Màtéwò 19

Yèésù wà tsɛ̀kɔ́ ti nára-aya kíkɔ̀

(Mákò 10:1-12; Lúkà 16:18)

1Yèésù wíìnyɛ̀ tã́, tsí ó ǹɖe nérè-Gàlìlé, tsí lɔ nérè-Yùɖéyà nákpálà yèé wà náàtàkè-èkéèdzì-oɖò-Yòɖánì#ɛ́. 2Ɔ̀nyà ɛ̀gbɛ̀lɛ́ɛ̀gbɛ̀-kã̀ tɛ̀ náànyì‐ɛ̀ lɔ, tsí ó bɔ àkɔ̃̀rɔ̃̀ ŋa náàŋírĩ-ŋa bɛ̀.

3Ńbɛ̀ɛ́, ɔma-ɛgbɛ́-Fàrísì† kã̀ŋa sɔ́ tìmá‐ɛ̀, tsí wà wò ní àŋa kó sɔ ɔ̀kpákù fúu, tsí à wà bèrèé ní: Ɛkpa-Ɔ̀ɖáyé†#ɛ́ fee, ó fú ɔ̀nà ní ɔ̀nyà-kã̀ kó tse àtsùgbé-iŋɛ́-kã̀, tsí kɔ aya-ɛ̀ɛ̀?

4Tsí Yèésù dzɔ́ŋù fú ŋa ní: “À kò kã Ìwé-Ɔ̀ɖáyé† niì? Ó ɖi, ńǹkpìnkpìlɛ̀-ayé#ɛ́, Ɔ̀ɖáyé ɖá ɔnɔkɛ̃̀ɛ̃ òŋu ɔnɔbɛ̃̀ɛ̃.”#19:4 Ìwé-Ìkpìnkpìlɛ̀-ayé 1:27, 5:2 (Genèse 1:27, 5:2) 5Tsí ó fɔ̀ ní: “Ńnɛ̀ ní ɔnɔkɛ̃̀ɛ̃ nákó ǹɖe ńɖi-boba‐ɛ̀ òŋu ìná‐ɛ̀, tsí káà tamá-aya‐ɛ̀#ɛ́, tsí àŋa méèdzì méèdzì#ɛ́, à nákó ɖi ɔ̀nyà ɔ̀kã̀ntso#ɛ́.”#19:5 Ìwé-Ìkpìnkpìlɛ̀-ayé 2:24 (Genèse 2:24)

6Tsí Yèésù wí ró ní: Ńǹwèrè nyɛ̀ŋɛ̀#ɛ́, à kò dzɛ́ méèdzì ró, à ɖi ɔ̀kã̀ntso. Ó ɖi, iŋɛ́ yèé Ɔ̀ɖáyé tse má#á, ɔ̀nyà kó máa yaá níìkã̀ níìkã̀. 7Tsí ɔma-ɛgbɛ́-Fàrísì ŋa#á wà bèrèé ní: Kí tse ńǹkɛ̀ɛ́, tsí Mɔ̀ɔ́sè† òŋu ɖáa si fú ɔnɔkɛ̃̀ɛ̃ ní kó tse ìwé-àyídzá-kã̀ lɔ fú ɔnɔbɛ̃̀ɛ̃ tã́ná tsí kɔ̀ɔ́?#19:7 È káà kã Ìwé-Àkóro 24:1 (Deutéronome 24:1).

8Tsí Yèésù dzɔ́ŋù fú ŋa ní: Kíbí ɛ̀ɖɔ̃̀ kã̀ ŋá tó gbà#á ní tse tsí Mɔ̀ɔ́sè fú ŋa nɔ́ɔ̀nà ní ká wà kɔ aya#á. Ó ɖi, kò wà bɛ́ɛ̀ ńǹkpìnkpìlɛ̀-ayé#ɛ́.

9Ó ɖi òŋu, òŋu wà wí fú ŋa gbo ní: Bí aya-ɔ̀nyà-kã̀ kò sũ̀ ńɖi-ɔkɔ, tsí ɛnɛ nyɛ̀ŋɛ̀ kɔ̀ɔ́, tsí káà nɛ́ aya òmírɛ̃̀#ɛ́, ɛnɛ nyɛ̀ŋɛ̀ gbaya ni.

10Tsí ɔmatsɛ́-Yèésù† ŋa wà fɔ̀ fúu ní: Bí ó dzɛ́ ní bɛ́ɛ̀ ní ó wà ní ɔnɔkɛ̃̀ɛ̃ kó gbé fú aya‐ɛ̀#ɛ́ ná, bí ɔ̀nyà-kã̀ kò náya ni ó sã̀ fúu lárè ńnɛ̀ɛ́ nɔ̀!

11Tsí Yèésù dzɔ́ŋù fú ŋa ní: Kò tsi ɔ̀nyà kpó kó nyáa gbà si ńǹtá-ɛ̀kɔ́ yèé bɛ́ ni. Ó ɖi, ɔ̀nyà kã̀ŋa gé ní Ɔ̀ɖáyé fú ŋa ní ká nyáa gbà si ńǹtá‐ɛ̀ ɛ́. 12Ńbɛ̀ɛ́, ɔnɔkɛ̃̀ɛ̃ kã̀ŋa wà#á, à kàkó nyáa nɛ́ aya, iŋɛ́ yèé tse#ɛ́, à kò wà ire, tsí bɛ́ɛ̀ ní à bí ŋa wá#á. Ɔ̀kã̀ ŋa gbo wà bɛ́ɛ̀, iŋɛ́ yèé tse#ɛ́, à sɔ ŋá ɖà. Ó ɖi, ɔ̀kã̀ ŋa gbo kɔ̀ ní àŋa kàkó nɛ́ aya, àtsùgbé-oyè-Ɔ̀ɖáyé†. Ó ɖi, ɛnɛ yèé nákó nyáa gbà si ńǹtá-iŋɛ́ yèé òŋu fɔ̀#ɛ́ kó gbàá.

Yèésù wà wúùre fú maɖé ŋa

(Mákò 10:13-16; Lúkà 18:15-17)

13Ɔ̀nyà ŋa gbɛ̃́ maɖé ŋa wá fú Yèésù ní kó mɔ́wɔ́ lé ńǹtá-ŋa, tsí wúùre fú ŋa. Tsí ɔmatsɛ́‐ɛ̀ ŋa kɔ̀ fú ŋa ní ká máa gbɛ̃́ maɖé ŋa wá ró. 14Ó ɖi, Yèésù fɔ̀ fú ŋa ní: Ká kɔ maɖé ŋa dzɔ̀ɔ́, ká máa ɖí ɔ̀nà fú ŋa ní ká máa wá ńɖɔ̀-òŋu. Iŋɛ́ yèé tse#ɛ́, ɛnɛ yèé ŋa wà kíbí maɖé ŋa#á, àŋa ní nákó gbé nóyè-Ɔ̀ɖáyé†#ɛ́. 15Tsí Yèésù mɔ́wɔ́ lé ńǹtá-maɖé ŋa#á. Kíbí ó tse bɛ́ɛ̀ tã́#á, ó ǹɖe bɛ̀, tsí lɔ.

Ó le fú olówó ŋa ní Ɔ̀ɖáyé kó dzoyè si ńǹtá-ŋa

(Mákò 10:17-31; Lúkà 18:18-30)

16Ó ɖi nɔ́dzɔ́-kã̀, tsí ɔ̀nyà-kã̀ tìmá Yèésù, tsí bèrèé ní: Akɔ́nɛ! Kí sã̀, tsí wà ní òŋu kó tse, tsí rí àyɛ̀-àrìtã́ ná? Kó fɔ̀ɔ́ fú òŋu.

17Tsí Yèésù gbo fɔ̀ fúu ní: Kí tse tsí ó wà bere òŋu náfɔ̀ ti nára-iŋɛ́ yèé sã̀#á ná? Ó ɖi, Ɔ̀ɖáyé òŋu níìkã̀ntso gé ní sã̀#á. Tsí bí ó wà wo kó rí àyɛ̀ àrìtã́ ni kó rɛ̃̀ si nɛ́kpa-Ɔ̀ɖáyé ŋa.

18Tsí ó bere Yèésù ní: Ɛkpa yèésí ŋa?

Tsí Yèésù dzɔ́ŋù fúu ní: Máa kpa ɔ̀nyà nóòkú. Máa gbaya. Máa gbɔkɔ. Máa tsolè. Máa tsòɖòbò má ɔ̀nyà-kã̀. 19Nà nɛ́ àrísá fú boba-ɛ̀ɛ òŋu ìnà-ɛ̀ɛ. Nà nɛ́ àmúɖɔ̃̀ fú enìkéèdzì-ɛ̀ɛ kíbí nà nɛ́ fú ara-ɛ̀ɛ#ɛ́.#19:19 È káà kã Ìwé-Fúfùɖá 20:12-16, Ìwé-Àkóro 5:16-20 (Exode 20:12-16, Deutéronome 5:16-20).

20Tsí ɔmɔ̀tsɔ́#ɛ́ fɔ̀ fúu ní: Òŋu ti rɛ̃̀ si nɛ́kpa nyɛ̀ŋɛ̀ ŋa kpó. Ó ɖi, kí bɔ̀ fú òŋu, tsí òŋu kó tse ró?

21Tsí Yèésù dzɔ́ŋù fúu ní: Bí ó wà wo kó tseé dzálɛ̀ ná ni, kó lɔ káà ta iŋɛ́‐ɛ̀ ŋa kpó, tsí kó mú owó‐ɛ̀ kpɛ̃́ fú adzìyàkú ŋa. Ńbɛ̀ɛ́, nákó kpaɖí iŋɛ́-ɛ̀fɛ́ ŋa si fú ara‐ɛ̀ nɔ́ɔ̀rɔ̃. Tsí bí ó tse bɛ́ɛ̀ tã́ ni kó wáa tɛ̀ náànyì-òŋu.

22Kíbí ɔmɔ̀tsɔ́#ɛ́ gbɔ́ afɔ̀ nyɛ̀ŋɛ̀#ɛ́, ara kúu kpó, tsí ó ǹɖe bɛ̀, tsí lɔ. Iŋɛ́ yèé tse#ɛ́, iŋɛ́ lákṹ lákṹ ŋa wà nɔ́wɔ́‐ɛ̀.

23Ńbɛ̀ɛ́, Yèésù wà fɔ̀ fú ɔmatsɛ́‐ɛ̀ ŋa ní: Òŋu wà wí fú ŋa ní fee, ó le fú olówó ŋa ní Ɔ̀ɖáyé kó wáa dzoyè si ńǹtá-ŋa. 24Tsí òŋu tɔ́ wà fɔ̀ fú ŋa ró ní: Atsĩ kó gbà ńfò-abɛ́rɛ́#ɛ́ kò le tó olówó-kã̀ kó wɔ̀ lɔ nóyè-Ɔ̀ɖáyé†.

25Tsí kíbí ɔmatsɛ́-Yèésù† ŋa gbɔ́ afɔ̀ nyɛ̀ŋɛ̀ ɛ́, ó mù ŋá héŋú, tsí à wà fɔ̀ ní: Tsí nɛ̀ɛ́ nákó rí ɔlà ńǹkɛ̀ɛ́ ni?

26Tsí Yèésù wà wò ŋá kokoko, tsí wà fɔ̀ fú ŋa ní: Ɔ̀nyà kàkó nyáa tseé. Ó ɖi, Ɔ̀ɖáyé òŋu nákó nyáa tse ɔ̀kã̀lɔ́ɔ̀kã̀ kpó.

27Tsí Òkúta gboŋù ńǹkɛ̀ɛ́, tsí wà fɔ̀ fú Yèésù ní: Kó rí gé! Àŋa òŋu, àŋa kɔ iŋɛ́ ɔ̀kã̀lɔ́ɔ̀kã̀ kpó dzɔ̀ɔ́, tsí waà tɛ̀ náànyì‐ɛ̀. Báàyí#ɛ́ fe, bí nákó wáa lɔ fú àŋa gbà fáà?

28Tsí Yèésù fɔ̀ fú ŋa ní: Òŋu wà wí fú ŋa ní fee, ńnɔ́-ayé titɔ̃ yèé Ɔ̀ɖáyé bàkó wáa tse#ɛ́, òŋu, Ɛnɛ yèé ɔ̀nyà bí#ɛ́†, òŋu nákó wáa dzokó náàntã̀-oyè-òŋu òŋu iyì. Ńǹwèrè nyɛ̀ŋɛ̀#ɛ́, àŋa máàméèdzì yèé gbo tɛ̀ náànyì-òŋu#ɛ́, àŋa gbo, à nákó dzokó náàntã̀-oyè kã̀kã̀, tsí wà kpɛdzɔ́ fú aro máàméèdzì-ɔma-Ìsàràyɛ́lì† ŋa#á. 29Tsí ɔ̀nyà kpó yèé nákó tse àtsùgbé-òŋu, tsí kɔ ilé òŋu ìnàbí dzɔ̀ɔ́ nàmí kɔ boba òŋu ínà dzɔ̀ɔ́ nàmí kɔ ɔma ŋa òŋu oko gbo dzɔ̀ɔ́#ɛ́, ɛnɛ nyɛ̀ŋɛ̀ nákó rí òlárèbɛ́ɛ̀, tsí nákó wáa rí àyɛ̀-àrìtã́ gbo máa. 30Ó ɖi, ɔ̀nyà kpíkpɔ̀ dzɛ́ ɛnɛ-iwá ŋa si báàyí, tsí à nákó wáa ɖi ɛnɛ-ànyì ŋa, tsí ɔ̀nyà kpíkpɔ̀ gbo dzɛ́ ɛnɛ-ànyì ŋa, tsí ɛnɛ yèé ŋa dzɛ́ ɛnɛ-ànyì ŋa#á, à nákó wáa ɖi ɛnɛ-iwá ŋa.

Currently Selected:

Màtéwò 19: ngl

Highlight

Copy