1 Kòríntì ŋa 1

1Èmi, Kpɔ́lù òŋu ìnàbí-wa Sòtɛ́nì, àwa ní wà tse ìwé yèé bɛ́ fú ŋɛ́#ɛ́. Adzítsɛ́-Yèésù† Kírísítò ní ǹ dzɛ́#ɛ́, iŋɛ́ yèé tse#ɛ́, ó dzɔdzú-Ɔ̀ɖáyé, tsí ó tsã̀ mí ni. 2Àa dzɔ́ wà kí ɛ̀ŋɛ, ɔma-ɛgbɛ́-Ɔ̀ɖáyé yèé ŋa wà ńǹlú-Kòríntì#ɛ́. Ɔ̀ɖáyé gbà ńǹtá-Yèésù† Kírísítò†, tsí tsã̀ ŋɛ́ ní ɛ̀ŋɛ kó dzɛ́ tòŋu akpá akpá, ɛsɛ̀ ɛsɛ̀. Bɛ́ɛ̀ ké ní ó tsã ɛnɛ yèé ŋa gbo kpó gba Yèésù Kírísítò gbɔ́ ńǹɖì ɔ̀kã̀lɔ́ɔ̀kã̀ kpó#ɛ́ ńnɛ̀ɛ́. Yèésù Kírísítò#ɛ́, ó dzɛ́ Ɔlá-ŋa, tsí dzɛ́ Ɔlá tiwa gbo. 3Ɔ̀ɖáyé Boba-wa òŋu Yèésù Kírísítò Ɔlá-wa méèdzì ká tse ore-ɔ̀fɛ́ fú ŋɛ́, tsí ká fú ŋɛ́ ńtútùúrɔ̀ gbo.

Kpɔ́lù wà ɖɔ́kpɛ́ fú Ɔ̀ɖáyé fú ikpá-ɔ̀fɛ́ yèé ŋa ó fú ŋa ńǹrɔ́ǹrɔ́#ɛ́

4Fee, ǹ kà kɔ àrìmáa ɖɔ́kpɛ́ fú Ɔ̀ɖáyé-mi ńǹwèrè ɔ̀kã̀lɔ́ɔ̀kã̀ fú ŋɛ́. Mà wà ɖɔ́kpɛ́ fúu náàtsùgbé-ore-ɔ̀fɛ́ yèé ó gbà ńǹtá-Yèésù Kírísítò, tsí tse fú ŋɛ́#ɛ́. 5Ǹ fɔ̀ bɛ́ɛ̀, iŋɛ́ yèé tse#ɛ́, kíbí Yèésù Kírísítò tse ɔ̀kã̀ntso bá ŋɛ́ si#ɛ́, Ɔ̀ɖáyé tu ikpá-ɔ̀fɛ́ ɔ̀kã̀lɔ́ɔ̀kã̀ kpó bò ŋɛ́ si bùràà. Ó ɖi, ó tse tsí è nyáa wà wíìnyɛ̀, tsí wà ma iŋɛ́ ɔ̀kã̀lɔ́ɔ̀kã̀ gbo kpó òŋu ikpá‐ɛ̀. 6Àa nya àyídzá-òtítɔ́ nára-Kírísítò fú ŋɛ́, tsí ó gba àntã̀ dzokó ńnɔ́-ŋɛ́ kpó kpãŋu si. 7Ńnɛ̀ ní Ɔ̀ɖáyé fú ŋɛ́ ńkpá-ɔ̀fɛ́ ŋa títí ɔ̀kã̀ kpókpó kò wà hã́ ŋɛ́ gìɖì#ɛ́. Ó fú ŋɛ́ ńkpá-ɔ̀fɛ́ ŋa#á bɛ́ɛ̀ ńǹwèrè yèé è wà si báàyí#ɛ́, ńǹwèrè yèé odzú-ŋɛ́ wà nɔ́ɔ̀nà si fú Yèésù Kírísítò Ɔlá-wa ní nákó wáa nya ara‐ɛ̀ ɖíre fúnɛ#ɛ́. 8Ɔ̀ɖáyé nákó tse tsí è nákó dzokó si rìgírìgí títí lɔ ńǹtã̀ntã́, tsí nɔ́dzɔ́ yèé Yèésù Kírísítò Ɔlá-wa nákó wá#á, à kàkó rí íbàɖí-kã̀ kpókpó fɔ̀ nára-ŋɛ́. 9Ɔ̀ɖáyé, ɛnɛ yèé kpè ŋɛ́ ní ɛ̀ŋɛ kó dzɛ́ tòŋu#ɛ́, àkaralé wà ńǹtá‐ɛ̀. Ó kpè ŋɛ́, àtsùgbée ɛ̀ŋɛ Ɔma bíbí‐ɛ̀ Yèésù Kírísítò Ɔlá-wa méèdzì, e wà ɖɔ̃̀ ni.

Ɔma-ɛgbɛ́-Kírísítò ŋa ńǹlú-Kòríntì kò tse ɔ̀kã̀ntso si ró

10Ìnàbí-mi ŋa, ǹ wà gbà ńǹtá-Yèésù Kírísítò Ɔlá-wa, tsí wà fɔ̀ fú ŋɛ́ ní arũ-ŋɛ́ kó wà ɖé. È máa kpɛ̃́ ɛgbɛ́#ɛ́. Ó ɖi, ìsérè-ŋɛ́ ŋa kó wà dzɛ́ ɔ̀kã̀ntso, tsí e wà tse ɔ̀kã̀ntso gbo bí è wò ní e tse iŋɛ́-kã̀. 11Ǹ wà fɔ̀ bɛ́ɛ̀, iŋɛ́ yèé tse#ɛ́, ɛnɛ-kpáfɛ-ìɖá-wa Kòlòwé ŋa fɔ̀ fú mi ní àrã̀-kã̀ wà náàŋírĩ-ŋɛ́ si. 12Àrã̀#á ní wà dzɛ́ ní, ɔ̀nyà kã̀ŋa wà náàŋírĩ-ŋɛ́, tsí wà fɔ̀ ní náànyì-Kpɔ́lù ní àŋa wà#á. Tsí olòmírɛ̃̀ ŋa gbo náa wà fɔ̀ ní náànyì-Àkpòlósì ní àŋa wà#á. Tsí ɔ̀nyà kã̀ŋa gbo náa wà fɔ̀ ró ní náànyì-Òkúta#1:12 Ɛnɛ yèé à wà kpè ní Òkúta ńbíbɛ́#ɛ́, òŋu ké ní à náa kpè ní Kèfásì ńǹlú-ɔma-Ìyúɖà ŋa#á. ní àŋa wà#á. Tsí ɔ̀nyà kã̀ŋa gbo náa tɔ́ wà fɔ̀ ró ní náànyì-Kírísítò ní àŋa gbo, àŋa wà#á. 13Kí wà dzɛ́ bɛ́ɛ̀ ná? È ɖédzú à nákó nyáa kpɛ̃́ Kírísítò#ɛ́ si nɛ́gbɛ́ nɛ́gbɛ́ bɛ́ɛ̀ nàmí bɛ́ fáà? Kpɔ́lù ní à kã̀ si ńǹtá-egi-ìɖáàgàlàdzà† fú ŋɛ́#ɛ́ɛ̀? Nàmí ó ɖɔkpɛ́-Kpɔ́lù ní à fɔ̀ tã́ná ká wìwɛ̀-Yèésù† fú ŋɛ́#ɛ́? 14Ɔ̀ɖáyé kútsɛ́ ní ǹ kò wìwɛ̀-Yèésù fú ɔ̀kã̀-ŋɛ́-kã̀ kpókpó náànyì-Kírísíkpò òŋu Gàyú. 15Ńbɛ̀ɛ́, ɔ̀nyà-kã̀ kpókpó kàkó nyáa fɔ̀ ní: À fɔ̀ ní ó ɖɔkpɛ́-èmi Kpɔ́lù tã́ná à wìwɛ̀-Yèésù fú òŋu. 16Ɛ̀hɛ̃́ɛ̃̀ɛ̃̀, ǹ wà tédzú ní ǹ wìwɛ̀-Yèésù fú ɛnɛ-kpáfɛ-Sètèfánà ŋa gbo. Ó ɖi, ɛnɛ-àtíbɔ̀ ŋa òŋu, ǹ kò ma bí ó tsi ǹ tɔ́ wìwɛ̀-Yèésù fú ɔ̀nyà-kã̀ ró. 17Fee, kò tsi náàtsùgbée n wáa wìwɛ̀-Yèésù fúnɛ gé ní Kírísítò bɛ̀ mí wá#á. Ó bɛ̀ mí wá, àtsùgbée n wáa dzíkɔ̀ ɖíɖɔ̃̀ fúnɛ ni. Tsí ikɔ̀#ɛ́, bí ǹ wà dzɛ́ɛ fúnɛ, kò wà ní n wà lo ifɛ̀ɛ́nɔ́-ɔ̀nyà, tsí ń ɖɔ̃ arũ fúnɛ. Tsí bí ó dzɛ́ bɛ́ɛ̀ ní ǹ wà dzíkɔ̀#ɛ́, ni ǹ wà nya ikpá yèé wà ńnɔ́-ikú yèé Kírísítò kú si ńǹtá-egi-ìɖáàgàlàdzà#á bɔ̀ ńnɛ̀ɛ́.

Ifɛ̀ɛ́nɔ́-Ɔ̀ɖáyé gbà níìkã̀ fú ifɛ̀ɛ́nɔ́-ɔ̀nyà ŋa

18Ìɖéǹɖè#ɛ́, ɛnɛ yèé làkóò nɛ́ɛ̀rá ŋa#á, à wà fɔ̀ ní ikɔ̀ yèé àa wà dzɛ́ ti nára-ikú yèé Kírísítò kú si ńǹtá-egi-ìɖáàgàlàdzà†#á, ó dzɛ́ afɔ̀-éwo kò sí fúnɛ. Ó ɖi, àwa yèé Ɔ̀ɖáyé wà gbà là ŋa#á, afɔ̀-ikpá-Ɔ̀ɖáyé ní ó dzɛ́ si fú àwa òŋu#ɛ́. 19Iŋɛ́ yèé tse#ɛ́, Ɔ̀ɖáyé fɔ̀ si ńǹwé‐ɛ̀ si ní: “Òŋu nákó tse tsí ifɛ̀ɛ́nɔ́-olí-ifɛ̀ɛ́nɔ́ ŋa nákó ra kpó, tsí òŋu nákó gba ìrã̀ã́mà gbo nɔ́wɔ́-olí-ìrã̀ã́mà ŋa, tsí sɔ ŋá ɖi ɔ̀nyà-akpotu.”#1:19 Ìwé-Yèsáyà 29:14 (Ésaïe 29:14) 20Bí ó dzɛ́ bɛ́ɛ̀ ní ó dzɛ́#ɛ́ fe, kí wà nɔ́wɔ́-olí-ifɛ̀ɛ́nɔ́ ŋa, tsí ká fɔ̀ ró? Tsí akɔ́nɛ nɛ́kpa-Ɔ̀ɖáyé† ŋa gbo fe, kí àŋa gbo, à nákó nyáa fɔ̀ ró ni? Tsí ɔma-ìsɛ̃̀ɛ̃́ yèé ŋa ma afɔ̀#ɛ́ gbo fe, kí àŋa gbo, à nákó nyáa fɔ̀ ró? Ɔ̀ɖáyé nyà ɖíre ní ifɛ̀ɛ́nɔ́-ɔ̀nyà-ayé yèé ŋa dzɛ́ iŋɛ́-akpotu. 21Nóòtítɔ́#ɛ́, Ɔ̀ɖáyé gbà ńǹtá-ifɛ̀ɛ́nɔ́‐ɛ̀, tsí tse tsí à kàkó nyáa lo ifɛ̀ɛ́nɔ́-ɔ̀nyà, tsí ń màá. Kíbí ó dzɛ́ bɛ́ɛ̀#ɛ́, Ɔ̀ɖáyé gbà ńǹtá-ikɔ̀ yèé àa wà dzɛ́ fúnɛ, tsí ó dzɔ iŋɛ́-akpotu nódzú-ɔ̀nyà ŋa#á, tsí ń gba ɛnɛ yèé gbàá gbɔ́ ŋa#á là. 22Ɔma-Ìyúɖà† ŋa náa wò ní Ɔ̀ɖáyé kó tse iŋɛ́-àwùsì ŋa, tsí ń nya ikpá‐ɛ̀ ɖíre. Tsí ɛnɛ yèé kò dzɛ́ ɔma-Ìyúɖà ŋa#á gbo náa wò ní àŋa kó lo ifɛ̀ɛ́nɔ́-àŋa, tsí ń ma Ɔ̀ɖáyé. 23Ó ɖi, àwa òŋu, àa wà dzíkɔ̀ fúnɛ ní Kírísítò, ɛnɛ yèé Ɔ̀ɖáyé tsã̀, tsí bɛ̀ wá#á, à kã̀ã́ si ńǹtá-egi-ìɖáàgàlàdzà. Ikɔ̀#ɛ́ ɖi òkúta-àkɔ̀sɛ̀ fú ɔma-Ìyúɖà ŋa, tsí dzɛ́ iŋɛ́-akpotu nódzú-ɛnɛ yèé kò dzɛ́ ɔma-Ìyúɖà ŋa#á gbo. 24Ó ɖi, nódzú-ɛnɛ yèé Ɔ̀ɖáyé kpè ní ká dzɛ́ tòŋu ŋa#á, ɔma-Ìyúɖà ŋa gbo, ɛnɛ yèé kò dzɛ́ ɔma-Ìyúɖà ŋa#á gbo, nódzú-àŋa kpó#ɛ́, Kírísítò ní dzɛ́ ikpá òŋu ifɛ̀ɛ́nɔ́-Ɔ̀ɖáyé#ɛ́. 25Iŋɛ́ yèé tse#ɛ́, iŋɛ́ yèé Ɔ̀ɖáyé tse, tsí ó dzɛ́ iŋɛ́-akpotu nódzú-ɔ̀nyà ŋa#á, iŋɛ́ nyɛ̀ŋɛ̀ dzɛ́ iŋɛ́-ifɛ̀ɛ́nɔ́ láre ifɛ̀ɛ́nɔ́-ɔ̀nyà sã́ŋú sã́ŋú. Bɛ́ɛ̀ ké ní iŋɛ́ yèé Ɔ̀ɖáyé tse, tsí kò nɛ́ àmí nódzú-ɔ̀nyà ŋa#á, iŋɛ́ nyɛ̀ŋɛ̀ gbo nɛ́kpá láre ikpá-ɔ̀nyà sã́ŋú sã́ŋú#ɛ́.

26Ìnàbí-mi ŋa, ɛ̀ŋɛ ká-ŋɛ́ è wo kíbí è wà gbà tã́ná Ɔ̀ɖáyé kpè ŋɛ́ ní ɛ̀ŋɛ kó dzɛ́ tòŋu#ɛ́ káyí! Ɛnɛ yèé ŋa dzɛ́ olí-ifɛ̀ɛ́nɔ́ ńǹrɔ́-kíbí ɔ̀nyà-ayé yèé ŋa náa módzú kpũ̀rã̀ã́ gbà#á, à kò nɔ́ɔ̀kpɔ̀ náàŋírĩ-ŋɛ́. Ɛnɛ yèé ikpá wà nɔ́wɔ́-ŋa#á gbo má nára-ɔ̀nyà lákṹ kɛ̀rɛ̀tsɛ̀ kɛ̀rɛ̀tsɛ̀ ŋa gbo, à kò nɔ́ɔ̀kpɔ̀ náàŋírĩ-ŋɛ́. 27Kà kàa bɛ́ɛ̀, ɛnɛ yèé kà tì dzɔ iŋɛ́-kã̀ kpókpó nódzú-ɔ̀nyà-ìtalɛ̀ bí ŋa#á, àŋa ní Ɔ̀ɖáyé tsã̀, tsí ń ɖánɔ́ mú ɛnɛ yèé ŋa ní àŋa dzɛ́ olí-ifɛ̀ɛ́nɔ́#ɛ́. Tsí ó tsã ɛnɛ yèé ikpá-kã̀ kpókpó kò sí nɔ́wɔ́-ŋa#á gbo, tsí ń ɖánɔ́ mú ɛnɛ yèé ŋa ní àŋa dzɛ́ olí-ikpá#á. 28Ɔ̀ɖáyé tsã ɛnɛ yèé ŋa à kà tì ń kpe iŋɛ́-kã̀, tsí à kà rí si nɔ́ɔ̀nà-kã̀ kpókpó ŋa#á gbo, tsí tse tsí ɛnɛ yèé ŋa ní àŋa dzɛ́ ɔ̀nyà gìɖì gìɖì nódzú-ɔ̀nyà-ìtalɛ̀ bí ŋa#á, à ɖi iŋɛ́-akpotu. 29Ɔ̀ɖáyé tse bɛ́ɛ̀, àtsùgbée ɔ̀nyà-kã̀ kpókpó kó máa wà tse kɛ́rɛ́kɛ́rɛ́ nódzú‐ɛ̀ ni. 30Ó ɖi ɛ̀ŋɛ òŋu, Ɔ̀ɖáyé tse tsí Yèésù Kírísítò tse ɔ̀kã̀ntso bá ŋɛ́ si. Yèésù Kírísítò#ɛ́ ní dzɛ́ ifɛ̀ɛ́nɔ́-Ɔ̀ɖáyé fú wa#á. Ɔ̀ɖáyé gbà ńǹtá‐ɛ̀, tsí gbà wá nɔ́ɔ̀nyà-atsòtítɔ́ nódzú-ara‐ɛ̀, tsí àa dzɛ́ tɛ̀ɛ̀ si akpá akpá, ɛsɛ̀ ɛsɛ̀. Gbà ńǹtá‐ɛ̀ ké ní ó gbà wá dzɔ̀ɔ́ nɔ́wɔ́-Ètsù†#ɛ́. 31Ńbɛ̀ɛ́, àa kó tse kíbí à ti kɔɔ́ si ńǸwé-Ɔ̀ɖáyé† si#ɛ́. À kɔɔ́ si ní: “Bí ɔ̀nyà-kã̀ wà wo kó mú iŋɛ́-kã̀ nya akpá#á, ɛnɛ nyɛ̀ŋɛ̀ kó mú iŋɛ́ yèé Ɔlɔ́dzɔ́ wà tse#ɛ́, tsí ń nya akpá.”#1:31 Ìwé-Yèrèmíyà 9:22-23 (Jérémie 9:22-23)

Currently Selected:

1 Kòríntì ŋa 1: ngl

Highlight

Copy