʼon itxumbʼal, atz tuchʼ tootzaqibʼal inqʼa niman vetz, inqʼa qat tiqʼo kuʼl tibʼ, eche inqʼa nitxaʼ. Pet inqʼa xaol, inqʼa at tootzaqibʼal, atz at itxumbʼal nik inatxheʼ, tan yeʼ qat aaqʼ tootzaqi inuqul inqʼa yol uvaʼ nik intxhuseʼ. Echxhte, inBʼaal. Tan ech uvaʼe nik achiibʼ s-tiʼ, —xeʼt Jesuus te quBʼaal Tiuxh.

22Yaʼne ech tal Jesuus xoʼl inqʼa niman tetz, inqʼa motx itxhaqa s-eche: —Eche in, tan qat ikʼuxh vinBʼaal s-ve jankʼalxh inqʼa kam laʼ inbʼan tzitza vatz txʼavaʼ. Tul tira yeʼxhabʼil invaʼq ootzaqin tetz u vatineʼ. Pet taʼn kuxh vinBʼaal ootzaqin vetz. Tul taʼnxh tootzaql vinBʼaal jaʼl u xaol uvaʼ, in laʼ saʼon tootzaqitaʼ. Tul taʼn kuxh in ootzaqin tetz, in viKʼaol; atz laʼ tootzaqi inqʼa xaol vinBʼaal uvaʼ, in laʼ saʼon tootzaqitaʼ, —xeʼt Jesuus.

23Yaʼne ijetxheʼl Jesuus inqʼa nikich itxhus tibʼ s-kʼatza xoʼl inqʼa xaol. Tul sutxhqʼ Jesuus tiʼ iqul tiʼ talax yol te inqʼa nikich itxhus tibʼ s-kʼatza. Tul ech tal Jesuus s-te s-eche: —At vibʼaʼnil quBʼaal Tiuxh setiibʼa, tiʼ uvaʼ tira nik motx etil jankʼal inqʼa nik inbʼaneʼ. 24Tul nik val sete uvaʼ: Mamala qʼexsanich tetz viyol quBʼaal Tiuxh tuchʼ inqʼa mam iqʼesal s-naʼya, nikich motx saʼon tilix inqʼa kaebʼal aanima, inqʼa nik etil inbʼant s-txheel, atz tiʼ tabʼil inqʼa bʼaʼnla txhaq yol, inqʼa nik motx etabʼi valt s-txheel. Tul yeʼ motx tila, atz yeʼ motx tabʼi, —xeʼt Jesuus.

Uvaʼs txumbʼalimal itxhusun quBʼaal Jesuus, tul tiqʼo tzaan val u aj Samaaria tuulbʼal viyol

25Echetz ibʼane val u vinaq uvaʼ nikich txhusun ibʼekʼbʼal inqʼa tij imam Israeel, tan tabʼi val u tzaʼlla yol te Jesuus. Tan aʼich kuxh isaʼ tiltaʼ maq tal laʼich elk Jesuus t-bʼey tiʼ itzaqʼbʼet u yol. Tul txakeʼvi. Tul ech tal te Jesuus s-eche: —Txhusul qetz, ¿kametz invaʼq laʼ inbʼana, tul laʼ vil u qʼij saq uvaʼ yeʼl iyaʼebʼal imotxebʼal? —xeʼte.

26Tul ech tal Jesuus s-te s-eche: —¿Kam nik tal inqʼa bʼekʼbʼal tzʼibʼamal ka t-viyolbʼal quBʼaal Tiuxh, bʼatzʼi, uvaʼ nik asikʼle? —xeʼt Jesuus.

27Yaʼne ech tal u vinaq te Jesuus s-eche: —Aʼ nik taleʼ uvaʼ: «Laʼ asaʼ u quBʼaal, u quTiuxh, tuchʼxh avaanima, tuchʼxh avaanxelal, tuchʼxh ayakʼil, atz tuchʼxh avitzʼabʼal,» chiche. Tul nikat tal inpaqte: «Saʼ inqʼa amol, eche uvaʼ nik asaʼt eebʼ,» chiche, —xeʼt u vinaq.

28Yaʼne ech tal Jesuus s-eche: —Antxhte uvaʼ nik aaleʼ. Ape. Bʼanetza, echetz yeʼl iyaʼebʼal imotxebʼal qʼij asaqe, —xeʼt Jesuus.

29Tul nikich kuxh itxhok u vinaq txumbʼal tiʼ talt tibʼ s-niman tetz viyolbʼal quBʼaal Tiuxh. Tul ech tal te Jesuus s-eche: —¿Jaʼletze inqʼa inmol bʼa, laʼ insaʼa? —xeʼte.

30Yaʼne ech tal Jesuus te u vinaq s-eche: —Ech ibʼane paqul, el bʼen val u vinaq, tij imam Israeel, tu tenam Jerusaleen. Tul aalich ikuʼ tu tenam Jerikoo. Tul txeyp u vinaq taʼn jolol elqʼom. Tul tira motx elqʼal jankʼal inqʼa kamaq tetz taʼn inqʼa elqʼom. Tul bʼeenoxh motx iqʼosox u vinaq taʼn inqʼa elqʼom. Atz bʼiit kuxh yeʼ kami.

31Tuuletzxh ipal val u oksan yol vatz Tiuxh tiʼ u bʼey tal uvaʼ atich u vinaq uvaʼ qʼosoxi. Tiletz u oksan yol u vinaq, tul yeʼ ilotxha. Pet aʼl kuxh ijal ibʼey, atz pal paʼl.

32Yaʼne pal vaʼt u vinaq, uvaʼ leviita u tiqleʼm, uvaʼ nikich ilon inqʼa kam uvaʼ atich tuul u tostiuxh.#Xhun 1.19 Tul tila uvaʼ atich u vinaq t-bʼey uvaʼ qʼosoxi. Tul antxh ibʼan txhae, tan ijalat ibʼey, tul pal paʼl.

33Pet paletz vet vaʼt u vinaq, val u aj Samaaria, tul tila uvaʼ bʼeenoichxh vet ikʼaxbʼ ka u vinaq t-bʼey uvaʼ qʼosoxi. Tul itxum u aj Samaaria ivatz u vinaq.

34Yaʼne ijetxhoʼk tibʼ u aj Samaaria kʼatz u vinaq. Tul itzʼaka vet inqʼa takʼoʼm u vinaq tuchʼ aseeite, atz tuchʼ qʼuʼich taʼl uuva. Yaʼne ibʼatxh u akʼoʼm. Tul taqʼ vet jaʼ u aj Samaaria u vinaq tiʼ vibʼur. Tul tiqʼo vet t-val u atibʼal uvaʼ ivatbʼalichxh xaol. Tul ikʼuula vet u aj Samaaria u vinaq.

35Echetz vet s-eqal, tul taqʼ vet ka u aj Samaaria kaʼvaʼl puaq uvaʼ plaataxhtuʼ te u aj etz vatbʼal, ijaʼmil kaʼvaʼl qʼij. Tul ech tal u aj Samaaria s-eche: «Kʼuula u vinaq uvaʼ akʼonaʼqle. Tul jankʼatetz u puaq uvaʼ laʼ isaʼ tiʼ ibʼanax bʼaʼn, tul paloqnetz vaqʼ ichʼexel uvaʼs laʼ inpal inpaqte,» xeʼt u aj Samaaria te u aj etz vatbʼal.

36Echetz ¿jabʼisteetz inqʼa vinaq s-te s-toxil kʼutxhun uvaʼ isaʼ vimol uvaʼ qʼosox ka t-bʼey taʼn elqʼom, nik anatxheʼ? —xeʼt Jesuus.

37Tul ech tal u vinaq, uvaʼ nikich txhusun ibʼekʼbʼal inqʼa tij imam Israeel, s-eche: —Aʼ uvaʼ txumun ivatz u vinaq uvaʼ qʼosox ka t-bʼey, —xeʼt te Jesuus.

Tul ech tal Jesuus s-eche: —Ape. Quuxh. Tul echatxh laʼ abʼan, eche uvaʼ ibʼan u vinaq uvaʼ txumun ivatz vimol, —xeʼt Jesuus.

Uvaʼs ex isolit quBʼaal Jesuus Taj tuchʼ Mal

38Atichetz ok Jesuus tiʼ bʼey tiʼ ixaon tuulbʼalaq tenam, tul pal Jesuus t-val u tal tenam. Yaʼne aʼ val u ixoq uvaʼ Tajich ibʼij kʼulun Jesuus t-totzotz. 39Atichetz val u titzʼin Taj uvaʼ Malich ibʼij, tul kʼuqeʼv txala toq Jesuus tiʼ tabʼil inqʼa yol uvaʼ nikich tal Jesuus. 40Petetz Taj, tan eyich kuxh taanima Taj tiʼ ibʼanax mamala taqʼon. Yaʼne ech ul tal Taj te Jesuus s-eche: —InBʼaal, ¿yeʼetz kolxh nik atxum inbʼeeq invatz? Tan nik kuxh taqʼ ka in u vitzʼin sinjunal tiʼ u aqʼon. Pet al inbʼeeq s-te, tul ul ilotxh in, —xeʼt Taj.

41Tul ech tal Jesuus s-eche: —Taj, ey kuxh avaanima, atz ey kuxh axh t-bʼey tiʼ ibʼanax inqʼa mamala aqʼon. 42Pet vaʼl kuxh uvaʼ tetxhal laʼ bʼanaxi; aʼetz uvaʼe, qat ichʼex Mal. Aʼe, uvaʼ qat tabʼi Mal vinyol. Tul yeʼxhabʼil laʼ maon te Mal, —xeʼt Jesuus.

Currently Selected:

Luk 10: ixlC

Highlight

Copy