Lúkà 3

Yòhánà Awɛ̀fúnɛ wà dzíkɔ̀-Ɔ̀ɖáyé fúnɛ

(Màtéwò 3:1-12; Mákò 1:1-8; Yòhánà 1:19-28)

1Ɔ̀nyà-kã̀ wà, tsí à náa kpèé ní Tìbèríyà, tsí ó dzɛ́ ɔ̀gã́-ìdzɔba ńlɛ̀-Rómà† wáa lɔ. Ńǹwèrè yèé ó wà tse ɔɖɔ̃́ mɛ́ɛɖógú náàntã̀#á, Yòhánà† ɔma-Sàkàríyà gbo wà si ńǹwèrè nyɛ̀ŋɛ̀. Tsí ɛnɛ yèé dzɛ́ kɔ̀màɖã́ã̀ si nérè-Yùɖéyà#á, à náa kpe òŋu gbo ní Kpɔ̃̀tíyù Kpìlátò†. Tsí ólú-erè-Gàlìlé gbo dzɛ́ Èróɖì†. Ìfó‐ɛ̀ Fìlíkpò gbo dzɛ́ ólú ńlɛ̀-Ìtùré òŋu erè-Tìràkònítì, tsí Lìsàní gbo dzɛ́ ólú ńlɛ̀-Àbìlɛ́nì. 2Tsí Hánà òŋu Kàyáfà gbo dzɛ́ ɔ̀gã́-atsɛbɔ-Ɔ̀ɖáyé ŋa† si ńǹwèrè nyɛ̀ŋɛ̀.

Náàsòkò nyɛ̀ŋɛ̀#ɛ́, Yòhánà ɔma-Sàkàríyà wà nɔ́ɔ̀ɖã̀ si, tsí Ɔ̀ɖáyé kpèé, tsí mú afɔ̀‐ɛ̀ bɔwɔ́‐ɛ̀. 3Kíbí ó gbɔ́ afɔ̀-Ɔ̀ɖáyé#ɛ́, ó ǹɖe, tsí lɔ nétí-oɖò-Yòɖánì, tsí ó rɛ̃̀ wérí erè-ìyabɛ̀ kpó, tsí wà dzíkɔ̀-Ɔ̀ɖáyé làkóò. Náa wà fɔ̀ fú ɔ̀nyà ŋa ní: Ká nyíìlò kpaɖà, tsí òŋu kó wɛ̀† fú ŋa, tsí Ɔ̀ɖáyé kó mú àbi-ŋa tɔrɛ fú ŋa.

4Tsí iŋɛ́ ŋa#á lɔ bɛ́ɛ̀ kíbí Yèsáyà† agbáfɔ̀-Ɔ̀ɖáyé fɔ̀† ti fɔ̀ si, tsí ti kɔɔ́ si ńǹwé‐ɛ̀ gbo#ɛ́. Ó wíìnyɛ̀ ti nára-Yòhánà#á ní:

“Oŋù-ɔ̀nyà-kã̀ wà ɖɔ̃́ nɔ́ɔ̀ɖã̀,

tsí wà ɖúgbe ní:

È tɔ́tse ɔ̀nà si fú Ɔlɔ́dzɔ́.

È tɔ́ ɔ̀nà sísɛ̃́ ŋa si fúu.

5Ó wà ní ɔ̀gbɔ̃ ŋa kpó ká rɛ̃́ɖí,

tsí òkè ŋa gbo kpó ká rɛbɔ̀.

Ɔ̀nà titɔ̃ ŋa kó sɛ̃́,

tsí ifò-odzú-ɔ̀nà ŋa gbo kó rɛ̃́ ɖí kpó.

6Ńbɛ̀ɛ́, ɔ̀nyà ŋa kpó nákó rí

kíbí Ɔ̀ɖáyé náa gbanɛ là#á.”#3:6 Ìwé-Yèsáyà 40:3-5 (Ésaïe 40:3-5)

7Tsí ɔ̀nyà ŋa wá ńɖi-Yòhánà kpíkpɔ̀, tsí à wà wí fúu ní kó wɛ̀ fú àŋa. Tsí náa wà wí fú ŋa ní: Ɔma-edzò ŋa! Ɔ̀ɖáyé bàkó wáa kpɛdzɔ́, tsí nɛ̀ɛ́ wí fú ŋɛ́ ní è nákó nyáa bɔ́ ńnɛ̀? 8Fee, ìrɛ̃̀-ɛsɛ̀-ŋɛ́ ŋa òŋu ìnyɛ̀-arũ-ŋɛ́ ŋa kó nyà ɖíre ní è nyíìlò kpaɖà. Ó ɖi, è máa dzokó si, tsí wà fɔ̀ ńnɔ́-ara-ŋɛ́ ŋa ní Àbàràhámì† dzɛ́ gbágbóǹgbàgbò-àŋa gé, ni àŋa nákó rí ɔlà. Ǹ wà wí fú ŋɛ́ ní òkúta yèé è wà rí bɛ́ ŋa#á, Ɔ̀ɖáyé nákó nyáa sɔ ŋá ɖi ɔmalɔ́ma fú Àbàràhámì. 9Báàyí gìɖì#ɛ́, ó ti lɔ ɛɖɔ̃̀ si ná, tsí kó ń wɔ̀ bá ogùgù-egi ŋa. Egi kí egi yèé kò wà so èso-ire#ɛ́, à nákó rɛ́ɛ, tsí kɛ́ɛ sɔ ńná.

10Tsí kíbí ó wà wíìnyɛ̀ bɛ́ɛ̀#ɛ́, ɔ̀nyà ŋa náa wà bèrèé ní: Kí wà ní àŋa kó tse báàyí?

11Tsí náa wà dzɔ́ŋù fú ŋa ní: Bí ìwɔ-kã̀, ò nɛ́ ìwɔ̀ra méèdzì, tsí ɔ̀nyà-kã̀ kò nɛ́, nà mú ɔ̀kã̀ fúu. Bí dzídzɛ wà fɛ́ɛ, tsí kò wà fú ɔ̀nyà-kã̀ òŋu, nà fúu.

12Tsí agbalómbà ŋa gbo wá ńɖi-Yòhánà, tsí à wà wò ní kó wɛ̀ fú àŋa, tsí à wà bèrèé ní: Akɔ́nɛ, kí wà ní àŋa kó tse?

13Tsí náa wà dzɔ́ŋù fú àŋa gbo ní: Ká máa gbowó kpèlé. Ká máa gbà láre ìmarũ yèé à wí fú ŋa ní ká gbà#á.

14Sɔ́dzà ŋa gbo náa wá ńɖɔ̀‐ɛ̀, tsí à náa wà bèrèé ní: Kí wà ní àŋa gbo, àŋa kó tse?

Tsí náa wà dzɔ́ŋù fú àŋa gbo ní: Ká máa gba iŋɛ́ ńkpá nɔ́wɔ́-ɔ̀nyà ŋa. Ká máa tsòɖòbò má ɔ̀nyà ŋa gbo, tsí gbowó nɔ́wɔ́-ŋa. Ìmarũ-owó-òtsùkpá kã̀kã̀ yèé à wà dzɛ#ɛ́, ó wà ní kó tó ŋa.

15Tsí odzú-ɔ̀nyà ŋa wà nɔ́ɔ̀nà si kpó ní Ɔ̀ɖáyé nákó bɛ Kírísítò Agbanɛlà#á wá. Tsí ɛnɛ kṹnukṹ wà dzèrèbe ní bóyá Yòhánà ní dzɛ́ Agbanɛlà#á.

16Tsí Yòhánà náa wà wí fú àŋa kpó ní: Òŋu, òŋu wà wɛ̀ fúnɛ òŋu omi ni. Ó ɖi, ɔ̀nyà-kã̀ nákó wáa wá, tsí nɛ́kpá láre òŋu, tsí òŋu kò dzɔ òŋu kó tú okù-kpákò‐ɛ̀ gìɖì. Ɛnɛ nyɛ̀ŋɛ̀ ní nákó tse tsí Mímí-Ɔ̀ɖáyé† òŋu iná‐ɛ̀ nákó tì wɔ̀ ńǹtá-ŋa#á. 17Ó banɛ́ iŋɛ́ yèé à náa ń fɛ́ iŋɛ́#ɛ́ si, tsí kó ń fɛ́ ɔma dzídzɛ, tsí kó kpaɖí‐ɛ̀ ɖà náàká. Tsí nákó tãná-kã̀ gú nyàngbò‐ɛ̀, iná-ìrɔ́ nyɛ̀ŋɛ̀#ɛ́ kà kú láyé.

18Bɛ́ɛ̀ ní ó wà tsɛ̀kɔ́ fú ɔ̀nyà ŋa, tsí wà dzíkɔ̀ ɖíɖɔ̃̀-kã̀ fú ŋa#á. Ó wíìnyɛ̀ kpíkpɔ̀ fú ŋa, tsí wà ɖíre ɛ̀kɔ́ kã̀ŋa gbo máa fú ŋa.

19Èkéèdzì‐ɛ̀#ɛ́, Yòhánà bá ólú Èróɖì gbo fɔ̀. Iŋɛ́ yèé tse#ɛ́, ó gba Èròɖíyà, tsí ń nɛ́. Èròɖíyà#á, aya-ìfó-Èróɖì ní ó dzɛ́#ɛ́. Tsí ó tse bɛ́ɛ̀ tã́, tsí tɔ́ wà tse íbàɖí ŋa máa ró. 20Tsí kíbí Yòhánà wà báa fɔ̀#ɛ́, àríkɛ̀ɛ́ gìɖì ó tɔ́ tse íbàɖí yèé lárè bɛ́ɛ̀#ɛ́ ńnɛ̀ɛ́. Òŋu ní dzɛ́ ní ó wáa múu lɔ káà si nɛ́ɛ̀ŋà.

Yòhánà wɛ̀ fú Yèésù

(Màtéwò 3:13-17; Mákò 1:9-11)

21Ńǹwèrè nyɛ̀ŋɛ̀ ŋa#á, Yòhánà† náa wà wɛ̀† fú ɔ̀nyà ŋa làkóò ni, tsí ó wɛ̀ fú Yèésù gbo. Kíbí ó wɛ̀ fúu tã́#á, Yèésù wà wúùre. Gbòkã́#á, ɔ̀rɔ̃ tsí, 22tsí Mímí-Ɔ̀ɖáyé† tì ti nɔ́ɔ̀rɔ̃ wá ńǹwànwà-àlúǹkùkù bɛ́, tsí wáa dzì ńǹtá‐ɛ̀.

Ńbɛ̀ɛ́, oŋù-Ɔ̀ɖáyé ɖɔ̃́ ti nɔ́ɔ̀rɔ̃, tsí wà fɔ̀ ní: Ìwɔ ní dzɛ́ Ɔma bíbí-mi#ɛ́, tsí ò dzɛ́ àrínódzú-mi gbo, tsí iŋɛ́-ɛ̀ɛ dzɔdzú-mi héŋú.

Gbágbóǹgbàgbò-Yèésù ŋa

(Màtéwò 1:1-17)

23Tsí Yèésù ǹɖe, tsí kpé itsɛ́‐ɛ̀ ŋa si ńnɛ̀. Náàsòkò nyɛ̀ŋɛ̀#ɛ́, ó nɛ́ ɔɖɔ̃́ kíbí ɔgbã̀wó bɛ́. Tsí ɔ̀nyà ŋa ɖédzú ɔma-Yòsɛ́fù† ní ó dzɛ́#ɛ́.

Yòsɛ́fù#ɛ́, ɔma-Èlí ní ó dzɛ́#ɛ́, 24tsí Èlí gbo dzɛ́ ɔma-Màtá, tsí Màtá gbo dzɛ́ ɔma-Lèfí, tsí Lèfí gbo dzɛ́ ɔma-Mɛ̀kí, tsí Mɛ̀kí gbo dzɛ́ ɔma-Yánà, tsí Yánà gbo dzɛ́ ɔma-Yòsɛ́fù.

25Tsí Yòsɛ́fù gbo dzɛ́ ɔma-Màtàtíyà, tsí Màtàtíyà gbo dzɛ́ ɔma-Àmɔ́sì, tsí Àmɔ́sì gbo dzɛ́ ɔma-Nàhúmù, tsí Nàhúmù gbo dzɛ́ ɔma-Èsílì, tsí Èsílì gbo dzɛ́ ɔma-Nágà.

26Tsí Nágà gbo dzɛ́ ɔma-Màhátì, tsí Màhátì gbo dzɛ́ ɔma-Màtàtíyà, tsí Màtàtíyà gbo dzɛ́ ɔma-Sɛ̀mɛ̀yí, tsí Sɛ̀mɛ̀yí gbo dzɛ́ ɔma-Yòsɛ́fù, tsí Yòsɛ́fù gbo dzɛ́ ɔma-Yóɖà.

27Tsí Yóɖà gbo dzɛ́ ɔma-Yòhánà, tsí Yòhánà gbo dzɛ́ ɔma-Résà, tsí Résà gbo dzɛ́ ɔma-Sòròbàbɛ́lì, tsí Sòròbàbɛ́lì gbo dzɛ́ ɔma-Sàlàtìyɛ́lì, tsí Sàlàtìyɛ́lì gbo dzɛ́ ɔma-Nèrí.

28Tsí Nèrí gbo dzɛ́ ɔma-Mɛ̀kí, tsí Mɛ̀kí gbo dzɛ́ ɔma-Àɖí, tsí Àɖí gbo dzɛ́ ɔma-Kòsámù, tsí Kòsámù gbo dzɛ́ ɔma-Èlàmàɖámù, tsí Èlàmàɖámù gbo dzɛ́ ɔma-Èrí.

29Tsí Èrí gbo dzɛ́ ɔma-Yòsúwà, tsí Yòsúwà gbo dzɛ́ ɔma-Èlíyèsɛ́rì, tsí Èlíyèsɛ́rì gbo dzɛ́ ɔma-Yòrímì, tsí Yòrímì gbo dzɛ́ ɔma-Màtá, tsí Màtá gbo dzɛ́ ɔma-Lèfí.

30Tsí Lèfí gbo dzɛ́ ɔma-Sìmɛ̀yɔ́nì, tsí Sìmɛ̀yɔ́nì gbo dzɛ́ ɔma-Yúɖà, tsí Yúɖà gbo dzɛ́ ɔma-Yòsɛ́fù, tsí Yòsɛ́fù gbo dzɛ́ ɔma-Yònánì, tsí Yònánì gbo dzɛ́ ɔma-Èlìyàkímì.

31Tsí Èlìyàkímì gbo dzɛ́ ɔma-Mɛ̀léyà, tsí Mɛ̀léyà gbo dzɛ́ ɔma-Mɛ̀nánì, tsí Mɛ̀nánì gbo dzɛ́ ɔma-Màtàtá, tsí Màtàtá gbo dzɛ́ ɔma-Nàtánì, tsí Nàtánì gbo dzɛ́ ɔma-Ɖàfíɖì†.

32Tsí Ɖàfíɖì gbo dzɛ́ ɔma-Yèsé, tsí Yèsé gbo dzɛ́ ɔma-Òbɛ́ɖì, tsí Òbɛ́ɖì gbo dzɛ́ ɔma-Bòwásì, tsí Bòwásì gbo dzɛ́ ɔma-Sàlá, tsí Sàlá gbo dzɛ́ ɔma-Nàsɔ́nì.

33Tsí Nàsɔ́nì gbo dzɛ́ ɔma-Àmìnàɖábù, tsí Àmìnàɖábù gbo dzɛ́ ɔma-Àrámì, tsí Àrámì gbo dzɛ́ ɔma-Èsìrónì, tsí Èsìrónì gbo dzɛ́ ɔma-Fàrɛ́sì, tsí Fàrɛ́sì gbo dzɛ́ ɔma-Yúɖà.

34Tsí Yúɖà† gbo dzɛ́ ɔma-Yàkúbù†, tsí Yàkúbù gbo dzɛ́ ɔma-Ìsákà†, tsí Ìsákà gbo dzɛ́ ɔma-Àbàràhámì†, tsí Àbàràhámì gbo dzɛ́ ɔma-Térà, tsí Térà gbo dzɛ́ ɔma-Nàhórì.

35Tsí Nàhórì gbo dzɛ́ ɔma-Sèrúkù, tsí Sèrúkù gbo dzɛ́ ɔma-Ràgú, tsí Ràgú gbo dzɛ́ ɔma-Fèlɛ́kì, tsí Fèlɛ́kì gbo dzɛ́ ɔma-Èbɛ́rì, tsí Èbɛ́rì gbo dzɛ́ ɔma-Sàlá.

36Tsí Sàlá gbo dzɛ́ ɔma-Kànánì, tsí Kànánì gbo dzɛ́ ɔma-Àfàsáɖì, tsí Àfàsáɖì gbo dzɛ́ ɔma-Sɛ́mì, tsí Sɛ́mì gbo dzɛ́ ɔma-Nòwá†, tsí Nòwá gbo dzɛ́ ɔma-Làmɛ́kì.

37Tsí Làmɛ́kì gbo dzɛ́ ɔma-Mètúsàlà, tsí Mètúsàlà gbo dzɛ́ ɔma-Ènɔ́kì, tsí Ènɔ́kì gbo dzɛ́ ɔma-Yàrɛ́ɖì, tsí Yàrɛ́ɖì gbo dzɛ́ ɔma-Màhàlɛ́lì, tsí Màhàlɛ́lì gbo dzɛ́ ɔma-Kànánì.

38Tsí Kànánì gbo dzɛ́ ɔma-Ènɔ́sì, tsí Ènɔ́sì gbo dzɛ́ ɔma-Sɛ́tì, tsí Sɛ́tì gbo dzɛ́ ɔma-Áɖàmì†, tsí Áɖàmì gbo dzɛ́ Ɔma-Ɔ̀ɖáyé.

Currently Selected:

Lúkà 3: ngl

Highlight

Copy