Màtéwò 8
8
Yèésù bɔ aɖɔ́ɔ̀tɛ̀-kã̀
(Mákò 1:40-45; Lúkà 5:12-16)
1Náànyì-bɛ́ɛ̀#ɛ́, Yèésù tì ti ńǹtá-òkè#ɛ́ wá. Kíbí ó tì wá#á, ɔ̀nyà ŋa tsɛ́ kì, tsí wà tɛ̀ náànyì‐ɛ̀. 2Tsí aɖɔ́ɔ̀tɛ̀†-kã̀ sɔ́ tìmá‐ɛ̀, tsí kálɛ̀, tsí mú erí kãlɛ̀ fúu, tsí wà fɔ̀ fúu ní: Ɔ̀gá! Ó dzàre ɖé, kó bɔ òŋu ɖé! Ó ɖi, bí ó dzɛ́, nákó nyáa bɔ òŋu, tsí òŋu kó ɖi ɔ̀nyà mímá nódzú-Ɔ̀ɖáyé.
3Tsí Yèésù na ɔwɔ́, tsí ń kã̀ã́, tsí fɔ̀ ní: Ɛ̃ɛ̃, òŋu dzɛ́! Kó ɖi ɔ̀nyà mímá nódzú-Ɔ̀ɖáyé! Tsí ńǹɖì-bɛ̀ gbòkã́#á, ɔ̀tɛ̀#ɛ́ tã́ fúu. 4Tsí Yèésù wà fɔ̀ fúu ní: Kó rɛ̃tígbè, tsí kó gbɔ́! Kó máa fɔ̀ɔ́, tsí ɔ̀nyà-kã̀ kó gbɔ́ oo. Ó ɖi, kó lɔ káà mú ara‐ɛ̀ ŋa atsɛbɔ-Ɔ̀ɖáyé† ní àrɔ̃̀#ɛ́ tã́. Tsí kó tsɛbɔ yèé Mɔ̀ɔ́sè† ti fɔ̀ si fú ŋa dzɔ̀ɔ́ dzɔ̀ɔ́#ɛ́, tsí kó ń gba àfárá, àtóoríi ɔ̀nyà kpó kó mà ní àrɔ̃̀#ɛ́ tã́ fúu.#8:4 À nákó nyáa fɔ̀ gbo ní: “Tsí nákó nya ɛnɛ yèé òŋu dzɛ́#ɛ́ ɖíre fú ŋa.”
Yèésù bɔ àtsìtsɛ́-ɔ̀gã́-sɔ́dzà-ìlú-Rómà-kã̀
(Lúkà 7:1-10; Yòhánà 4:43-54)
5Náànyì-bɛ́ɛ̀ ró#ɛ́, Yèésù lɔ ńǹlú-Kàfànàwú. Kíbí ó wɔ̀ ńǹlú#ɛ́, ɔ̀gã́-sɔ́dzà-ilɛ̀-Rómà†-kã̀ wà bɛ̀, tsí wáa ríi, tsí wà tsìkálɛ̀ fúu ní: 6Ɔ̀gá! Àtsìtsɛ́-òŋu, akpá‐ɛ̀ kú, ɛsɛ̀‐ɛ̀ kú, tsí ó sũ̀ ńlé si, tsí wà gbɔ́ ɖíɖɔ̃̀ tó bɛ́ɛ̀. 7Tsí Yèésù fɔ̀ fúu ní: Òŋu bàa, tsí òŋu kó wáa bɔɔ́ fúu.
8Tsí ɔ̀gã́-sɔ́dzà ŋa#á ní: Ɔ̀gá! Òŋu kò dzɔ kó wá ńlé-òŋu. Ó ɖi, kó tsóŋù gé, àrɔ̃̀#ɛ́ nákó tu àtsìtsɛ́-òŋu. 9Ó ɖi, òŋu ká-òŋu, onùgbó-òŋu ŋa wà, tsí wà kã́rũ-òŋu, tsí òŋu gbo, òŋu dzɛ́ onùgbó fú sɔ́dzà kã̀ŋa, tsí wà kã́rũ-ŋa. Bí òŋu wí fú sɔ́dzà-kã̀ ní kó lɔ ńbí, náa lɔ. Bí òŋu wí fú ɔ̀kã̀ gbo ní kó wá, náa wá. Tsí bí òŋu ɖá itsɛ́-kã̀ fú arú-òŋu ní kó tse, náa tseé.
10Kíbí Yèésù gbɔ́ bɛ́ɛ̀#ɛ́, ó tsàlá fúu tó bɛ́ɛ̀, tsí ó wà fɔ̀ fú ɛnɛ yèé wà tɛ̀ náànyì‐ɛ̀ ŋa#á ní: Òŋu wà wí òtítɔ́ fú ŋa ní fee, òŋu kò rí ɔ̀nyà-kã̀ kpókpó ńǹlú-Ìsàràyɛ́lì†, tsí kó nɛ́ àkaralé tó bɛ́ wòrí. 11Ɛ̃ɛ̃! Òŋu wà wí fú ŋa ní ɔ̀nyà kpíkpɔ̀ nákó ti nɔ́wɔ́-ɔ̀ntsà òŋu nɔ́wɔ́-bùkúù, tsí wáa dzɛ ɔɖɔ̃́ bá Àbàràhámì† òŋu Ìsákà† má nára-Yàkúbù† nɔ́ɔ̀rɔ̃ ńbí Ɔ̀ɖáyé wà dzoyè#ɛ́. 12Tsí ɛnɛ yèé ŋa gìɖì má dzèrè-oyè-Ɔ̀ɖáyé†#ɛ́, à nákó lé ŋa lɔ nóòɖe nóòkùkù sã́ŋú sã́ŋú ńbí à nákó wà sɔkṹ, tsí wà dzara kpàkpàkpà#á.
13Tsí ó nyí, tsí wà fɔ̀ fú ɔ̀gã́-sɔ́dzà#á ní: Kó bɔ̀ lɔ ńlé. Ó ɖi, ńǹmarũ-kíbí ó nɛ́ àkaralé si ńǹtá-Ɔ̀ɖáyé#ɛ́, nákó bɔ àtsìtsɛ́‐ɛ̀ fúu.
Tsí náàsòkò nyɛ̀ŋɛ̀ tútútú#ɛ́, ara#á tu àtsìtsɛ́#ɛ́.
Yèésù bɔ àkɔ̃̀rɔ̃̀ kpíkpɔ̀
(Mákò 1:29-34; Lúkà 4:38-41)
14Yèésù lɔ ńlé-Òkúta. Kíbí ó lɔ káà tó bɛ̀#ɛ́, ó rí ìnà-aya-Òkúta, tsí otútù wà kpaá, tsí ó sũ̀ si, 15tsí Yèésù tìmá‐ɛ̀, tsí banɛ́ ɔwɔ́‐ɛ̀, tsí otútù#ɛ́ gbã̀ã́, tsí ó ǹɖe, tsí gbàá náàledzò.
16Tsí ó ɖi ńmúmù-odzúùrɔ̃̀, tsí à gbɛ̃́ ɛnɛ yèé ŋa edzò† ŋa wà ɖɔ́kpɔ fú#ɛ́ wá fú Yèésù. Ɛnɛ ŋa#á kpɔ̀, tsí Yèésù tsóŋù, tsí lé edzò ŋa#á sɛ̃̀ náànyì-ŋa, tsí bɔ àkɔ̃̀rɔ̃̀ ŋa gbo kpó.
17Yèésù tse bɛ́ɛ̀, àtsùgbée afɔ̀ yèé Yèsáyà† agbáfɔ̀-Ɔ̀ɖáyé fɔ̀† kɔ si ńǸwé-Ɔ̀ɖáyé†#ɛ́ kó tsɛ ni. Ó kɔ si ní:
“Ó gba iŋɛ́ yèé wà mú wa réré ŋa#á tse ti ara‐ɛ̀.
Tsí ó gbà wá dzɔ̀ɔ́ nɔ́wɔ́-àrɔ̃̀-wa ŋa.”#8:17 Ìwé-Yèsáyà 53:4 (Ésaïe 53:4)
Nɛ̀ɛ́ dzɔ kó tɛ̀ náànyì-Yèésù?
(Lúkà 9:57-62)
18Ɔ̀nyà ŋa sú wérí‐ɛ̀ si kpìtìì. Kíbí ó rí bɛ́ɛ̀#ɛ́, ó fɔ̀ fú ɔmatsɛ́‐ɛ̀ ŋa ní àŋa kó lɔ náàtàkè-èkéèdzì-oɖò tsítsédzú tɛ̀ŋgɛ̀lɛ̀ɛ̀#ɛ́.
19Tsí akɔ́nɛ nɛ́kpa-Ɔ̀ɖáyé†-kã̀ sɔ́ tìmá‐ɛ̀, tsí fɔ̀ fúu ní: Akɔ́nɛ! Ńǹɖì ɔ̀kã̀lɔ́ɔ̀kã̀ kpó yèé nákó lɔ#ɛ́, òŋu nákó wà tɛ̀ náànyì‐ɛ̀.
20Tsí Yèésù dzɔ́ŋù fúu ní: Kɔ̀lɔ̀kɔ̀lɔ̀ ŋa nɛ́ ìɖìsũ̀, tsí ɛyɛ ŋa gbo nɛ́ ilé. Ó ɖi òŋu, Ɛnɛ yèé ɔ̀nyà bí#ɛ́†, òŋu kò nɛ́ ìɖì-ńbí òŋu kó mú éwo gbè#ɛ́.
21Tsí olòmírɛ̃̀-kã̀ náàŋírĩ-atɛ̀náànyì‐ɛ̀ ŋa, ó tsí arũ, tsí wà fɔ̀ fúu ní: Ɔ̀gá! Òŋu tsìkálɛ̀, kó fú òŋu nɔ́ɔ̀nà, tsí òŋu kó lɔ káà ri boba-òŋu tã́ná.
22Tsí Yèésù wà fɔ̀ fúu ní: Kó tɛ̀ náànyì-òŋu, tsí kó kɔ òkú ŋa dzɔ̀ɔ́ fú òkú ŋa, tsí ká ri ara-ŋa.
Yèésù ɖá awu lákṹ-kã̀ ɖóro
(Mákò 4:35-41; Lúkà 8:22-25)
23Náànyì-bɛ́ɛ̀#ɛ́, Yèésù wɔ̀ nɔ́kɔ̃̀-odzómi-kã̀ òŋu ɔmatsɛ́‐ɛ̀ ŋa, tsí à dzì nɔ́ɔ̀nà. 24Kíbí à làkóò#ɛ́, kò kpɛ̃́ gé#ɛ́, awu lákṹ-kã̀ kpé tsítse ńǹtá-oɖò#ɛ́. Awu#ɛ́ wà tse gbàgbàgbà, tsí omi wà kpa ɖà nɔ́kɔ̃̀-odzómi#ɛ́ títí ó bàkó tɛ̀ mù. Náàsòkò nyɛ̀ŋɛ̀#ɛ́, Yèésù sũ̀, tsí sɔ̃rũ lɔ si. 25Tsí ɔmatsɛ́‐ɛ̀ ŋa sɔ́ tìmá‐ɛ̀, tsí wà dzíi, tsí wà ɖúgbe fúu ní: Ɔ̀gá! Kó gba àŋa ɖé, àŋa rá ooò.
26Tsí Yèésù dzɔ́ŋù fú ŋa ní: Kí tse tsí odzo wà tse ŋá? Àkaralé-ŋa kò wɔlɛ̀ nɛ́?
Tsí ó ǹɖe, tsí gbãdzú fefe bá awu#ɛ́ òŋu oɖò#ɛ́. Tsí ìɖì kíìɖì kpa kpó tíyɛ̃ tíyɛ̃ tíyɛ̃. 27Tsí ó mu ɔmatsɛ́‐ɛ̀ ŋa, tsí à wà fɔ̀ ní: Kpɔ̀ɔ́ dza! Ɔ̀nyà-ìrɔ́ mɛ̀ɛ́ ní títí awu òŋu oɖò gìɖì gbo, à wà mú éwo dzó fúu ná?
Edzò ŋa wà ɖɔ́kpɔ fú ɔ̀nyà méèdzì kã̀ŋa, tsí Yèésù lé edzò ŋa#á sɛ̃̀ náànyì-ŋa
(Mákò 5:1-20; Lúkà 8:26-39)
28Tsí kíbí à làkóò#ɛ́, à káà tó náàtàkè-èkéèdzì-oɖò#ɛ́ ńlɛ̀-ɛnɛ-Gàɖàrá ŋa. Kíbí Yèésù tó ńbɛ̀#ɛ́, ɔ̀nyà méèdzì kã̀ŋa wà bɛ̀, tsí edzò† ŋa wà ɖɔ́kpɔ fú ŋa. À káà wà néèkpò ŋa#8:28 Dzɔ̀ɔ́ dzɔ̀ɔ́#ɛ́, ɔma-Ìyúɖà ŋa náa ri òkú-ŋa ńnɔ́-ifò-òkúta ŋa ni. si, tsí gboró si tó bɛ́ɛ̀, títí ɔ̀nyà-kã̀ kpókpó kà nyáa fa ɔ̀nà nyɛ̀ŋɛ̀. Tsí à bɔ́ ti néèkpò ŋa#á, tsí wáa kpàɖé Yèésù, 29tsí bu igbe ta kũkũ gbòkã́, tsí wà fɔ̀ ní: Ɔma bíbí-Ɔ̀ɖáyé, kí ò wà wò fú wa ni? Ò wá, tsí o wáa mú wa réré tã́ná àsòkò-ɛdzɔ́ kpíkpè kó tó niì?
30Ńǹwèrè nyɛ̀ŋɛ̀#ɛ́, ɔ̀hà kpíkpɔ̀ kã̀ŋa gbo wà nóòtèrè fú ŋa bɛ̀, tsí wà dzɛ. 31Tsí edzò ŋa#á tsìkálɛ̀ fú Yèésù, tsí wà fɔ̀ fúu ní: Kíbí ó dzɛ́ ní ó bàkó lé àŋa ǹɖe ná#á, kó lé àŋa lɔ ká wɔ̀ ńǹtá-ɔ̀hà ŋa#á.
32Tsí Yèésù fɔ̀ fú ŋa ní: Ká ǹɖe lɔ!
Tsí à ǹɖe ńǹtá-ɔnɔkɛ̃̀ɛ̃ méèdzì ŋa#á, tsí lɔ káà wɔ̀ ńǹtá-ɔ̀hà ŋa#á. Gbòkã́ gé#ɛ́, ɔ̀hà ŋa#á kpó yáré kpìrìkpìrì ti ńǹtá-òkè yèé à wà si#ɛ́, tsí wáa lɔ káà bɔ́ sɔ nóɖò, tsí à kú kpó.
33Tsí aró-ɔ̀hà ŋa#á sá lɔ náàŋírĩ-ìlú, tsí káà fɔ iŋɛ́ yèé tse ŋa#á kpó. Iŋɛ́ yèé à tse fú ɔ̀nyà méèdzì yèé edzò ŋa wà ɖɔ́kpɔ fú#ɛ́, à fɔ òŋu gbo. 34Tsí ìlú#ɛ́ kpó fùɖá, tsí kó lɔ káà kpàɖé Yèésù. Tsí kíbí à ríi#ɛ́, à tsìkálɛ̀ fúu ní kó ǹɖe nérè-àŋa bɛ̀.
Currently Selected:
Màtéwò 8: ngl
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.