1 Kòríntì ŋa 4

Adzítsɛ́-Kírísítò ŋa ní àa dzɛ́#ɛ́

1Kíbí ó dzɛ́ bɛ́ɛ̀#ɛ́, ɔ̀nyà ŋa kó wà rí wa ní àtsìtsɛ́-Kírísítò ŋa ní àa dzɛ́#ɛ́, tsí Ɔ̀ɖáyé ɖá itsɛ́-kã̀ bɔwɔ́-wa. Itsɛ́#ɛ́ ní wà dzɛ́ ní ó ti tse ètò-kã̀ ɖúkù si dzɔ̀ɔ́ dzɔ̀ɔ́, tsí ó ní àa kó wà dzíkɔ̀‐ɛ̀ fúnɛ. 2Ó ɖi, kíbí ó wà bɛ́ɛ̀#ɛ́, iŋɛ́-kã̀ wà, tsí kpã́dzú fú ɛnɛ yèé ŋa à mú si nárũ-itsɛ́-kã̀#á. Òŋu ní wà dzɛ́ ní fee, itsɛ́ yèé kṹnukṹ wà tse#ɛ́, kṹnukṹ kó tseé, tsí ɔ̀gá‐ɛ̀ kó karalé si ńǹtá‐ɛ̀. 3Ó ɖi, ń tèmi òŋu fee, è nákó nyáa kpɛdzɔ́ bá mi, tsí àkpɛ̀dzɔ́-ìtalɛ̀ bí ŋa gbo nákó nyáa kpɛdzɔ́ bá mi. Kò tsi iŋɛ́ yèé kpã́dzú fú mi#ɛ́ ńnɛ̀ɛ́. Tsí èmi ká-mi, ǹ kò wà kpɛdzɔ́-kã̀ gbo bá ara-mi. 4Ó ɖi, ɛ̀ɖɔ̃̀-mi dzokó si. Kò tsi ǹ wà fɔ̀ ní iŋɛ́ ɔ̀kã̀lɔ́ɔ̀kã̀ kpó yèé ǹ tse#ɛ́, ni ǹ kò tòtsì wòrí ní ó dzɛ́#ɛ́. Ó ɖi, itsɛ́ yèé ǹ tse#ɛ́, bí ǹ tseé ire gbo, bí ǹ kò tseé ire gbo, Ɔlá-wa ní wà kpɛdzɔ́ fú mi#ɛ́. 5Ńbɛ̀ɛ́, kò wà ní e kpɛdzɔ́-iŋɛ́-kã̀ kpókpó tsúwádzú-ìwèrè yèé Ɔlá-wa nákó wá#á. Ɔlá-wa#á ní bàkó wáa tsí atsɔ nódzú-iŋɛ́ ɔ̀kã̀lɔ́ɔ̀kã̀ kpó yèé wà nóòkùkù si#ɛ́ nɔ́dzɔ́ yèé nákó wá#á. Tsí nákó nya ìsérè yèé ɖúkù si ńnɔ́-ɔ̀nyà ŋa#á gbo si ńgbaŋgba. Nɔ́dzɔ́ nyɛ̀ŋɛ̀#ɛ́, kṹnukṹ nákó gba ényìì ńɖi-Ɔ̀ɖáyé fú iŋɛ́ yèé ó tse#ɛ́.

6Ìnàbí-mi ŋa, afɔ̀ yèé ǹ fɔ̀ wáa lɔ ŋa#á fee, ǹ wà ń tse ìsàwé ti nára-èmi Àkpòlósì méèdzì, tsí kó mɔ́wɔ́ gbè fú ŋɛ́ ni. È rí wa tse, tsí e kɔ́ŋɛ́ ti ńnɔ́‐ɛ̀, àtsùgbée e nyáa gbɔ́ òkpì-ìsàwé yèé fɔ̀ ní: “È máa wà tsèsérè kadzá iŋɛ́ yèé à ti kɔ si ńǸwé-Ɔ̀ɖáyé†#ɛ́.” Ǹ wà wò gbo ní ɔ̀kã̀-ŋɛ́-kã̀ kó máa wà kɛ́ ara‐ɛ̀. Ó ɖi, ńǹwèrè yèé è nya ara-ŋɛ́ si náànyì-ɔ̀nyà-kã̀, tsí wà rí ní ɛnɛ nyɛ̀ŋɛ̀ nyɔ̀ɔ́ láre ɛnɛ-àtíbɔ̀ ŋa#á, è wà kɛ́ ara-ŋɛ́ ńnɛ̀ɛ́. 7Ǹ ní fòò, nɛ̀ɛ́ fɛ́ɛ nɔ́ɔ̀nà, tsí ò wà tsèsérè ní òŋu láre ɛnɛ-àtíbɔ̀ ŋa, tsí òŋu nákó nyáa kpɛdzɔ́ bá ŋa ná? Kí wà nɔ́wɔ́ tɛ̀ɛ, tsí kò tsi Ɔ̀ɖáyé ní fɛ́ɛ ńnɛ̀#ɛ́? Tsí bí ó dzɛ́ ní Ɔ̀ɖáyé ní fɛ́ɛ ńŋɛ́ ɔ̀kã̀lɔ́ɔ̀kã̀ kpó#ɛ́ fe, kí tse tsí ò wà kɛ́ ara-ɛ̀ɛ bɛ́ɛ̀ kíbí ɛnɛ yèé fɔ̀ ní kò tsi iŋɛ́ fúfú, tsí ò gbàá ni ná?

8Báàyí#ɛ́, è rí ayé tã́, tsí iŋɛ́ ɔ̀kã̀lɔ́ɔ̀kã̀ kpó tsɔ̀ ŋɛ́ kũ̀ si, kò tsi bɛ́ɛ̀ɛ̀? Tsí è ti ɖi ólú gbo si kpó, tsí àwa òŋu, àa kò dzɛ́ iŋɛ́-kã̀ ró. Ó má dzɔdzú-mi ní e dzɛ́ ólú#ɛ́ bɛ́ɛ̀ ìɖéǹɖè, àtsùgbée àwa gbo, àa kó dzɛ ólú#ɛ́ bá ŋɛ́. 9Ńǹsérè-tèmi òŋu fee, àwa yèé dzɛ́ adzítsɛ́-Yèésù† ŋa#á, Ɔ̀ɖáyé mú wa si ńǹɖì-kã́ã̀nyì kã́ã̀nyì fú ɔ̀nyà kpó ni. Ó ɖi, àa wà kíbí ɛnɛ yèé ŋa à kpɛdzɔ́ fú, tsí ɖáàbi fú ŋa ní ká kpa ŋá nóòkú náàwùdzɔ bɛ́#ɛ́ ni. Iŋɛ́ yèé tse#ɛ́, ó wà kíbí àa ɖi olí-àwògbã̀ si fú ayé gbaŋgba#á kpó, adzítsɛ́-ɔ̀rɔ̃† ŋa gbo, ɔ̀nyà ŋa gbo, à ɖóro si kpó dzòò, tsí wà wò wá ńǹkɛ̀ɛ́ gé ni. 10Tsí ɔ̀nyà ŋa wà rí wa ní éwo kò sí fú wa náàtsùgbée kíbí àa dzɛ́ adzítsɛ́-Kírísítò ŋa#á. Ó ɖi ɛ̀ŋɛ òŋu, ɛ̀ŋɛ ní dzɛ́ olí-ifɛ̀ɛ́nɔ́ si tó bɛ́ɛ̀#ɛ́, iŋɛ́ yèé tse#ɛ́, Kírísítò tse ɔ̀kã̀ntso bá ŋɛ́ si, kò tsi bɛ́ɛ̀ɛ̀? Tsí à wà rí wa ní àa kò le nɔ́Ɔ̀ɖáyé sísɛ̃̀. Ó ɖi, ɛ̀ŋɛ òŋu, è le tó bɛ́ɛ̀. Tsí ɔ̀nyà ŋa náa wà bu ìɖì si fú ŋɛ́. Ó ɖi, àwa òŋu, àa kò tì dzɔ iŋɛ́-kã̀ kpókpó nódzú-ɔ̀nyà-kã̀. 11Títí wáa fú báàyí#ɛ́, ebi ńnɔ́, àŋgbɛ̃ nɔ́ɔ̀gɔ̃̀rɔ̃̀ ní àa wà si#ɛ́. Àwù kà dzɔ ìwɔ̀ra nára-wa, tsí à náa wà tse íbàɖí bá wa gbo. Tsí àa náa wà tsí wérí gbo gé náàrì nɛ́ ìɖìgbé. 12Tsí àa náa múgírí si kũkũ, tsí wà tsitsɛ́ nɔ́wɔ́-ara tàwa ká-wa. Ɔ̀nyà ŋa náa wà bú wa, tsí àwa òŋu, àa náa bere kùsɛ̀ɛ̀-Ɔ̀ɖáyé fú ŋa. À náa tsoró bá wa bɛ́ tsɛ̃̀ɛ̃̀, tsí àa náa gbódzú, tsí tɔ́wɔ́ gbàá. 13Ɔ̀nyà ŋa náa wà wíìnyɛ̀-íbàɖí nára-wa, tsí àwa òŋu, àa náa mú oŋù-abo, tsí wà ń ɖáàmí le ŋá. Àa ɖà kíbí gugurɛ̃́ bɛ́, tsí ɖi iŋɛ́ gbígbɛ̃ɛ̃́rĩ́ kpɔ́tɔ́kpɔ́tɔ́ yèé ayé gbaŋgba#á kpó gbã etí‐ɛ̀ si#ɛ́. Bɛ́ɛ̀ ní à wà rí wa títí wáa fú báàyí#ɛ́.

14Ó ɖi, iŋɛ́ yèé ǹ wà kɔ fú ŋɛ́ bɛ́#ɛ́, ǹ kò wà kɔɔ́, tsí n ń ɖánɔ́ mú ŋɛ́. Ó ɖi, ǹ wà kɔɔ́, tsí n ń kã́rã́ ɛ̀ŋɛ yèé dzɛ́ ɔma-àrínódzú-mi ŋa#á ni. 15Tsí bí ó dzɛ́ ní agbɛ̃́nɛ yèé ŋa wà gbɛ̃́ ŋɛ́ nɔ́ɔ̀nà-Kírísítò#ɛ́ kpɔ̀ gbɛ̃̀ɛ̃̀ gìɖì fee, boba ɔ̀kã̀ntso gé ní wà fú ŋɛ́#ɛ́, kò tó méèdzì. Tsí èmi ní ɖi boba-ŋɛ́#ɛ́, iŋɛ́ yèé tse#ɛ́, èmi ní tsɛ̃̀tsɛ̃̀ wáa dzíkɔ̀ ɖíɖɔ̃̀ fú ŋɛ́ ti nára-Yèésù Kírísítò kélékélé, tsí è gbàá gbɔ́#ɛ́. 16Ńbɛ̀ɛ́, è dzàre ɖé, ńǹrɔ́-kíbí ìlò-mi wà, tsí è wà rí#ɛ́, ɛ̀ŋɛ gbo, è náa kɛ́ ìlò-mi bɛ́ɛ̀. 17Náàtsùgbée bɛ́ɛ̀ ní ǹ bɛ Tìmɔ̀té wá fú ŋɛ́#ɛ́. Tìmɔ̀té#ɛ́ dzɛ́ ɔma-àrínódzú-mi, tsí ǹ karalé si ńǹtá‐ɛ̀. Náa tsitsɛ́-Ɔlá-wa gbo. Ńbɛ̀ɛ́, bí ó wá, ńǹrɔ́-kíbí ǹ wà tɛ̀ náànyì-Yèésù Kírísítò Ɔlá-wa gbà#á, nákó tédzú ŋɛ́ ńnɛ̀ kpó. Tsí ɛ̀kɔ́ yèé mà tse fúnɛ nɛ́gbɛ́-Kírísítò ŋa gbo wérí kpó#ɛ́, nákó fɔ̀ɔ́ fú ŋɛ́.

18Ɔ̀nyà kã̀ŋa òŋu wà náàŋírĩ-ŋɛ́, tsí à wà kɛ́ ara-ŋa, tsí wà tsèsérè kíbí ɛnɛ yèé fɔ̀ ní ǹ kàkó tɔ́ sɛ̃̀ wá ńɖi-ŋɛ́ bɛ́ ró yí. 19Ó ɖi, bí Ɔlɔ́dzɔ́ dzɛ́, màa sɛ̃̀ wá ńɖi-ŋɛ́ nára-ɔdzɔ́. Tsí bí ǹ wá#á, afɔ̀ yèé ɛnɛ yèé wà kɛ́ ara-ŋa nyɛ̀ŋɛ̀ ŋa#á wà fɔ̀#ɛ́, màa màá. Tsí kò tsi ń ti afɔ̀ fífɔ̀ gé ni, ikpá yèé wà nɔ́wɔ́-ŋa gbo#ɛ́, màa màá. 20Ǹ fɔ̀ bɛ́ɛ̀, iŋɛ́ yèé tse#ɛ́, afɔ̀-oyè-Ɔ̀ɖáyé† òŋu, kò tsi afɔ̀-ká ɖɔ̃ arũ fɔ̀ɔ́ gé ni. Ó ɖi, afɔ̀-ikpá-Ɔ̀ɖáyé ni. 21Báàyí#ɛ́ fe, bí è wà wò ní n wá ńɖi-ŋɛ́ gbà fáà? Ǹ banɛ́ kòtsã́ wáàà? Nàmí è wà wò ní n wá náàmúɖɔ̃̀ òŋu inɔ́ tútù? Yèésí sã̀ fú ŋɛ́ lárè ni?

Currently Selected:

1 Kòríntì ŋa 4: ngl

Highlight

Copy