Xhun 3

Uvaʼs talt quBʼaal Jesuus inuqul te Nikodeemo tiʼ itxhej qʼij isaq uvaʼ yeʼl iyaʼebʼal imotxebʼal

1Atichetz val u vinaq uvaʼ Nikodeemoich ibʼij; iqʼesalich xoʼl inqʼa tij imam Israeel. Tul atich ok xoʼl u tuqʼeʼybʼal inqʼa fariseeo. 2Tuulbʼaletz val u qʼeqxeʼmbʼal, tul ex ilixoq Jesuus taʼn Nikodeemo. Tul ech tal Nikodeemo te Jesuus s-eche: —Txhusul qetz, qootzaqle uvaʼ quBʼaal Tiuxh qat txhaqon tzaan axh tiʼ atxhusun s-quxoʼl. Tan oq yeʼl quBʼaal Tiuxh sakʼatza, tul laʼ koq oleʼv axh tiʼ ibʼanax invaʼq kaebʼal aanima, eche uvaʼ nik abʼaneʼ, —xeʼt Nikodeemo.

3Yaʼne ech tal Jesuus s-eche: —Tira nuqxh nik val see: Jaʼl uvaʼ yeʼ laʼ alal tikaʼpaq, tul yeʼl tokebʼal tiʼ ibʼant quBʼaal Tiuxh iqʼesalil t-taanima, —xeʼt Jesuus.

4Tul ech tal Nikodeemo s-eche: —¡Keʼchetz laʼ talal invaʼq xaol tikaʼpaq, oq qʼest veteʼ! Tan bʼane laʼetz koq utxh tatin u xaol paqte kʼatz vitxutx, tul laʼ alal paqte, —xeʼt Nikodeemo.

5Yaʼne ech tal Jesuus s-eche: —Tira nuqxh nik val see: Jitetz kuxh taʼne uvaʼ laʼ alal vaʼl u xaol taʼn itxutx, pet tetxhal kuxh laʼ nal alal tikaʼpaq tuchʼ viTiuxhil Tiuxh. Atz tetxhal laʼ nal alal paqte vatz quBʼaal Tiuxh. Tan jaʼl u xaol uvaʼ laʼ alal paqte vatz quBʼaal Tiuxh, aʼetz uvaʼe, laʼ bʼen atinoq tal uvaʼ nik ibʼanvat quBʼaal Tiuxh iqʼesalil. 6Tan jaʼl invaʼq xaol uvaʼ laʼ alal taʼn alam aanima, antetz kuxh vitxhiʼoʼl nik bʼanbʼen. Pet jaʼl uvaʼ laʼ alal taʼn viTiuxhil Tiuxh, aʼetz vet u taanxelale nik titzʼeʼv vatz quBʼaal Tiuxh. 7Pet yeʼ kuxh sotz akʼuul te u yol, kʼuxh ech nik val see s-eche: «Tetxhal laʼ alal ex tikaʼpaq,» chich in. 8Jankʼal eche u kaqiqʼ, tan tal kuxh nik aabʼivat u toqʼeʼ. Tul yeʼ nik eeleʼ tal nik tzajka, atz tal nik ikʼaqeʼ. Echetze inqʼa xaol, inqʼa yeʼ ootzaqin tetz quBʼaal Tiuxh, tan yeʼ nik ibʼen s-te tiʼ titzʼeʼv vaʼq xaol tikaʼpaq taʼn viTiuxhil Tiuxh, —xeʼt Jesuus.

9Yaʼne ech tal vet Nikodeemo te Jesuus s-eche: —¿Kametz laʼ qule inimal u yol uvaʼe? —xeʼt Nikodeemo.

10Tul ech tal Jesuus s-eche: —¿Yeʼetz kol nik ibʼen u yol see?, atz axh txhusul tetz inqʼa tij imam Israeel. 11Tira nuqxh nik val see: Jankʼalxh inqʼa yol uvaʼ nik qal inuqul see tuchʼ inqʼa nik itxhus tibʼ sinkʼatza, tan oʼetzxhte ootzaqin tetz. Tul oʼetzxhte ilonaʼq tetz inuqul kam inqʼa nik qal see. Tul jitoqetz nik eqejeʼ, ex inqʼa iqʼesal tuqʼeʼybʼal inqʼa qumol s-tijaq imam Israeel. 12Iletz inqʼa yol nik val inuqul sete tzitza vatz txʼavaʼ, tul yeʼ nik eqej in s-tiʼ. Tul oqetz laʼ val inuqul sete tiʼ inqʼa kam t-amlikaʼ, tul aʼetz koq laʼ eqejtxha ine s-tiʼ. 13Pet yeʼxhal invaʼq bʼennaʼq tu amlikaʼ. Pet taʼn kuxh ine [uvaʼ tzajnaʼq in tu amlikaʼ], in, u Kʼaola uvaʼ qat bʼen in s-alam aanima.

14Taqʼetz jaʼ Moisees u kan s-jetxhel jaʼ tu tzaqa txʼavaʼ, tul yek nikich ibʼan inqʼa xaol bʼaʼn uvaʼs nikich motx isaqit jaʼ u kan. Echatetz laʼ vaqʼax jaʼe, in u kʼutxhul tetz quBʼaal Tiuxh vatz txʼavaʼ.#Nuumeros 21.9 15Echetz jatvaʼl inqʼa xaol uvaʼ laʼ qeon in, yeʼletz vet ikamebʼal vatz quBʼaal Tiuxh. Pet at vet qʼij isaq uvaʼ yeʼl iyaʼebʼal imotxebʼal laʼ ibʼana.

Uvaʼs talt quBʼaal Jesuus uvaʼ quBʼaal Tiuxh txhaqon tzaan, tiʼ uvaʼ jatvaʼl xaol laʼ qeon, tul at qʼij isaq uvaʼ yeʼl iyaʼebʼal imotxebʼal

16Tan sibʼxh taanima quBʼaal Tiuxh tiʼ jankʼal inqʼa xaol vatz txʼavaʼ. Tan aʼ isaʼ yeʼ laʼ itzʼeqx inqʼa xaol. Pet at qʼij isaq uvaʼ yeʼl iyaʼebʼal imotxebʼal laʼ ibʼana. Xaʼtetze qat taqʼ tzaan in, in viKʼaol tiʼ ul vaqʼt vibʼ kamoq tiʼ itxhoox jankʼal vipaʼv inqʼa xaol, in, uvaʼ taʼnxh in sibʼ viqleʼm.#Xhun 1.14

17Qatetz itxhaq tzaan in quBʼaal Tiuxh, in viKʼaol. Poro jit aʼ qat itxhaqvat tzaan in tiʼ taqʼax jaʼp u yol tiibʼa jankʼal inqʼa xaol tiʼ ikʼaxbʼisaleʼ, pet, tiʼ uvaʼ, jankʼal inqʼa xaol laʼ ikol tibʼ vatz u kʼaxkʼo tiʼ inqʼa ipaʼv. 18Tan jaʼl uvaʼ laʼ qeon in, in viKʼaol quBʼaal Tiuxh, tan yeʼl vet u yol laʼ jaʼp s-tiibʼa tiʼ vipaʼv. Pet jaʼl uvaʼ yeʼ laʼ qeon in, in viKʼaol quBʼaal Tiuxh, tan at vet jaʼp viyol quBʼaal Tiuxh s-tiibʼa tiʼ ibʼen tu kʼaxkʼo. Tan yeʼ qat iqej viKʼaol quBʼaal Tiuxh uvaʼ taʼnxhte uvaʼ palnaʼq tiqleʼm. 19Keʼchetz koq qat ijaʼp viyol quBʼaal Tiuxh s-tiibʼa, pet, tiʼ uvaʼ, yeʼ toksa viyol quBʼaal Tiuxh s-tuul uvaʼ qat ul inkʼutxh s-xoʼl tzitza vatz txʼavaʼ, eche itxiqun vaʼq txiqubʼal. Pet aʼl aʼ qat bʼenk taanima tiʼ inqʼa paʼv, eche ibʼen t-tokto. Tan aʼ kuxh tetz ibʼanax inqʼa kantxhaqla txumbʼal. 20Tan jankʼalxh inqʼa xaol uvaʼ, aʼ kuxh u kantxhaqla txumbʼal nik ibʼaneʼ, aʼetz inqʼae, nik iyan ivatz s-ve, in, u Txiqubʼal. Tul jitoq nik itxhok tok sinkʼatza, in, u Txiqubʼal, tan yeʼ isaʼ laʼ motx eluʼl vatz qʼij saq tiʼ inqʼa kantxhaqla txumbʼal nik ibʼaneʼ. 21Pet u xaol uvaʼ, aʼ nik inima vinuqul viyolbʼal quBʼaal Tiuxh, tan aʼetz u xaole uvaʼ nik itxhok tok sinkʼatza, in u Txiqubʼal. Echetz laʼ tootzaqile uvaʼ, aʼ u titzʼabʼal quBʼaal Tiuxh nik motx ibʼaneʼ, —xeʼt Jesuus te Nikodeemo.

Uvaʼs talt Xhun uvaʼ, aʼ quBʼaal Jesuus palnaʼq tiqleʼm viʼ Xhun

22Xamteletz vet tiʼ inqʼa utxhi, tul bʼen vet Jesuus tuchʼ inqʼa nikich itxhus tibʼ s-kʼatza tuulbʼal Judeea. Tul atin vet Jesuus tzitzi s-tuchʼ. Tul nikich taqʼ kuʼ Jesuus inqʼa xaol xeʼ aʼ.

23Tul nikichat taqʼ kuʼ Xhun inqʼa xaol xeʼ aʼ tu tal tenam Enoon uvaʼ inaaqaʼ tibʼ tuchʼ u tenam Saliim. Tan mamala xaomla aʼ atich tzitzi. Tul motx aqʼbʼ inqʼa xaol kʼatz Xhun. Tul nikich taqʼ kuʼ Xhun xeʼ aʼ. 24Ayaʼletz uvaʼe, nikich ibʼan Xhun uvaʼs yeʼnaqich jaʼoq Xhun t-tzeʼ.#Tio 14.3; Kuxh 6.17; Luk 3.19-20

25Yaʼne xeʼt vet yol xoʼl inqʼa nikich itxhus tibʼ kʼatz Xhun tuchʼ inqʼa iqʼesal tuqʼeʼybʼal inqʼa tij imam Israeel tiʼ inimal inqʼa txʼajo ibʼ vatz quBʼaal Tiuxh. 26Tul aqʼbʼ vet inqʼa nikich itxhus tibʼ kʼatz Xhun. Tul echaq motx tal te Xhun s-eche: —Txhusul qetz, il naq u vinaq at tzitzi uvaʼ atich sakʼatza txala bʼen Jordaan, naq uvaʼ aal u tiqleʼm s-qe. Iletz naq imol tibʼ tuchʼ inqʼa nik itxhus tibʼ s-kʼatza tiʼ taqʼax kuʼ inqʼa xaol xeʼ aʼ. Tul mam tenam nik taqʼbʼ vatz naq, —xeʼtaqe.

27Yaʼne ech tal Xhun s-eche: —Yeʼxhabʼil vaʼq xaol laʼ utxh taqʼax bʼen s-nim tuchʼ u tiqleʼm, oq jit quBʼaal Tiuxh laʼ saʼon s-tiʼ. 28Tul antxh ex ootzaqin tetz vinyol uvaʼ val sete tiʼ u viqleʼm. Ech u yol val sete s-eche: «Jit aʼ, ine u Kriisto. Pet aʼ, ine, uvaʼ qat ibʼaxabʼsa tzaan in quBʼaal Tiuxh vatz u Kriisto,» yetz xeʼt in sete.#Xhun 1.20 29Tan jabʼil koq aj etz u ixvaak laʼ ibʼana, pet aʼ u aj tzʼaloʼm aj etz; aʼe, u Kriisto. Pet u tamiʼk u aj tzʼaloʼm, tan at kuxh s-kʼatza, eche vatineʼ. Niketz ichiibʼ u tamiʼk u aj tzʼaloʼm tiʼ ipaxin vitziulal, echetz nik itzoqp vinchiibʼe, tiʼ uvaʼ nik etaleʼ, tiʼ uvaʼ aʼxh nik tabʼi inqʼa xaol viyol u Kriisto. 30Echetzxh vet toq ibʼane. Tan aʼ vet u tetz u Kriisto laʼ yakʼini; pet il vet u vetz aalemal itzoqpeʼ, —xeʼt Xhun.{*}#3.30 Tul tira nikich tiqʼo vet kuʼl tibʼ Xhun kʼatz quBʼaal Jesuus. Atz tira tal Xhun inuqul uvaʼ jitich aʼ Xhune u Kriisto. Tan nikich tal inqʼa nikich itxhus tibʼ kʼatz Xhun uvaʼ yeʼxh jankʼal xaol nikich tul vet kʼatz Xhun. Tan aʼ nikich motx imolvat vet tibʼ mamala xaol vatz quBʼaal Jesuus.

Uvaʼs talt Xhun, u aqʼol kuʼ xaol xeʼ aʼ, uvaʼ een tzajnaʼql quBʼaal Jesuus t-amlikaʼ

31Tul ech tal Xhun, u aqʼol kuʼ xaol xeʼ aʼ, inpaqt s-eche: —Tan aʼ u Kriisto iqʼesal s-qiibʼa s-qukaqaayil. Tan een tzajnaʼql t-amlikaʼ. Pet ech koq in, tan in kuxh invaʼl sulaʼ aanima vatz txʼavaʼ. Tul aʼ nik inyolbʼe inqʼa txumbʼal tetz inqʼa xaol vatz txʼavaʼ. Pet koq viyol u Kriisto, tan palnaʼq tiʼ u vetz, atz palnaʼq tiqleʼm tiʼ viyolon tiibʼa jankʼal inqʼa qetz tzitza vatz txʼavaʼ, tan een tzajnaʼql t-amlikaʼ. 32Tan kam uvaʼ ilel taʼn, atz abʼimal tzaan taʼn kʼatz quBʼaal Tiuxh, tul aʼetz uvaʼe, nik tal s-quxoʼl. Aloq jit jankʼal xaol nik kʼulun u yol uvaʼ nik taleʼ.

33Pet jaʼl uvaʼ nik qeon inqʼa yol uvaʼ nik tal u Kriisto, tul aʼetz uvaʼe, nik kʼutxhun tuchʼ u tatineʼ uvaʼ nuqxh inqʼa iyol quBʼaal Tiuxh uvaʼ nik tal u Kriisto. 34Tan antxh inqʼa iyol quBʼaal Tiuxh nik iyolbʼe u Kriisto uvaʼ qat itxhaq tzaan quBʼaal Tiuxh. Tan tira kuxh taqʼ quBʼaal Tiuxh viTiuxhil kʼatz Jesuus. 35Tan atxh taanima quBʼaal Tiuxh tiʼ viKʼaol, echetz qat toksat vet quBʼaal Tiuxhe jankʼal inqʼa kam tiqʼabʼ.#Tio 11.27; Luk 10.22

36Echetz jaʼl uvaʼ laʼ qeon viKʼaol quBʼaal Tiuxh, tul at qʼij isaq uvaʼ yeʼl iyaʼebʼal imotxebʼal laʼ ibʼana. Pet jaʼl uvaʼ laʼ ixvan viKʼaol quBʼaal Tiuxh, tul yeʼl qʼij isaq laʼ ibʼana. Pet aʼ vet u kʼaxkʼo laʼ taqʼ quBʼaal Tiuxh s-tiibʼa uvaʼ yeʼl iyaʼebʼal imotxebʼal, —xeʼt Xhun.

Currently Selected:

Xhun 3: ixlC

Highlight

Copy