1 Kòríntì ŋa 7

Kpɔ́lù wà dzɔ́ŋù-afɔ̀-aya òŋu ɔkɔ nínɛ́ fú ŋa

1Báàyí#ɛ́, ǹ bòkó dzɔ́ŋù fú ŋɛ́ ti nára-ìwé yèé è tse wá fú mi#ɛ́. Fee, ɔnɔkɛ̃̀ɛ̃ kó gbé náàrì nɛ́ aya#á, iŋɛ́-ire ni. 2Ó ɖi, ɔnɔkɛ̃̀ɛ̃ kó nɛ́ aya fú ara‐ɛ̀, àtsùgbée kó máa tse àlòwá. Tsí ɔnɔbɛ̃̀ɛ̃ gbo kó nɛ́ ɔkɔ fú ara‐ɛ̀, àtsùgbée òŋu gbo kó máa tse àlòwá. 3Tsí ó wà gbo ní ɔkɔ kó wà tse iŋɛ́ yèé wo odzú‐ɛ̀#ɛ́, òŋu ní dzɛ́ ní kó wà sũ̀ bá aya‐ɛ̀#ɛ́. Tsí aya gbo kó wà tse iŋɛ́ yèé wo odzú‐ɛ̀#ɛ́, òŋu ní dzɛ́ ní òŋu gbo kó wà sũ̀ ńɖi-ɔkɔ‐ɛ̀#ɛ́. 4Ara-aya kò dzɛ́ tòŋu níìkã̀ sɔ̃́ŋú gé. Ó ɖi, ó dzɛ́ ti ɔkɔ‐ɛ̀ si ni. Tsí ara-ɔkɔ gbo, kò dzɛ́ tòŋu níìkã̀ sɔ̃́ŋú gé. Ó dzɛ́ ti aya‐ɛ̀ gbo si ni. 5Ɔ̀nyà-kã̀ kó máa tã́ enìkéèdzì‐ɛ̀ ní òŋu kàkó fúu nára-òŋu. Ó ɖi, bí ó dzɛ́ ní è wò ní àŋa kó kɛ́ ìwèrè ìmarũ-kã̀, tsí àŋa kó ń wúùre ná, ɛ̀ŋɛ méèdzì méèdzì#ɛ́ kpó, è nákó nyáa kpaá, tsí làá ní àŋa kàkó wà sũ̀ bá ara-àŋa. Bí ìwèrè nyɛ̀ŋɛ̀ tã́, è náa kpé sṹsũ̀. Bí kò tsi bɛ́ɛ̀, bóyá è kàkó nyáa mú ara-ŋɛ́ si làkóò làkóò, tsí Ètsù† nákó wáa ɖã́ ŋɛ́ wò. 6Ó ɖi, afɔ̀ yèé ǹ wà fɔ̀#ɛ́, ǹ wà fú ŋɛ́ nɔ́ɔ̀nà ti nára-iŋɛ́ yèé è nákó tse#ɛ́ ni. Kò tsi ɛkpa ní ó dzɛ́, tsí ǹ wà ɖá fú ŋɛ́#ɛ́. 7Fee, ǹ wò ní ɔ̀nyà kpó má gbé kíbí èmi ká-mi ǹ gbé si#ɛ́. Ó ɖi, Ɔ̀ɖáyé sì fúnɛ ńkpá ŋa ńǹrɔ́ǹrɔ́ kṹnukṹ òŋu tɛ̀ɛ̀. Ó fú ɔ̀nyà kã̀ŋa ní ká gbé náàkpã́. Ó ɖi, kò fú ɔ̀nyà kpó ní kó gbé bɛ́ɛ̀.

8Ǹ wà fɔ̀ fú ɔnɔkɛ̃̀ɛ̃ yèé kò nɛ́ aya si ŋa#á òŋu ɔnɔbɛ̃̀ɛ̃ yèé ŋa dzɛ́ okpó si#ɛ́ ní fee, bí à gbé kíbí èmi gbo ǹ gbé si#ɛ́, nákó sã̀ fú ŋa. 9Ó ɖi, bí ó dzɛ́ ní à kàkó nyáa mú ara-ŋa si làkóò làkóò#ɛ́, kṹnukṹ kó nɛ́ aya, tsí kṹnukṹ kó nɛ́ ɔkɔ. Iŋɛ́ yèé tse#ɛ́, bí à tse bɛ́ɛ̀, nákó sã̀ fú ŋa láre ká gbé bɛ́ɛ̀ si, tsí kó wà wù ŋá fùlùfùlù ní àŋa kó sũ̀ bá ɔnɔbɛ̃̀ɛ̃ nàmí àŋa kó sũ̀ ńɖi-ɔkɔ.

10Ɛnɛ yèé dzɛ́ ɔkɔláya òŋu ayalɔ́kɔ si ŋa#á, ǹ wà ɖá ɛkpa-kã̀ fú àŋa gbo. Ó ɖi, ɛkpa#á kò ti ńɖɔ̀-mi, ńɖi-Ɔlá-wa ní ó ti#ɛ́. Ó ní: Aya kó máa kɔ ɔkɔ. 11Ó ɖi, bí ó sì wáa dzɛ́ ní ó kɔ ɔkɔ#ɛ́, kó kí bɛ́ɛ̀ náàrì nɛ́ ɔkɔ ró nàmí kó sɛ̃̀ wáa tɔ́tse àŋírĩ-òŋu ɔkɔ#ɛ́, tsí ká sɛ̃̀ nɛ́ ara-ŋa. Tsí ɔkɔ gbo kó máa kɔ aya.

12Ǹ wà wo n wíìnyɛ̀-kã̀ gbo fú ɛnɛ yèé ŋa nɛ́ aya si nàmí à nɛ́ ɔkɔ si, tsí aya-ŋa#á nàmí ɔkɔ-ŋa#á kò gba Yèésù gbɔ́ wòná#á. Èmi ní wà wí afɔ̀ yèé bɛ́#ɛ́, kò tsi Ɔlá-wa ni. Òŋu ní wà dzɛ́ ní fee, bí ó dzɛ́ ní ìnàbí olí-Yèésù-kã̀ wà, tsí aya‐ɛ̀ kò gba Yèésù gbɔ́ wòná, tsí aya#á gbà si ńǹtá‐ɛ̀ fúu ní òŋu nákó gbé náànkpã̀nàkũ̀‐ɛ̀ si#ɛ́, ɔkɔ#ɛ́ kó máa kɔ̀ɔ́. 13Tsí bí ó dzɛ́ ní ìnàbí olí-Yèésù-kã̀ gbo wà, tsí ɔkɔ tɛ̀ɛ̀ gbo kò gba Yèésù gbɔ́ wòná, tsí ɔkɔ#ɛ́ gbo gbà si ńǹtá‐ɛ̀ ní aya#á kó wà náànkpã̀nàkũ̀-òŋu si#ɛ́, kò wà ní aya#á gbo kó kɔ ɔkɔ#ɛ́. 14Ǹ fɔ̀ bɛ́ɛ̀, iŋɛ́ yèé tse#ɛ́, ɔkɔ yèé kò gba Yèésù gbɔ́#ɛ́ sɔ́má-Ɔ̀ɖáyé si náàtsùgbée kíbí ó tse ɔ̀kã̀ntso bá aya‐ɛ̀ si#ɛ́. Tsí aya yèé gbo kò gba Yèésù gbɔ́#ɛ́, òŋu gbo sɔ́má-Ɔ̀ɖáyé si náàtsùgbée kíbí òŋu gbo tse ɔ̀kã̀ntso bá ɔkɔ‐ɛ̀ si#ɛ́. Bí kò tsi bɛ́ɛ̀, à má fɔ̀ ní ɔma-ŋà ŋa kò dzɛ́ ti Ɔ̀ɖáyé. Ó ɖi, à sɔ́má-Ɔ̀ɖáyé si báàyí. 15Tsí bí ó sì dzɛ́ ní ɔkɔ nàmí aya yèé kò gba Yèésù gbɔ́#ɛ́ wò ní òŋu kó kɔ olí-Yèésù#ɛ́ ná, ɔ̀nà wà fúu. Bí ó wáa lɔ bɛ́ɛ̀, okù-kã̀ kò so olí-Yèésù ŋa#á si ní ńbɛ̀ gé ní à nákó gbé si#ɛ́. Iŋɛ́ yèé tse#ɛ́, Ɔ̀ɖáyé kpè ŋɛ́ ní ɛ̀ŋɛ kó gbé ńtútùúrɔ̀ ni. 16Ìwɔ aya yèé dzɛ́ olí-Yèésù#ɛ́, bóyá Ɔ̀ɖáyé nákó nyáa tse àtsùgbée tɛ̀ɛ, tsí gba ɔkɔ‐ɛ̀ɛ là báàyí ò kò mà? Tsí ìwɔ ɔkɔ yèé gbo dzɛ́ olí-Yèésù#ɛ́ fe, bóyá Ɔ̀ɖáyé nákó nyáa tse àtsùgbé-tɛ̀ɛ gbo, tsí gba aya-ɛ̀ɛ là báàyí ìwɔ gbo ò kò mà nɛ́.

17Ńǹwèrè yèé Ɔ̀ɖáyé kpè wá ní àa kó dzɛ́ tòŋu#ɛ́, Ɔlá-wa ti kpɛ̃́ ńǹrɔ́-kíbí kṹnukṹ nákó gbé gbà#á, tsí ń bɔwɔ́‐ɛ̀. Ńbɛ̀ɛ́, kṹnukṹ kó gbé bɛ́ɛ̀. Afɔ̀ yèé bɛ́#ɛ́ dzɛ́ afɔ̀-kã̀, tsí ɛ̀kɔ́‐ɛ̀ ní mà wà tse fúnɛ nɛ́gbɛ́-Kírísítò ŋa gbo kpó#ɛ́. 18Bí ɔ̀nyà-kã̀ wà, tsí à ti ɖákó† fúu tã́ná Ɔ̀ɖáyé kó kpèé ní kó dzɛ́ tòŋu, ó wà ní ɛnɛ nyɛ̀ŋɛ̀ kó kí bɛ́ɛ̀. Bí ɔ̀nyà-kã̀ gbo wà, tsí kò ɖákó tã́ná Ɔ̀ɖáyé kpèé ní kó dzɛ́ tòŋu#ɛ́, kò wà ní ɛnɛ nyɛ̀ŋɛ̀ gbo kó ɖákó ró. 19À ɖákó fɛ́ɛɛ̀? À kò ɖákó fɛ́ɛɛ̀? Kò tsi òŋu ní kpã́dzú#ɛ́. Iŋɛ́ yèé kpã́dzú#ɛ́ gé ní dzɛ́ ní ká tse si nóŋù-Ɔ̀ɖáyé#ɛ́.

20Ńǹrɔ́-kíbí kṹnukṹ ti wà si tã́ná Ɔ̀ɖáyé kó kpèé ní kó dzɛ́ tòŋu#ɛ́, kṹnukṹ kó gbé bɛ́ɛ̀. 21Bí ó dzɛ́ ní arú ní ò dzɛ́ si tã́ná Ɔ̀ɖáyé kpèɛ́ ní ìwɔ kó dzɛ́ tòŋu#ɛ́, máa tsí arũ. Ó ɖi, bí ó wáa dzɛ́ ní ɔ̀nà-kã̀ tsí fɛ́ɛ, tsí olówó-ɛ̀ɛ kɔ̀ɛ́ dzɔ̀ɔ́, tsí ò kí nɔ́wɔ́-ara-ɛ̀ɛ ná, nà tse tsí kó nɛ́ èrè fɛ́ɛ. 22Ó ɖi, bí arú-kã̀ wà, tsí Ɔlá-wa kpèé ní kó dzɛ́ tòŋu#ɛ́, ɛnɛ nyɛ̀ŋɛ̀ kò dzɛ́ arú si nódzú-Ɔlá-wa ró. Tsí bí ɔ̀nyà-kã̀ wà, tsí ɛnɛ nyɛ̀ŋɛ̀ òŋu kò dzɛ́ arú, tsí Kírísítò Ɔlá-wa kpèé ní kó dzɛ́ tòŋu#ɛ́, ɛnɛ nyɛ̀ŋɛ̀ òŋu ɖi arú fú Kírísítò ni. 23Owó geregere ní Ɔ̀ɖáyé kɛ́, tsí ń rà ŋɛ́ ní ɛ̀ŋɛ kó dzɛ́ tòŋu#ɛ́. Kíbí ó dzɛ́ bɛ́ɛ̀#ɛ́, è máa ɖi arú fú ɔ̀nyà ŋa. 24Ìnàbí-mi ŋa, ńǹrɔ́-kíbí è ti wà si ńǹwèrè yèé Ɔ̀ɖáyé kpè ŋɛ́ ní ɛ̀ŋɛ kó dzɛ́ tòŋu#ɛ́, è gbé bɛ́ɛ̀ si nódzú-Ɔ̀ɖáyé.

Kpɔ́lù wà wíìnyɛ̀ fú ɛnɛ yèé kò nɛ́ aya si ŋa#á òŋu ɛnɛ yèé kò nɛ́ ɔkɔ si ŋa#á

25Ǹ bòkó wíìnyɛ̀-kã̀ fú ɛnɛ yèé kò nɛ́ aya si ŋa#á òŋu ɛnɛ yèé kò nɛ́ ɔkɔ si ŋa#á gbo. Ɔlá-wa kò ɖá ɛkpa-kã̀ si ti nára-afɔ̀ yèé bɛ́ gbo bɛ́, tsí n ń bɔwɔ́-ŋɛ́. Ó ɖi, kíbí ó rí ànyínɔ́ fú mi, tsí à nákó nyáa karalé si ńǹtá-mi#ɛ́, màa fú ŋɛ́ ńfɛ̀ɛ́nɔ́-kã̀.

26Ti nára-bɛ́ɛ̀#ɛ́, ń tèmi òŋu, ɔ̀nyà kó gbé bɛ́ɛ̀ náàrì nɛ́ aya nàmí náàrì nɛ́ ɔkɔ#ɛ́, iŋɛ́-ire ni. Ǹ fɔ̀ bɛ́ɛ̀, àtsùgbé-òfò yèé wà si báàyí#ɛ́ ni. 27Ńbɛ̀ɛ́, bí ò nɛ́ aya si ná, máa wò ní òŋu kó kɔ̀ɔ́. Tsí bí ò kò sì nɛ́ aya gbo si, máa wò ní òŋu kó nɛ́. 28Ó ɖi, bí ò nɛ́ aya, ò kò dzàbi-Ɔ̀ɖáyé. Tsí bí èkíɖã-kã̀ gbo nɛ́ ɔkɔ#ɛ́, òŋu gbo kò dzàbi-Ɔ̀ɖáyé. Ó ɖi fee, òfò kpíkpɔ̀ nákó wá náyé-ɔkɔláya ŋa òŋu ayalɔ́kɔ ŋa. Èmi òŋu, ǹ wà wò ní e bɔ́ nɔ́wɔ́-òfò-ìrɔ́-bɛ́ɛ̀ ŋa gé ni.

29Ìnàbí-mi ŋa, ìwèrè yèé bɔ̀#ɛ́ kò kpɔ̀ si ró. Ńbɛ̀ɛ́, ńnɔ́-ìwèrè yèé bɔ̀ si#ɛ́, ɛnɛ yèé nɛ́ aya si ŋa#á, ó wà ní ká gbé kíbí ɛnɛ yèé fɔ̀ ní à kò nɛ́ aya si bɛ́, 30tsí ɛnɛ yèé wà sɔkṹ ŋa gbo#ɛ́, àŋa gbo ká gbé kíbí ɛnɛ yèé fɔ̀ ní à kò wà sɔkṹ bɛ́. Tsí ɛnɛ yèé wà ɖáàgbáàrĩ́ ŋa gbo#ɛ́, àŋa gbo ká gbé kíbí ɛnɛ yèé fɔ̀ ní iŋɛ́-àrĩ́-kã̀ kpókpó kò wà tse ŋá bɛ́. Tsí àràdzà ŋa gbo, àŋa gbo ká gbé kíbí ɛnɛ yèé fɔ̀ ní adzà yèé à wà rà#á kò dzɛ́ tiŋa bɛ́, 31tsí ɛnɛ yèé ŋa gbo náa wà lo iŋɛ́-ayé yèé ŋa nyí#ɛ́, àŋa gbo ká gbé kíbí ɛnɛ yèé fɔ̀ ní à kò wà lo iŋɛ́ ŋa#á bɛ́. Iŋɛ́ yèé tse#ɛ́ fee, ayé ńbí àa wà si báàyí#ɛ́ kàkó wà si títí lɔ, nákó wáa tã́.

32Tsí ǹ kò wà wò ní ìsérè kó lárè ŋɛ́ si. Ɛnɛ yèé kò nɛ́ aya si#ɛ́, itsɛ́-Ɔlá-wa tsítse náa kpã́ã nódzú si, tsí bí kó tse fáà, tsí kó dzɔdzú‐ɛ̀#ɛ́ gé ní náa wà wò#ɛ́. 33Ó ɖi, ɛnɛ yèé nɛ́ aya si#ɛ́ òŋu, iŋɛ́-ayé yèé ŋa tsítse ní náa kpã́ã nódzú si#ɛ́, tsí bí kó tse fáà, tsí kó dzɔdzú-aya‐ɛ̀#ɛ́ ní òŋu gbo náa wà wò#ɛ́, 34tsí ìsérè‐ɛ̀ gbo náa kpɛ̃́ méèdzì si. Bí ɔnɔbɛ̃̀ɛ̃-kã̀ wà nàmí èkíɖã-kã̀ gbo wà, tsí kò nɛ́ ɔkɔ si#ɛ́, itsɛ́-Ɔlá-wa tsítse ní náa kpã́ã nódzú si#ɛ́, tsí náa wò ní òŋu kó dzɛ́ tɛ̀ɛ̀ kpó akpá akpá, ɛsɛ̀ ɛsɛ̀. Ó ɖi, ɔnɔbɛ̃̀ɛ̃ yèé nɛ́ ɔkɔ si#ɛ́, iŋɛ́-ayé yèé ŋa tsítse ní náa kpã́ òŋu gbo nódzú si#ɛ́, tsí bí òŋu gbo kó tse fáà, tsí kó dzɔdzú ɔkɔ‐ɛ̀#ɛ́ ní náa wà wò#ɛ́. 35Ǹ wà fɔ afɔ̀ yèé bɛ́, àtsùgbée kó dzɛ́ ire fú ɛ̀ŋɛ ká-ŋɛ́ ni. Kò tsi ní ǹ wà fɔ̀ bɛ́ɛ̀, tsí wà ń mú ŋɛ́ ńkpá ní bɛ́ɛ̀ gé ní ó wà ní e tse#ɛ́. Kà kàa bɛ́ɛ̀, ǹ wà wò ní e wà tse iŋɛ́ yèé sã̀#á, tsí e mú ara-ŋɛ́ bɔ̀ ńtsɛ́-Ɔlá-wa dzálɛ̀ kpó, tsí e tamá‐ɛ̀ si kpátíláá ni.

36Ká fɔ̀ ní ɔ̀nyà-kã̀ wà ɖíìgbã̀nà-èkíɖã-kã̀. Tsí ɛnɛ nyɛ̀ŋɛ̀ rí ní bí òŋu kò yáa gbɛ̃́ɛ̃ náàbitɔ̃, ni íbàɖí ní òŋu wà tse nára‐ɛ̀#ɛ́, tsí ó rí gbo ní òŋu kàkó nyáa mú ara-òŋu si ró, tsí ó wà tsèsérè gbo ní ó wà ní òŋu kó nɛ́ɛ#ɛ́, ɛnɛ nyɛ̀ŋɛ̀ kó tse iŋɛ́ yèé sã̀ ní kó tse#ɛ́. Ó ɖi, kó nɛ́ɛ kíbí à náa nɛ́ aya gìɖì gìɖì#ɛ́. Bí ó tse bɛ́ɛ̀, kò dzàbi-Ɔ̀ɖáyé. 37Ó ɖi, bí ó ɖé fú ɔnɔkɛ̃̀ɛ̃#ɛ́ òŋu ká‐ɛ̀, tsí kò dzɛ́ ní ɔ̀nyà-kã̀ ní sɔ́ɔ si ńnɛ̀#ɛ́, tsí bí ó tã́ ńnɔ́‐ɛ̀ gbo kpó ní òŋu kàkó nɛ́ èkíɖã#á, tsí òŋu ká‐ɛ̀ gbo ní wò ní òŋu kó máa ma èwò-ìgbã̀nà-òŋu#ɛ́, bí à kò nɛ́ ara-ŋa, ó tseé ire ni. 38Ńbɛ̀ɛ́, bí ɔ̀nyà-kã̀ ɖíìgbã̀nà-èkíɖã-kã̀, tsí nɛ́ɛ#ɛ́, ɛnɛ nyɛ̀ŋɛ̀ tseé ire. Ó ɖi, bí ɔ̀nyà-kã̀ gbo kò nɛ́ɛ#ɛ́, ɛnɛ nyɛ̀ŋɛ̀ gbo tɔ́ tseé ire lárè ró.

39Bí ɔnɔbɛ̃̀ɛ̃-kã̀ nɛ́ ɔkɔ si, ɛkpa yèé wà nára-aya nínɛ́#ɛ́ òŋu ɔkɔ nínɛ́#ɛ́ so òŋu ɔkɔ‐ɛ̀ méèdzì si ńǹwèrè yèé ɔkɔ#ɛ́ wà náàyɛ̀ si#ɛ́. Ó ɖi, bí ɔkɔ#ɛ́ wáa tsàrìsí#ɛ́, ɛkpa#á kò so ɔnɔbɛ̃̀ɛ̃#ɛ́ si ró. Ńbɛ̀ɛ́, ɔ̀nà wà fúu, tsí ɛnɛ yèé wùú ni kó nɛ́. Ó ɖi, ó wà ní ɛnɛ yèé nákó nɛ́#ɛ́ kó dzɛ́ olí-Yèésù. 40Ó ɖi, ń tèmi òŋu fee, bí ó kí bɛ́ɛ̀ náàrì nɛ́ ɔkɔ ró#ɛ́, nákó wɛ éwo-ire gìɖì héŋú ni. Tsí èmi gbo ǹ karalé si ní Mímí-Ɔ̀ɖáyé† wà ńǹtá-mi si.

Currently Selected:

1 Kòríntì ŋa 7: ngl

Highlight

Copy